Lé Kpẹ̀a E Lúùk Beè Emí

8 Pọ́ì ńkem̀ tṍó aa ló tṍóá, a beè gbóó kyã̀à aa pọ̀b bon dọ pọ̀b bon nè aa ńkem̀ bon dọ ńkem̀ bon, vaá vee lé kpẹ̀a ea kil ló Boǹ Méné Bàrì. Òb Nè Bàà Nená beè dìé ló, 2 bií ló sìgà gbò pábia ea beè kpó zọ lọ̀l vá m vaá bó ba zọ̀ló. Ba bée kọlà: Mérì e gbò nen ólò kọ à dú Màgdálà, e Jíízọ̀s beè kpó àlàbà kà zọ lọ̀líé m ã́, 3 Jòánà e a dóm Kúzà ólò kùdẽe ló gyọ́ Hẹ́rọ̀d, Sùzánà nè dõona kà gbò pábia e bà géè tú ba gyọ́ nvèèmà bá nè Jíízọ̀s nè gbò e bà ólò nyoonée nvée.

4 Tṍó e gã́bug nen bií ló gbò e bà géè nyoonée aa pọ̀b bon dọ pọ̀b bon ni bṍóná, à gbóó tú bel dòòle ló loomá bel nè va kọọ̀: 5 “Enè neǹ kìl ól beè àà gé fó súú sọ́gọ́ nu. Boo tṍó ea gé fó nuá, sìgà súú beè dọ gã́ èèlè naa ní e gbò nen zag tọ́ boo, vaá ńnóm à dù gé tigi. 6 Sìgà beè dọ boo dem vaá tṍó e bà sí mée, bà gbóó kãa, boo béè kọ bà náa beè ié tọ́ọ̀ kà múú gè dùùlà. 7 Sìgà beè dọ gbàà gbò té e suu di ló, vaá tṍó e bà gbá dùm, té e suu di lóá à gbóó dùm uú va bá boo. 8 Sõò sìgà beè dọ boo sãa ea dú lé, vaá tṍó ea ni sí mée, à gbóó mumí 100 tóm. Tṍó ea gé ló nakà belí, à gbóó kọ́ nè va kọọ̀: “Neń ea íe tṍ gè dãamá nu á dã̀.”

9 Sõò gbò e bà ólò nyoonée nvée beè gbóó bĩináe nú e bel dòòle lóí tõó dọ̀. 10 À gbóó kọ́ nè va kọọ̀: “Bàrì a náa kọ boólo ó dãi ból ló nuù ke gũ̀a ea di káí ea kil ló Boǹ Méné Bàrì. Sõò kilma kĩée e nagbòa dì, bel dòòle ló ní em gé lóómá bel nè va ẹ́, kọbé, kọbèè bà gé ẹb, bà náa é mon, vaá kọbèè bà gé pãane tṍ, bà náa é dã́ ból ló kà ea di m. 11 Nee nú e bel dòòle lóá tõó dọ̀í: Ból súúá tõó dọ̀ moǹ bel Bàrì. 12 Gbò ní ea dọ́ gã́ èèlèa dú gbò e bà dã́ moǹ belá, vaá Pọ́lọ́ Nyómá à gbóó dù gé tú bel e ba beè dã̀a lọ̀l vá m, kọbé bà náa ziga ló vaá ié dùùà. 13 Gbò ní ea dọ́ boo demá dú gbò e bà dã́ moǹ belá vaá tú ẹ́ẹ́-ẹẹ̀ nyíe tuumá, sõò bà náa síi lí kẽ. Bà ziga ló mm̀ pọ́ì ńkem̀ tṍó, sõò tṍó e ẹ̀bmà dú, bà gbóó dọ̀. 14 Gbò ní ea dọ́ gbàà gbò té e suu di lóá dú gbò e bà beè dã́ moǹ belá, sõò tã̀àgã̀ bùlà, ge gbó gyọ́, nè kpéè ló ea di mm̀ dùm gyẽeme gbẹẹ́ vá m, vaá naa kọ bà á gá sìm kilsĩ́. 15 Gbò ní ea dọ́ boo lé kunukẽ̀a dú gbò e bà tú lé bùlà tuumá moǹ belá nvea m tṍó e bà dã́, vaá mumí ból súú tení dú ló gè ié ĩ̀ìmà.

16 “Tọ́ọ̀ nen náa ólò mùn sã́ vaá tú nu uú boo àbèè ge tú sẹlẹ́ kè kẽè vái, sõò bà ólò sẹlẹ́ boo nú e bà ólò mùn sã́ sẹlẹ́ boo, kọbé à ẹ́ẹ̀lẹ̀ kẽ nè gbò e bà é bã́ tọá. 17 Boo béè kọọ̀ náa íe nú ea di ke gũ̀a e náa é beè dọ bàlà kẽ, vaá kọ̀láá kà nú e ba beè palàge gõ̀ é beè dọ bàlà kẽ vaá gbò nen nyímá. 18 Vó à naa, palàge ọẹi dẽe ló bé eo dã́ì nu naa, boo béè kọọ̀ neń ea íe, bà é kpáá tẹlẹ ló nèe, sõò neń e bè náa íe, bà é tú bã̀àna ní ea beè dòòmà kọ à íèèa lọ̀líé bá.”

