Ani Ojieɔ Bulɛ Kpo Otsɔɔ Nuŋtsɔ lɛ Gbɛkɛnaashi Niyenii Lɛ?
1 Kɛha anɔkwa Kristofoi lɛ, Nuŋtsɔ lɛ gbɛkɛnaashi niyenii lɛ he gbijurɔ ni ayeɔ daa afi lɛ ji nifeemɔ ko ni he hiaa waa. (1Kor. 11:24-26) Eji nɔ ni yɔɔ miishɛɛ kɛ hiɛdɔɔ fɛɛ. Wɔmii shɛɔ wɔhe waa akɛ wɔsuɔmɔ Nyɔŋmɔ, Yehowa kɛ kpɔmɔ afɔleshaa lɛ eha kɛha wɔnaanɔ sɛɛnamɔ. Eji ekɛ enɛ haaa kulɛ, wɔbɛ hiɛnɔkamɔ ko. No hewɔ ni wɔjieɔ bulɛ ni mli kwɔ kpo wɔtsɔɔ Nyɔŋmɔ Bi lɛ gbele lɛ. Te wɔɔfee tɛŋŋ wɔfee enɛ?
2 Wɔjwɛŋmɔi kɛ Wɔtsuii ni Wɔɔfee Amɛ Klalo: Kristofoi awekui babaoo feɔ nakai kɛtsɔ Biblia mli saji ni akɛha ni akane yɛ gbii ni tsɔɔ Kaimɔ gbi lɛ hiɛ lɛ akanemɔ nɔ. Kɛji akɛ fɔlɔi kane sane nɛɛ ákɛ weku lɛ, amɛbii lɛ náa hiɛsɔɔ ni mli kwɔ amɛhaa nɔ ni Nuŋtsɔ lɛ Gbɛkɛnaashi Niyenii lɛ tsɔɔ diɛŋtsɛ. Akɛni Kpɔmɔnɔ lɛ hàa eshai anɔ hewɔ lɛ, ákɛ Kristofoi lɛ wɔbaanyɛ wɔŋɔ hegbɛ lɛ koni wɔsusu wɔ diɛŋtsɛ wɔjeŋba kɛ wɔhemɔkɛyeli lɛ he. Wɔjieɔ bulɛ kpo wɔtsɔɔ kɛtsɔ wiemɔ ni akɛhaa lɛ toi ni wɔboɔ jogbaŋŋ, kɛ bɔ ni Nyɔŋmɔ Bi lɛ gbele lɛ saa wɔ diɛŋtsɛ wɔhe ehaa lɛ nɔ ni wɔjwɛŋɔ lɛ nɔ.
3 Bulɛ ní Wɔkɛ Baasaa Maŋtsɛyeli Asa lɛ Nɔ: Esa akɛ onukpai akuu lɛ ato gbɛjianɔ koni asaa Maŋtsɛyeli Asa lɛ nɔ jogbaŋŋ ni afee lɛ klalo kɛha nɛkɛ nifeemɔ krɛdɛɛ nɛɛ. Kɛji akɛ asafoi ni fe ekome kɛ asa lɛ tsuɔ nii lɛ, no lɛ onukpai akui lɛ baanyɛ afee ekome kɛto jɛmɛ saamɔ he gbɛjianɔ, bɔni afee ni asafo ni kɛ asa lɛ baatsu nii yɛ sɛɛ mli lɛ akafee tsakemɔ ko ákɛ ja okadi nibii lɛ ni akɛ eko aaato najiaŋ lɛ pɛ.
4 Esa akɛ jɛmɛ wulamɔ nibii lɛ akafee nɔ ni yɔɔ haŋtsii, koni ekaba bulɛ ni yɔɔ nifeemɔ ni he hiaa nɛɛ he lɛ shi. Ákɛ nɔkwɛmɔnɔ lɛ, asafoi komɛi kɛ fɔfɔii, kanei, fiifi kɛ woji ni afee lɛ kpãai ni hiɛ sui srɔtoi tsotsoroɔ samfɛji lɛ ahe, sɛndo lɛ nɔ, kɛ okpɔlɔi lɛ kɛ wiemɔ kpoku lɛ nɔ. Enɛ ebafeŋ nɔ ni sa. Wɔsumɔŋ akɛ wɔ-Maŋtsɛyeli Asa lɛ afee tamɔ Kristendom sɔlemɔtsũi ni asáa mli haŋtsii yɛ Easter kɛ Blonya beaŋ lɛ kɔkɔɔkɔ. Enɛ ejieee bulɛ ni sa kpo etsɔɔɔ nifeemɔ ni hiɛdɔɔ yɔɔ he nɛɛ. Ebaanyɛ egbala jwɛŋmɔ kɛjɛ wiemɔ ni ahaa yɛ nɛkɛ gbɛkɛnaashi ni he hiaa nɛɛ nɔ.
5 Kɛji ákɛ akɛ mama ko baahà okpɔlɔ lɛ nɔ lɛ, no lɛ esa akɛ efee nɔ ni mli ka faŋŋ, ni nitɛŋmɔi loo niŋmaa ni baagbala mɛi ajwɛŋmɔ kɛjɛ aboloo kɛ wein ni akɛma jɛmɛ lɛ nɔ lɛ bɛ mli. Kɛji akɛ ato fɔfɔii ahe gbɛjianɔ lɛ, no lɛ esa akɛ efee nɔ ni bɛ haŋtsii ni sa. Enɛ baaha mɛi fɛɛ ajwɛŋmɔ ahi Ŋmalɛ naa gbɛjianɔtoo ni akɛbaaha lɛ nɔ.
