Kristian Aika A Tei I Nuka I Nanoni Boong Aika Kaitira
“Tiaki ana bwai te aba ngaiia, n ai arou ngkai tiaki ana bwai te aba Ngai.”—IOANE 17:16.
1, 2. Tera ana taeka Iesu ibukin aia iraorao taan rimwina ma te aba aei, ao baikara titiraki aika a riki ma iai?
N TE kabanea n tairiki are e maiu iai Iesu i aon te aba bwa te aomata ae kororaoi, e karaoa ana tataro ae ananau ae ongoraeaki irouia taan rimwina. N te tataro anne, e taekina te koaua ae irekereke ma maiuiia Kristian ni koaua n tatabemania nako. E taekinia taan rimwina ni kangai: “I a tia n angania am taeka; ao e ribaiia te aba, ba tiaki ana bwai te aba ngaiia; n ai arou ngkai tiaki ana bwai te aba Ngai. I aki tataro ba Ko na uotiia nako mai aon te aba, ma I tataro ba Ko na kawakinia mairoun teuare buakaka. Tiaki ana bwai te aba ngaiia, n ai arou ngkai tiaki ana bwai te aba Ngai.”—Ioane 17:14-16.
2 Uoua ana tai Iesu n taekina ae taan rimwina bon tiaki ana bwai te aba ngaiia. Aroia aei ni kaokoroia ma te aba e na karika te itabarara nakoia, bwa a na riribaaki irouia kaain te aonnaba. Ma e ngae n anne, a aki riai ni bwara nanoia Kristian, bwa e na boni kawakinia Iehova. (Taeka N Rabakau 18:10; Mataio 24:9, 13) Ni kaineti ma ana taeka Iesu, ti kona ngkanne n titiraki ni kangai: ‘Bukin tera bwa Kristian ni koaua a na kaokoro ma te aba? Tera ae nanonaki n ae tiaki ana bwai te aba ngaiia? Ngkana a na riribaaki Kristian irouia kaain te aonnaba, ao tera aia kaantaninga Kristian ibukin te aba? Ao ae moamoa riki, tera aia kaantaninga ni kaineti ma tautaeka ake i aon te aba?’ Kaeka nakon titiraki aikai aika kuneaki n te Baibara a rangi ni kakawaki, ibukina bwa a rotiira ni kabaneira.
“Mairoun te Atua Ngaira”
3. (a) Tera ae e karikira bwa ti na okoro ma te aba? (b) Tera ae kakoauaa ae te aonnaba aei e “wene i nanon teuare buakaka”?
3 Ara iraorao ae kaan ma Iehova e kaota bukina teuana ae tiaki ana bwai te aba ngaira. E korea ae kangai te abotoro Ioane: “Ti ataira ba mairoun te Atua ngaira, ao a bane kaain aonaba ni wene i nanon teuare buakaka.” (1 Ioane 5:19) A koaua ana taeka Ioane ibukin te aba aei. Taiani buaka, mwakuri ni kakeru, te iowawa, te karawawataki, te babakanikawai ao ai te wene ni bure ae taabangaki ngkai, a kakoauaa bwa te aba aei e kairaki iroun Tatan, ao tiaki te Atua. (Ioane 12:31; 2 I-Korinto 4:4; I-Ebeto 6:12) Ngkana e a riki te aomata bwa kaain Ana Tia Kakoaua Iehova, e na aki karaoi ke n tangiri mwakuri aika bubuaka aikai. Ibukin anne, bon tiaki ngaia ana bwai te aba.—I-Rom 12:2; 13:12-14; 1 I-Korinto 6:9-11; 1 Ioane 3:10-12.
