“Nyɛwoa Nyɔŋmɔ Tawuu Nii lɛ Fɛɛ”

KRISTOFOI ni wo tawuu nii? Mɛni hewɔ esa akɛ amɛkɛ tawuu atade ni tamɔ nɛkɛ awula amɛhe? Ani amɛjeee mɛi ni sumɔɔ toiŋjɔlɛ? (2 Timoteo 2:24) Hɛɛ, amɛsumɔɔ toiŋjɔlɛ. Ni kɛlɛ, anɔkwa Kristofoi fɛɛ kɛ amɛhe ewo tawuu ko mli​—nɔ ni jeee akɛ amɛmiibɔ mɔdɛŋ ni amɛgbe mɛi, shi moŋ ni amɛye kunim.

Eji Satan tseee atua kulɛ, tawuu ni tamɔ nɛkɛ he ebahiaŋ. Shi etse atua, ni elaka Adam kɛ Hawa koni amɛbafata ehe yɛ etuatsemɔ lɛ mli. Kɛjɛ no nɔ kɛbaa nɛɛ, jeŋ gbɛjianɔtoo ni eba lɛ ka “mɔ fɔŋ,” Satan Abonsam hewalɛ mli. (1 Yohane 5:19) Esa akɛ mɛi ni baa amɛhe shi amɛhaa Jeŋ Muu Fɛɛ Nɔyelɔ ni sa, Yehowa lɛ, ate shi amɛwo hewalɛ ni je lɛ kɛ enɔyelɔ lɛ naa yɛ amɛnɔ lɛ. Esa akɛ amɛwuu amɛha amɛmumɔŋ shihilɛ. Yɛ enɛ hewɔ lɛ, awoɔ Kristofoi aŋaa akɛ: “Nyɛwoa Nyɔŋmɔ tawuu nii lɛ fɛɛ, koni nyɛnyɛ Abonsam ŋaatsɔɔi lɛ anaa nyɛdamɔ.”​—Efesobii 6:⁠11.

Tawuu Nii Lɛ

Kadimɔ akɛ “Nyɔŋmɔ tawuu nii lɛ fɛɛ” he miihia wɔ, kɛ wɔɔfee mɛi ni ebu amɛhe jogbaŋŋ. Belɛ nyɛhaa wɔkwɛa nɛkɛ tawuu nii nɛɛ fai lɛ fɛɛ eko taakɛ bɔfo Paulo tsɔɔ mli lɛ, ni agbɛnɛ wɔkɛ anɔkwayeli aŋmɛ wɔ diɛŋtsɛ wɔhe wɔkwɛ koni wɔkwɛ akɛ ani wɔwula wɔhe jogbaŋŋ kɛha mumɔŋ tawuu lɛ lo.​—Efesobii 6:​14-17.

“No hewɔ lɛ nyɛdamɔa shi, ni nyɛkɛ anɔkwale afia nyɛhɛ.” (Efesobii 6:14a) Yɛ Biblia bei amli lɛ, asraafoi kɛ mlifiinii ni elɛɛmɔ shɛɔ waotalɔi ekpaa fiɔ amɛmli. Nɛkɛ mlifiinii nɛɛ yeɔ buaa ni ebuɔ hɛ he. Kɛ asraafonyo fi emlifiinii nɛɛ kpɛŋŋ lɛ, no tsɔɔ akɛ esaa ehe kɛha tawuu.

Belɛ kwɛ bɔ ni esa jogbaŋŋ ha ákɛ akɛ ŋwɛi anɔkwale lɛ aaato asraafonyo mlifiinii he! Enɛ tsɔɔ jogbaŋŋ akɛ esa akɛ wɔha Nyɔŋmɔ anɔkwa wiemɔ lɛ abɛŋkɛ wɔ kpaakpa, tamɔ akɛ no efimɔ wɔ. Esa akɛ wɔsusu shishiumɔ ni yɔɔ Nyɔŋmɔ Wiemɔ lɛ mli lɛ he waa. Enɛ baabu wɔhe kɛjɛ amale kɛ shishiumɔ ni akɛaalaka wɔ lɛ he. Agbɛnɛ Yehowa daaŋ wiemɔi lɛ hu baafi wɔsɛɛ ni ewo wɔ hewalɛ yɛ mumɔŋ ni ewaje wɔ emuuyeli mlihiɛmɔ lɛ.

