Sane ni he hiaa fe fɛɛ ni Biblia lɛ wieɔ he ji Nyɔŋmɔ Maŋtsɛyeli lɛ. Yehowa baatsɔ nakai Maŋtsɛyeli lɛ nɔ ehã nɔ hewɔ ni ebɔ shikpɔŋ lɛ aba mli. Mɛni ji Maŋtsɛyeli nɛɛ? Te wɔfeɔ tɛŋŋ wɔleɔ akɛ eeye nɔ bianɛ lɛ? Mɛni Maŋtsɛyeli lɛ efee momo? Ni mɛni ebaafee wɔsɛɛ? Abaahã sanebimɔi nɛɛ hetoo yɛ nikasemɔ nɛɛ kɛ nikasemɔi enyɔ ni baanyiɛ sɛɛ lɛ amli.

1. Mɛni ji Nyɔŋmɔ Maŋtsɛyeli lɛ? Namɔ ji e-Maŋtsɛ?

Maŋtsɛyeli nɛɛ ji nɔyeli ko ni Yehowa Nyɔŋmɔ to shishi. Yesu Kristo, ni ji nɔyeli nɛɛ Maŋtsɛ lɛ, yeɔ nɔ kɛjɛɔ ŋwɛi. (Mateo 4:​17; Yohane 18:​36) Biblia lɛ wie Yesu he akɛ: “Ebaaye . . . Maŋtsɛ kɛya naanɔ.” (Luka 1:​32, 33) Yesu, ni ji Nyɔŋmɔ Maŋtsɛyeli lɛ Maŋtsɛ lɛ, baaye mɔ fɛɛ mɔ ni yɔɔ shikpɔŋ lɛ nɔ lɛ nɔ.

2. Namɛi baafata Yesu he kɛye nɔ?

Mɛi komɛi baafata Yesu he kɛye nɔ. Mɛi ni jɛ ‘weku fɛɛ weku kɛ wiemɔ fɛɛ wiemɔ kɛ gbɔmɛi srɔtoi fɛɛ kɛ jeŋmaŋ fɛɛ jeŋmaŋ mli baaye shikpɔŋ lɛ nɔ akɛ maŋtsɛmɛi.’ (Kpojiemɔ 5:​9, 10) Mɛi enyiɛ baafata Kristo he kɛye nɔ? Kɛjɛ be ni Yesu ba shikpɔŋ lɛ nɔ kɛbashi amrɔ nɛɛ, mɛi akpekpei abɔ ebatsɔmɔ esɛɛnyiɛlɔi. Ani amɛ fɛɛ amɛbaafata ehe kɛye nɔ? Dabi. Amɛteŋ mɛi 144,000 pɛ baaya ŋwɛi ni amɛyafata Yesu he kɛye nɔ. (Kanemɔ Kpojiemɔ 14:​1-4.) Kristofoi krokomɛi fɛɛ ni baashwɛ yɛ shikpɔŋ lɛ nɔ lɛ, baatsɔmɔ Maŋtsɛyeli lɛ shishi bii.​—Lala 37:29.

3. Mɛni hewɔ Nyɔŋmɔ Maŋtsɛyeli lɛ hi kwraa fe adesai anɔyelii lɛ?

Kɛ́ nɔyelɔi ni ji adesai bɔ mɔdɛŋ akɛ amɛbaafee nibii kpakpai po lɛ, amɛnyɛŋ amɛfee nɔ fɛɛ nɔ ni amɛsumɔɔ akɛ amɛfee lɛ. Ni bei komɛi lɛ, nɔyelɔi ni bayeɔ amɛsɛɛ lɛ fóɔ amɛ pɛ amɛnɔ mli, ni amɛsumɔɔɔ ni amɛwaa maŋbii lɛ. Shi Yesu, ni ji Nyɔŋmɔ Maŋtsɛyeli lɛ Nɔyelɔ lɛ, kome too baaye nɔ daa. Nyɔŋmɔ eto “maŋtsɛyeli ko ni anyɛŋ hiɛ akpãtã lɛ shishi.” (Daniel 2:​44) Yesu baaye shikpɔŋ muu lɛ fɛɛ nɔ, ni ekɛ mɔ fɛɛ mɔ baaye jogbaŋŋ, ekwɛŋ hiɛiaŋ. Yesu sumɔɔ mɔ, emli hi, ni eyeɔ jalɛ sane, ni ebaatsɔɔ mɛi ni amɛ hu amɛsumɔ mɛi, amɛmli ahi, ni amɛye jalɛ sane.​—Kanemɔ Yesaia 11:9.

