Rooro-n-rikirake, Kamoamoaa Iehova!

“Kamoamoa Iehova mai aonaba, . . . rorobuaka ma ateiaine.”—Taian Areru 148:7, 12.

1, 2. (a) Aekan waaki raa ake a tiatianaki iai rooro-n-rikirake aika mwaiti, aika bwaai aika a atai taekaia? (b) Bukin tera bwa a aki riai n un rooro-n-rikirake n tiatianakiia mairouia aia karo?

A ATAI raoi baika a tuai ni kariaiakaki ni karaoi rooro-n-rikirake. A mwaiti i buakoia aika a kona n tuangko bwa te ririki raa are a na riai ni karoko iai imwain are a na kariaiakaki n toua nanon te kawai n tii ngaia, ke te aoa iraua n te tairiki are a na riai ni matu iai, ke te ririki raa are a kaukaki iai ni kabuta te kaa. N taai tabetai, e kona n namakinna te roro-n-rikirake bwa a rangi ni mwaiti mai buakon ana bubutii n ingainga ae a kaaitaraki ma te kaeka aei: “Tataninga ni karokoa ae ko a ikawai.”

² Kam ataia ngkami aika rooro-n-rikirake bwa a namakinna ami karo ae e raoiroi tiatianakimi n aron aikai, tao ibukin kamanoami. Kam boni bae n ataia naba bwa e kukurei Iehova ngkana kam ongotaeka irouia ami karo. (I-Korote 3:20) Ma ko a tia n namakinna bwa man tiatianakimi aikai, ao ai aron ae ko tuai ni waakina raoi maium ni koaua? A bane bwaai aika kakawaki ni katabuakaki karaoaia iroum, ma tii ngkana ko a ikawai? Tiaki ngaia anne te koaua! Iai te mwakuri ae e tabe ni karaoaki ni boong aikai, ae e a rangi ni kakawaki riki nakon mwakuri aika ko tabe ni kakaantaningai karaoaia. Kam kariaiakaki ngkami aika rooro-n-rikirake bwa kam na karaoa te mwakuri aei? Kam aki tii kariaiakaki iai, ma e kaoingkami te Atua are Moan te Rietata bwa kam na karaoia!

3. E kaoia rooro-n-rikirake Iehova bwa a na anganaki te kakabwaia raa, ao baikara titiraki aika ti na rinanoi ngkai?

³ Tera te mwakuri anne? Nora are taekinaki n te kibu ae aana te kaongora aei: “Kamoamoa Iehova mai aonaba, . . . rorobuaka ma ateiaine.” (Taian Areru 148:7, 12) Iai ikanne kakabwaiami ae moan te kakannato: Kam kona ni kamoamoaa Iehova. Ngkai te roro-n-rikirake ngkoe, ko kukurei ni karaoa te mwakuri aei? A mwaiti aika a kukurei iai. Ibukin norakina bwa e aera ngkai e manena karaoana, ao ti na maroroakin titiraki aikai. Te moanibwai, bukin tera bwa ko riai ni kamoamoaa Iehova? Te kauoua, ko na kanga ni kamoamoaa n te aro ae uaana? Te katenua, n ningai te tai ae raoiroi ibukin moanakin kamoamoan Iehova?

E Aera Bwa E na Kamoamoaki Iehova?

4, 5. (a) Ni kaineti ma te Areru 148, baikara bwaai aika a kamimi iangoaia? (b) A na kanga bwaai aika karikaki aika a aki kona n taetae ke n iaiango, ni kamoamoaa Iehova?

⁴ Bukina ae rangi ni kakawaki ngkai e kamoamoaki Iehova, bwa boni ngaia te tia Karikiriki. E buokira te Areru 148 bwa ti na kaatuua iangoan te koaua aei. Iangoia: Ngkana ko a uakaan ma te koraki n aomata aika a kaai n ungari bwanaia aika tangiraoi n anenea te kuna ae ringa te nano, e na tera aron am namakin? Tera ae ko na karaoia ngkana ko ataia bwa mwanewen te kuna a boni koaua, a kaotiotii iango aika ko ataia bwa a kakawaki, a kakimwareirei, ao a kaunganano? Ko na namakina kan reiakinan taekana ao n ira buakon te anene? Angiina i buakora a na bae ni karaoa anne. E kaotia te Areru 148 bwa ko a kaitaraa naba ma te aekaki anne ngkai, ma ko a kabwaia riki nakon anne. Te areru anne e kabwarabwaraa taekan te koraki n aomata ae korakora mwaitiia, aika a bane ni katiteuanaki ni kamoamoaa Iehova. Ma ngkana ko wareka te areru aei, tao ko kona n nora te bwai ae kamimi iai. Tera te baenne?

