Jésus Christ nɛ̂ o nde?

1. Tunɔ pɛ Jésus ba angiri mɛng nde?

Sɔ ba doy Jésus sɔngsi nɛ hio olo mɔ fɛt. Nɛ olo hio wi, Jésus badung sɔngsi ha zang ngɔn mɛ ze nde wi mɔ nzɔy-sɔtɛ gding ɛ tɛ bhɛ wɛnɛ ha zu nu (Jean 8:23). Jésus ha kɔ ha Sɔ ha zang bhɔngara hio olo mɔ fɛt. Wɛnɛ nɛ wi ndang ka Jéhovah bhɔngara nɛ kɔ wa, mɔngɔ ɛ sa wɛnɛ nde “ndanga” bem pɛ Sɔ (Jean 1:14). Jésus dea tom tuka wan nɛ tima pɛ Sɔ, yo nɛ ingi ɛ sa wɛnɛ nde “Wen.”​—Tɔli Jean 1:1-3; Kolose 1:15, 16.

2. Ha zu ge Jésus tea ha zu nu nde?

Sɔ tɔmsa bem pɛa ha zu nu nɛ wal gdea tunɔ pɛa ha zang Marie ma bhoko Juif ka tɛ ing wowi na. Yo nɛ ingi Jésus bo nɛ gdibafa nɛ wal mur tɛ na (Luc 1:30-35). Jésus tɛa zu nu (1) mɔ osi kpasa wen ha zu Sɔ, (2) mɔ osi ha ɔ wal deamɔ ka Sɔ ngoya, ngase ka ɔ dung ha zang hio ngaya mɔ, nɛ (3) mɔ ku tunɔ pɛa ka lɛma fɛt tuka “mɔ gbosisi” dɔka wi ha si bala pɛ gdangamɔ.​—Tɔli Matthieu 20:28.

3. Ha zu ge yo ana mɔtɔ nde ɛ kpe ma mɔ mɔ kusi ɔ nde?

Mɔ kusi ma wi ha li fio, yo ana mɔto nde ɛ kpe ma mɔ gding (Exode 21:29, 30). Ha bosia, Sɔ tɛ bhɔngiri mɔ nde hio wi a gbɛl nɛ mbua fe na, ɔ ingɔ yo mɛng nde? Sɔ ba tɔ ha bosi wowi Adam nde ka dea mɔ ka Bible sa yo nde “sɛmbɔ” kɛ, abe fe. Ka ba dung so nde Adam a de sɛmbɔ na, ingi a lɛm fe ndang nɛ ndang na (Genèse 2:16, 17; 5:5). Bible tɔa nde fio “lea” zang nzan nɛ wal pɛ Adam. Yo dea nde hio be zang wa a kpa sɛmbɔ nɛ fio ha pata. Yo nɛ ingi ɔ nɛ bezoin mɔ tɔ nde ɛ kpe ma mɔ mɔ kusi nɛ ɔ ha zang fio ka ɔ kpa nɛ wal pɛ Adam.​—Tɔli Rome 5:12; 6:23.

Nɛ o ha be lɛm kpea gɛnɛ mɔ kusi ɔ ha zang fio? Ka ɔ fea ɔ nɛ tɛ ɔ ha kpe sɛmbɔ bɔ. Ma wan de sɛmbɔ lɛm kpe sɛmbɔ pɛ dan wa na.​—Tɔli Rome 14:7.

4. Jésus fea ha zu ge?

Jésus bo nɛ sɛmbɔ tuka ɔ na. Mɔngɔ a bo nɛ bezoin mɔ fe gon zu sɛmbɔ pɛa na: Ma soe ndang a tɛ de sɛmbɔ na. Ma, Jésus fea ha zu sɛmbɔ pɛ hio wi. Sɔ tomsa be wei pɛa mɔ fe ha wen zu ɔ mɔ osi nɛ gasa ngoy ka wɛnɛ nɛ yo ha wal pɛ hio wi. Jésus osa fin ngoy pɛa ha wal bɔ nɛ zea nu bafa ku nɛ tunɔ pɛa gɔn ha zu sɛmbɔ bɔ.​—Tɔli Jean 3:16; Rome 5:18, 19.

Zɔ vidéo Jésus fea ha zu ge nde?

5. Ge te mɔ Jésus be de ha ngimɔ kɛ nde?

Ha ngimɔ ka Jésus bhɔna ha zu nu, a karsa hio zɛlɛ a tunsɔ hio fio nɛ hio bɔnɛ pɛ mbua. Nɛ wal mɔ ndɔngki, a osi nɛ mɔ ka be de bin ha hio wi fɛt ka ze nu (Matthieu 15:30, 31; Jean 5:29). Ha pata fio pɛ Jésus, Sɔ tunsɔ wɛnɛ ha fio mɛ ze nde wi nzɔy-sɔtɛ (1 Pierre 3:18). Ha pata, wɛnɛ dungɔ ha pɛtɛ Jéhovah Sɔ nɛ wal we kɔ wa, wɛnɛ kɛra Jéhovah mɔ ha ngaya ha wɛnɛ mɔ dung tuka wan-le mɔ zu nu fɛt (Hebro 10:12, 13). Jésus detɔm sising tuka wan-le ha zang ngɔn, nɛ hio wan-nɛtɔm pɛa ha osa dede wen ki kɛ ha zu nu mburr.​—Tɔli Gbasamɔ 11:15; Matthieu 24:14.

Ha zang ma be ngimɔ, Jésus be ku ngaya pɛa mɔ wan-le mɔ kusi nɛ bɔnɛ fɛt fin nɛ hio wi ka dung ha sia. Hio wi fɛt ka osa mɛkaramɔ pɛ mbua ha Jésus nɛ zea nu wa bekpa bin tunɔ ha zang paradis ha zu nu.​—Tɔli Matthieu 5:5.