4. Nɔyeli ko ni yɔɔ hewalɛ waa baaye shikpɔŋ muu lɛ fɛɛ nɔ

Yesu Kristo yɛ hewalɛ kwraa fe nɔyelɔi ni ji adesai lɛ. Nyɛkanea Mateo 28:​18 lɛ, ni nyɛsusua sanebimɔ nɛɛ he:

• Mɛɛ gbɛ nɔ Yesu nɔyeli lɛ hi kwraa fe nɔyelɔi ni ji adesai lɛ anɔ lɛ?

Bei pii lɛ, atsakeɔ nɔyelɔi ni ji adesai lɛ, ni amɛteŋ mɔ fɛɛ mɔ yeɔ shikpɔŋ lɛ fã ko pɛ nɔ. Ni Nyɔŋmɔ Maŋtsɛyeli lɛ hu? Nyɛkanea Daniel 7:​14 lɛ, ni nyɛsusua sanebimɔi nɛɛ ahe:

• Mɛni hewɔ ehi waa akɛ ‘akpãtãŋ Nyɔŋmɔ Maŋtsɛyeli lɛ hiɛ’ lɛ?

• Mɛni hewɔ ehi waa akɛ ebaaye shikpɔŋ muu lɛ fɛɛ nɔ lɛ?

5. Esa akɛ akɛ nɔyeli kroko abaye adesai anɔyelii anajiaŋ

Mɛni hewɔ esa akɛ Nyɔŋmɔ Maŋtsɛyeli lɛ abaye adesai anɔyelii anajiaŋ lɛ? Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.

VIDIO: Mɛni Ji Nyɔŋmɔ Maŋtsɛyeli Lɛ?​—Vidio Lɛ Fã Ko (1:41)

• Mɛɛ yibii adesai anɔyelii ewo?

Nyɛkanea Jajelɔ 8:9 lɛ, ni nyɛsusua sanebimɔi nɛɛ ahe:

• Kɛ́ okwɛ lɛ, esa akɛ Nyɔŋmɔ Maŋtsɛyeli lɛ abaye adesai anɔyelii anajiaŋ? Mɛni hewɔ okɛɔ nakai?

6. Nyɔŋmɔ Maŋtsɛyeli lɛ yɛ nɔyelɔi ni nuɔ wɔ shishi

Yesu, wɔ-Maŋtsɛ lɛ, bahi shi akɛ gbɔmɔ, hewɔ lɛ, ebaanyɛ ‘enu wɔgbɔjɔmɔi lɛ ahe ehã wɔ.’ (Hebribii 4:​15) Yehowa ji mɔ ni halaa hii kɛ yei anɔkwafoi 144,000 ni baafata Yesu he kɛye nɔ lɛ, kɛjɛɔ “weku fɛɛ weku kɛ wiemɔ fɛɛ wiemɔ kɛ gbɔmɛi srɔtoi fɛɛ kɛ jeŋmaŋ fɛɛ jeŋmaŋ mli.”​—Kpojiemɔ 5:9.

• Ani le ni ole akɛ, Yesu kɛ mɛi fɛɛ ni baafata ehe kɛye nɔ lɛ ehi shi pɛŋ akɛ adesai lɛ, shɛjeɔ omii? Mɛni hewɔ okɛɔ nakai?

7. Nyɔŋmɔ Maŋtsɛyeli lɛ yɛ mlai ni hi kwraa fe adesai anɔyelii lɛ anɔ

Adesai anɔyelii woɔ mlai ní amɛsusuɔ akɛ ebaabu amɛshishi bii lɛ ahe ni amɛbaaná he sɛɛ hu. Nyɔŋmɔ Maŋtsɛyeli lɛ hu yɛ mlai ni esa akɛ eshishi bii lɛ aye nɔ. Nyɛkanea 1 Korintobii 6:​9-11 lɛ, ni nyɛsusua sanebimɔi nɛɛ ahe:

• Kɛ́ mɔ fɛɛ mɔ ye mlai ni Nyɔŋmɔ ewo lɛ anɔ lɛ, kɛ́ okwɛ lɛ, te je lɛŋ shihilɛ baafee tɛŋŋ?a

• Kɛ́ okwɛ lɛ, eja gbɛ akɛ Yehowa baakpa gbɛ akɛ Maŋtsɛyeli lɛ shishi bii lɛ aye mlai nɛɛ anɔ? Mɛni hewɔ okɛɔ nakai?

