“Afii Akpe Hee Lɛ—Mɛni Yɔɔ Wɔsɛɛ Be Kɛha Bo?”
1 Nakai sanebimɔ lɛ ehi gbɔmɛi ni yɔɔ shikpɔŋ nɔ he fɛɛ he lɛ ajwɛŋmɔi amli. Eyɛ mli akɛ adesai enyɛ efee nibii babaoo yɛ afii ohai abɔ ni eho lɛ amli moŋ, shi aha gbɔmɛi anine enyɛ shi ejaakɛ naagbai ni eba adesai anɔ afii akpei abɔ lɛ kã he eyɛ lolo. (Hiob 14:1; Lala 90:10) Nɛgbɛ adesai baanyɛ aná heyeli kɛjɛ?
2 Wɔbaaná hegbɛ krɛdɛɛ ko akɛ wɔɔha wɔnanemɛi lɛ nakai sanebimɔ lɛ hetoo yɛ October kɛ November nyɔji lɛ amli. Yɛ mɛɛ gbɛ nɔ? Kɛtsɔ Maŋtsɛyeli Sanekpakpa No. 36 lɛ jaa nɔ. Eyitso ji “Afii Akpe Hee Lɛ—Mɛni Yɔɔ Wɔsɛɛ Be Kɛha Bo?” Wɔkɛ Buu-Mɔɔ kɛ Awake! woji tɛtrɛbii lɛ baaha yɛ October klɛŋklɛŋ fã lɛ mli. Kɛkɛ lɛ, kɛjɛ Ju, October 16 aahu kɛyashi Sohaa November 17 lɛ, wɔkɛ wɔhe baawo Maŋtsɛyeli Sanekpakpa No. 36 lɛ jaa mli waa diɛŋtsɛ. Wɔbaagbala wɔjwɛŋmɔ kɛma Maŋtsɛyeli Sanekpakpa No. 36 lɛ nɔ yɛ otsii lɛ amli gbii lɛ anɔ yɛ tafaa nɛɛ mli. Yɛ otsii lɛ anaagbeei lɛ, wɔkɛ no kɛ woji tɛtrɛbii heei lɛ baaha.
3 Ani Obaaná Mli Gbɛfaŋnɔ Waa? Onukpai, asafoŋ sɔɔlɔi, kɛ gbɛgbalɔi baasumɔ koni amɛnyiɛ hiɛ yɛ tafaa nɛɛ mli, akɛni amɛji mɛi ni nyiɛɔ nitsumɔ lɛ hiɛ lɛ hewɔ. Shiɛlɔi babaoo etsake amɛshihilɛi amli koni amɛkɛ amɛhe awo gbɛgbalɔi awalɔ nitsumɔ lɛ mli yɛ nyɔji enyɔ ni akɛjaa lɛ mli loo yɛ emli ekome mli. Mɛi krokomɛi toɔ gbɛjianɔ koni amɛtsɛ waa fe daa nɛɛ yɛ shiɛmɔ nitsumɔ lɛ mli.
4 Asafo Woloŋ Nikasemɔ nɔkwɛlɔi baanyɛ atsu nii waa yɛ mɛi fɛɛ ni yɔɔ amɛkuu lɛ mli lɛ hewalɛwoo mli koni amɛná Maŋtsɛyeli Sanekpakpa No. 36 lɛ jaa mli gbɛfaŋnɔ waa. Ekolɛ shiɛlɔi komɛi yɛ ni kɛ amɛhe wooo shiɛmɔ nitsumɔ lɛ mli dɔŋŋ. Esa akɛ onukpai lɛ ayasara mɛnɛɛmɛi koni amɛna nɔ ni amɛbaanyɛ amɛfee ni amɛkɛye amɛbua amɛ. Ekolɛ amɛbaanyɛ amɛto gbɛjianɔ koni shiɛlɔ ni he esa afata mɔ fɛɛ mɔ ni ekpa shiɛmɔyaa lɛ he yɛ shiɛmɔ nitsumɔ lɛ mli yɛ nyɔji nɛɛ amli. Maŋtsɛyeli Sanekpakpa No. 36 lɛ he shiɛmɔ wiemɔ kuku baanyɛ afee nɔ̃ pɛ ni he hiaa koni akɛha shiɛlɔi nɛɛ abɔi shiɛmɔyaa ekoŋŋ.
5 Enɛ hu baanyɛ afee hegbɛ kpakpa kɛha Biblia mli nikaselɔi ni eshwɛ fioo amɛbaagbe Nilee wolo lɛ kasemɔ naa lɛ ni amɛhe esa akɛ shiɛlɔi ni abaptisiko amɛ lɛ koni amɛbɔi shiɛmɔyaa. Gbekɛbii po baanyɛ aná nitsumɔ ni yɔɔ miishɛɛ nɛɛ mli gbɛfaŋnɔ jogbaŋŋ.
6 Shiɛmɔ wiemɔ kuku ko ji nɔ̃ pɛ ni he hiaa. Obaanyɛ okɛɛ akɛ:
◼ “Mikɛ mibe eha koni mikɛye mibua kɛja shɛɛ sane ni he hiaa waa nɛɛ maha weku fɛɛ weku yɛ [maŋtiase loo maŋ lɛ gbɛi]. Onɔ̃ lɛ nɛ. Ofainɛ kanemɔ.” Ekolɛ ebaafee nɔ ni sɛɛnamɔ yɔɔ he akɛ ahiɛŋ odaseyeli baagi pɛmpɛoo loo baagi beni ajaa Maŋtsɛyeli Sanekpakpa No. 36 lɛ.