4. Baikara aaro ake ti kaotia iai bwa bon ana bwai Iehova ngaira?
4 E taku Ioane bwa e kaokoro aroia Kristian ibukina bwa boni “mairoun te Atua” ngaiia. Aomata ni kabane ake a katabui maiuiia nakon Iehova a a bon riki bwa Ana bwai. E kangai te abotoro Bauro: “Ngkana ti maiu, ao ti maiu i bukin te Uea. Ngkana ti mate, ao ti mate i bukin te Uea. Ngkana ti maiu ke ti mate, ao bon ana bai te Uea ngaira.” (I-Rom 14:8, BK; Taian Areru 116:15) Ti riai n taromauria Iehova n tii ngaia, kioina ngkai ana bwai ngaira. (Te Otinako 20:4-6) Mangaia are te Kristian ni koaua e aki kona ni moanibwaia bwain te maiu aei. E bon aki kamatauningai banna ke bwaai aika karineaki irouia taian tautaeka, ma e aki kona ni karaoa te mwakuri teuana ke ni bwaina te iango teuana ni kaineti ma bwaai aikai, ae kaotia bwa e karinea n te karinerine ae ai aron te taromauri. E bon aki atuaniia taan takaakaro aika tanoata taekaia, ke aomata tabeman ake a mataiakinaki ni boong aikai. E angania aomata inaaomataia ni karaoa ae a kani karaoia, ma e taromauria te tia Karikiriki n tii ngaia. (Mataio 4:10; Te Kaotioti 19:10) Aroarona aei bon te bwai naba teuana ae kaokoroa ma te aba.
“Tiaki mai aon te Aba Ueau”
5, 6. Ti a kanga ni kaokoro ma te aba ngkai ti aantaeka nakon ana Tautaeka n Uea te Atua?
5 Bon taani kakairi iroun Kristo Iesu Kristian, ao a aantaeka i aan ana Tautaeka n Uea te Atua. Ibukin anne, ao a kaokoro ma te aba. E taekina ae kangai Iesu ngke e kateaki i matan Bontio Birato: “Tiaki mai aon te aba ueau: ngkana mai aon te aba ueau, ao a buaka au aomata, ba e kawa n anga te aba Ngai nakoia I-Iutaia: ma ngkai, tiaki maikai ueau.” (Ioane 18:36) Te Tautaeka n Uea bon te bwai ni mwakuri ae na kabonganaki ibukin katabuan aran Iehova, e na boutokaa riain ao mwaakana n tautaeka, ao e na kakoroa bukin ana kaantaninga i aon te aba n ai aron karaoana i karawa. (Mataio 6:9, 10) N ana mwakuri ni minita Iesu i aon te aba, e tataekina euangkerion te Tautaeka n Uea, ao e taku bwa a na kaakaraoa anne taan rimwina, ni karokoa tokin te waaki i aon te aba. (Mataio 4:23; 24:14) N 1914, a koro bukin ana taeka ni burabeti Te Kaotioti 11:15: “E riki te uea ae aonaba ba uean ara Uea ao uean ana Kristo; ao ane E na uea n aki totoki.” N te tai ae e a kaan rokona ngkai, bon tii te Tautaeka n Uea i karawa ae e na tautaeka i aoia aomata. (Taniera 2:44) Bon iai te tai teuana ae taan tautaeka ni kabane a na kairoroaki bwa a na butimwaea mwaakan te tautaeka anne.—Taian Areru 2:6-12.
6 Ibukina bwa a atai bwaai aikai, Kristian ni koaua aika maiu ngkai a riki bwa kaain ana Tautaeka n Uea te Atua, ao a ira nanon ana reirei Iesu are a na “ukera moa Uean te Atua ma te raoiroi ae e tangiria.” (Mataio 6:33, BK) Tiaki nanon anne bwa a aki-kakaonimaki nakon te tautaeka n aaba ike a mena iai, ma e nanonaki iai bwa a kaokoro ma te aba ni kaineti ma bwaai n taamnei. Te mwakuri are a moanibwaia Kristian ni boong aikai are e moanibwaiaki naba n te moan tienture, bon ‘kaotiotan taekan Uean te Atua.’ (Mwakuri 28:23) Akea te tautaeka ae riai ni kataia n tuka karaoan te mwakuri ane reke mairoun te Atua anne.
7. Bukin tera ngkai Kristian ni koaua a tei i nuka, ao a kanga n tia ni kaotiota aroia anne?
7 A tei i nuka Ana Tia Kakoaua Iehova ni kaineti ma kauntaba ake a riki i marenaia baronga tabeua ke botannaomata, ake a riki i nanon te ka-20 ao te ka-21 n tienture ibukina bwa bon ana bwai Iehova ngaiia, ao ibukina bwa a kakairi iroun Iesu ma n aantaeka nakon ana Tautaeka n Uea te Atua. A aki tabeitera ao a aki tabeka aia bwai ni buaka ni kaaitara ma aomata tabeman, ao a aki boutokai aia waaki aomata n aia taeka. A kaota aia onimaki ae kamimi ngke e korakora bwainikirinaia, n aroia ni kakairi n reirei aikai ake a taekinaki ngkoa nakoia taian Nazi i Tiaman n 1934: “Akea nanora n aia waaki n tautaeka aomata, ma ti anga nanora ni kabane nakon ana Tautaeka n Uea te Atua ae kairaki iroun te Uea ae Kristo. Ti aki kona n iowawa ke n tiritiri nakoia aomata. Ti na kukurei ni maeka ma te rau ma ni karaoa ae raoiroi nakoia aomata ni kabaneia, n aron ae ti kona.”