⁵ A mwaiti taani kamoamoaa Iehova aika a taekinaki n te Areru 148, aika a aki kona n taetae ke n iaiango. N te katoto, ti wareka taekan taai, namwakaina, itoi, te tinoo, maunga, ao ai tabuki, aika a kamoamoaa Iehova. A na kanga bwaai aika karikaki aika aki-maiu aikai ni karaoa anne? (Kibuna 3, 8, 9) A karaoa aron are a karaoia naba taian aroka, manin taari, ao boni maan. (Kibuna 7, 9, 10) Ko a tia ni matakuakina bungin taai ae tamaroa ke n taraa namwakaina ae e a tabwanin raoi ni buti i karawa ae on n taian itoi, ke ni ngarengare ni kukurei n noriia maan n takaakaro, ke ni miiakina te aba ae moan te tamaroa? Ko a tia ngkanne n “ongo” te anene ni kamoamoa man bwaai aika karikaki. Bwaai ni kabane aika e karaoi Iehova, a kauringira bwa boni ngaia te tia Karikiriki ae moan te mwaaka, ao akea riki temanna n te iuniweeti aei, ae rangi ni korakora, ae e rangi ni wanawana ke n rangi n tatangira, n ai arona.​—I-Rom 1:20; Te Kaotioti 4:11.

6, 7. (a) Taian Areru 148 e kabwarabwaraa bwa baikara ana karikibwai Iehova aika wanawana aika a kamoamoaa? (b) Bukin tera bwa ti kona ni kairaki bwa ti na kamoamoaa Iehova? Kabwarabwaraa.

⁶ E kabwarabwaraa naba te Areru 148 taekan ana karikibwai te Atua aika wanawana, aika a kamoamoaa Iehova. Ni kibuna 2, ti kunea iai taekan ana “taanga” Iehova i karawa, aika taian anera, bwa a kamoamoaa te Atua. Ni kibuna 11, aomata aika korakora ao ni kona n ringa nanoia aomata, n aroia ueea ma taani moti, a kaoaki naba bwa a na ira buakon kamoamoan Iehova. Ngkana e reke kukureia anera aika korakora ni kamoamoan Iehova, akea ngkanne mai buakoia aomata aika mangori ae e riai n taku bwa e a rangi ni kakannato nakon Iehova, ao e na aki neboia. Ngkanne ni kibuna 12 ao 13, ngkami rooro-n-rikirake, kam a kaoaki bwa kam na iri naba ni kamoamoaa Iehova. E ringaki nanom ni kani karaoa anne?

⁷ Iangoa te kabotau. Ngkana iai raoraom ae ko rangi ni kaan ma ngaia ao iai rabakauna ae kamimi tao n te takaakaro, te korobanna, ke te katangitang, ko na taekina arona nakoia am utu ao raoraom riki tabeman? Ko na boni bae. Reiakinan bwaai ni kabane aika e a tia ni karaoi Iehova, e kona n rotira naba n aron anne. N te katoto, e taekinaki n Taian Areru 19:1, 2 (NW) bwa karawa ae on n taiani itoi “e karika ‘atoatongan taian taeka aika bati.” Ibukira ngkanne, ngkana ti iangoi bwaai aika kamimi ake e a tia ni karaoi Iehova, ao e kangaanga iroura bwa ti na aki taekina Atuara nakoia tabemwaang.

8, 9. Baikara bukina ake e tangirira iai Iehova bwa ti na kamoamoaa?

