Kaotiko Bwa Ngkoe Te Tia Rimwini Kristo Ni Koaua

“Kainnamwarake aika raraoi a karikii uaaia aika raraoi, ma kaai aika bubuaka a karikii uaaia aika bubuaka.”​—MATAIO 7:17.

1, 2. A kanga taan rimwini Kristo ni koaua ni kaokoroaki mairouia Kristian ni kewe, ai moarara riki n tain te toki aei?

E taekinna Iesu bwa a na rangi ni kaokoro taan rimwina ni koaua ma Kristian ni kewe, man uaaia ae aia reirei nako ao kateiia. (Mataio 7:15-17, 20) A na boni kaririaki aomata ni baika a karin n aia iango ke i nanoia. (Mataio 15:18, 19) A karikii “uaaia aika bubuaka” te koraki ake a reireiaki n reirei aika kewe, ma a karikii “uaaia aika raraoi” te koraki ake a reireiaki te koaua ibukin te Atua.

² A a tia n rangi n teretere raoi uaa aika uoua aikai n tain te toki aei. (Wareka Taniera 12:3, 10, BG.) A kairua aia iango Kristian ni kewe ibukin te Atua ao a aki toki ni kaota tangiran te Atua n te aro ae mwamwanaa te aba, ma te koraki ake iai aia atatai ni kaineti ma nanon te Atua, a bon taromauria te Atua “n te taamnei ao n te koaua.” (Ioane 4:24; 2 Timoteo 3:1-5) A kakorakoraia ni kaotiotii aroaro ake e kaotiotii Kristo. Ma tera arora ngaira? Ngkana ko rinanoi kanikinaeaia Kristian ni koaua aika i nano aika nimaua, ao titirakiniko ni kangai: ‘A teretere raoi kateiu ao au reirei bwa a boraoi ma Ana Taeka te Atua? I anai nanoia te koraki ake a ukera te koaua ni kateiu ao au angareirei?’

Maiuakina Ana Taeka te Atua

3. Tera ae kukurei iai Iehova, ao tera irekerekena ma Kristian ni koaua?

³ E taku Iesu: “A na aki bane n rin n te tautaeka n uea ae bwaini karawa akana kangai nakoiu, ‘Te Uea, te Uea,’ ma e na bon rin ane kakaraoa nanon Tamau are i karawa.” (Mataio 7:21) Eng, e aki kukurei Iehova n taekinan ae te Kristian ngkoe, ma e kukurei ni karaoan ae riai ni karaoia te Kristian. Ibukia ngkanne taan rimwini Kristo ni koaua, e irekereke anne ma aroaroni maiuia ni kabane, n ikotaki naba ma kateiia ni kaineti ma te mwane, aia mwakuri ni kareketianti, aroia ni kaakibotu, aroia ni kaineti ma katein nako te aonnaba, bukamaru, te mare ao iraorao riki tabeua ma aomata nako. Ma e ngae n anne, a kakairi Kristian ni kewe n aroaroia kaain te aonnaba n iaiango ao ni kawaia nako, ake a a ririkirake riki iai ni kaitaraa te Atua ni boong aika kaitira aikai.​—Taian Areru 92:7, BG.

4, 5. Ti na kanga ni maiuakin ana taeka Iehova aika ni Maraki 3:18, BG?

⁴ Ni kaineti ma anne, e korea ae kangai te burabeti ae Maraki: “Ane kam na oki iai ma n ata ae raoiroi ma ae buakaka, ma n ata ae toro iroun te Atua ma ae aki toro i Rouna.” (Maraki 3:18, BG) Ngkai ko iangoi taeka akanne, titirakiniko ni kangai: ‘E boraoi aroarou ma kaain te aonnaba ke e rangi ni kaokoro? I kekeiaki n taai nako ni kaboraoa aroarou ma raoraou tao n te tabo n reirei ke n te tabo ni mwakuri, ke I teimatoa n nimti ana boto n reirei te Baibara, ao n taetae ngkana I nora riaina?’ (Wareka 1 Betero 3:16.) Ni koauana, ti aki kani kamoamoai raoiroira, ma ti riai n taraaki bwa ti rangi ni kaokoro ma te koraki ake a aki tangira Iehova ao a aki toro irouna.

