Taekini Baika A Kan Ongoraei Aomata

Te Baere E Karaoia Iesu

TAAMNEI: Iesu ao te Aine i Taun te Mwanibwa

1. Mataku n te TAAMNEI, ke wareka Ioane 4:6-9. Imwina ao nori titiraki aikai:

1. Tera ae e noria Iesu iroun te aine arei imwain ae e moana ana maroro?

2. E taku Iesu: “Anganai nimau.” E aera ngkai aei te anga ae uaana ni moanakin te maroro?

Tera Reireiara Mairoun Iesu?

2. E na nakoraoi riki ara maroro ngkana ti moanna ma te bwai ae e kan ongoraeia te aomata.

Kakairi Iroun Iesu

3. Tauraoi ni kaangaraoiko. Tai kataua bwa ko na moana am maroro ma te boto n iango are ko a tia ni katauraoia. Moanna ma te bae a iaiangoia aomata n te bong anne. Titirakiniko aei:

1. ‘Tera ngkai te rongorongo?’

2. ‘Tera ae a mamaroroakinna kaain rarikiu, raou ni mwakuri, ke raou n reirei?’

4. Kamatairikiko. Titirakiniko aei:

1. ‘Tera ae e karaoia ngkai te aomata? E na tera ae e iaiangoia?’

2. ‘Tera ae I kona n ataia man oneana, teina, ke mwengana, ni kaineti ma baika e kakoauai ke kateina?’

3. ‘E nakoraoi te tai aei ngkana I maroro ma ngaia?’

5. Kakauongo.

1. Tai taua atin te maroro.

2. Kaungaa te aomata bwa e na kaota nanona. Ngkana e angaraoi, tabeki titiraki.