Taan Raoi ao Taan Tei Ibukin Kristo
8, 9. A kanga Ana Tia Kakoaua Iehova n taai aikai n riki bwa taan raoi ao taan tei, ao tera aron rotakin aia iraorao ma botannaomata iai?
8 E taekina taekana ma raona ni Kristian aika kabiraki Bauro ngke e kangai: “Taan raoi ngaira i bukini Kristo, n ai aron te Atua ngkai kaanga E butingkami i roura.” (2 I-Korinto 5:20; I-Ebeto 6:20) Man 1914, Kristian aika kabiraki n te taamnei a tau n aranaki bwa taan raoi ibukin ana Tautaeka n Uea te Atua. Bon ‘natin’ te tautaeka n uea anne ngaiia. (Mataio 13:38; I-Biribi 3:20; Te Kaotioti 5:9, 10) Irarikin anne, Iehova e a tia ni kairiia nako mai buakoia botannaomata nako, “te koraki ae uanao” aika “tiibu tabemaang.” Te koraki aikai bon Kristian aika kaantaninga te maiu i aon te aba, ao a weteaki bwa a na boutokoa aia mwakuri n tia raoi naati aika kabiraki. (Te Kaotioti 7:9; Ioane 10:16) “Tiibu tabemaang” aikai a kona n aranaki bwa “taan tei” ibukin ana Tautaeka n Uea te Atua.
9 A aki tabarea aia waaki kaain te aba ike a beku iai, te tia raoi ma ana tia mwakuri. N aron anne, a tei i nuka Kristian ni kaineti ma ana waaki n tautaeka nako te aonnaba aei. A aki tabeitera ni kaineti ma kauntaeka i marenaia botannaomata, reeti n aomata, natannaomata, ke waaki ni karikirake. (Mwakuri 10:34, 35) Ma a “kakaraoa ae raoiroi nakoia aomata ni kabaneia.” (I-Karatia 6:10) Aroia Ana Tia Kakoaua Iehova n tei i nuka, e nanonaki iai bwa akea te aomata ae kona n rawa ni butimwaea aia rongorongo ibukina bwa aongkoa a tabeitera ni kaineti ma kauntaeka aika boto i aon kaokoron te reeti, te botannaomata, ke te baronga.
Kinaaki n te Itangitangiri
10. Tera aron kakawakin te tangira, nakon te Kristian?
10 Irarikin bwaai aika a a tia n taekinaki, a tei i nuka Kristian ni kaineti ma ana waaki te aonnaba ibukin aia iraorao ma raoia ni Kristian. E taekina ae kangai Iesu nakoia taan rimwina: “Ane a na ataingkami aomata ni kabaneia ba au reirei ngkami n aei, ngkana kam i tangitangiri.” (Ioane 13:35) Te itangitangiri n tari bon te aroaro ni Kristian teuana ae moan te kakawaki. (1 Ioane 3:14) E rangi ni korakora te kan iraorao i marenaia Kristian, bwa aia iraorao aei e irekereke naba ma aia iraorao ma Iehova ao Iesu. E aki kaonotaki aia tangira nakoia kaain aia ekaretia n taabo aika a mena iai. Ma e irekereke ma ‘taria aika a uamae nako i aonnaba.’—1 Betero 5:9, BK.