7 Shiɛmɔyaa He Kpeei ni Ato He Gbɛjianɔ Jogbaŋŋ: Esa akɛ onukpai lɛ akwɛ koni gbɛjianɔ fɛɛ ni atoɔ kɛhaa odaseyeli lɛ afee nɔ ni sa kɛ nɔ ni anyɛɔ akɛtsuɔ nii. Esa akɛ shiɛmɔ nitsumɔ nɔkwɛlɔ lɛ titri akwɛ koni aná shia-kɛ-shia kɛ shikpɔŋkukuji babaoo ni abaatsu nii yɛ mli bɔni afee ni mɔ fɛɛ mɔ anyɛ aná nitsumɔ lɛ mli gbɛfaŋnɔ kɛmɔ shi. Kɛ eeehi lɛ, esa akɛ ato kpeei kɛha shiɛmɔyaa he gbɛjianɔ otsi lɛ mli gbi fɛɛ gbi, kɛha otsii lɛ anaagbeei, kɛ agbɛnɛ daa gbɛkɛ. Abaanyɛ ato gbɛjianɔ hu koni akpe hulushinyɔɔ mli koni skul nikaselɔi, nitsulɔi ni amɛnitsumɔ bei tsakeɔ, kɛ mɛi krokomɛi aná he sɛɛ.
8 Nɔ ni Abaafee yɛ Mɛi ni Bɛ Shia Ahe: Oti ni ma wɔhiɛ ji akɛ esa akɛ wɔkɛ shiabii pii awie bɔ ni wɔɔnyɛ. Kɛ mɔ ko kwraa bɛ shia beni otee lɛ, ŋmaa adrɛs lɛ ni oya jɛmɛ gbi lɛ mli be kroko. Kɛ beni aaashɛ tafaa lɛ naagbee otsi lɛ mli ni onine shɛko shiabii nɛɛ anɔ lolo lɛ, obaanyɛ oshĩ Maŋtsɛyeli Sanekpakpa No. 36 lɛ eko oha amɛ yɛ he ni mɛi ni hoɔ lɛ enaŋ. Nyɛ asafo lɛ mli onukpai lɛ baakɛɛ asafo lɛ koni amɛshĩ Maŋtsɛyeli Sanekpakpa No. 36 lɛ ekome yɛ shiai ni mɛi bɛ mli lɛ kɛ́ no ji amɛ klɛŋklɛŋ jɛmɛ yaa beni amɛtsuɔ nii yɛ akrowai kɛ hei ni shikpɔŋkukuji babaoo yɔɔ ni abaanyɛ atsu fɛɛ mli nii yɛ tafaa lɛ mli lɛ.
9 Nyɛhaa Wɔtsua Nii Waa Diɛŋtsɛ! Esa akɛ asafoi lɛ abɔ mɔdɛŋ koni amɛtsu amɛshikpɔŋkuku lɛ fɛɛ mli nii dani tafaa lɛ aba naagbee yɛ November 17. Kɛ nyɛ shikpɔŋkuku lɛ da saŋŋ lɛ, ekolɛ shiɛlɔi komɛi pɛ baatsu nii yɛ he ni ebaahi nakai feemɔ yɛ kɛ he ni yɔɔ shweshweeshwe. Abaanyɛ akɛ gbɛjianɔtoo nɛɛ atsu nii koni nine ashɛ mɛi babaoo ni sa lɛ anɔ bɔ ni aaanyɛ yɛ gbɛ ni waaa nɔ. Kwɛmɔ koni oŋmala mɛi fɛɛ ni yɔɔ he miishɛɛ lɛ ahe saji jogbaŋŋ. Abaanyɛ akɛ niiashikpamɔi ni ŋɔɔŋɔi amaje Asafo lɛ kɛtsɔ onukpai lɛ anɔ.
10 Esa akɛ onukpai lɛ atsɔ hiɛ ale woji tɛtrɛbii krokomɛi ni ehe baahia asafo lɛ koni amɛshɛ nakai yibɔ lɛ. Ehe ehiaaa ni ashɛ Maŋtsɛyeli Sanekpakpa No. 36 lɛ, akɛni akɛ efalɛ ko miimaje asafo fɛɛ asafo hewɔ. Gbɛgbalɔi krɛdɛɛi, daa gbɛgbalɔi kɛ gbɛgbalɔi awalɔi baaná ekomekomei 200 ni amɛbaaja yɛ be mli ni asafoŋ shiɛlɔi baaná ekomekomei 40. No hewɔ lɛ, ani ofee klalo kɛ ekãa akɛ obaatsu nii waa diɛŋtsɛ yɛ nitsumɔ krɛdɛɛ nɛɛ mli? Kwɛ bɔ ni eji hegbɛ ni wɔná akɛ wɔɔha wɔnanemɛi lɛ fɛɛ ale nɔ ni Nyɔŋmɔ ewo shi akɛ ekɛbaaba yɛ wɔsɛɛ be ni etsɛŋ ni ebaaba lɛ mli lɛ!