Tóm Gbò E Jíízọ̀s Beè Lẹ̀ẹ̀là

8 Sọ́ọ̀l beè nvèè sãa kúm kọ bà á fẹ́ẹ.

Lọl deeá ààmà, ba beè gbóó palàge biigè ló gbò e bà beè di bõ̀ònatõ̀ò ea di Jèrúselẹ̀m. Daalá lọl ló gbò e Jíízọ̀s lẹẹlàa, dénè ọ̀và beè teelá zààlà kil bálásĩ́ Jùdíà nè Sàmérìà. 2 Sõò gbò e bà ólò fã̀ Bàrì beè dàlà Stívìn ààmà gé lì, vaá ba beè palàge bã̀àgã̀é boo. 3 Sọ́ọ̀l beè gbóó dààmà togó gè naa uú boo bõ̀ònatõ̀òa mm̀ kà agẹ bá. A beè olòó aa tọ dọ tọ, vaá sii gbò gbálà nè gbò bia ààmà kilma tọọ̀ kpọ́gọ́lọ́.

4 Sõò gbò e ba beè teelá zààlàa beè kilsĩ́ gè vee moǹ bel Bàrì gbẹá kọ̀láá kĩée e bà íná. 5 Tṍóá, Fílìp à gbóó àà kil Sàmérìà vaá dààmà togó gè kọ́ nú ea kil ló Kráìst nèva. 6 Dénè gbò e bà di kĩá géè palàge pãane tṍ ló bel e Fílìp géè lò, vaá bà géè ẹ̀b tóm dũ̀ùnè ea géè sì. 7 Zọ ea beè di mm̀ gbò nen beè kòòlàgì kpã́ vaá teelá àà vá m. Nagé, gã́bug gbò e báàsĩ́ va beè ọọ* nè gbò kọ̀và beè boá. 8 Vó beè naa kọọ̀ nyíè gbò e bà di boná a palàge ẹẹ.

9 À íe ene kà gbálà ea kọlà Sáímòn, ea beè di boná, e besĩ́ à kalá dọ̀ tṍóá, a beè olòó bó biè naamá gbò nú ea é bọọ́ ló pá Sàmérìà, vaá kọọ̀ ẹlẹẹ̀ kpã̀àmà gbálà. 10 Dénè ọ̀và, lọl ló ńkem tẹlẹ ló ńpọ̀b ólò pãanée tṍ ló vaá kọọ̀: “Gbálàí ní e Gbele Kpóó ea aa bá Bàrì di bá ẹ́.” 11 Bà ólò pãanée tṍ ló boo béè kọọ̀ a dú kpã́á dee ea ni bó biè naamági nú ea bọọ́ vá ló. 12 Sõò tṍó e gbò gbálà nè gbò bia ziga ló lé kpẹ̀a ea kil ló Boǹ Méné Bàrì nè béè Jíízọ̀s Kráìst e Fílìp géè veeá, bà gbóó dììa múú. 13 Sáímòn beè gbóó du nágé nen ea gé nyoone nvéè Kráìst, vaá tṍó ea ni diìa múú lọ̀l, a beè kilsĩ́ gè bììa nvéè Fílìp, vaá a beè palàge bọọẹ́ ló tṍó ea mon gbò tóm dũ̀ùnè e Fílìp gé sí.

14 Tṍó e gbò e Jíízọ̀s lẹẹlà e bà di Jèrúselẹ̀m dã́ kọọ̀ pá Sàmérìà a ziga ló moǹ bel Bàrì, bà gbóó lẹ̀ẹ̀là Pítà nè Jṍòn má va, 15 vaá ba beè àà sí vá ló gé tã̀àgã va ló Bàrì boo kọbé bà íe nyómá káí, 16 boo béè kọọ̀ tọ́ọ̀ ọ̀và gáà beè ie nyómá káí. Áá gè dììa múú boo béè Jíízọ̀s, ea dú Nen Ea Íéi ní e ba beè naa ẽ́. 17 Tṍóá, Pítà nè Jṍòn à gbóó dẹlẹ́ va bá ból vaá bà gbóó dààmà togó gè ié nyómá káí.

