Lé Kpẹ̀a E Lúùk Beè Emí

20 Enè dee ea géè noomà nuù gbò nen gbẹá tọọ̀ káí vaá vee lé kpẹ̀aá, gbò togó vààla gyọ́ọ nè gbò émì kpá, bií ló gbò kàneǹ pá Júù beè gbóó dù 2 gé bĩináe kọọ̀: “Kọ́ nèi, mó íb kpóó ní eo síìmà gbò tómí ẽ́? Àbèè kọọ̀ mée ní ea beè nè ni kpóóí é?” 3 À aalá nè va kọọ̀: “À íe ene kà bíb e nda é bĩ́íná nágé boolo, vaá ò áalai neḿ mi: 4 É kọọ̀ Bàrì sẹ̀ nen ní ea beè nè kpóó Jṍòn kọ á diile nen múú ẽ́?” 5 Bà gbóó dààmà togó gè kọ́ nè ene kọọ̀: “Be è kọ́ọ̀, ‘Bàrì ní ea beè nèe ẽ́,’ à é bĩ́ínái kọọ̀, ‘Vaá éé ní ea náa nóo beè zigaíé ló é?’ 6 Sõò be è kọ́ọ̀, ‘Nen ní ea beè nèe ẽ́,’ dénè neń ea di kĩí é tóbmài dem, boo béè kọọ̀ bà palàge àgala boo kọọ̀ Jṍòn níà neǹ kọ́ọ̀ bùlà Bàrì.” 7 Vó à naa, bà gbóó kọ́ nèe kọọ̀ bà náa nyímàè kĩée e a kpóó aà. 8 Jíízọ̀s à gbóó kọ́ nè va kọọ̀: “Beè vó, nda ním é kọ́ nágé íb kpóó e nda ólò siimá gbò tómí nèi.”

9 À gbóó dààmà togó gè tú nu dòòle ló loomá bel nè va kọọ̀: “À íe ene kà gbálà ea beè kìl ól vã́ìn. À gbóó tú ólá nè gbò e bà é ẹb nú ea kil ló vaá àà sí kpã́á deè kyẽè ea é túe gã́bug dee bá. 10 Tṍó e nú e ba beè fò ni léèvè, à gbóó lẹ̀ẹ̀là ene kà a gyóòlo siimá ló gbò e bà géè ẹ̀b nú ea kil ló ólá kọ á gé tú sìgà vã́ìn domá. Sõò gbò e bà ólò ẹ̀b nú ea kil ló ólá beè bòmie vaá kyã̀àmàe kóló bá ààmà. 11 A beè lẹ̀ẹ̀là nàgé dõona kà a gyóòlo. Sõò ba beè bòmie nagé, nvèèmàe lẹ́, vaá kyã̀àmàe kóló bá ààmà. 12 À gbóó kpáá lẹ̀ẹ̀là ní ea égè taà nen, sõò ba beè nvèèe kom ló vaá tobvíe lọl mm̀ ólá. 13 Tṍóá, tẹ̀ íè ólá à gbóó kọọ̀, ‘Éé ní em é náa ẽ́? M̀ é lẹẹlà nà nvín em palàge vùlè. Be à sẹlẹ, bà é fã́e dẽe.’ 14 Tṍó e gbò e bà ólò ẹ̀b nú ea kil ló ólá moníe, bà gbóó kọ́ nè ene kọọ̀, ‘Neenii neń ea é dé a gyọ́í. Naanii mè èé fẹ́ẹ kọbé gyọ́í dú ńbeéle.’ 15 Vó à naa, bà gbóó siíe lọl mm̀ ólá vaá fẹ́ẹ. Éé ní e tẹ̀ íè ólá é náá va ẹ́? 16 À é dú gé fẹ́ gbò e bà géè ẹ̀b nú ea kil ló ólá, vaá tú ólá nè dõona gbò.”

Tṍó e bà dã́ naa vó, bà gbóó kọọ̀: “Á lọ̀!” 17 À gbóó ẹ̀b va, vaá kọọ̀: “Beè vó, éé ní e dọ̀ Kpá Káí ea kọ́ọ̀: ‘Kpò dem e gbò tìb tọ beè gbẹmà nvéeá ní e bà oòa kẽ nòòmà gából deè tọ ẹ́,’ tõó dọ̀ ẹ? 18 Kà agẹ bá kom é bã́ ló kọ̀láá neń ea dọ̀ boo demí. Vaá kọ̀láá neń e demí dọ́ boo é légá.”

