Mɛi Krokomɛi ni Ayeɔ Abuaa Amɛ Koni Amɛkɛ Woo Aha Yehowa

¹ Aajaje shɛɛ sane ko ni he hiaa waa aatsɔɔ gbɔmɛi yɛ shikpɔŋ lɛ fɛɛ nɔ, akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ; ni nyɛjáa mɔ ni fee ŋwɛi kɛ shikpɔŋ kɛ ŋshɔ kɛ nubui ni baa lɛ.” (Kpoj. 14:6, 7) Eji hegbɛ ni wɔná akɛ wɔkɛ wɔhe aaawo nakai sanejajemɔ lɛ mli. Mɛni ehe hiaa ni gbɔmɛi ale yɛ Yehowa he bɔni afee ni amɛshe lɛ gbeyei ni amɛjá lɛ lɛ?

² Egbɛi Lɛ: Ehe miihia ni gbɔmɛi atsɔ gbɛi nɔ amɛle anɔkwa Nyɔŋmɔ kome pɛ lɛ kɛjɛ apasa nyɔŋmɔi babaoo ni ajáa amɛ ŋmɛnɛ lɛ ahe. (5 Mose 4:35; 1 Kor. 8:5, 6) Yɛ anɔkwale mli lɛ, Biblia ŋmalɔi kɛ Yehowa gbɛi ni yɔɔ nyam lɛ tsu nii fe shii 7,000. Yɛ be mli ni wɔkɛ sɛɛyoomɔ tsuɔ nii yɛ gbɛ ni sa nɔ yɛ be mli ni wɔjieɔ Nyɔŋmɔ gbɛi lɛ kpo lɛ, esaaa akɛ wɔkɛteeɔ loo wɔhiɛ gboɔ yɛ ekɛ nitsumɔ he kɔkɔɔkɔ. Nyɔŋmɔ suɔmɔnaa nii ji ni adesai fɛɛ abale egbɛi lɛ.—Lala 83:19.

³ Esu-Kɛ-Baŋ: Bɔni afee ni awo Yehowa hiɛ nyam lɛ, ehe miihia ni gbɔmɛi ale nɔ̃ Nyɔŋmɔ ni eji. Esa akɛ wɔha amɛle esuɔmɔ ni nɔ bɛ lɛ, enilee ni kwɔ fe fɛɛ, ejalɛ saneyeli ni yeɔ emuu lɛ, kɛ ehewalɛ kpeteŋkpele lɛ, kɛ emɔbɔnalɛ, emlihilɛ, kɛ esui krokomɛi ni yɔɔ naakpɛɛ lɛ. (2 Mose 34:6, 7) Esa akɛ amɛkase bɔ ni amɛaafee ni amɛshe Nyɔŋmɔ gbeyei yɛ gbɛ kpakpa nɔ, amɛkɛ woo aha lɛ, ni amɛyoo akɛ amɛshihilɛ diɛŋtsɛ damɔ Yehowa nɔkpɛlɛmɔ ni amɛaaná lɛ nɔ.—Lala 89:8.

⁴ Nyɔŋmɔ ni Atsiɔ Abɛŋkɛɔ Lɛ: Kɛji akɛ aaahere gbɔmɛi ayiwala kɛjɛ Nyɔŋmɔ kojomɔ ni baa lɛ mli lɛ, no lɛ esa akɛ amɛtsɛ́ Yehowa yɛ hemɔkɛyeli mli. (Rom. 10:13, 14; 2 Tes. 1:8) Enɛ kɔɔ saji babaoo he fe Nyɔŋmɔ gbɛi kɛ esui ahe nilee kɛkɛ ni wɔɔná. Esa akɛ wɔye wɔbua mɛi koni amɛná amɛkɛ Yehowa teŋ naanyobɔɔ ko, amɛkɛ amɛhiɛ afɔ̃ enɔ kɛ amɛtsui muu fɛɛ. (Abɛi 3:5, 6) Yɛ be mli ni amɛkɛ nɔ ni amɛkaseɔ lɛ tsuɔ nii, amɛtsɔɔ amɛhe kɛyaa Nyɔŋmɔ ŋɔɔ yɛ sɔlemɔ mli yɛ anɔkwayeli mli, ní amɛnáa eyelikɛbuamɔ yɛ amɛshihilɛi amli lɛ, amɛhemɔkɛyeli lɛ mli waa, ni ebaaye ebua amɛ ni amɛtsi amɛbɛŋkɛ Yehowa.—Lala 34:9.

⁵ Eba akɛ wɔkɛ ekãa aaajaje Nyɔŋmɔ gbɛi lɛ, ni wɔye wɔbua mɛi krokomɛi ni amɛkɛ amɛhiɛ afɔ̃ enɔ kwraa, ni amɛshe lɛ gbeyei. Wɔbaanyɛ wɔye wɔbua mɛi babaoo lolo koni amɛbale Yehowa ni amɛwo ehiɛ nyam ákɛ amɛ ‘yiwalaheremɔ Nyɔŋmɔ.’—Lala 25:5.