“Ni nyɛwoa jalɛ dama lɛ.” (Efesobii 6:14b) Asraafonyo dama lɛ buɔ egbɔmɔtso lɛ henɔ ko ni he hiaa waa he​—tsui lɛ. Belɛ jalɛ buɔ wɔtsui he yɛ mumɔŋ tawuu nii ni Nyɔŋmɔ kɛha lɛ mli. Yɛ Ŋmalɛ naa lɛ, tsui lɛ ji bɔ ni wɔji yɛ mligbɛ lɛ he okadi ni sa​—wɔ henumɔi, susumɔi, kɛ yiŋtoi. Akɛni Biblia lɛ hu tsɔɔ akɛ tsui lɛ sumɔɔ ni efee efɔŋ hewɔ lɛ, ehe miihia waa ni wɔna faishitswaa ko akɛ wɔɔkpɛtɛ Yehowa jalɛ taomɔ nii ahe. (Yeremia 17:⁠9) Esaaa akɛ toiboo ni aaafee aha Nyɔŋmɔ lɛ feɔ osato kponɔgbɛ nifeemɔ ko, shi moŋ esa akɛ eba kɛjɛ mligbɛ. Enɛ biɔ ni wɔna jalɛ nifeemɔ he suɔmɔ ni mli wa kɛ nyɛɛ ni mli wa nakai nɔŋŋ wɔha mlakwamɔ. (Lala 45:⁠8) Kɛkɛ lɛ abaabu wɔtsui he.

“Ni nyɛkɛ hejɔlɛ sanekpakpa lɛ he saamɔ-kɛ-too awoa nyɛnaji.” (Efesobii 6:15) Ani okɛwo onaji yɛ nɛkɛ gbɛ nɔ? Ani onaji nɛɛ kɛ bo yaa sɔɔmɔ nitsumɔ lɛ nɔ koni oyajaje sanekpakpa lɛ? Ani oobɔ mɔdɛŋ ni oha oshiɛmɔ kɛ nitsɔɔmɔ nitsumɔi lɛ hilɛ aya hiɛ? Eji anɔkwale akɛ shikpɔŋkukuji lɛ ekomɛi wooo yibii. Aŋkroaŋkroi komɛi baanyɛ afee shikpilikpii, mɛi ni nɔ ko jeee amɛhe sane ko, loo mɛi ni teɔ shi woɔ wɔ po. Wɔ shiɛmɔ lɛ kɛ yiwaa po baaba wɔnɔ. Shi kɛ Kristofoi mia amɛhiɛ lɛ, amɛnaa tsuishiŋmɛɛ, su ko ni buɔ mɔ he kɛjɛɔ Satan tutuamɔi amli. Eyɛ mli akɛ awa Paulo yi moŋ, shi kɛlɛ eji shiɛlɔ ni yɔɔ ekãa, ni ewoɔ wɔ hewalɛ akɛ ‘wɔɔkase lɛ, tamɔ bɔ ni lɛ hu ekase Kristo lɛ.’​—1 Korintobii 11:⁠1.