19 Kà lèlà tṍóá, gbò émì kpá nè gbò togó vààla gyọ́ọ beè gbóó gbĩ́ gè siíe, boo béè kọ ba beè nyimá kọọ̀ baala ní ea gé ló gbò bel dòòle lóá nyòòmàe. Sõò pọ̀ beè sií va ló gbò e ba beè di kĩá. 20 Boo béè kọọ̀ bà géè gbĩ́ tṍó ea é léé ló gè siimáe, bà gbóó kpẽ́ kpègè nè gbò e bà é sẹlẹ ló belí kọọ̀ ọ̀vàà gbò lé lab dògò kọbé bà láá tú bel ea é ló siimáe má neń ea gé bẹl. 21 Bà gbóó kọ́ nèe kọọ̀: “Neǹ Dòbá, è nyímà kọọ̀ ò ólò ló kà-kà bel vaá noomà lèlà nu, vaá nóo ólò ẹ̀b sĩ́ nen naamá nu, vaá ò ólò noomà kà-kà bel ea kil ló Bàrì. 22 É kọọ̀ log ténmá kọ é kpẽ́ kpègè gbáá nè Sízà sẹ̀ náa ténmá ẽ́?” 23 Sõò boo béè kọọ̀ Jíízọ̀s nyímá kyèèlè ea dì vá m, à gbóó kọ́ nè va kọọ̀: 24 “Ni zógeḿ mi enè kà dìnárìọ̀s.* Sĩ́ mée nè béè mée ní ea di boo é?” Bà aalá nèe kọọ̀: “Níà níí Sízà.” 25 À gbóó kọ́ nè va kọọ̀: “Beè vó, kpẽi nú ea kuu Sízà nei Sízà, vaá ò kpẽ́i nú ea kuu Bàrì nei Bàrì.” 26 Bà náa beè láá tú bel ea ló siimáe gbẹá kèsĩ́ gbòa, tãa vó, bé ea áálá bel naa beè palàge bọọ́ vá ló. Bà gbóó pĩigã́.

27 Sõò sìgà pá Sádùsíì e bà dú gbò e bà náa ólò zìgà kọọ̀ kẽ̀èà aa kemà ú dìa, beè gbóó dù gé bĩináe kọọ̀: 28 “Neǹ Dòbá, Mózìs beè emí kọọ̀, ‘Beè nen ú gbẹẹ a va, vaá à gáà ie tọ́ọ̀ kà nvín, a vígà á ilí a vaá, vaá bònee nvín gbàà nèe.’ 29 À íe àlàbà kà vígà págbálà e bà dúá gbàà. Ńtúá kà beè ú gbẹẹ a va tṍó ea gáà ie tọ́ọ̀ kà nvín. 30 Ní ea égè bàà nen 31 nè ní ea égè taà nen beè ilíe. Mm̀ tẽ̀ènè sĩ́deèá, àlàbà ọ̀vàa beè ilíe, sõò ba beè ú gbẹẹ́ẹ tṍó e bà gáà ie tọ́ọ̀ kà nvín. 32 Dee deè nvée, pábiaá beè gbóó u nágé. 33 Vó à naa, tṍó e bà é kẽeà aa kemà ú, mée ea di gbàà àlàbà není ní ea é dú a dóm ẽ́? Boo béè kọọ̀ dénè ọ̀và beè ilíe.”

34 Jíízọ̀s à aalá nè va kọọ̀: “Gbò e bà di nakà kúúlíí* ólò ilí va, vaá iá dóm, 35 Sõò gbò e bà bọ́ló gè bã mm̀ ãa bàlà booá nè gbò e bà é kẽeà aa kemà ú náa é ílí àbèè ge iá ná. 36 Kàsĩ́, bà náa é ú ná, boo béè kọọ̀ bà é di belí gbò nyómá tóm. Bà dú gbò nvín Bàrì boo béè kọọ̀ bà é kẽeà aa kemà ú. 37 Bã̀àna Mózìs beè kọ́ nú ea kil ló kẽ̀èà aa kemà ú mm̀ nòòtẽ́ ea kil ló sã́ ea beè bẹ́ ló kpò sàgà téá, tṍó ea beè kolí Jìhóvà* kolíe ‘Bàrì Ébràhám̀, Bàrì Áízìk, nè Bàrì Jékọ̀ba.’ 38 À dú Bàrì gbò e bà di dùm, níì níí gbò e ba ni ú nì, boo béè kọọ̀ kilma kĩée e ẹlẹ dì, dénè ọ̀và di dùm.” 39 Sìgà gbò émì kpáá à gbóó kọ́ nèe kọọ̀: “Neǹ Dòbá, ò láà aalá.” 40 Tọ́ọ̀ nen náa beè ié ná kói gè kpáá bĩináe bã̀àna ene kà bíb.

41 Ẹlẹ à gbóó bĩiná va kọọ̀: “Éé ní ea náa bà kọọ̀ Kráìst níà nvín Dévìd e? 42 Boo béè kọọ̀ Dévìd beè kọ́ mm̀ kpá Sọ́l kọọ̀, ‘Jìhóvà* beè kọ́ nè Neń Ea Íém kọọ̀: “Ĩìm tẽ́ boo bá lè 43 dọ̀ọ̀mà tṍó em é tú pá o gbò ọ́b nvèè ní kè kátọ.”’ 44 Dévìd beè kolíe Neń Ea Íém. Vó à naa, éé ní ea náa à dú a nvín ẽ́?”

45 Tṍó e dénè gbòa gé pãanée tṍ ló, à gbóó kọ́ nè pá a gbò nyòòne nvée kọọ̀: 46 “Iei ọ̀ẹ̀ dẽe ló gbò émì kpá ea ólò leemá va gè nvèà vọ̀b kọ̀lá ló kyã̀à, vaá gbĩ́ kọọ̀ gbò nen á kanàè va mon gbẹá kèki nè ge ĩìtẽ́ deèsĩ́ té* gbẹá ba gbò tọ bõ̀ònaló fã̀ nè kĩée e ka di ló lọ̀l vaá à lee tṍó e bà gé dé gyã́á ló èlà. 47 Bà ólò kpalí bá gbò vaà tãa, vaá tã̀àgã̀ begè dẽè tã̀àgã ló Bàrì kọbé gbò nen leelàẹ̀ va. Bà é íe kà agẹ bá kpọ̀té.”