⁵ Ngkana ko ataia bwa ko kainnanoa karaoiroan riki kateim, e aera bwa ko aki tataro ibukin anne ao n ukera kakorakoraan am onimaki rinanon te katoatai n ukeuke n reirei n te Baibara, te tataro ao kaakaeani bobotaki? Ngkana ko kabatiaa riki maiuakinan Ana Taeka te Atua, ane ko na karikii ‘uaa aika raraoi’ aika bati riki n ikotaki naba ma ‘te karea ni karaoiroi ae nako mai wim ae kaotiota aran te Atua.’​—Ebera 13:15.

Tataekina Ana Tautaeka n Uea te Atua

6, 7. Tera te kaokoro ae kona n noraki i marenaia Kristian ni koaua ao Kristian ni kewe ni kaineti ma rongorongon te Tautaeka n Uea?

⁶ E taku Iesu: “I riai naba n tataekina te rongorongo ae raoiroi ae taekan ana tautaeka n uea te Atua nakoni kaawa ake tabeua, bwa ngaia aei bukini kanakoau.” (Ruka 4:43) Bukin tera bwa ana boto n iango Iesu n ana mwakuri ni minita bon Ana Tautaeka n Uea te Atua? Ibukina bwa e ataia ae ngkana e Uea n te Tautaeka n Uea anne ma tarina aika natinaki n te taamnei ake a a tia ni kautaki, a na boni kamaunai baike a karikii rawawataia aomata ae bon te bure ao te Riaboro. (I-Rom 5:12; Te Kaotioti 20:10) Ai ngaia are, e tua nakoia taan rimwina bwa a na tataekina te Tautaeka n Uea ni karokoa tokin te waaki ae ngkai. (Mataio 24:14) A aki ira buakon te mwakuri aei te koraki ake a tii taekinna bwa aongkoa taan rimwini Kristo ngaiia, ao ni koauana, a bon aki kona. Bukin tera? Aikai bukina aika tenua ma iai riki: Te moan, a aki kona n uarongorongoi baike a aki ota iai. Te kauoua, akea te nanorinano ao te ninikoria irouia angia mai buakoia ake aroaro ake a kainnanoaki ibukini kaitaraan te kakaniko ao te kakaaitara are tao e kona n riki man tibwaan nako rongorongon te Tautaeka n Uea nakoia aomata nako. (Mataio 24:9; 1 Betero 2:23) Ao te katenua, bon akea taamnein te Atua irouia Kristian ni kewe.​—Ioane 14:16, 17.

⁷ N te itera teuana, a ataia taan rimwini Kristo ni koaua bwa tera Ana Tautaeka n Uea te Atua ao tera ae e na kakororaoia. Irarikin anne, a moanibwai baika irekereke ma te Tautaeka n Uea n aroia n tataekinna ni katobibia te aonnaba, man ana ibuobuoki taamnein Iehova. (Tekaria 4:6, BG) Ko katoatai n uataboa te mwakuri aei? Ko kataia ni katamaroaa riki am mwakuri ni minita ngkai te tia uarongorongoa te Tautaeka n Uea ngkoe, tao ni kabatiaa riki am tai iai ke ni karikirakea am mwakuri ni minita bwa e na rangi n uaana? A a tia tabeman ni kataia ni karikirakei aroia n uarongorongo rinanoni kamanenaan raoi riki te Baibara. “E maiu ana taeka te Atua ao e mwaaka,” e korea anne te abotoro Bauro, are e a riki bwa anuana te mamaroro man te Baibara.​—Ebera 4:12; Mwakuri 17:2, 3.

8, 9. (a) Baikara rongorongo aika a kamataataa manenani kabonganaan te Baibara n ara mwakuri ni minita? (b) Ti na kanga n rikirake riki ni mwaatai ni kamanena Ana Taeka te Atua?

⁸ Ngke e uarongorongo man te auti teuana ma teuana te tari te mwaane temanna, ao e wareka Taniera 2:44 nakon te mwaane ae te Katorika ao e kabwarabwaraa aron Ana Tautaeka n Uea te Atua are e na karokoa te rau ni koaua ao te mweraoi. E taku te mwaane aei: “I rangi ni karabwako ngkai ko kauka te Baibara ao ni kaota te kibu n oneani mwin are ko a tii taekinna naba.” Ni warekan te kibu teuana iroun te tari te mwaane nakon te aine ae kaain te Aro ae te Greek Orthodox, ao e a tabeki titiraki tabeua neiei aika kaota kan ongoraana. N te rongorongo naba aei, a kaekai titiraki man te Baibara te tari te mwaane aei ma buuna. Imwina riki, e taku te aine aei: “Kam ataia bwa e aera ngkai I kukurei ni kataetaeingkami? Ibukina bwa kam roko n au auti ma te Baibara, ao kam wareware mai iai.”

