Etekiera
27 E a manga roko naba ana taeka Iehova irou, ae kangai: 2 “Ao ngkoe ae natin te aomata, anenea te anene ae kananokawaki* ibukin Turo,+ 3 ao kangai nakon Turo,
‘Ngkoe ae ko maeka i rarikini mataroan oon taari,
Ae te tia iokinibwai nakoia botannaomata man abamwakoro aika bati,
E kangai ana taeka te Uea ae Moan te Rietata ae Iehova:
“Ko kangai, ngkoe ae Turo, ‘E kororaoi tamaroau.’+
4 A mena am aono i nukani marawa,
Ao a kakororaoa tamaroam am taani kaba.
5 A karaoi am rai ni kabane mani kain Tieniera ae te mwaiango,+
Ao a anaa kain Rebanon ae te tiira ni karaoa iai am aneang.
6 A karaoi am bwennarina man aroka aika oke ake i Batian,
Ao e karaoaki moan am kaibuke mani kaai aika teatura aika katamaroaaki ni koron te erebwanti, ake man abamwakoroni Kitim.+
7 A riki taian rinen aika matamata mai Aikubita bwa iem,
Ao a karaoaki rabunan aon am teeke man te karai ae buruu ao te karai ae beboo ae buraen te tiibu, ake man abamwakoron Eritia.+
8 Boni kaain Titon ma Arewata+ am taani bwennarina.
Ao am kaimoa bon am rorobuaka aika rabakau, ngkoe ae Turo.+
9 Ao taani bonorarania am kaibuke boni mwaane mai Kebara+ aika mwaatai* ao mwaane aika rabakau.+
A bane kaibuken taari ma aia taani boborau ni kawariko bwa a na iokinibwai bwaai ni boobwai.
10 A kaaina am taanga ni buaka rorobuakani Botia, Rata, ao Buta,+ bon am rorobuaka ngaiia aika taani buaka.
A katinei aia otanga ma bwaraia ni buaka iroum, ao a uota nakoim te karineaki.
11 A tei ni katobibii am oo rorobuakan Arewata ake n am taanga ni buaka,
Ao a mena n am taua rorobuaka aika ninikoria.
A katinei aia otanga aika mronron ni katobibii am oo,
Ao a kakororaoa tamaroam.
12 “‘“E karaoa te waaki ni bitineti ma ngkoe Taretiti,+ ibukini mwaitini kaubwaim.+ A anga te tirewa, te biti, te bititaom, ao te buange, bwa boon am bwai.+ 13 A iokinibwai ma ngkoe Iawan, Tubara,+ ao Meteka,+ ao a anga tooro+ ma bwaai aika karaoaki man te buraati bwa boon am bwai ake ko iokinibwaia. 14 Ao a anga taian aoti ao taiani miure tibun Tokarema+ bwa boon am bwai. 15 A iokinibwai ma ngkoe kaain Tetan,+ ao ko kammwakuriia taan iokinibwai n abamwakoro aika bati. A anga koron te erebwanti+ ma te kai ae roroo ae kakawaki bwa boon am bwai. 16 E karaoa te waaki ni bitineti ma ngkoe Etom ibukini batin am bwai. A anga te timaraketo,* te karai ae beboo ae buraen te tiibu, baika matamata aika katamaroaaki n taeraki, kunnikai aika raraoi, te ane, ao taian rubi,* bwa boon am bwai.
17 “‘“E iokinibwai ma ngkoe Iuta ao te aba ae Iteraera, ao a anga uitani Minnita,+ amwarake aika rangi n raraoi, aia karewe manibeeru,*+ te oera, ao te batiam,+ bwa boon am bwai.+
18 “‘“E karaoa te waaki ni bitineti ma ngkoe Tamateko+ ibukini mwaitin am bwai ao kaubwaim ni kabane, ao e iokinibwaia wainin Erebon ao buraen te tiibu mai Taara.* 19 Ao Wetan ma Iawan mai Utara a anga baika karaoaki man te biti, te katia,* ao te kaibwabwaa,* bwa boon am bwai. 20 E iokinibwai ma ngkoe Tetan+ ni kunnikain* taiani kaintoka. 21 Ko kammwakuriia I-Arabia ma mataniwini Keta ni kabane,+ ake taan iokinibwaia taian tiibutetei ao tiibu mwaane ma kooti.+ 22 A iokinibwai ma ngkoe taan iokinibwai mai Tieba ao Raama,+ ao a anga ni kabane aeka ni boiarara aika taiani kabanea n raoiroi, atibu aika kakawaki, ao koora, bwa boon am bwai.+ 23 A iokinibwai ma ngkoe Aran,+ Kanne, ao Eten,+ aika taan iokinibwai mai Tieba,+ Atuura,+ ao Kirimata. 24 A iokinibwaia n am mwakete taiani kunnikai aika tamaroa, kauaatao aika karaoaki man te kunnikai ae buruu ao kunnikai aika matamata aika katamaroaaki n taeraki, ao ai rabunan aontano aika bati mataia, aika a bane ni bautaki ao ni kabaeaki n taian roobu.
25 A riki kaibuken Taretiti+ bwa baon am bwai n iokinibwai,
N te aro are ko a on ao n tinebu* i nukani marawa.
26 A uotiko am tia bwennarina ribuakon taari ae buaka,
Ao e urubekeiko te angimainiku i nukani marawa.
27 N te bong are ko bwaka iai ao a na bane n iinako i nukani marawa+
Kaubwaim, am bwai, am bwai n iokinibwai, am taani boborau, am kaimoa,
Taani bonorarania am kaibuke, taan iokinibwaia am bwai ni boobwai,+ ao am rorobuaka ni kabane aika taani buaka,+
Ae te koraki ae mwaitikurikuri* akana i nanom.
28 Ao a na mwaeiei aaba akana i rarikin taari ngkana a tang n takarua am kaimoa.
29 A na bane taani bwennarina, taani boborau, ao kaimoa,
N ruo rikaaki man aia kaibuke ma n tei i aon te aba.
30 A na kanenei bwanaaia ao n tang ni korakai ibukim+
Ma ni kaaurakea te tano nako aon atuia ma n rabinobino i buakon te mannang.
31 A na kamarai atuia ao ni karina te raerobwa* i aoia.
A na tang ni korakai ibukim n te tanginiwenei ae korakora.
32 I nanon aia bwaebwaeti ao a na anenea te anene ae kananokawaki ma ni kaokioka ae kangai ibukim:
‘Ai antai ae ai aron Turo ae e a mabu ngkai i nukani marawa?+
33 Ngkana a roko am bwai mai marawa, ao ko katoki nanoia botannaomata aika bati.+
A kabatiaaki kaubwaia uean aon te aba ni kaubwaim ae bati, ao n am bwai n iokinibwai.+
34 Ao ngkai ko a urubekeaki i marawa, ma n iinako n te ran ae makuakua,+
Ao a bane am bwai n iokinibwai ma am aomata n iinako ma ngkoe.+
35 A na bane n tarataraiko ma te miroaroa kaain abamwakoro nako,+
Ao a na rurubenebene ma te maakunrang aia uea,+ ao a na ubu n aki rau.
36 A na katiitii ibukin te bwai ae riki nakoim taan iokinibwai mai buakoia natannaomata nako.
E na karina ma ni kakamaaku tokim,
Ao ko na mauna n aki toki.’”’”+