Maŋtsɛyeli-shiɛmɔ nitsumɔ lɛ ni wɔkɛ wɔhe aaawo mli vii lɛ wajeɔ wɔhekɛnɔfɔɔ yɛ sanekpakpa lɛ mli. Agbɛnɛ ehaa Yehowa mumɔ lɛ tsuɔ nii kɛtsɔɔ wɔnɔ yɛ esuɔmɔnaa nifeemɔ he nitsumɔ mli. Yɛ anɔkwale mli lɛ, nitsumɔ ni tamɔ nɛkɛ feɔ wɔ ŋwɛibɔfoi lɛ ananemɛi nitsulɔi​—kɛ Yehowa Nyɔŋmɔ diɛŋtsɛ po. (1 Korintobii 3:9; Kpojiemɔ 14:⁠6) Ni kɛ wɔyɛ ‘babaoo feemɔ yɛ Nuŋtsɔ lɛ nitsumɔ lɛ mli lɛ,’ ehaa ‘wɔfiɔ shi ni wɔgbugbaaa.’ (1 Korintobii 15:58) Mɛɛ hebuu ni yɔɔ naakpɛɛ enɛ kɛhaa wɔ nɛkɛ!

“Nyɛhiɛa hemɔkɛyeli tsɛŋ ni da lɛ mli. (Efesobii 6:​16, New World Translation) Blema bei amli asraafonyo lɛ kɛ tsɛŋ ni da buɔ ehe kɛjɛɔ akpɔlɔi kɛ gaimlibii ahe. Kɛ ekɛ tsɛŋ tsuuu nii lɛ, abaanyɛ apila lɛ waa loo agbe lɛ kwraa po. Kristofoi kɛ tawuu nii ni oshara yɔɔ he kwraa fe enɛ miikpe​—“mɔ fɔŋ lɛ gaimlibii ni tsoɔ lɛ.” Nɔ ni fata enɛɛmɛi ahe ji Satan nibii fɛɛ ni ekutsuɔ nii koni ekɛgbɔjɔ wɔhemɔkɛyeli ni ekɛgbe wɔ yɛ mumɔŋ lɛ. Nɔ ni fata he ji yiwaa, amalei, jeŋ nilee ni lakaa mɔ, heloo gbɛfaŋ nibii ni lakaa mɔ, kɛ kaa koni akɛ he awo bɔlɛnamɔ jeŋba shara mli. Bɔni afee ni wɔbu wɔhe kɛjɛ enɛɛmɛi fɛɛ he lɛ, tsɛŋ ni da he miihia wɔ. Wɔnyɛŋ wɔshi wɔ gbɔmɔtso lɛ fa ko ni jɛmɛ kã efolo.

Abraham kɛ eŋa, Sara, na hemɔkɛyeli ni mli wa. Beni amɛfo fɔmɔ po lɛ, amɛna hemɔkɛyeli yɛ Nyɔŋmɔ shiwoo mli akɛ amɛbaafɔ seshi ko. Yɛ sɛɛ mli lɛ, Abraham jie hemɔkɛyeli ni ekaaa kpo beni ebo tsɛmɔ akɛ ekɛ ebi Isak asha afɔle lɛ toi, ebi koome ni ekɛ Sara ni esumɔɔ lɛ lɛ fɔ lɛ lɛ. Yehowa tsi Abraham gbɛ, ni ekɛ afɔleshaa nɔ kroko to najiaŋ. Shi Abraham efee klalo momo akɛ eeefee toiboo. Mɛni hewɔ? Ejaakɛ eyɛ hemɔkɛyeli ni yeɔ emuu akɛ Yehowa baanyɛ atee ebinuu lɛ shi ni eha shiwooi ni kɔɔ ehe lɛ aba mli.​—Romabii 4:​16-21; Hebribii 11:​11, 12, 17-19.

Mose hu na hemɔkɛyeli ni he hiaa wɔ lɛ eko. Ekpoo Mizraim jwetrii, ni ehala moŋ akɛ ekɛ Nyɔŋmɔ webii aaana yiwaa mli amanehulu. Mɛni hewɔ? Ejaakɛ ena hemɔkɛyeli akɛ Yehowa yɛ ni ekɛ yiwalaheremɔ baaba abaha lsraelbii lɛ. Bɔ ni Mose hemɔkɛyeli mli wa ha sɔŋŋ hewɔ lɛ, etee nɔ “emɔ Mɔ ni anaaa lɛ lɛ mli tamɔ nɔ ni eena lɛ.”​—​—Hebribii 11:​6, 24-27.