⁹ E koaua bwa e kakawaki naba ara boki ao ti riai n anganako n ara mwakuri ni minita. Ma te Baibara bon ara bwai ni mwakuri ae moan te kakawaki. Mangaia are, ngkana tiaki anuam te katoatai ni kamanena te Baibara n am mwakuri ni minita, e aera bwa ko a aki kateia bwa tiam? Tao ko kona n rinei kiibu tabeua aika kakawaki ake a kabwarabwaraa Ana Tautaeka n Uea te Atua ao arona ni kamaunai kangaanga tabeua ake a tabeaianga iai aomata akana n am aono. Ngkanne, ko a riai n tauraoi ni wareki n am tai n uarongorongo man te auti teuana ma teuana.

Kakatonga n Tataekina Aran te Atua

10, 11. Ni kaineti ma kamanenaan aran te Atua, tera te kaokoro i marenan Iesu ao aomata aika bati ake a taku bwa taan rimwina ngaiia?

¹⁰ “Taani kakoaua au taeka ngkami, ao bon te Atua Ngai, bon ana taeka Iehova.” (Itaia 43:12, BG) E iangoia ana tia Kakoaua Iehova ae moan te raoiroi ae Iesu Kristo bwa bon te mwioko ae rine uouotan aran te Atua ao taekinana nakoia aomata nako. (Wareka Te Otinako 3:15, BG; Ioane 17:6; Ebera 2:12.) Ni koauana, ibukina bwa e tataekina aran Tamana Iesu, e a atongaki iai bwa “te tia Kakoaua ae Kakaonimaki.”​—Te Kaotioti 1:5; Mataio 6:9.

¹¹ Ni kaitaraan anne, a bati aomata ake a taku bwa a tei ibukin te Atua ao Natina, ake a a tia ni kaotiotii aroaro aika kabuakakaa aran te Atua ao ni kamauna mani kibun nako aia Baibara. Ni kaotiotan te nano ae titeboo ma anne, e a roko te kaetieti n taai aika a a tibwa nako nakoia ebikobo n te Aro ni Katorika, bwa “e na aki kamanenaaki ke n tataekinaki aran te Atua n te tetragrammaton [ae maan aika aua n te taetae n Ebera] aika YHWH” n tain te tataro.a Ai kairuara te aeka n iango aei!

12. A kanga n rangi ni kinaaki riki ana toro Iehova bwa iai rekerekeia ma ngaia n 1931?

¹² A kakatonga Kristian ni koaua ni kamanena aran te Atua bwa a kakairi irouni Kristo ao “taani kakoaua aika uanao” ake a maiu imwaina. (Ebera 12:1) N 1931, a a bon rangi ni kinaaki riki ana toro te Atua bwa a rangi n irekereke ma Iehova, ni butimwaean araia ae Ana Tia Kakoaua Iehova. (Wareka Itaia 43:10-12, BG.) Nanona ngkanne ae onoti, a a riki taan rimwini Kristo ni koaua bwa ‘aomata ake a ingoanaki n aran te Atua.’​—Mwakuri 15:14, 17.

13. Ti na kanga ni maiuakina ae boraoi ma arara ae anganira te Atua?

¹³ Ti na kanga ni kakoauaa raoi bwa ti karaoa ae riai ni karaoaki irouia aomata aika ingoanaki n aran te Atua? Te anga teuana, ti riai ni kakaonimaki n tataekina aran te Atua. “Ane taboa aran Iehova ao e na kamaiuaki,” anne ae koreia Bauro. “Ma a na kanga n taboa aran teuare a tuai n onimakinna? Ao a na kanga n onimakinna ngkana a tuai n ongo taekana? Ao a na kanga n ongo ngkana akea te tia uarongorongo? Ao a na kanga n uarongorongo ngkana a aki kanakoaki?” (I-Rom 10:13-15) Irarikina, ti riai ni bwaina te riai n ara taetaenikawai ni kaotaraean aia kewe Aaro aika kabuakakaa ara tia Karikiriki, n aron te reirei ibukin te ai ni moone ike e a bukinaki iai te Atua ae tatangira n aroaron te Riaboro aika kammaraki.​—Ieremia 7:31, BG; 1 Ioane 4:8; kabotaua ma Mareko 9:17-27.