11. E a kanga aroia n itangitangiri Ana Tia Kakoaua Iehova i marenaia, n tia n rota anuani maiuia?
11 Ni boong aikai, a kaotiota te itangitangiri ni Kristian Ana Tia Kakoaua Iehova n te aro ae a kakoroa bukin taeka ake n Itaia 2:4: “A na ororoi aia kabaang ba winibarau, ao aia raanti n oniki ba bwaai ni koro-mwangani-kaai: a na aki tabeka te kabaang te botanaomata teuana ni buakana te botanaomata teuana, ao a na aki manga reireiia te buaka.” Ibukina bwa a reireinaki iroun Iehova, iai te rau i marenaia Kristian ni koaua ma te Atua, ao bon i marenaia naba. (Itaia 54:13) Ibukina bwa a tangira te Atua ma taria, ao a aki kona n tabeki bwaai ni buaka ni buakania iai raoia ni Kristian, ke aomata tabeman ake a maeka n aaba tabeua. Te rau ao te bonnano boni bwaai aika kakawaki aika irekereke ma aia taromauri, ao a kakoauaa bwa e mena taamnein te Atua i aoia. (Taian Areru 133:1; Mika 2:12; Mataio 22:37-39; I-Korote 3:14) A “ukoukora te raoi, . . . [a] kaeea ni kan tauua,” kioina ngkai a ataia bwa “a memena matan Iehova i aoia akana raoiroi ni kan akoia.”—Taian Areru 34:14, 15.
Aia Kaantaninga Kristian Ibukin te Aonnaba Aei
12. Tera ana kaantaninga Iehova ibukia kaain te aonnaba ae a katotongnga ngkai Ana Tia Kakoaua Iehova, ao a kanga ni karaoa anne?
12 E a tia Iehova ni kabuakaka te aonnaba aei, ma e tuai ni motika taekaia aomata n tatabemania nako. E na karaoa anne rinanon Iesu n Ana tai ae e a tia ni baireia. (Taian Areru 67:3, 4; Mataio 25:31-46; 2 Betero 3:10) Ni karokoa te tai anne, e bon tabe naba ngkai ni kaotiota te tangira ae korakora nakon te botannaomata. E anga naba natina ae ana rikitemanna bwa te kawai are a kona aomata ni kabane iai ni karekea te maiu are aki toki. (Ioane 3:16) Ngaira aika Kristian, ti katotonga ana tangira te Atua n te aro ae ti kaongoia aomata taekan ana bwai n ibuobuoki te Atua ake e a tia ni katauraoi ibukin kamaiuaia aomata. Ti karaoa anne e ngae ngkana a mwaiti aomata aika a rarawa iai.
13. Tera ae ti riai n iangoia ibukia taan tautaeka?
13 Tera ae ti riai n iangoia ni kaineti ma taan tautaeka ngkai? E kaekaa te titiraki anne Bauro ngke e korea ae kangai: “Ke a bane aomata n ongo irouia mataniwi aika a tei n te tautaeka, ba te tautaeka nako boni mairoun te Atua: a bane ni kateaki iroun te Atua tautaeka aika a tei ngkai.” (I-Rom 13:1, 2, BK) A kona n reke nakoa aika kakannato irouia aomata ao nakoa aika mangori naba. Ma n aki ongeia bwa tera nakoaia, ma aomata aikai a bane ni mangori riki nakon Iehova ae Moan te Mwaaka, bwa akea mwaakaia ngkana E aki kariaia anne. E aantaeka te Kristian nakon te tautaeka ibukina bwa karaoan anne e kaota ana ongeaba iroun Iehova. Ma tera ae na karaoaki ngkana e bobuaka ana tua te Atua ma ana tua te tautaeka n te aba teuana?
Ana Tua te Atua ao Ana Tua Kaitara
14, 15. (a) E a kanga Taniera ni kararoa te kangaanga ni kaineti ma te aki-ongeaba? (b) Tera ae a karaoia I-Ebera ake teniman ngke e a riki te kangaanga ae e irekereke ma te ongotaeka, ae e aki kona ni kararoaki?
14 Taniera ma raona ake teniman a karaoa te banna ni katoto ae moan te raoiroi n aron te ongotaeka iroun te tautaeka ao nakon te Atua. Ngke a taenikai rorongan Ebera aika aman aikai i Baburon, a ongeaba n tuan te aba, ao a waekoa n rineaki bwa a na anganaki te kataneiai ae kaokoro. E ataia Taniera bwa te kataneiai anne e na karika te bobuaka ma ana Tua Iehova, ngaia are e maroroakina taekan te kangaanga anne ma te mataniwi. Imwin te maroro, a karaoaki babaire aika kaokoro, are e tabeakinaki iai mataniwin nanoia I-Ebera ake aman. (Taniera 1:8-17) Ana Tia Kakoaua Iehova a kakairi naba iroun Taniera ngkana a karaua ni kabwarabwaraa aroia nakoia kaain te tautaeka n te aro n akoi, bwa a aonga ni kararoaki kangaanga aika kona n riki.
