Sane Ko Ni Baanyɛ Aye Abua Yei Ni Afee Amɛ Niseniianii

Akɛ wiemɔi nɛɛ kpa sane ko ni yɔɔ jw.org lɛ nɔ lɛ hiɛ. Sane lɛ yitso ji, “Yei Ashweshweeshwefeemɔ​—Mɛni Ji Biblia Lɛ Susumɔ Yɛ He?” Kɛ́ okwɛ nakai sane lɛ shishigbɛ lɛ, obaana link ko yɛ jɛmɛ. Kɛ́ okliki nɔ lɛ, obaanyɛ odaunlodi sane lɛ nɔ ni aprintiɔ lɛ, ni oprinti ni okota lɛ ni efee tamɔ trati ni hiɛ baafai ejwɛ. Nakai nyɛmi yoo ko ni yɔɔ United States ni atsɛɔ lɛ Stacy lɛ fee. Ewie akɛ: “Miprinti trati lɛ eko ni mi kɛ nyɛmi yoo ko tee he ko ni yei ni afeɔ amɛ niseniianii lɛ yabaa abo yɛ, ni wɔkɛyahã amɛ.”

Yoo ko ni tsuɔ nii yɛ abobaahe nɛɛ bi ni ahã lɛ trati lɛ eko koni ekɛhã yei ni yɔɔ jɛmɛ lɛ. Enɛ hewɔ lɛ, amɛhã lɛ trati lɛ 40 ni amɛkɛ jw.org kaadi lɛ 30 fata he. Sɛɛ mli be ni nyɛmimɛi lɛ tee jɛmɛ lɛ, yoo ni kwɛɔ jɛmɛ lɛ nɔ lɛ bi amɛ koni amɛbafee bɔ ni amɛkɛ mɛi kaseɔ Biblia lɛ amɛhãa lɛ he nɔkwɛmɔnɔ amɛtsɔɔ yei lɛ.

Stacy kɛ nyɛmimɛi yei enyɔ krokomɛi tee abobaahe kroko hu. Amɛhã mɛi ni tsuɔ nii yɛ jɛmɛ lɛ tratii enumɔ, ni mɛi lɛ bi ni amɛkɛ pii abafata he. Yei ni tsuɔ nii yɛ jɛmɛ lɛ ateŋ mɔ kome wie akɛ: “Trati nɛɛ baaye abua yei ni afee amɛ niseniianii nɛɛ, ni ebaaye abua wɔ hu.” Be ni nyɛmimɛi yei lɛ ku amɛsɛɛ amɛtee lɛ, yei lɛ ateŋ mɛi komɛi bi ni afee bɔ ni akɛ mɛi kaseɔ Biblia lɛ ahãa lɛ he nɔkwɛmɔnɔ atsɔɔ amɛ, ni amɛteŋ mɛi enyɔ kɛɛ amɛbaaba kpee ni abaafee yɛ Maŋtsɛyeli Asa lɛ nɔ nakai otsi lɛ naagbee lɛ.

Stacy wie akɛ: “Eŋɔɔ wɔnaa waa akɛ mɛi lɛ nya sane ni taa mɔ tsuiŋ nɛɛ he. Kɛ́ oprinti eko ni okota lɛ, ehãa efeɔ mlɛo akɛ obaatsɔ no nɔ okɛ yei ni afee amɛ niseniianii lɛ baagba Nyɔŋmɔ Maŋtsɛyeli lɛ he sane. Bɔ ni amɛhere sane lɛ nɔ lɛ ta wɔtsuiŋ waa. Ni wɔle akɛ, Yehowa baajɔɔ mɔdɛŋ ni wɔbɔɔ koni wɔhã yei ni afee amɛ niseniianii ni yɔɔ hei krokomɛi hu lɛ anu sane kpakpa lɛ.”