14. Tera aroia aomata tabeman ngkana a ataa aran te Atua?

¹⁴ Ko kakatonga n tataekina aran Tamam are i karawa? Ko buokiia aomata nako bwa a na ataa te ara ae tabu aei? E ongo temanna te aine i Paris i Buranti bwa a ataa aran te Atua Ana Tia Kakoaua Iehova, ngaia are e a butiia te tia Kakoaua are e kaitiboo ma ngaia imwina bwa e na kaota te ara anne nakoina man te Baibara. Ngke e wareka Taian Areru 83:18 neiei ao e rangi ni korakora rotakina iai. E a moana ana reirei n te Baibara ao e a riki ngkai bwa te tari te aine ae kakaonimaki ae beku n te aba teuana. Ngke e moan nora aran te Atua n te Baibara te aine ae kaain te Katorika ae maeka i Aotiteria, ao e a bon tang naba ibukini kukureina. E a tia ngkai n riki bwa te regular bwaiania neiei i nanon ririki aika bati. N taai aika tibwa nako, ngke a kaota aran te Atua nakon temanna te aine n oin ana Baibara taani Kakoaua i Jamaica, e a boni bwaro naba rannimatan neiei ibukini kimwareireina. Mangaia are, kakatonga n tataekina aran te Atua ao kakairi iroun Iesu ni kaotiota te ara ae kakawaki aei nakoia aomata nako.

“Tai Tangira Aia Waaki Kaain te Aonnaba”

15, 16. Tera aia iango Kristian ni koaua ibukin aia waaki kaain te aonnaba ao baikara titiraki aika ti riai n titirakinira iai?

¹⁵ “Tai tangira aia waaki kaain te aonnaba ke waakina nako. Ngkana iai ae tangira aia waaki kaain te aonnaba, ao e aki mena tangiran te Tama i nanona.” (1 Ioane 2:15) A tei ni kaitaraa Iehova ao taamneina ae raoiroi aia waaki kaain te aonnaba ma aroaroia n tangiri bwaikorakin te maiu aei. Mangaia are, a aki tii rawa n arona aroia kaain te aonnaba taan rimwini Kristo ni koaua. Ma a bon rawa naba n tangira te aonnaba kioina ngkai a ataia bwa e korea ae kangai te tia rimwini Kristo ae Iakobo: “Te iraorao ma kaain te aonnaba . . . bon ribaan te Atua.”​—Iakobo 4:4.

¹⁶ E kona ni kangaanga touani mwin ana taeka Iakobo n te aonnaba ae a mwaitikurikuri iai kariri. (2 Timoteo 4:10) Ai ngaia are, e tataro Iesu ibukia taan rimwina ni kangai: “I aki bubutiiko bwa ko na anaiia mai buakoia kaain te aonnaba, ma I butiiko bwa ko na kawakinia mairoun teuare buakaka. A aki arona aroia kaain te aonnaba, n arou naba ngai ae I aki arona aroia kaain te aonnaba.” (Ioane 17:15, 16) Titirakiniko: ‘I kekeiaki bwa N na aki arona aroia kaain te aonnaba? A atai au koaua ibukini bukamaru ao katei aika aki boraoi ma te Baibara aomata nako, n ikotaki ma baike tao a aki moan riki mairouia beekan ma e kaotiotaki raoi iai nanoia kaain te aonnaba?’​—2 I-Korinto 6:17; 1 Betero 4:3, 4.

17. Tera ae kona n anai nanoia aomata aika raoiroi bwa a na tei n ana itera Iehova?

¹⁷ Ni koauana, e na aki reke tangirara n te aonnaba ngkana ti kabotoi ara reirei i aon te Baibara, ma tao e na kauekea kan ongoraeia aomata aika raoiroi nanoia. E koaua bwa ngkana a kunea aomata ae e boto raoi ara onimaki i aon te Baibara ao e irekereke ma aroaroni maiura ni kabane, tao ane a na taekina ae ai aron aei nakoia taani kabiraki: “Ti na airi ma ngkami, ba ti ongo ba E memena te Atua i roumi.”​—Tekaria 8:23, BG.