19 A kà nè pá a vígà págbálà beè gbóó dù, sõò bà náa beè láá bã̀é kpàn boo béè gã́bug neń ea beè dìé ló. 20 Bà gbóó kọ́ nèe kọọ̀: “O kà nè pá o vígà págbálà di élá kèdẹi e bà gé gbĩ́ gè mòn ni.” 21 À kọ́ nè va kọọ̀: “Ńdáà kà nè pá ńdáà vígà págbálà dú gbò e bà dã́ moǹ bel Bàrì vaá naa.”

22 Enè dee, Jíízọ̀s nè gbò e bà ólò nyoonée nvée beè àà gé bã mm̀ faà sĩ́ múú. À gbóó kọ́ nè va kọọ̀: “Naanii mè é ful kil na sábá pèneí.” Bà gbóó bã m ọví àà. 23 Tṍó e bà di sĩ́ múúá e bà gé aà, à gbóó daa. Gbele bá kpóó fọ́ọ́lọ́ à gbóó ula sĩ́ múúá naa ní e múú daamà togó gè bã mm̀ faàa, naa ní ea bélí ea é díi. 24 Bà gbóó àà gé kẽée lọl boo vaá kọ́ nèe kọọ̀: “Neǹ Dòbá, Neǹ Dòbá, èé gé pè!” À gbóó aa boo vaá kọ́ bel fọ́ọ́lọ́ nè múúá. Fọ́ọ́lọ́á à gbóó fùlà vaá dénè kẽ à gbóó ọ̀b. 25 À gbóó kọ́ nè va kọọ̀: Éé ní ea náa nóo íèì zìgà ẹ? Sõò pọ̀ beè palàge sií va, vaá a beè bọọ́ vá ló naa ní e bà kọ́ nè ene kọọ̀: “Níì mó íb není ẽ́? À lẹẹlà bel ló bã̀àna fọ́ọ́lọ́ nè múú vaá bà gbànie tṍ ló.”

26 Ba beè gbóó fùl kil deè bálásĩ́ Gèrásà ea di na sábá Pène Gálilìa. 27 Tṍó e Jíízọ̀s aa mm̀ faàa dọ kẽ, ene kà gbálà e zọ di m ea aa boná beè gbóó dúé ló. A dú kpã́á dee ea beè nvèà kọ̀là ló, vaá náa ólò tõó tọ, sõò à ólò tõó gbàà kóló dem* e bà ólò lì nen. 28 À gé mon gé Jíízọ̀s, à gbóó vulí kpã́ vaá dọ̀ẹ́ ke gbàà, vaá tú agẹ mon kọọmá kọọ̀: “Éé ní eo gbĩ́ìḿ ló, e Jíízọ̀s, eo dúù Sã́áná Bàrì Ea Bọọ Lọ̀l Vaá À Lee é? M̀ baǹ ni kọ ó gá nèm kpọ̀té.” 29 (Boo béè kọọ̀ Jíízọ̀s géè kọ́ nè zọá kọ á aa mm̀ gbálàa. À ólò siíe gã́bug tṍó, vaá bà ólò tú kpọ́gọ́lọ́ bọbmáe vaá kùe dẽe ló, sõò à ólò kàb zaali lọa ló, vaá zọá ólò gbóó faaláẹ ààmà kilma kĩée e gbò nen á gé.) 30 Jíízọ̀s à gbóó bĩináe kọọ̀: “O bée kọlà vàẹ?” À kọọ̀: À kọlà “Gã́bug Gbò,” boo béè kọọ̀ gã́bug zọ a bã́é m. 31 Bà gbóó kilsĩ́ gè bànie kọ á gá kpoè va tẹlẹ̀ẹ̀ mm̀ bànà ábiìs. 32 À íe gã́bug diì máá e ba beè di boo gùa e bà géè dé nu. Bà gbóó bànie kọ à sọẹ̀ va tọ́ deè kọ bà á bãè mm̀ gbò diì mááá. À gbóó sọ̀va tọ́ deè. 33 Gbò zọá à gbóó aa mm̀ gbálàa bã mm̀ gbò diì mááá, vaá gbò diì mááá à gbóó kònà aa boo gùa dọ múú vaá pè gbẹá m. 34 Sõò tṍó e gbò e bà ólò kùdẽe ló diì mááá mon nú ea nááá, bà gbóó teelá bã bon nè gbò bon ea di kuló kĩá gé kọ́ nú ea nááá.