• Mɛni tsɔɔ akɛ mɛi ni yeee mlai nɛɛ anɔ lɛ baanyɛ atsake?​—Kwɛmɔ kuku 11 lɛ.

EMLI OTI

Nyɔŋmɔ Maŋtsɛyeli lɛ ji nɔyeli diɛŋtsɛ ni yɔɔ ŋwɛi, ni ebaaye shikpɔŋ muu lɛ fɛɛ nɔ.

Mɛni Okase?

• Namɛi ji Nyɔŋmɔ Maŋtsɛyeli lɛ nɔyelɔi lɛ?

• Mɛni hewɔ Nyɔŋmɔ Maŋtsɛyeli lɛ hi kwraa fe adesai anɔyelii lɛ?

• Mɛɛ nibii komɛi Yehowa kpaa gbɛ akɛ Maŋtsɛyeli lɛ shishi bii lɛ baafee?

EHE SAJI KROKOMƐI

Obaana nɔ ni Yesu wie yɛ he ni Maŋtsɛyeli lɛ yɔɔ lɛ he.

“Ani Nyɔŋmɔ Maŋtsɛyeli lɛ yɛ Otsui Mli?” (jw.org lɛ nɔ sane)

Mɛni hewɔ Yehowa Odasefoi naa akɛ, anɔkwa ni amɛbaaye Nyɔŋmɔ Maŋtsɛyeli lɛ he hiaa fe anɔkwa ni amɛbaaye adesai anɔyeli ko lɛ?

Amɛfiɔ Nyɔŋmɔ Maŋtsɛyeli Lɛ Sɛɛ (1:43)

Obaana nɔ ni Biblia lɛ ewie yɛ mɛi 144,000 lɛ ni Yehowa halaa ni amɛyafata Yesu he kɛye nɔ lɛ ahe.

“Namɛi Baaya Ŋwɛi?” (jw.org lɛ nɔ sane)

Mɛni hã yoo ko ni awo lɛ tsũŋ lɛ yiŋ tsɔ akɛ Nyɔŋmɔ pɛ ji mɔ ni baahã aye jalɛ sane yɛ jeŋ fɛɛ lɛ?

“Mina Mɔ Ni Baahã Aye Jalɛ Sane Yɛ Jeŋ Fɛɛ” (Awake!, November 2011)

Yesu kɛɛ esaaa akɛ esɛɛnyiɛlɔi lɛ ‘fataa je lɛ he.’ (Yohane 15:​19) Enɛ tsɔɔ akɛ wɔfiɔ Nyɔŋmɔ Maŋtsɛyeli lɛ pɛ sɛɛ, wɔkɛ wɔhe wooo je lɛŋ saji amli, ni wɔfiii mɔ ko sɛɛ yɛ saji nɛɛ amli. Akɛ nɔkwɛmɔnɔ lɛ, wɔkɛ wɔhe wooo pɔlitis mli, ni kɛ́ aawu ta lɛ, wɔkɛ wɔhe wooo mli ni wɔfiii kuu ko sɛɛ hu. Yɛ anɔkwale mli lɛ, enɛ feemɔ bɛ mlɛo. Mɛi baanyɛ aye wɔhe fɛo yɛ no hewɔ. Te wɔɔfee tɛŋŋ wɔhã ana akɛ wɔfiɔ Nyɔŋmɔ Maŋtsɛyeli lɛ pɛ sɛɛ, ni wɔyeɔ Yehowa anɔkwa?

1. Te anɔkwa Kristofoi naa adesai anɔyelii amɛhãa tɛŋŋ?

Kristofoi buɔ adesai anɔyelii lɛ. Wɔboɔ Yesu toi ni ‘wɔkɛ Kaisare nibii hãa Kaisare,’ ni tsɔɔ akɛ, wɔyeɔ maŋ lɛ mlai anɔ. Eko ji akɛ, wɔwoɔ toi ni abiɔ ni wɔwo lɛ. (Marko 12:​17) Biblia lɛ tsɔɔ akɛ, adesai anɔyelii ni yeɔ nɔ lɛ, Yehowa ji mɔ ni eŋmɛ amɛ gbɛ ni amɛyeɔ nɔ lɛ. (Romabii 13:1) Enɛ hewɔ lɛ, wɔle akɛ hegbɛ ni adesai anɔyelii yɔɔ lɛ yawaa he ko. Wɔheɔ wɔyeɔ akɛ, wɔ-Nyɔŋmɔ lɛ kɛ eŋwɛi Maŋtsɛyeli lɛ pɛ ni baanyɛ atsu adesai anaagbai lɛ ahe nii.