Kaotiota te Tangira ni Kristian ni Koaua

18. Tera ae irekereke ma kaotiotan ara tangira ibukin Iehova ao raora n aomata?

¹⁸ E taku Iesu: “Ko riai n tangira Iehova ae Atuam ma nanom ni kabanea, maium ni kabanea ao am iango ni kabanea” ao “ko riai n tangira raom n aomata n aron tangiram i bon iroum.” (Mataio 22:37, 39) Te tangira anne (ae te a·gaʹpe n te taetae ni Kuriiti) bon te tangira ae boto i aon te riai, te aroaro ni maiu ae riai iroura ao ae riai i mataia aomata, ma n angiin te tai e irekereke ma korakoran rotakin te nano. E kona ni karika te tangira ae nako man te nano ni koaua. (1 Betero 1:22) Boni kaitaraan raoi te bangaomata bwa e kaotiotaki raoi n taeka ao mwakuri aika kaota mwannanoaia aomata.​—Wareka 1 I-Korinto 13:4-7.

19, 20. Taekin rongorongo tabeua aika kaota mwaakan te tangira ni Kristian.

¹⁹ A kona Kristian ni koaua ni karaoi baika a aki kona ni karaoi aomata nako, n aron te tokanikai i aoni kangaanga ni kaineti ma kakaokoron te reeti, te katei ao bwaai n tutuki man te tautaeka, ibukina bwa te tangira bon uaan te taamnei ae raoiroi are mairoun te Atua. (Wareka Ioane 13:34, 35; I-Karatia 5:22) A rangi n ringaki nanoia te koraki aika ai aroia tiibu ngkana a nora te aeka n tangira anne. N te katoto, ni moan irin te roro n rikirake ae te mwaane ae te I-Iutaia ae maeka i Iteraera n te botaki ni Kristian, ao e rangi ni mimi ngke e noriia taari mwaane, ae te I-Iutaia ao te I-Arabia ni kaai n taromauria Iehova. Ibukin anne, e a moanna ni katoatai ni kaakaei bobotaki teuaei ao n reirei naba n te Baibara. Ko kaotiota te tangira ae nako mai nanom nakoia taari? Ao ko kakorakorako ni karababaa am tangira ni butimwaeia ake a a tibwa roko n te Tabo n Taromauri, n aki ongeia bwa kaain ia, tera karani kunia ke tao a kaubwai ke a aki?

²⁰ Ti kataia ni kaotiota tangiraia aomata nako ngkai Kristian ni koaua ngaira. N te aba ae El Salvador, iai te tia uarongorongo ae te roro n rikirake ae te aine ae reirei n te Baibara ma te aine ae te Katorika ae 87 ana ririki, ae rangi ni matoatoa n ana Aro. N te bong teuana, e a rangi ni kakaiaki aorakin neiei ao e a karinaki n te onnaoraki. Ngke e a okira mwengana, ao e a kakawaraki irouia taani Kakoaua ao a taraia raoi bwa e na iai kanana. A kakaraoa aei i nanon tao teuana te namwakaina. Akea mai buakoia kaain ana Aro neiei ae kakawaria. Tera mwina? E a karenakoi ana taamnei, e buuta arana man ana Aro ao e a moana ana reirei n te Baibara. Eng, iai mwaakan te tangira ni Kristian! E kona n rotii naano n aaro aika tao a na aki kona n rotaki iai n te taetaenikawai.

21. Ti na kanga ni karekea mweraoira nakon taai aika a na roko?

²¹ N te tai ae e a rangi ni kaan, ao e na kangai Iesu nakoia aomata nako ake a taku bwa aongkoa a toro irouna: “I bon aki kinaingkami naba teutana! Naako mairou, ngkami aika taani kakaraoa ae buakaka.” (Mataio 7:23) Mangaia are, ti bia karikii uaa aika karineaki iai te Tama ao te Nati. E taku Iesu: “Ane ongo au taeka aikai ma ni kakaraoi, e na atongaki bwa te aomata ae wanawana ae katea ana auti i aon te bwaa.” (Mataio 7:24) Eng, ngkana ti kaotira bwa ngaira taan rimwini Kristo ni koaua, ti na karekea iai akoara iroun te Atua ao mweraoira nakon taai aika a na roko ae titeboo ma e kateaki i aon te bwaa!

[Kabwarabwara ae nano]

Ko Uringnga?

• A kanga ni kaokoroaki taan rimwini Kristo ni koaua ma Kristian ni kewe?

• Taekin tabeua ‘uaa’ aika kanikinaeaia Kristian ni koaua.

• Baikara tiia aika ko kona n uaiakin ngkana ko na kaotiota uaan te Kristian?

[Taamnei n iteraniba 21]

Bon anuam te katoatai ni kamanena te Baibara n am mwakuri ni minita?

[Taamnei n iteraniba 23]

A ataa am koaua aomata nako ni kaineti ma bukamaru aika aki boraoi ma te Baibara?