35 Tṍóá, gbò nen beè gbóó àà sì gé ẹ̀b nú ea nááá. Tṍó e bà íná ló Jíízọ̀s vaá mòn gbálà e gã́bug zọ̀ beè dìé m ã́, ea nveà kọ̀là ló di ĩ́ìtẽ́ kpàn Jíízọ̀s vaá di mm̀ a bug, pọ̀ beè gbóó sií va. 36 Gbò e ba beè mònmà dẽe beè gbóó nootẽ́ nè va bé e gbálà e zọ beè di m ã́ beè ié bóa naa. 37 Tṍóá, gã́bug nen ea aa bálásĩ́ Gèrásà beè gbóó kọ́ nè Jíízọ̀s kọ á aa kĩá àà, boo béè kọọ̀ pọ̀ beè palàge sií va. À gbóó bã mm̀ faà sĩ́ múú kọbé à aalìè. 38 Sõò gbálà e zọ beè dìé m ã́ beè kilsĩ́ gè bànie kọ à é nyoonèèe, sõò a beè kọ́ nèe kọ á gá dù, vaá gbóó kọ́ nèe kọọ̀: 39 “Àà kil be, vaá ò kilsĩ́ gè kọ́ nú e Bàrì náa nè ni.” Gbálàa beè gbóó àà vaá kọ́ nú e Jíízọ̀s náa nèe beeá ló zivèkà boná.

40 Tṍó e Jíízọ̀s oòa kẽ iná Gálilì, gbò nen beè tú lé bá tuumáe boo béè kọ bà géè ẹ̀bmàe dẽe. 41 Tṍóá, ene kà gbálà e a bée kọlà Jéírọ̀s, ea dú enè neǹ tùle tọ bõ̀ònaló fã̀ pá Júù beè gbóó dù. À gbóó dọ ke gbàà Jíízọ̀s vaá dààmà togó gè bànie kọ á duè a tọ, 42 boo béè kọọ̀ kpáló áá kà a nvín pábia ea é láá toolá 12 gbàà géè zọ̀ belí ea é ú.

Boo tṍó ea gé aàa, gbò nen à gbóó àng kẽ bììmàe. 43 À íe ene kà ńnváá e mii ni síé ló mm̀ 12 gbáá, vaá tọ́ọ̀ nen gáà laa bóe. 44 À gbóó tení dúé nvée vaá daa bá ló zái ea di ló a pọ̀b kọ̀là ló, tẽ̀ènè tṍóá, mii ea géè síé lóá à gbóó fùlà. 45 Jíízọ̀s à gbóó kọọ̀: “Mée daám bá ló é?” Tṍó e dénè ọ̀và amà sàn, Pítà à gbóó kọọ̀: “Neǹ Dòbá, ò nyímá kọọ̀ gbò nen di ḿ-ma ní ló e bà gé ang kẽ bììmà ni.” 46 Jíízọ̀s à gbóó kọọ̀: “M̀ nyímà kọọ̀ nen daám bá ló, boo béè kọọ̀ kpóó aàḿ ló.” 47 Tṍó e ńnvááí mon kọọ̀ gbò nen nyímá nú ea nááá, lóóe beè gbóó kení vaá à gbóó kumíe dúnú ke gbàà, vaá kọ́ gbẹá kèsĩ́ dénè gbòa nú ea náa à daalìèe bá ló nè bé ea gbẹá boo boàẹ̀ naa. 48 Sõò a beè kọ́ nèe kọọ̀: “Nvín pábia, o zìgà a náa kọ ó boá. Aa mm̀ fẹ́ẹ́-fẹẹ̀ ló.”

49 Boo tṍó ea dì ea gé lo-ló belá, enè nen ea ólò sí tóm nè Jéírọ̀s beè gbóó dúé ló gé kọ́ nèe kọọ̀: “O nvín pábia a ú. Ó gá kpáá tãagẽ na Neǹ Dòbá.” 50 Tṍó e Jíízọ̀s dã́ naa vó, à gbóó kọọ̀: “Pọ̀ á gá sií ni, ié zìgà, mè à é kpáá tõó dùm.”* 51 Tṍó ea íná tọá, náa beè zìgà kọọ̀ tọ́ọ̀ nen á zọẹ̀ẹ bã m, daalá lọl ló Pítà, Jṍòn, Jém̀z, nè tẹ̀ nè kà nvíná. 52 Sõò gbò nen beè dì e bà géè tó vẹ̀ẹ̀và boo béè nvín pábiaá. Jíízọ̀s à gbóó kọọ̀: “Ó gá to nai, boo béè kọọ̀ náa ú, sõò à di dáá.” 53 Bà gbóó dààmà togó gè màngã̀e vaá nvèèmàe lẹ́ boo béè kọ bà nyímá kọọ̀ a ú. 54 Jíízọ̀s à gbóó siíe bá ló bá vaá kolíe kọọ̀: “Nvín pábia, aa boo!” 55 Dùm à gbóó kpáá bã̀é m.* À gbóó aa boo tẽ̀ènè tṍóá. Jíízọ̀s à gbóó kọ bà á nèe nu á dè. 56 Nyíè a tẹ̀ nè a kà beè palàge ẹẹ, sõò Jíízọ̀s beè kọ́ nè va kọ bà á gá kọ́ nú ea náááí nè tọ́ọ̀ nen.