Jiemɔ Hiɛsɔɔ Kpo Kɛha Teokrase Nibii Lɛ

¹ Beni Maŋtsɛ Yosia toɔ gbɛjianɔ koni esaa sɔlemɔtsu lɛ, ejie mɛi ni akɛ nitsumɔ lɛ ewo amɛdɛŋ lɛ ayi akɛ: “Akɛ amɛ ebuuu shika ni atuɔ awoɔ amɛdɛŋ lɛ he akɔntaa, ejaakɛ amɛyeɔ anɔkwa.” (2 Maŋ. 22:3-7) Hiɛsɔɔ ni nakai hii lɛ yɔɔ kɛha krɔŋkrɔŋ nii lɛ jeɔ kpo yɛ bɔ ni amɛkɛ nibii ni akɛwo amɛdɛŋ lɛ tsu nii amɛha lɛ mli. Ŋmɛnɛ, yɛ be mli ni wɔkɛ wɔhe woɔ Nyɔŋmɔ sanekpakpa ni ji nitsumɔ krɔŋkrɔŋ lɛ mli lɛ, ehe miihia ni wɔ hu wɔjie anɔkwayeli kpo yɛ nibii ni akɛwo wɔdɛŋ lɛ mli.

² Yɛ Sɔɔmɔ Nitsumɔ lɛ Mli: Hiɛsɔɔ kɛha shɛɛ sane ni he hiaa ni yɔɔ wɔ woji lɛ amli kɛ wɔhiɛ ni wɔɔha ehi shika ni afiteɔ yɛ amɛfeemɔ mli lɛ nɔ lɛ haa wɔbuɔ amɛ akɛ amɛjara wa waa diɛŋtsɛ. Esaaa akɛ wɔkɛ wɔ woji lɛ haa mɛi ni ejieee hiɛsɔɔ kpo yɛ Biblia mli shɛɛ sane lɛ he lɛ kɛkɛ ni wɔjieee mli. Kɛji akɛ miishɛɛ fioo ko pɛ mɔ ko jie lɛ kpo yɛ sanekpakpa lɛ he lɛ, wɔbaanyɛ ni wɔkɛ dɛhiɛmɔ wolo aha lɛ moŋ fe wolo kroko.

³ Okɛ woji lɛ aha yɛ gbɛ ni tsɔɔ bulɛ kɛha ejara lɛ nɔ. Kaashĩ yɛ agbonaa yɛ hei ni kɔɔyɔɔ baanyɛ agbɛ amɛ ashwã. Bɔni afee ni wɔkwa nifitemɔ lɛ, kanemɔ woji srɔtoi ni oyɔɔ yɛ shĩa lɛ fɛɛ dani ohé woji krokomɛi ofata he. Kɛji akɛ woji tɛtrɛbii ni oheɔ lɛ eko fɛɛ eko shwɛɔ be fɛɛ be lɛ, no lɛ susumɔ nɔ ni oheɔ lɛ nɔtsemɔ he.

⁴ Woji ni Oheɔ Kɛhaa Bo Diɛŋtsɛ Ohe: Esa akɛ wɔshɛ nɔ ni he hiaa wɔ diɛŋtsɛ lɛ pɛ. Esa akɛ wɔbɔ mɔdɛŋ ni wɔkɛ hiɛshikamɔ atsu nii titri beni wɔshɛɔ deluxe Bibliai srɔtoi, Reference Bible srɔtoi, kɛ woji wuji krokomɛi tamɔ Concordance, Index, Insight wolokpoi lɛ, kɛ Proclaimers woji lɛ ní fɛɛ feemɔ jara wa waa lɛ.

⁵ Ani okwɛɔ koni oŋma ogbɛi kɛ adrɛs yɛ woji ni ji bo diɛŋtsɛ onɔ̃ lɛ amli? Enɛ yeɔ ebuaa ni ehaaa woji ni alaajeɔ ni akuɔ sɛɛ aheɔ ekoŋŋ lɛ afa tsɔ̃. Kɛji akɛ olaaje lala wolo, Biblia, loo nikasemɔ wolo ko lɛ, ekolɛ obaana yɛ he ni akɛ nibii ni laajeɔ lɛ toɔ yɛ Maŋtsɛyeli Asa lɛ nɔ loo yɛ kpeei ashishi lɛ amli.—Luka 15:8, 9.

⁶ Nyɛhaa wɔbɔa mɔdɛŋ ni wɔkɛ wɔ woji lɛ atsua nii yɛ nilee mli. Enɛ ji gbɛ ni wɔɔtsɔ nɔ wɔjie anɔkwa ni wɔyeɔ yɛ Maŋtsɛyeli lɛ he nibii ni Yehowa kɛwo wɔdɛŋ lɛ he nitsumɔ kpo.—Luka 16:10.