Nɔ Hewɔ Ni Esa Akɛ Osumɔ Akɛ Ooofee Biblia Mli Nikasemɔ
1 Niiashikpamɔi ni nyɔmɔwoo babaoo yɔɔ mli lɛ ateŋ ekome ji ni Yehowa kɛ Kristofonyo lɛ aaatsu nii ni ekɛye ebua mɔ ko ni ebatsɔ Kristo kaselɔ. (Mat. 28:19, 20; 1 Kor 3:6, 9] Ebaanyɛ etsɔɔ naanɔ wala kɛha mɛi ni wɔyeɔ wɔbuaa amɛ yɛ nɛkɛ gbɛ nɔ lɛ.
2 Wekukpaa ni bɛŋkɛ kpaakpa bakaa tsɔɔlɔ lɛ kɛ mɔ ni atsɔɔ lɛ nii lɛ teŋ. Nikaselɔ lɛ mumɔŋ dalɛ lɛ ji miishɛɛ sane kpele. (1 Tes. 2:11, 19, 20) No hewɔ lɛ, esa akɛ efee oti ni ma Kristofonyo fɛɛ Kristofonyo hiɛ akɛ kɛ hoo lɛ ekɛ mɔ ko ni yɔɔ eweku lɛ sɛɛ afee shia Biblia mli nikasemɔ kome. Ni kɛlɛ, eji gbɛnaa nii ni ka wekuyitso lɛ nɔ akɛ ekɛ lɛ diɛŋtsɛ eweku lɛ afee Biblia mli nikasemɔ daa. Yɛ shiai ni tsɛ lɛ jeee heyelilɔ lɛ, ehe bahiaa ni Kristofonyo nyɛ lɛ ato gbɛjianɔ ni sa ni ekɛ gbekɛbii lɛ akase Biblia lɛ.
NYƐSƆLEA KƐHA NIKASEMƆI
3 Akɛni wɔshɛ shɔŋŋ yɛ naagbee be nɛɛ mli hewɔ lɛ, esa akɛ mɔ fɛɛ mɔ abɔ mɔdɛŋ ni efee Biblia mli nikasemɔi ni woɔ yibii. Daa sɔlemɔ ni wɔɔfee wɔha Yehowa yɛ enɛ gbɛfaŋ lɛ tsɔɔ bɔ ni wɔsumɔɔ yɛ anɔkwayeli fɛɛ mli akɛ wɔɔfee Biblia mli nikasemɔ. Etsɔɔ akɛ wɔnaa wala-kɛ-gbele shihilɛ ni kɔɔ he lɛ. (Ezek. 33:7-9, 14-16) Abaama Yehowa jɔɔmɔ nɔ mi aha wɔ yɛ wɔ mɔdɛŋbɔɔ lɛ mli.—1 Yoh. 5:14, 15.
4 Kɛ wɔɔfee mɛi ni bɔɔ mɔdɛŋ yɛ kaselɔi afeemɔ mli lɛ, belɛ esa akɛ wɔsaa wɔhe jogbaŋŋ. Eyeɔ ebuaa hu kɛ wɔkwɛ ni wɔkase mɛi ni bɔɔ mɔdɛŋ yɛ Biblia kasemɔ feemɔ mli lɛ. Wɔkɛ ŋaawooi ni jɛ nɔkwɛlɔi gbɛfalɔi kɛ mɛi krokomɛi ni eye omanye yɛ kaselɔi afeemɔ mli lɛ aŋɔɔ baaha yɛ nyɔji ni baa nɛɛ amli. Saji sɔrɔtoi ni baatsara nɔ aba lɛ baama ŋaawoi ni anyɛɔ atsuɔ he nii yɛ Biblia kasemɔ shishijee kɛ efeemɔ ni woɔ yibii amli lɛ anɔ mi.
Wɔsɛɛ Be Mli Saji Ni Baaba
5 Mɛni ji saji ni abaasusu he yɛ Bulletin loo wolo nɛɛ mli saji ni baaba yɛ wɔsɛɛ be mli lɛ ekomɛi? Wɔbaawie bɔ ni shiɛlɔi kɛ gbɛgbalɔi sɔrɔtoi eje Biblia kasemɔ shishi kɛ nitsɔɔmɔ gbɛi ni amɛkɛtsu nii ni no ha amɛnine shɛ kaselɔi lɛ atsuii anɔ lɛ ahe. Wɔkɛ ŋaa woo hu baaha yɛ bɔ ni nyɛaafee ni nyɛha amɛna hiɛsɔɔ amɛha Yehowa gbɛjianɔtoo lɛ ni amɛshwe akɛ amɛ hu amɛaana sɔɔmɔ nitsumɔ lɛ mli gbɛfaŋnɔ baaha. Akɛ ŋaawoo ni tsɔɔ bɔ ni ooofee ni oweku Biblia kasemɔ lɛ hu afee nɔ ni shishinumɔ yɔɔ mli babaoo kɛha gbekɛbii lɛ koni amɛkɛ Yehowa teŋ wekukpaa lɛ mli awa bu baaha.
6 Abaptisi gbɔmɛi 959, 834 yɛ jeŋ fɛɛ yɛ sɔɔmɔ afii ejwɛ ni eho nɛɛ amli, ni abaptisi mɛi 8,833 yɛ nakai be lɛ nɔŋŋ mli yɛ maŋ nɛɛ mli. Gbɔmɛi nɛɛ ateŋ mɛi ni fa ji mɛi ni shɛ baptisimɔ he kɛtsɔ yelikɛbuamɔ ni mɔ ko ni kɛ amɛ feɔ Biblia mli nikasemɔ lɛ kɛha amɛ lɛ nɔ. Bɔ ni abaa Kaimɔ lɛ yeli shishi ahaa lɛ tsɔɔ akɛ mɛi pii yɛ ni abaanyɛ aye abua amɛ ni amɛshwere kɛyashɛ baptisimɔ he. Kɛ wɔtee nɔ yɛ mɔdɛŋ ni wɔbɔɔ koni wɔkɛ gbɔmɛi ni tamɔ nɛkɛ aje Biblia lɛ kasemɔ shihilɛ mli lɛ, wɔbaanyɛ wɔye wɔbua mɛi babaoo ni amɛbatsɔmɔ kaselɔi koni yɛ naagbee lɛ amɛna naanɔ wala mli ŋɔɔmɔ.—1 Tim. 6:12, 19.