⁸ Bukina naba teuana ae kakawaki iai kamoamoan Iehova, bon ibukina bwa e tangirira bwa ti na karaoia. Bukin tera? Ibukina bwa e kainnanoa kamoamoana mairouia aomata? E aki. Ngaira aika aomata ti kona ni kainnanoa kamoamoakira n taai tabetai, ma e bon rangi n rietata riki Iehova nakoira. (Itaia 55:8) E aki nanokokoraki bon ibukina ke n aroarona. (Itaia 45:5) Ma e bon tangirira bwa ti na kamoamoaa ao e kukurei ngkana ti karaoa anne. Bukin tera? Iangoi bukina aika uoua. Te moan, e ataia bwa ti riai ni kamoamoaa. E karikira ma kainnanoakin bwaai n taamnei ao tangiran te taromauri. (Mataio 5:3) E kukurei Iehova n norira ni kakoroan bukin anne, ao ai tii te arona ma aron kakukureiaia am karo n noriko ni kang amwarake aika a ataia bwa a raoiroi ibukim.​—Ioane 4:34.

⁹ Te kauoua, e ataia Iehova bwa a riai aomata tabemwaang n ongora aron kamoamoana iroura. E korei taeka aikai te abotoro Bauro nakon te roro-n-rikirake are Timoteo: “Ko na tarataraiko ao tarataraa te reirei: ko na memena ni baikai; ba ngkana ko karaoa aei, ao ko kamaiuko iai ma ake a ongo i roum.” (1 Timoteo 4:16) Eng, ngkana ko reiakinia aomata taekan Iehova ae te Atua, ni kamoamoaa, ao a na kona naba n ataa Iehova. Te atatai anne e kona ni karekea nakoia te maiu are aki toki!​—Ioane 17:3.

10. Bukin tera bwa ti namakinna ae ti kairaki bwa ti na kamoamoaa Atuara?

¹⁰ Ma iai riki bukin kamoamoan Iehova. Uringa te kabotau ibukin raoraom are rabakau. Ngkana ko ongo aia kewe tabemwaang ibukina, ni kabuakakaa arana ae raoiroi, tiaki te koaua bwa ko nang kananomatoako riki ni kamoamoaa? E a taetaebuakaki Iehova n te aonnaba aei. (Ioane 8:44; Te Kaotioti 12:9) Te koraki ake a tangiria a a kairaki bwa a na taekina te koaua ibukina, ni kaeta raoi etin taekana. Ko na tangiria naba ni kaota am tangira ao am kakaitau nakon Iehova ma ni kaotia bwa ko tangiria bwa e na riki bwa te tia Tautaekaniko, n onea mwin te boto ni kairiribai are Tatan? Ko kona ni karaoi akanne ni kabane rinanon kamoamoan Iehova. Te titiraki ngkanne are imwina bwa ko na kanga ni kamoamoaa.

Aroia Rooro-n-Rikirake Tabeman ni Kamoamoaa Iehova

11. Baikara katoto man te Baibara ake a kaotia bwa a rangi n uaana rooro-n-rikirake ni kamoamoan Iehova?

¹¹ E kaotaki n te Baibara bwa a aki toki rooro-n-rikirake ni kamoamoaa Iehova n te aro ae uaana. N te katoto, iai te ateiaine ae kaain Iteraera, are e uotaki bwa te taenikai irouia kaain Turia. E ninikoria n uarongorongo ibukin ana burabeti Iehova are Eritai nakon ana toka te aine. E karaoaki te kakai imwin anne, ao e a riki iai te kaotioti ae korakora. (2 Uea 5:1-​17) E ninikoria naba Iesu n uarongorongo ngke e uarereke. Mai buakon bwaai ni kabane ake a kona n ribootinaki taekaia n te Baibara ibukin te roro-n-rikirake aei, ao Iehova e rinea teuana mai iai. Bon taekan are e riki ngke ai 12 ana ririki ni maiu Iesu, ao e ninikoria n titirakinia taan anga reirei n te tembora, ao a miroaroa nakekei ibukin ataakin aron nako Iehova ae bati irouna.​—Ruka 2:46-​49.

12, 13. (a) Tera are e karaoia Iesu n te tembora tabeua te bong imwain matena, ao tera aron rotakia aomata ake iai? (b) Tera ana namakin Iesu ibukin aia taeka ni kamoamoa ataeinimwaane aika uarereke?

