Sanebimɔ He
● Mɛni hewɔ esa akɛ wɔkwɛ wɔ atadewoo kɛ hesaamɔ jogbaŋŋ yɛ be mli ni wɔyaa ni wɔyasara Asafo lɛ nitsumɔ he niji ni yɔɔ jeŋ fɛɛ lɛ eko lɛ?
Aakpa Kristofoi agbɛ akɛ amɛ su kɛ baŋ baafee nɔ ni yɔɔ fɛo. Esa akɛ wɔ atadewoo kɛ hesaamɔ yɛ be fɛɛ mli lɛ afee nɔ ni sa ni woo yɔɔ mli ni sa kɛha Yehowa Nyɔŋmɔ tsuji. Enɛ ji anɔkwale, titri lɛ yɛ be mli ni wɔyasaraa Betel shia lɛ. Agbɛnɛ hu asumɔɔɔ ni abaa akɛ aaba ni abasara Betelnyo ko yɛ teemɔŋ, ja sane ko ni he hiaa ni esa akɛ Betelnyo pɔtɛɛ lɛ ale he nɔ ko aloo ohiɛ shɛɛ sane ko ni he hiaa waa kɛha lɛ. Wɔhiɛnɔkamɔ ji akɛ shihilɛ ni wɔyɔɔ mli bianɛ lɛ baatsake koni nibii ahi aha wɔ, ni kɛ eba lɛ nakai lɛ, wɔbaahere bo atuu kɛ oba akɛ ooba ni obasara Betel. Yɛ be mli ni ewieɔ atadewoo kɛ hesaamɔ ni sa he lɛ, Organized to Accomplish Our Ministry wolo lɛ wie gbɔmɔtsoŋ hetsemɔ kɛ atadewoo kɛ hesaamɔ kɛ hiɛshikamɔ he yɛ be mli ni akɛ he ewo sɔɔmɔ nitsumɔ lɛ mli kɛ Kristofoi akpeei ni ayaa lɛ. Kɛkɛ ni ewie yɛ baafa 131 kuku 2 akɛ: “Nakai nɔŋŋ eji kɛ ooya ni oyasara Betel shia ni yɔɔ Brooklyn lɛ loo Asafo lɛ nitsumɔ he niji lɛ eko. Kaimɔ akɛ, gbɛi Betel lɛ shishi ji ‘Nyɔŋmɔ shia,’ no hewɔ lɛ esa akɛ wɔ atadewoo kɛ hesaamɔ kɛ jeŋba atamɔ nɔ ni ataoɔ yɛ wɔdɛŋ lɛ nɔŋŋ yɛ be mli ni wɔyaa kpeei kɛha mɔ yɛ Maŋtsɛyeli Asa lɛ nɔ lɛ.”
Bɔfo Paulo kɛɛ “akɛ wɔ efee nikwɛmɔ nii aha je lɛ kɛ ŋwɛibɔfoi kɛ gbɔmɛi.” (1 Kor. 4:9) No hewɔ lɛ esa akɛ wɔ atadewoo kɛ hesaamɔ ana hewalɛ kpakpa yɛ mɛi krokomɛi anɔ yɛ bɔ ni amɛsusuɔ Yehowa anɔkwale jamɔ he amɛhaa lɛ he. Shi ayɔse akɛ kɛ nyɛmimɛi hii kɛ yei komɛi miiba ni amɛbasara Asafo lɛ nitsumɔ he niji lɛ ekomɛi lɛ, anaa akɛ amɛhesaamɔ loo atadewoo shɛɛɛ. Atadewoo ni tamɔ nɛkɛ esaaa kɛ aaya ayaaara nitsumɔ he niji lɛ. Wɔmiisumɔ ni wɔhiɛ taomɔ nii ni nɔ kwɔlɔ ni haa ayɔseɔ Nyɔŋmɔ webii akɛ esoro amɛ yɛ je lɛ he lɛ nɔŋŋ mli yɛ nɛkɛ sane nɛɛ kɛ wɔ Kristofoi ashihilɛi krokomɛi fɛɛ hu mli, kɛtsɔ nibii fɛɛ ni wɔɔfee ni wɔkɛwo Nyɔŋmɔ hiɛ nyam lɛ nɔ. (Rom. 12:2; 1 Kor. 10:31) Ehi hu akɛ wɔɔwie wɔtsɔɔ mɛi ni wɔkɛ amɛ kaseɔ Biblia lɛ kɛ mɛi krokomɛi ni ekolɛ amɛbaaya ni amɛyasara Asafo lɛ ninumɔ he niji lɛ eko yɛ klɛŋklɛŋ be mli kwraa lɛ ni wɔkai amɛ bɔ ni ehe hiaa akɛ amɛaaha amɛhiɛ ahi atadewoo kɛ hesaamɔ ni sa nɔ lɛ nɔ.
No hewɔ lɛ kɛ ooya ni oyasara Asafo lɛ nitsumɔ hei lɛ, bi ohe akɛ: ‘Ani mikɛ hiɛshikamɔ ewo atade ni misaa mihe nakai nɔŋŋ lo?’ (Mika 6:8) Ani ewieɔ Nyɔŋmɔ ni mijaa lɛ lɛ he ekpakpa? Ani bɔ ni mipueɔ mihaa lɛ baagbala mɛi krokomɛi ajwɛŋmɔ aloo eeewo amɛ mlila? Ani miito okadi kpakpa miiha mɛi krokomɛi ni baaya ayasara jɛmɛ klɛŋklɛŋ kwraa lɛ?’ Eba akɛ wɔkɛ wɔ atadewoo kɛ hesaamɔ aaawula “Nyɔŋmɔ ni wɔyiwalaherelɔ lɛ tsɔɔmɔ lɛ yɛ nibii fɛɛ mli.”—Tito 2:10.