Ani wɔyɛ hemɔkɛyeli ni tamɔ nakai yɛ Yehowa mli? Ani bɔ ni wekukpaa ni ka wɔkɛ Yehowa teŋ lɛ bɛŋkɛ kpaakpa ha hewɔ lɛ etamɔ nɔ ni wɔmiina lɛ? Ani wɔmiisumɔ ni wɔsha afɔle fɛɛ ni wɔɔnyɛ loo ni wɔŋmɛ wɔtsui shi yɛ piŋmɔi amli koni wɔhiɛ wekukpaa ni ka wɔkɛ Nyɔŋmɔ teŋ lɛ mli? Ani wɔyɛ hemɔkɛyeli ni yeɔ emuu kwraa yɛ Yehowa mli? (Hebribii 11:⁠1) Kɛji nakai ni lɛ, no lɛ Satan gaimlibii ni tsoɔ lɛ nyɛŋ agbu gbɛ kɛtsɔ wɔ hemɔkɛyeli tsɛŋ lɛ mli.

“Ni walaheremɔ dadefai lɛ hu nyɛbua” (Efesobii 6:17a) Asraafonyo dadefai lɛ buɔ eyitso he, no hewɔ lɛ ebuɔ ansɔ lɛ​—henɔ ni kudɔɔ henumɔ kɛ susumɔ lɛ he. Kristofonyo yiwalaheremɔ hiɛnɔkamɔ lɛ tamɔ dadefai ejaakɛ ebuɔ jwɛŋmɔ lɛ he. Áfee Kristofonyo jwɛŋmɔ lɛ ehee kɛtsɔ anɔkwa nilee nɔ, shi eka he eji mɔ aŋkro ni he waaa ni yeee emuu lɛ nɔ̃. (Romabii 7:​18; 12:⁠2) Kɛ wɔŋmɛ jwɛŋmɔ lɛ gbɛ ni susumɔi ni he tseee ni fiteɔ hemɔkɛyeli ni je nɛɛ mumɔ lɛ kɛbaa bote mli lɛ, hekɛnɔfɔɔ ni wɔyɔɔ yɛ yiwalaheremɔ mli lɛ baakwa ni yɛ naagbee lɛ ebaagbo. Shi yɛ gbɛ kroko nɔ lɛ, kɛ wɔŋɔ Nyɔŋmɔ wiemɔi ni wajeɔ mɔ lɛ wɔwo wɔjwɛŋmɔ mli daa lɛ, wɔhiɛnɔkamɔ lɛ baaya nɔ ahi shi akɛ nɔ ni kpɛlɛɔ kaŋkaŋ ni mli tse keŋkeŋ. Ani obuɔ oyiwalaheremɔ dadefai lɛ kpɛŋŋ be fɛɛ be?

“Mumɔŋ klante ni ji Nyɔŋmɔ wiemɔ lɛ.” (Efesobii 6:17b) Wiemɔ, akɛ hefamɔ ni hi fe fɛɛ lɛ ji ni okɛ tawuu mli hegbɛ ni ooona lɛ atsu nii lɛ, ji anɔkwale yɛ Kristofoi atawuu mli. Beni wɔnaji, ni wɔkɛ toiŋjɔlɛ he sanekpakpa lɛ ewula lɛ lɛ kɛ wɔ yaa mɛi ni heee yeee lɛ ateŋ lɛ, wɔyaaa akɛ mɛi ni bɛ tawuu nii ko. Nyɔŋmɔ Wiemɔ, ni ji Biblia lɛ tsuɔ nii akɛ klante ni naa ba waa ni folɔɔ mumɔŋ amalei kɛ susumɔi ni ejaaa lɛ ni eyeɔ ebuaa mɛi ni tsui ja lɛ koni amɛna mumɔŋ heyeli.​—Yohane 8:​31, 32.