¹² Ngke e a ikawai Iesu, ao e riing nanoia naba ataei bwa a na kamoamoaa Iehova. N te katoto, tabeua te bong imwain matena, ao e kabanea ana tai n te tembora i Ierutarem. E karaoi “bwai ni kamimi” ikekei. E kakioia nako te koraki ake a karika te tabo ane tabu anne bwa nneia taan ira. E kamarurungia naba mataki ao mwauku. Aomata ni kabane ake a mena ikekei, ao riki mataniwin Aaro, a riai n tia ni kairaki bwa a na kamoamoaa Iehova ao Natina are te Mesia. Ma e kananokawaki bwa a mwaiti ni boong akanne ae a aki kamoamoaa Iehova. A ataia bwa e kanakoaki Iesu iroun te Atua, ma a maakuia mataniwin Aaro. Ma iai te koraki n aomata ae a ninikoria n taetae. Ko ataia bwa antai te koraki anne? E taku te Baibara: “Ao ibonga ake a kakanato ma taani koroboki, ngke a nori ana bwai ni kamimi [Iesu] ake E karaoi, ma te koraki n ataei ba a takarua i nanoni maneaban te Atua ni kangai, Otanna nakon Natin Tawita, ao a nanobuaka, ao a taku nako Ina, Ko ongo aia taeka aikai ke Ko aki?”​—Mataio 21:15, 16; Ioane 12:42.

¹³ A kaantaningaia ibonga akekei bwa Iesu e na kain wiia ataei ake a kamoamoaa. Ma e karaoa anne? E bon aki! E kaekaia ibonga Iesu n taku: “I ongo: kam tuai ni wareka te taeka are kangai, Ko kateimatoa kamoamoam mai nanoni wiia ataei aika uarereke ma merimeri?” E teretere bwa e kukurei Iesu ma Tamana n aia kamoamoa ataei akekei. Ataei akekei a karaoa te bwai ae a riai ni kaman tia ni karaoia ikawai. E rangi n teretere raoi n aia iango n ataei bwa e riai ni kamoamoaki Iesu. A nora te mwaane aei ni karaoi bwaai aika kamimi, e ninikoria n taetae ma te onimaki, ao e kaota korakoran tangiran te Atua ao ana aomata. Bon te koaua bwa ngaia “Natin Tawita” are beritanaki, ao bon te Mesia. Ibukin aia onimaki ataei akekei, ao e reke naba kakabwaiaia bwa a na kakoroa bukin te taetae ni burabeti.​—Taian Areru 8:2.

14. A kanga bwaai n tituaraoi ake a reke irouia rooro-n-rikirake ni kataubobongaia bwa a na kamoamoaa te Atua?

¹⁴ Tera reireiara man katoto aikai? A kona rooro-n-rikirake n riki bwa taani kamoamoaa Iehova aika uaana iai. Aroia naba bwa a kona n ataa te koaua n te aro ae mataata raoi, ma ni kaotiota taekan aia onimaki ma te ingaingannano ao te koaua. A anganaki naba te bwai n tituaraoi are n Taeka N Rabakau 20:29: “Kamoamoaia rorobuaka korakoraia.” Eng, ngkami roro-n-rikirake kam kakabwaiaki n anganaki te korakora ao te konabwai, aika bwaai aika manena aika a boni kainnanoaki ibukin kamoamoan Iehova. Kam na kanga ngkanne ni kabonganai raoi bwaai n tituaraoi akanne?

Ko na Kanga ni Kamoamoaa Iehova?

15. Te aeka n nano ra ae aana te mwakuri ao e kainnanoaki ibukin kamoamoan Iehova n te aro ae uaana?

¹⁵ Kamoamoana n te aro ae uaana, e nako man nanon te aomata. Ko aki kona ni kamoamoaa Iehova n te aro ae uaana, ngkana ko karaoa anne tii ibukina bwa a tangiriko tabeman bwa ko na karaoia. Uringnga bwa te tua ae te kabanea ni kakannato mai buakon tuua nako bon aei: “Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.” (Mataio 22:37) Ko a tia raoi ni kinaa Iehova rinanon am ukeuke n reirei n ana Taeka? Mwin raoi te ukeuke anne e na karina i nanom tangiran Iehova. Te kawai ae angaraoi ibukin kaotiotan te tangira anne boni man kamoamoana. Ngkana e itiaki ao ni korakora nanomi are e aana ami mwakuri, kam a tauraoi ngkanne ni kamoamoaa Iehova ma te ingaingannano.

16, 17. Tera te bwai ae e kona ni karaoia aroaron te aomata ni kaineti ma kamoamoan Iehova? Kabwarabwaraa.

