E Tangiriia Aomata Aika Itiaki Iehova

“Teboki baim. Kaitiaka am ruu. Kaitiaka te auti. Karenakoi maange.” A bati kaaro aika reireinia natiia aroia ni kateimatoa itiakin rabwataia. Ma bon ana reirei Iehova bwa ti na kakaitiaki. (TO 30:​18-20; TTK 23:14; 2Ko 7:1) Ngkana ti teimatoa ni kaitiakii rabwatara ao ara bwai, ti boni karinea iai Iehova. (1Be 1:​14-16) Ao tera aroni mwengara ma rarikina? A kakarenakoi aia maange aomata n te kawai ao n taabo ni kamaangang, ma a kabanea aia konaa Kristian ni kateimatoa itiakini mwengaia ae te aonnaba. (TA 115:16; Kao 11:18) E kona naba ni kaotaraeaki aroarora ibukin te kakaitiaki ni baika uarereke, n aroni karenakoan maangen te kanre, tiin ni moi ke te kam. Ti kani “kaotiotira bwa ana tabonibai te Atua ngaira” n iterani maiura ni kabane.​—2Ko 6:​3, 4.

MATAKU N TE TAAMNEI AE E TANGIRIIA AOMATA AIKA ITIAKI TE ATUA AO KAEKAI TITIRAKI AIKAI:

• Tera aroia tabemwaang ni karekei aonaia ngkai a aki kateimatoa itiakin aia bwai?

• E kangaa ni kaotaki ana iango Iehova ibukin te itiaki n te Tua Rinanoni Mote?

• Ti na kangaa ni karekea neboan Iehova e ngae ngke ti aki taetae?