Yesu tsɔɔ bɔ ni tawuu nii nɛɛ he wa ha, beni ekɛ Satan Abonsam bɔi mpleshii lɛ. Beni aka lɛ yɛ ŋa lɛ nɔ lɛ, Yesu fa ehe yɛ Satan tutuamɔi etɛ he kɛtsɔ Nyɔŋmɔ Wiemɔ lɛ ni ekɛtsu nii yɛ gbɛ ni mɔɔ shi jogbaŋŋ nɔ, akɛ: “Aŋma akɛ.” (Mateo 4:​1-11) Kɛ wɔkase bɔ ni akɛ klante nɛɛ tsuɔ nii kɛ hesaa lɛ, wɔbaanyɛ wɔye wɔbua mɛi ni he jɔ lɛ ni amɛye amɛhe kɛjɛ Satan hewalɛ lɛ shishi. Agbɛnɛ hu, asafoŋ onukpai kɛ Nyɔŋmɔ Wiemɔ lɛ tsuɔ nii ni amɛkɛbuɔ tooi lɛ ahe kɛjɛɔ aŋkroaŋkroi ni baasumɔ ni amɛfite mɛi ni he waaa lɛ ahemɔkɛyeli lɛ ahe.​—Bɔfoi lɛ Asaji 20:​28-30.

Asraafonyo lɛ hesaa yɛ klante kɛ nitsumɔ mli lɛ baaa yɛ gbɛ ni yɔɔ mlɛo nɔ. Tsɔsemɔ kɛ be kakadaŋŋ kɛ ekasemɔ yɛ henɔjɔɔmɔ mli he miihia koni anyɛ akɛtsu nii yɛ ŋaalee mli. Nakai nɔŋŋ hu yɛ mumɔŋ tawuu mli lɛ, eheɔ nikasemɔ babaoo kɛ ekɛ nitsumɔ yɛ sɔɔmɔ lɛ mli dani mɔ lɛ atsɔ mɔ ni kɛ Nyɔŋmɔ Wiemɔ lɛ tsuɔ nii yɛ hesaa mli. Nyɛhaa wɔkɛ mɔdɛŋ fɛɛ ni he hiaa lɛ awoa mli koni wɔtsɔmɔ mɛi ni fɔ̃ɔ klante yɛ mumɔŋ kɛ hesaa, mɛi ni nyɛɔ “amɛjaa anɔkwale wiemɔ lɛ mli pɛpɛɛpɛ.”​—2 Timoteo 2:⁠15.

Nyɛhiɛa Sɔlemɔ Mli daa, Nyɛdamɔa Shi Shiŋŋ

Wɔ mumɔŋ tawuu nii lɛ mli nibii lɛ fɛɛ he miihia kɛha emuuyeli mli ni wɔɔhiɛ wɔha Nyɔŋmɔ. Shi te wɔɔfee tɛŋŋ wɔwo tawuu nii nɛɛ be fɛɛ be? Biblia lɛ kasemɔ daa, Kristofoi akpeei ni atsɔɔ hiɛ asaa he ahaa, agbɛnɛ sane toiboo kpakpa kɛ he ni akɛwoɔ mli baaye abua wɔ ni wɔwo tawuu nii lɛ be fɛɛ be. (2 Timoteo 3:​16; Hebribii 10:​24, 25) Sɔɔmɔ nitsumɔ lɛ ni wɔkɛ wɔhe aaawo mli kɛ ekãa kɛ Kristofoi anaanyobɔɔ kpakpa hu baaye abua wɔ koni wɔha wɔ mumɔŋ tawuu nii ni wɔkɛbuɔ wɔhe ni wɔkɛtutuaa mɔ lɛ ahi shihilɛ kpakpa mli.​—Abɛi 13:​20; Romabii 15:​15, 16; 1 Korintobii 15:⁠33.

