Te Teei ae Iesu

A maeka i Natareta Ioteba ma Maria ao Iesu, n ikotaki ma natiia mwaane ao aine ake tabeman. E boutokaiia ana utu Ioteba n ana mwakuri ae te kabentaa, ao e reireinia taekan Iehova ma ana Tua. A katoatai n nanako te utu aei nakon te tinakoka n taromauri ao a nanako Ierutarem ibukin te Toa ae te Riao ni katoa ririki.

Ngke 12 ana ririki Iesu, a mwananga ana utu n te kawai ae abwabwaki nako Ierutarem n aron ae a taneiai iai. A rangi ni bati n te kaawa aomata ake a roko bwa a na bukamarua te Toa ae te Riao. Imwin anne, a a mwananga n oki nakoni mwengaia Ioteba ma Maria ao a taku bwa e mena Iesu i buakoia raoia ni mwananga. Ma ngke a kakaaea i buakoia aia koraki, ao a aikoa kunea.

A okira Ierutarem ao a kakaaea natiia i nanon tenibong. N tokina ao a a roko n te tembora. A nora Iesu n tekateka i buakoia taan reirei ma n ongora irouia ao n tabeki titiraki. A rangi n anaaki nanoia taan reirei iroun Iesu ngaia are a a manga titirakinna. Ao a mimi n ana kaeka. A a kona n ataia bwa e ota raoi n Ana Tua Iehova.

A rangi n raraoma Ioteba ma Maria. E taku Maria: ‘Natiu, ti a kua ni kakaaeko n taabo nako! Ko mena ia?’ E taku Iesu: ‘Ko aki ataia ae I riai ni mena ikai n ana auti Tamau?’

E a oki Iesu ma ana karo nakoni mwengaia i Natareta. E reireinaki Iesu te kabentaa iroun Ioteba. N am iango, te aeka n aomata raa Iesu ngke te teei? Ngke e a ikawairake, e ririkirake wanawanana ao e akoaki iroun te Atua ao aomata.