Wɔ Bɔlɔ Kpeteŋkpele lɛ Susuɔ Wɔhe!
1 Beni Yehowa bɔɔ mɔdɛŋ koni ekɛ Israel ni toi egbo lɛ asusu saji ahe lɛ, ebi akɛ: “Ani oleee, ani onuko? naanɔ Nyɔŋmɔ lɛ, Yehowa ni bɔ shikpɔŋ lɛ naagbeehei lɛ.” (Yes. 40:28) Wɔle wɔ-Bɔlɔ Kpeteŋkpele lɛ, ni wɔnaa bɔ ni ejɛɔ suɔmɔ mli ekwɛɔ wɔnɔ lɛ. Shi kɛlɛ, mɛi akpekpei akpei abɔ jeɔ shihilɛ mli ni eyɔɔ lɛ he ŋwane loo amɛhiɛ susumɔ ko yɛ ehe ni kɛ nɔ ni anaa yɛ Biblia lɛ mli lɛ kpãaa gbee. Te wɔɔfee tɛŋŋ wɔye wɔbua amɛ?
2 Ato wolo hee ni ji Is There a Creator Who Cares About You? lɛ he gbɛjianɔ koni akɛye abua gbɔmɛi ni tamɔ nakai. Ehaa gbɔmɛi ni susuɔ nii ahe lɛ susuɔ anɔkwalei lɛ ahe. Esa akɛ wolo lɛ mli saji ni ŋɔɔ lɛ kɛ bɔ ni enyɛɔ ekɔneɔ mɔyiŋ lɛ akanya mɛi ni kaneɔ lɛ.
3 Lé Creator Wolo lɛ Mli Saji: Hã emli saji ni ato naa lɛ ahi ojwɛŋmɔ mli. Yitsei 2 kɛyashi 5 lɛ gbaa bɔ ni jeŋ muu lɛ, wala, kɛ gbɔmɔ ba shihilɛ mli kɛ nɔ ni kɛ enɛ ba lɛ he sane. Yitsei 6 kɛyashi 9 lɛ pɛiɔ Biblia lɛ kɛ e-Ŋmalɔ lɛ mli, ni titri lɛ, kɛji akɛ abaanyɛ akɛ he afɔ̃ Mose Klɛŋklɛŋ Wolo lɛ mli amaniɛbɔɔ ni kɔɔ adebɔɔ he lɛ nɔ lo. Yitso 10 lɛ kɛ sanebimɔi ni haoɔ mɔ waa lɛ ateŋ ekome ni gbɔmɔ biɔ lɛ hetoo ni haa mɔ tsui nyɔɔ emli haa: “Kɛ Bɔlɔ lɛ susuɔ wɔhe lɛ, mɛni hewɔ amanehulu efa babaoo nɛkɛ?”
4 Bɔɔ Mɔdɛŋ ni Okɛ Mɛi ni Jeɔ Ŋwane lɛ Asusu Saji Ahe: Creator wolo lɛ baafai 78-79 lɛ kɛ saji ni asusu he ni obaanyɛ okɛtsu nii ni okɛye obua mɛi krokomɛi koni amɛkɛmu saji anaa yɛ gbɛ ni ja nɔ yɛ Nyɔŋmɔ he lɛ haa. Bi amɛ akɛ: “Ani jeŋ muu lɛ yɛ shishijee?” Mɛi babaoo baakpɛlɛ nɔ akɛ nakai eji. Kɛ nakai eji lɛ, bi akɛ: “Ani nakai shishijee lɛ diɛŋtsɛ ba loo nɔ ko kɛba?” Mɛi babaoo yɔseɔ akɛ nɔ ko kɛba. Enɛ kɛ naagbee sanebimɔ lɛ baa: “Ani nɔ ko ni hiɔ shi daa ji nɔ ni kɛ jeŋ muu lɛ fɛɛ shishijee lɛ ba, loo Mɔ ko ni hiɔ shi daa ji mɔ ni kɛba?” Gbɛ ni tamɔ enɛ baanyɛ aha mɛi babaoo ana akɛ esa akɛ Bɔlɔ ko ahi shi.
5 Creator wolo lɛ ji wolo diɛŋtsɛ ni he hiaa mɛi babaoo. Gbaa emli saji otsɔɔ owekumɛi, nanemɛi nitsulɔi, nanemɛi skulbii, kɛ mɛi krokomɛi ni ole lɛ. Hiɛmɔ kɛya shiɛmɔ bɔni afee ni onyɛ okɛha mɛi ni okɛkpeɔ ni jeɔ shihilɛ mli ni Nyɔŋmɔ yɔɔ lɛ he ŋwane lɛ. Babaoo ni wɔleɔ nɛkɛ wolo nɛɛ mli saji lɛ, babaoo ni suɔmɔ ni wɔyɔɔ kɛha wɔ-Bɔlɔ lɛ baaji, ni ebaatsirɛ wɔ koni wɔya nɔ wɔnyiɛ yɛ eshishitoo mlai ni nɔ kwɔlɔ lɛ kɛ gbeekpãmɔ naa.—Efe. 5:1; Kpoj. 4:11.