2. Te wɔɔfee tɛŋŋ wɔhã ana akɛ wɔfiɔ Nyɔŋmɔ Nɔyeli lɛ pɛ sɛɛ?

Wɔkɛ wɔhe wooo pɔlitis mli tamɔ Yesu fee lɛ nɔŋŋ. Be ni mɛi komɛi na naakpɛɛ nii ko ni Yesu fee, ni amɛka akɛ amɛbaawó lɛ maŋtsɛ yɛ shikpɔŋ lɛ nɔ lɛ, ekpɛlɛɛɛ amɛ. (Yohane 6:​15) Mɛni hewɔ? Ejaakɛ sɛɛ mli lɛ ewie akɛ, “mi-Maŋtsɛyeli lɛ jɛɛɛ je nɛɛ mli.” (Yohane 18:​36) Wɔ, ni ji Yesu sɛɛnyiɛlɔi lɛ, wɔhãa anaa yɛ gbɛi srɔtoi anɔ akɛ, wɔfiɔ Nyɔŋmɔ Nɔyeli lɛ pɛ sɛɛ. Akɛ nɔkwɛmɔnɔ lɛ, wɔyaaa ta. (Kanemɔ Mika 4:3.) Wɔjieɔ bulɛ kpo wɔtsɔɔ maŋ okadii​—tamɔ aflaŋaa nɛkɛ​—​shi wɔkɛ woo ni wɔkɛhãa Nyɔŋmɔ lɛ hãaa okadii nɛɛ. (1 Yohane 5:​21) Wɔfiii paati ko loo mɔ ko ni miibi ni afɔ̃ oshiki ahã lɛ lɛ sɛɛ, ni wɔwieee wɔshiii amɛ hu. Wɔtsɔɔ gbɛi nɛɛ kɛ ekrokomɛi anɔ wɔhãa anaa akɛ, wɔfiɔ Nyɔŋmɔ Nɔyeli lɛ, ni ji e-Maŋtsɛyeli lɛ, pɛ sɛɛ.

KASEMƆ PII OFATA HE

3. Anɔkwa Kristofoi kɛ amɛhe wooo je nɛŋ saji amli

Yesu kɛ esɛɛnyiɛlɔi lɛ fee nɔkwɛmɔnɔ kpakpa amɛfɔ̃ shi amɛhã wɔ. Nyɛkanea Romabii 13:​1, 5-7 kɛ 1 Petro 2:​13, 14 lɛ. No sɛɛ lɛ, jiemɔ VIDIO lɛ ni nyɛsusua sanebimɔi ni nyiɛ sɛɛ nɛɛ ahe.

VIDIO: Anɔkwa Kristofoi Kɛ Amɛhe Wooo Maŋ Saji Amli​—Fã 1 (4:28)

• Mɛni hewɔ esa akɛ wɔkɛ woo ahã adesai anɔyelii lɛ?

• Mɛɛ nibii komɛi kɛ́ wɔfee lɛ etsɔɔ akɛ wɔmiiba wɔhe shi wɔmiiwo amɛshishi?

Kɛ́ aawu ta lɛ, ekolɛ maji komɛi baakɛɛ akɛ amɛwuŋ eko, shi amɛwaa mɛi ni wuɔ ta lɛ. Kɛ́ eba lɛ nakai lɛ, mɛni esa akɛ anɔkwa Kristofoi afee? Nyɛkanea Yohane 17:​16 lɛ. No sɛɛ lɛ, jiemɔ VIDIO lɛ ni nyɛsusua sanebimɔ ni nyiɛ sɛɛ nɛɛ he.

VIDIO: Anɔkwa Kristofoi Kɛ Amɛhe Wooo Maŋ Saji Amli​—Fã 2 (3:11)

• Te wɔɔfee tɛŋŋ wɔhã ana akɛ wɔkɛ wɔhe wooo maŋ saji amli?

Kɛ́ amralofoi lɛ kɛɛ ofee nɔ ko ni teɔ shi ewoɔ Nyɔŋmɔ mla lɛ hu? Nyɛkanea Bɔfoi 5:​28, 29 lɛ. No sɛɛ lɛ, jiemɔ VIDIO lɛ ni nyɛsusua sanebimɔi ni nyiɛ sɛɛ nɛɛ ahe.

VIDIO: Anɔkwa Kristofoi Kɛ Amɛhe Wooo Maŋ Saji Amli​—Fã 3 (1:18)

• Kɛ́ amralofoi lɛ kɛɛ wɔfee nɔ ko, shi eteɔ shi ewoɔ Nyɔŋmɔ mla lɛ, namɔ toi esa akɛ wɔbo?