¹⁶ Ma imwain ae ko na iangoa te bwai ae ko na taekinna, iangoa moa are ko na karaoia. Ngkana e ataaki ataeinnainen Iteraera are n ana bong Eritai, bwa e aki atataa te katei, e aki kakarinerine, ke e bwanga-ni-kewe, n am iango ana toka aika kaain Turia a na kan ongora ana taeka ibukin ana burabeti Iehova? A na bae n aki. N aron naba anne, a bae ni kan ongora aomata nakoim ngkana a noria bwa ko kakarinerine, ko bwabwaina te koaua, ao e raoiroi aroaroni maium. (I-Rom 2:21) Iangoa te katoto teuana.

¹⁷ Te ateinnaine ae 11 ana ririki ni maiu ae mena i Botukare, e kaaitara ma kairoroakina n ana tabo n reirei bwa e na bukamarui boong ni motirawa ake a bobuaka ma mataniwin nanona ae e a tia ni kataneiaki man te Baibara. E bwaina te karinerine ni kabwarabwaraa nakon ana tia reirei bwa bukin tera ngkai e riai n rawa, ma e bwainingareia ana tia reirei arei. I nanon waakinakon te tai, ao e aki toki ana tia reirei ni kakabwainrangnga ao ni kakanikoa ana Aro. Ma e teimatoa ni karinerine te ateinnaine aei. I nanon ririki ake imwina, ao e a riki te ateinnaine aei bwa te regular bwaiania ae e kabwanina ana tai n te mwakuri ni minita. N te bwabwaro teuana, ao e matakuakinia aomata ake a bwabetitoaki ao e a kinaa naba temanna i buakoia. Bon ana tia reirei ngkoa arei! Imwin aia irabwati ae irianaki n te tang ao neiere te tia reirei arei e tuanga te ateinnaine aei bwa e aki kona ni mwanuoka aroarona ngkoa ni karinerine. E a bon tia ni kawaraki te tia reirei aei iroun te tia Kakoaua temanna ike e a tia n taekin iai aroaroni maiun ana ataei aei ni kakarinerine. Ibukin anne, e moanaki te reirei n te Baibara ma ngaia ao e a kakoauaa te koaua neiei. Eng, aroaroni maium e kona n riki bwa te anga ae moan te korakora ibukin kamoamoan Iehova!

18. Tera ae e kona ni karaoia te roro-n-rikirake ngkana e tabwarabwara ni moana te maroro ibukin te Baibara ao Iehova ae te Atua?

¹⁸ Ko a tia ni kunea n taai tabetai bwa e kangaanga moanakin te maroro ibukin am onimaki n am kuura n reirei? Tiaki tii ngkoe n namakina anne. Ma ko kona ni baireia bwa a na titirakiniko tabeman taekan am onimaki. N te katoto, ngkana e kaukaki n tuan abam, e aera bwa ko aki uoti booki aika kabwarabwaraa te Baibara ao ni warekia n am tai ni katawanou ke n taai tabeua riki ngkana e kariaiakaki karaoana? A na kona raom n reirei n titirakiniko bwa tera ae ko tabe ni warekia. Ngkana ko kaekaia ao n tuangia te bwai ae e kakannongora iai te rongorongo anne ke te boki are ko warekia, ao ane ko na kona ni kunea ae e a moanaki naba ikanne te maroro ae raoiroi. Uringnga n tabeki titiraki n ukeria nako bwa tera ae a kakoauaa raom n reirei. Kakauongo ma te karinerine ao tibwaa are ko a tia n reiakinna man te Baibara. Aei are e a karekea te kimwareirei ae bati ao ni buokiia aika mwaiti bwa a na ataa Iehova.

19. A na kanga rooro-n-rikirake n rabakau riki n te mwakuri ni minita man te auti teuana nakon te auti teuana?

¹⁹ Te mwakuri ni minita man te auti teuana nakon te auti teuana, bon te anga ae rangi n uaana ibukin kamoamoan Iehova. Ngkana ko tuai karaoia, e aera bwa ko aki kateia bwa tiam? Ngkana ko ira karaoana ngkai, iai riki tiia tabeua ake ko kona ni katei ibukim? N te katoto, n onean mwin are ko na taekin bwaai aika titeboo n taai nako ngkana ko kawari taian auti, kakaaei riki kawai aika ko na kanakoraoi, n titirakinia am karo ao aomata aika mwaatai ibukin iango aika manena. Reireiniko aron kabonganakin riki te Baibara, n okiokiriia aomata n te aro ae uaana, ao ni moana te reirei n te Baibara. (1 Timoteo 4:15) Kabatian am tai ni kamoamoaa Iehova n aanga aikai, e na karikirakea riki rabakaum, ao e na rikirake riki kimwareireim n te mwakuri ni minita.