15 Ma e ngae n anne, n te taina, iai te kangaanga ae riki ae aki kona ni kararoaki, ae kaineti ma te aantaeka. E katea te boua ae abwabwaki n te aba ae aoraoi ae Rura ueani Baburon, ao e tuatua bwa bwakuaku n te tautaeka n ikotaki ma taani babaire ao taani moti, a na botaki ni bukamarua moan taromauriana. Raoraon Taniera ake teniman a a kaman tia n rineaki bwa taani babaire, ma ngaia are boni ngaiia naba ake a riai ni botaki iai. E baireaki te tai teuana n te botaki anne are kaaina nako iai a riai ni bobaraki i matan te boua arei. Ma a ataia I-Ebera aikai bwa e na urua ana tua te Atua te waaki aei. (Te Tua-Kaua 5:8-10) Ngaia are ngke a bane ni bobaraki aomata, ao a teimatoa n teitei naakai. E kakamaaku te mate ae katauaki bwa tuuaan te aomata ae urua ana tua te uea, ao ngke arona bwa e aki karaoa te kakai teuana te Atua, ao a na aki rawea maiuia; ma a kukurei riki ni kataua mateia nakon ae a na riaon ana taeka Iehova.—Taniera 2:49–3:29.
16, 17. Tera are a karaoia abotoro ngke a tuangaki bwa a na aki manga tataekina te rongorongo, ao bukin tera bwa a karaoa anne?
16 Ana abotoro Iesu Kristo ake a maiu n te moan tienture a kateaki i mataia mataniwia I-Iutaia ake i Ierutarem ma n tuangaki bwa a na aki uarongorongo n aran Iesu. Tera ae a karaoia iai? E mwiokoia Iesu bwa a na kakiritiania aomata mai buakoia botannaomata ni kabane, n ikotaki naba ma kaain Iutaia. E tuangia bwa a na kaotioti naba ibukina i Ierutarem ao ni katobibia te aonnaba. (Mataio 28:19, 20; Mwakuri 1:8) A ataia abotoro bwa ana tua Iesu a boraoi ma ana kaantaninga te Atua ibukia. (Ioane 5:30; 8:28) Mangaia are a kangai: “E riai te ongotaeka iroun te Atua, ao tiaki irouia aomata.”—Mwakuri 4:19, 20; 5:29, BK.
17 A bon aki karitei iai abotoro. (Taeka N Rabakau 24:21) Ma e ngae n anne, ngke taan tautaeka aika aomata a tuangia bwa a na aki karaoa nanon te Atua, ao a taekinna bwa ‘a na ongotaeka iroun te Atua, ao tiaki irouia aomata.’ E a tia naba Iesu n taekina ae ti riai n “angan te Embera ae bon oin ana bai, ao angan te Atua ae bon oin ana bai.” (Mareko 12:17, BK) Ngkana ti urua ana tua te Atua ibukin kani karaoan te bwai ae ti tuangaki iroun te aomata, ao titeboo ngkanne ma ti angan te aomata te bwai ae ti riai n angan te Atua. N onean mwin anne, ti angan te Embera bwaai ni kabane ake ana bwai, ma ti aantaeka riki nakon mwaakan Iehova ae moan te rietata. Boni ngaia te tia Tautaeka i aon Bwaai ni Kabane, te tia Karikiriki ae bon Nibwan te mwaaka ni kabane.—Te Kaotioti 4:11.
Ti na Teimatoa n Nene
18, 19. Tera te katoto ae raoiroi ae a a tia ni karaoia tarira aika mwaiti, ao ti na kanga ni kakairi irouia?
18 N te tai aei, angiia tautaeka n te aonnaba a ataia bwa Ana Tia Kakoaua Iehova a tei i nuka, ao ti karabwarabwa iai. Ma e korakora bwainikirinaia Taani Kakoaua n aaba tabeua. I nanon te ka-20 n tienture ao ni karokoa ngkai, tarira ao mwanera n onimaki tabeman, a rangi ni kakorakoraiia ngkai a buaka “n te buaka ae raoiroi ae ana buaka te onimaki.”—1 Timoteo 6:12.