6 Bulɛ Kpo ni Aaajie yɛ Kaimɔ lɛ Sɛɛ: Nɔ ni ofeɔ beni ojɛ Kaimɔ lɛ kɛba shia sɛɛ mli lɛ hu tsɔɔ bulɛ ni oyɔɔ kɛha be ni yɔɔ nyam nɛɛ. Nyɛmimɛi eto “Kaimɔ okpɔlɔŋmɛɛ” he gbɛjianɔ yɛ asafoi komɛi amli beni agbe nifeemɔ lɛ naa sɛɛ, ni anuɔ dãa ni akɛ lala ni atswaa lɛ waa joɔ kɛyaboteɔ jenamɔ mli yɛ jɛmɛ. Yɛ okpɔlɔŋmɛɛ ni tamɔ enɛ eko shishi lɛ, shiɛlɔi enyɔ komɛi kɛ amɛhe wo jeŋba shara mli beni amɛnu dãa babaoo sɛɛ. Kwɛ bɔ ni enɛ baatsɔɔ bulɛ ni abɛ kɛha Yehowa kɛ e-Bi lɛ ní kɛ ewala hã yɛ wɔhe eshai ahewɔ lɛ!—Okɛto 2 Mose 32:5, 6, 17-19; Bɔfoi lɛ Asaji 7:41-43 he.
7 Wɔmiisumɔ ni wɔgbala jwɛŋmɔ kɛba ŋaawoo ni akɛha yɛ March 1, 1969, Watchtower lɛ, baafa 160 lɛ nɔ, heni ekɛɔ yɛ akɛ: “Bei pii lɛ, beni Yehowa Odasefoi aweku ko ejɛ nɛkɛ kpee nɛɛ shishi amɛba shia sɛɛ lɛ, amɛŋɔɔ be ni amɛkɛsusuɔ nɔ ni Kaimɔ lɛ tsɔɔ lɛ he. Nɛkɛ hejɔɔmɔ be ni akɛsusuɔ gbijurɔyeli lɛ kɛ Biblia mli saji ni kɔɔ eshishitoo he lɛ he lɛ baanyɛ aná hewalɛ ni sa yɛ mɔ nɔ, be mli ni akɛ gbɛkɛ ni sa kadimɔ ni yɔɔ miishɛɛ lɛ baa enaagbee lɛ. Te aaafee tɛŋŋ ni mɔ ko ajwɛŋ Yehowa nifeemɔi wuji lɛ ahe yɛ Kaimɔ lɛ sɛɛ, beni yɛ nakai beaŋ nɔŋŋ lɛ eeye nii ni eenu dãa babaoo yɛ lala ni atswaa lɛ waa teŋ lɛ?”—Kwɛmɔ Watchtower, February 1, 1976, lɛ baafa 76 lɛ hu.
8 Yɛ be mli ni nɔ ni yɔɔ yiteŋgbɛ lɛ eteee shi ewooo wekui loo shiɛlɔi ni aaafee ekome kɛha hejɔɔmɔ lɛ, eka shi faŋŋ akɛ eteɔ shi ewoɔ henaabuamɔi ni ato dãa kɛ lala ni naa wa ni akɛjoɔ he gbɛjianɔ yɛ shishi lɛ. Enɛ jeee gbɛ ni Kristofonyo tsɔɔ nɔ ejieɔ miishɛɛ kpo etsɔɔ kpɔmɔnɔ ni akɛha lɛ! Eka shi faŋŋ akɛ esa akɛ wɔjeŋba yɛ gbɛkɛ ni afeɔ Kaimɔ lɛ, kɛ yɛ no sɛɛ lɛ ajie bulɛ kpele kɛ hiɛsɔɔ ni wɔyɔɔ kɛha nifeemɔ lɛ, kɛ gbele ni Nyɔŋmɔ Bi lɛ gbo yɛ wɔ hewɔ lɛ kpo.—Okɛto 1 Kor. 11:20-22.
9 Kwɛ bɔ ni wɔdaa Yehowa shi yɛ emlihilɛ kɛ mɔbɔnalɛ lɛ hewɔ. Eba akɛ afi nɛɛ gbijurɔyeli lɛ baaha wɔ fɛɛ hegbɛ ni wɔkɛtsɔɔ lɛɛlɛŋ akɛ wɔkɛ bulɛ haa kpɔmɔ afɔleshaa ni ajɛ suɔmɔ mli akɛha lɛ. Wɔhesaamɔ kɛ jeŋba ni wɔkɛaajie bulɛ kpo wɔtsɔɔ nifeemɔ ni he hiaa nɛɛ lɛ baawo miishɛɛ Nyɔŋmɔ ni ji Yehowa lɛ hiɛ nyam, ni ebaatsirɛ anɔkwafoi ni naa lɛ koni amɛkɛɛ akɛ: “Nyɔŋmɔ yɛ nyɛteŋ lɛɛlɛŋ.”—1 Korintobii 14:25; Jaj. 3:1.