Jwɛŋmɔ kpakpa ni wɔɔna hu he miihia. Wɔkaŋmɛ gbɛ ni je nɛŋ nibii ni yɔɔ fɛo lɛ mligbala wɔjwɛŋmɔ. Shi moŋ, nyɛhaa ‘wɔshihilɛ afea kuku.’ (Mateo 6:​19-24, NW) Esa akɛ wɔsumɔ jalɛnifeemɔ ni wɔnyɛ mlakwamɔ yɛ Yesu Kristo kasemɔ mli. (Hebribii 1:⁠9) Enɛɛmɛi fɛɛ yeɔ ebuaa wɔ ni wɔhaa mumɔŋ tawuu nii ni Nyɔŋmɔ kɛha wɔ lɛ hiɔ wɔhe daa.

Yɛ be mli ni Paulo ewie mumɔŋ tawuu nii lɛ eko fɛɛ eko he egbe naa lɛ, emu sane lɛ naa akɛ: “Ni nyɛkɛ sɔlemɔ kɛ faikpamɔ fɛɛ asɔlea daa yɛ mumɔ mli, ni enɛ nɔŋŋ hewɔ lɛ nyɛsaraa, ni nyɛkaa he daa nyɛkpaa fai nyɛhaa krɔŋkrɔŋ bii lɛ fɛɛ.” (Efesobii 6:18) Asraafoi anɔkwafoi lɛ kɛ asraafoi anitsumɔ he yitso lɛ yeɔ sharamɔ be fɛɛ be ni amɛboɔ famɔi atoi. Akɛ asraafoi Kristofoi lɛ, ehe miihia ni wɔkɛ Yehowa Nyɔŋmɔ, wɔ Jeŋ Muu Fɛɛ Maŋtsɛ lɛ aye sharamɔ be fɛɛ be, kɛtsɔ Yesu Kristo, ‘etatsɛnukpa kpele kɛha majimaji akui’ lɛ nɔ. (Yesaia 55:​4, NW) Abaanyɛ afee enɛ, jeee kɛtsɔ hiɛaŋhiɛaŋ sɔlemɔ ko nɔ, shi moŋ kɛtsɔ sɔlemɔ ni jɛ tsuiŋ ni tsɔɔ tsakpaa ni bɛŋkɛ kpaakpa kɛ he ni atu aha Yehowa nɔ. Kɛ wɔkɛ Yehowa ye sharamɔ loo wɔkɛ lɛ gba sane daa lɛ, wɔnine shɛɔ hewalɛ ni wajeɔ wɔ daa gbi yɛ tawuu lɛ mli lɛ nɔ.

Yesu kɛɛ: “Miye je lɛ nɔ kunim.” (Yohane 16:33) Yehowa hu miisumɔ ni wɔtsɔmɔ kunimyelɔi. Beni bɔfo Paulo gbele bɛŋkɛɔ lɛ, enyɛ ekɛɛ akɛ: “Ta kpakpa lɛ miwuu; foidamɔ lɛ, mida migbe naa; hemɔkɛyeli lɛ, mihiɛ mli tswɛ” (2 Timoteo 4:⁠7) Eba akɛ wɔɔnyɛ wɔwie wiemɔi ni tamɔ nakai nɔŋŋ yɛ wɔ gbɛfaŋ nɔ ni wɔnaa yɛ tawuu lɛ mli lɛ mli. Kɛ wɔmiisumɔ enɛ diɛŋtsɛ lɛ, no lɛ nyɛhaa “wɔdamɔa shi shiŋŋ wɔshia Abonsam ŋaatsɔɔi lɛ” kɛtsɔ tawuu nii ni jɛ Nyɔŋmɔ ŋɔɔ lɛ fɛɛ ni wɔɔha ahi wɔhe lɛ nɔ.​—Efesobii 6:​11, NW.