19 Ti na kanga n teimatoa n nene n ai aroia? Te moanibwai, ti riai ni kakaantaninga rokon te kairiribai. Ti aki riai ni kubanako ke ni mimi ngkana ti bwainikirinaki. E kauringa Timoteo Bauro ni kangai: “Ai aroia naba aomata ni bane aika a kani maiu n tangiran te Atua i nanoni Iesu Kristo: a na bainikirinaki.” (2 Timoteo 3:12, BK; 1 Betero 4:12) Ti na bae ni mimi ngkana ti aki riribaaki, kioina ngkai ti maiu n te aonnaba ae e korakora iai te kairiri mairoun Tatan. (Te Kaotioti 12:17) Ibukina bwa ti kakaonimaki, e na teimatoa naba n iai aomata tabeman aika a ‘mimi iroura ao a na taetaebuakaira.’—1 Betero 4:4.
20. Baikara koaua ake ti a kauringaki taekaia ake a kona ni kakorakoraira riki?
20 Te kauoua ni bwai, ti kakoauaa bwa e na boutokaira Iehova ma ana anera. N aron are e taekinna ngkoa Eritai, “a maiti riki aika mena i roura nakoia ake a mena i rouia.” (2 Uea 6:16; Taian Areru 34:7) E kona ni kariaia Iehova waakinakon aia mwakuri taani kairiribai i nanon tabeua te tai, bwa tao iai ana kaantaninga ae riai ae e uaiakinna iai. Ma e ngae n anne, e na bon anganira naba te korakora ae ti kainnanoia, bwa ti aonga n nanomwaaka iai. (Itaia 41:9, 10) A a tia ni kamateaki tabeman, ma a aki bwara nanora iai. E taekina ae kangai Iesu: “Tai makuia akana a kamatea te rabata ao a aki kona ni kamatea te tamnei: ma kam na maka Teuare e kona n tiringa te rabata ma te Tamnei i mone.” (Mataio 10:16-23, 28, BK) Kaanga “iruwa” ngaira nakon te waaki ae i aon te aba ae ngkai. Ti kabongana ara tai ngkai bwa ti “aonga ni karekea iai te maiu ni koaua,” ae te maiu n aki toki n ana aonnaba ae boou te Atua. (1 Betero 2:11; 1 Timoteo 6:19, BK) Bon akea te aomata ae kona n tukira man te kaniwanga anne ngkana ti teimatoa ni kakaonimaki iroun te Atua.
21. Tera ae ti riai n ururingnga?
21 Mangaia are ti na uringa ae ti rangi n akoaki ngkai ti kona n iraorao ma Iehova ae te Atua. Ti bia kakaitau ibukina bwa ti a kakabwaiaki ngkai ti a riki bwa taan rimwin Kristo aika a aantaeka nakon te Tautaeka n Uea. Ti bia tangiriia tarira ma nanora ni kabane, ma ni kukurei naba n tangirara irouia. Ao ae kakawaki riki, ti bia ongotaeka n ana taeka te tia areru aikai: “Ko na kaantaninga Iehova: Ko na korakora, ao kabebetea nanom; Eng, ko na kaantaninga Iehova.” (Taian Areru 27:14; Itaia 54:17) Ti na kona iai ni katotonga aroia Kristian aika mwaiti kurikuri ake a maiu n taai aika nako, ma n teimatoa n nene n ara kaantaninga. Ao ti na riki bwa Kristian aika tei i nuka aika tiaki ana bwai te aba.
Ko Kona ni Kabwarabwaraa?
• E a kanga ara iraorao ma Iehova ni kaokoroira ma kaain te aonnaba aei?
• Ti na kanga ngaira aika ti aantaeka nakon ana Tautaeka n Uea te Atua, n teimatoa n tei i nuka n te aonnaba aei?
• E a kanga tangiraia tarira n onimaki iroura ni buokira bwa ti na tei i nuka, ma ni kaokoro ma te aba?
[Taamnei n iteraniba 9]
Tera aron rotakin ara iraorao ma te aonnaba aei, ngkai ti aantaeka nakon ana Tautaeka n Uea te Atua?
[Taamnei n iteraniba 12]
Tera ae riai ni karaoaki ngkana taan tautaeka a tuangira bwa ti na urua ana tua te Atua?