Fó Mɛi Krokomɛi Anɔ̃ Mli—Kɛtsɔ Oshiɛmɔ Wiemɔ lɛ Mli ní Oootsake lɛ Nɔ
1 Bɔfo Paulo fee nɔkwɛmɔnɔ fɛfɛo efɔ shi eha wɔ yɛ bɔ ni etsakeɔ sanekpakpa lɛ mli be fɛɛ be koni ekɔ etoibolɔi lɛ ashihilɛ kɛ amɛsusumɔ he lɛ mli. (1 Kor. 9:19-23) Esa akɛ wɔbɔ mɔdɛŋ ni wɔfee nakai nɔŋŋ. Kɛ́ wɔtsɔ hiɛ wɔsusu nii ahe lɛ, wɔbaanyɛ wɔha saji ni yɔɔ Wɔ Maŋtsɛyeli Sɔɔmɔ lɛ mli lɛ akɔ mɛi ni yɔɔ wɔshikpɔŋkuku lɛ mli lɛ ashihilɛ he bei pii. Be mli ni wɔbɛŋkɛɔ shinaa ko naa lɛ, ekolɛ wɔbaana okadii komɛi ni tsɔɔ nibii ni shiatsɛ lɛ nyáa he, ní wɔha wɔshiɛmɔ wiemɔ lɛ akɔ nibii nɛɛ ahe. Shi kɛlɛ, gbɛ kroko hu yɛ ni wɔbaanyɛ wɔtsɔ nɔ wɔtsake wɔshiɛmɔ wiemɔ lɛ mli.
2 Ha Ekɔ Nɔ ni Shiatsɛ lɛ Kɛɔ lɛ He: Kɛ wɔkɛ sanekpakpa lɛ miiha lɛ, wɔfɔɔ sane bimɔ ni wɔŋmɛɔ shiatsɛmɛi lɛ agbɛ koni amɛha hetoo. Te obuɔ hetoo ni amɛhaa lɛ ohaa tɛŋŋ? Ani onuɔ he akɛ okpɛlɛ hetoo ni amɛhaa lɛ nɔ kɛkɛ, koni no sɛɛ lɛ okɛ sane ni osaa ohe yɛ mli lɛ atsa nɔ? Aloo nɔ ni okɛɔ lɛ tsɔɔ akɛ owiemɔ lɛ miikɔ hetoo ní shiatsɛ lɛ ha lɛ he? Kɛ oná nɔ ni mɛi kɛɔ lɛ he miishɛɛ diɛŋtsɛ lɛ, no lɛ obaanyɛ ni okɛ sanebimɔi krokomɛi atsu nii ní okɛna nɔ diɛŋtsɛ ni yɔɔ amɛjwɛŋmɔ mli. (Abɛi 20:5) Enɛ feemɔ baaha onyɛ okɛ Maŋtsɛyeli shɛɛ sane lɛ mli fãi ni baakɔ toibolɔ lɛ shihilɛ he diɛŋtsɛ lɛ atsu nii.
3 Enɛ biɔ ni wɔná he miishɛɛ akɛ wɔbaawie saji krokomɛi hu ahe wɔfata saji ni wɔto akɛ wɔbaawie he lɛ he kɛ́ ebi ní wɔfee nakai. Kɛ wɔwie naagba ko ní je kpo yɛ adafitswaa sane ko mli lɛ he kɛje wɔwiemɔ lɛ shishi, ní shiatsɛ lɛ tsĩ nɔ ko ni miiya nɔ yɛ ekutso lɛ mli loo nɔ ko ni kɔɔ lɛ diɛŋtsɛ ehe lɛ tã lɛ, suɔmɔ diɛŋtsɛ ni wɔyɔɔ akɛ wɔɔtsu shiatsɛ lɛ hiamɔ nii ahe nii lɛ baatsirɛ wɔ koni wɔha Biblia mli sanegbaa lɛ akɔ nibii ni he hiaa lɛ waa lɛ he.—Fil. 2:4.
4 Wɔshiɛmɔ Wiemɔ lɛ He Gbɛjianɔ ni Wɔɔto: Kɛ shiatsɛ lɛ bi sane ko lɛ, ekolɛ ebaafee nɔ ni sɛɛnamɔ yɔɔ he kɛha wɔ akɛ wɔɔtao sane lɛ mli jogbaŋŋ koni wɔkɛ lɛ ayatsa sanegbaa lɛ nɔ be kroko. Wɔbaanyɛ wɔkɛ woji ni tsɔɔ esane lɛ mli jogbaŋŋ lɛ hu aha lɛ. Enɛɛmɛi fɛɛ tsɔɔ akɛ wɔmiisumɔ ní wɔye wɔbua mɛi krokomɛi ni amɛbale Yehowa.—2 Kor. 2:17.