N Ningai ae Ko Riai ni Moana Iai Kamoamoan Iehova?

20. Bukin tera bwa e aki riai irouia rooro-n-rikirake bwa a na namakinna ae a rangi n uarereke ibukin kamoamoan Iehova?

²⁰ Man titiraki aika tenua aika taekinaki n te maroro aei, ao te kaeka nakon te kabanea aei e rangi ni bebete. Noria bwa e kangai ana kaeka te Baibara: “Ko na ururinga naba te tia Karaoiko n am bong n ataei.” (Te Minita 12:1) Eng, te tai ni moana kamoamoan Iehova boni ngkai. E rangi ni bebete taekinan aei: “I rangi n uarereke ibukin kamoamoan Iehova. I aki rabakau iai. N na riai n taningaa ikawaiu.” Tao tiaki tii ngkoe n namakina anne. N aron anne, te roro-n-rikirake ngkoa are Ieremia, e tuanga Iehova ni kangai: “Akea ngai, te Uea ae Iehova! noria, I babanga taetae: ba te tei ngai.” E karaua nanona Iehova bwa akea bukina ae e na maaku iai. (Ieremia 1:6, 7) N aron naba anne, akea bukina ae ti na maaku ngkana ti kamoamoaa Iehova. Waaki ni kaikoaki nakoira, a na bane ni katokaki iroun Iehova.​—Taian Areru 118:6.

21, 22. Bukin tera bwa rooro-n-rikirake aika kamoamoaa Iehova a katiteboaki ma aoin te karangaina, ao bukin tera bwa e kaunganano aron kabotauaia anne?

²¹ Ti a kaumakingkami rooro-n-rikirake ngkanne n aei: Tai tabwarabwara ni kamoamoaa Iehova! Ngkai ko roro-n-rikirake ao aei te tai ae te kabanea n raoiroi ibukin irakin te mwakuri ae moan te kakawaki are e a tabe ni karaoaki i aon te aba ni boong aikai. Ngkana ko karaoa anne ko a riki iai bwa kaain te botaki ae kamimi, ae taekan te utu ae katiteuanaki ni katobibia te aonnaba, are a bane kaaina ni kamoamoaa Iehova. Moan te kukurei Iehova ngkai ko kaaina te utu aei. Nori taeka aika kairaki koreaia aikai are e taekin te tia areru nakon Iehova: “A kan anga ngaiia am aomata ni bongini mwakam, n tamaroan te raoiroi: Bon iai aoin am bong n ataei mai nanoni biroton te karangaina.”​—Taian Areru 110:3.

²² Tiaki te koaua bwa aoin te karangaina aika a ranea ootaia n te ingabong, a kaota te banna ae tamaroa? A kakukurei taraakiia, a takiakia ao a aikoa kona ni warekaki ibukin mwaitiia ae e a rangi ni bati. Anne aron Iehova n taraiia rooro-n-rikirake ake a kakaonimaki ni kamoamoaa n taai aika bubuaka aikai. E teretere bwa rineakin ae ko na kamoamoa Iehova, e kakimwareireia nanona. (Taeka N Rabakau 27:11) Mangaia are, ngkami rooro-n-rikirake, kam na kamoamoaa Iehova!

Ngkana iai raoraom ae rianako rabakauna n te bwai teuana, ko na aki taekinna nakoia tabemwaang?

Ko na Kanga ni Kaeka?

• Baikara bwaai tabeua aika kakawaki ibukin kamoamoan Iehova?

• Baikara katoto man te Baibara aika a kaotia bwa a kona n rangi n uaana rooro-n-rikirake ibukin kamoamoan Iehova?

• A na kanga rooro-n-rikirake ni kamoamoaa Iehova ni boong aikai?

• N ningai ae a riai iai rooro-n-rikirake ni moana kamoamoan Iehova ao bukin tera?

[Taamnei n iteraniba 17]

A kona raom n reirei ni kan ataa am koaua