• Ani ole shihilɛi komɛi amli ni Kristofoi boŋ amralofoi lɛ toi?

4. Yɛ wɔnifeemɔ kɛ wɔjwɛŋmɔ mli

Nyɛkanea 1 Yohane 5:​21 lɛ. No sɛɛ lɛ, jiemɔ VIDIO lɛ ni nyɛsusua sanebimɔi ni nyiɛ sɛɛ nɛɛ ahe.

VIDIO: Nɔ Hewɔ Ni Esa Akɛ Anɔkwa Kristofoi Aná Ekãa​—Dani Amɛfiŋ Afã Ko Sɛɛ (2:49)

• Mɛni hewɔ Ayenge kpɛ eyiŋ akɛ ekɛ ehe dɔmɔŋ paati ko, ni ekɛ ehe woŋ maŋ hedɔɔ nifeemɔ ko kwraa hu mli, tamɔ aflaŋaa ŋamɔ nɛkɛ lɛ?

• Kɛ́ okwɛ lɛ, nilee yɛ yiŋ ni ekpɛ lɛ mli?

Mɛɛ shihilɛi krokomɛi amli kɛ́ wɔkwɛɛɛ ni ahi lɛ, wɔkɛ wɔhe baawo je lɛŋ saji amli? Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.

VIDIO: Nɔ Ni Mikase Kɛjɛ Buu-Mɔɔ Lɛ Mli​—Okɛ Ohe Akawo Maŋ Saji Amli Yɛ Jeŋ Fɔŋ Nɛɛ Mli (5:16)

• Kɛ́ maŋ ko kɛ maŋ kroko miishĩ akaŋ yɛ shwɛmɔ ko mli lɛ, te ooofee tɛŋŋ otsɔɔ akɛ ofiii amɛteŋ mɔ ko sɛɛ?

• Kɛ́ amralofoi lɛ kpɛ yiŋ ko ni ye wɔ awui loo wɔná he sɛɛ po lɛ, mɛni wɔbaanyɛ wɔfee kɛtsɔɔ akɛ wɔkɛ wɔhe wooo maŋ saji amli?

• Kɛ́ daa nɛɛ wɔkwɛɔ loo wɔkaneɔ pɔlitis he saji, loo wɔkɛ mɛi ni fɔɔ pɔlitis he wiemɔ bɔɔ lɛ, mɛɛ gbɛ nɔ ebaanyɛ ená wɔnɔ hewalɛ?

EMLI OTI

Kristofoi kwɛɔ jogbaŋŋ koni amɛkɛ amɛhe akawo pɔlitis kɛ maŋ saji amli yɛ amɛwiemɔ, amɛnifeemɔ, kɛ amɛjwɛŋmɔ mli.

Mɛni Okase?

• Mɛɛ nibii esa akɛ wɔfee wɔhã amralofoi lɛ?

• Mɛni hewɔ wɔkɛ wɔhe wooo pɔlitis kɛ maŋ saji amli lɛ?

• Mɛɛ shihilɛi amli kɛ́ wɔkwɛɛɛ ni ahi lɛ, wɔkɛ wɔhe baawo pɔlitis kɛ maŋ saji amli?

EHE SAJI KROKOMƐI

Mɛɛ nibii ekolɛ ehe baahia ni wɔkɛshã afɔle bɔ ni afee ni wɔkɛ wɔhe akawo pɔlitis kɛ maŋ saji amli?

Yehowa Kwako Wɔ Kɔkɔɔkɔ (3:14)

Mɛni wekui baanyɛ afee kɛsaa amɛhe amɛto koni amɛkɛ amɛhe akawo pɔlitis kɛ maŋ saji amli?

Okɛ Ohe Akawo Maŋ Saji Amli Yɛ Skul Kɛ Hei Krokomɛi (4:25)

Mɛni hewɔ mɔ ko maŋ ni ebaafã he lɛ jeee hegbɛ ni fe fɛɛ ni ebaanyɛ ená lɛ?

“Nyɔŋmɔ Nyɛɔ Nii Fɛɛ Efeɔ” (5:19)

Obaana bɔ ni obaafee okpɛ oyiŋ yɛ nitsumɔ he bɔ ni baahã oya nɔ ofee mɔ ni fataaa je lɛ he.

“Mɔ Fɛɛ Mɔ Aaatere Lɛ Diɛŋtsɛ Ejatsu” (Buu-Mɔɔ, March 15, 2006)