18 Tṍó e Sáímòn mon kọ bà íe nyómá káí tṍó e gbò e Jíízọ̀s lẹẹlàa dẹlẹ́ va bá ból, à gbóó tú kpègè nè gbò e Jíízọ̀s lẹẹlàa, 19 vaá kọọ̀: “Tu naigé kpóóí nei nda, kọbé kọ̀láá nen e nda dẹlẹ̀ bá ból láá ié nyómá káí.” 20 Sõò Pítà à kọ́ nèe kọọ̀: “O kpègè nè ọ̀ọ̀ á kyọasĩ́, boo béè kọ ò doomà kọọ̀ ò é láá tuè kpègè zalmàè dõ̀ònù ea aa bá Bàrì. 21 Nóo é láá zọ̀i sí tóm e gé síi, boo béè kọ nyíé ni náa õoà kèsĩ́ Bàrì. 22 Vó à naa, ọgá aa ló gbò o pọ́lọ́ vaá ò palàge bàn Jìhóvà,* kọbé be à válí, à láá ia ló gbò pọ́lọ́ nú eo gé bugi togó boo nè ní, 23 boo béè kọọ̀ m̀ monì kọ ọ̀ọ̀ neǹ bẹẹ nyíe vaá ò dúù gyóòlo nè pọ́lọ́ lab dògò.” 24 Sáímòn à gbóó kọ́ nèva kọọ̀: “Palàge banii Jìhóvà* neḿ mi, kọbé tọ́ọ̀ kà gbò nú eo kọ́ọ̀í náa nááaḿ ló.”

25 Tṍó e ba ni tú agẹ bá siimá neǹ ditõ̀ò vaá ló moǹ bel Jìhóvà* lọ̀l, bà gbóó òòà kil deè Jèrúselẹ̀m. Tṍó e bà gé aàa, ba beè kọ́ kpẹ̀a gã́bug boǹ pá Sàmérìà.

26 Nyómá tóm Jìhóvà* beè gbóó kọ́ nè Fílìp kọọ̀: “Aa boo, vaá ò aà kil boo èèlè ea di deè kpọ̀lọ̀-kpọ̀lọ̀, ea aa Jèrúselẹ̀m kil Gázàa.” (Níà èèlè ea téní boo kpáà bàlà ól záí sãa.) 27 A beè gbóó àà vaá mòn ene kà pọ̀b neǹ Ìtìópìà, ea ólò sí tóm kè kẽè Kàndésì, ea dú pábia ea géè bẹl Ìtìópìà. Gbálàí ní ea beè di togó dénè a gyọ́ ẹ́. A beè àà sí Jèrúselẹ̀m gé fã̀ Bàrì, 28 vaá à géè bugi nú e neǹ kọ́ọ̀ bùlà Bàrì Àìzáíà beè emí tẹlẹ bàlà kẽ tṍó ea di ĩ́ìtẽ́ mm̀ a faà e nom ólò kpọlẹ̀ ea gé ooà kil be. 29 Nyómá káí à gbóó kọ́ nè Fílìp kọọ̀: “Bã ló faà e nom gé kpọ́lẹ̀ ala.” 30 Fílìp à gbóó teelá zọ̀ faàa kuna ló vaá dã́ tṍó ea gé bugi nú e neǹ kọ́ọ̀ bùlà Bàrì Àìzáíà beè emí tẹlẹ bàlà kẽ. À gbóó bĩináe kọọ̀: “É kọ ò dã́à gé ból ló nú eo gé bugi á?” 31 Gbálàa à kọọ̀: “À é náà và m̀ dã́ ból ló beè tọ́ọ̀ nen náa baatẽ́ nèm ẽ́?” À gbóó kọ́ nè Fílìp kọ á bã mm̀ faàa vaá ĩinìèe tẽ́ ku kpàn. 32 Dọ̀ Kpá Káí ea géè bugiá kọọ̀: “Ba beè faaláẹ ààmà belí naanà ból e bà é gé kèl. A beè gbá gã́ belí bé e nvín naanà ból ólò pĩigã́ gbẹá kèsĩ́ nen ea gé kọọ gyáa lọ̀líé ló naaá. 33 Bà náa beè beelá bel leèe tṍó e bà gé nveemàe lẹ́. Mée ní ea é kọ́ nú ea kil ló a mana-mana ẽ́? Boo béè kọọ̀ ba beè fùl a dùm naamá ńkpulu gbẹá boo kunukẽ̀í.”

34 Gbálàa à gbóó kọ́ nè Fílìp kọọ̀: “Sóó-sóo, kọ́ nèm, mée ní e neǹ kọ́ọ̀ bùlà Bàrìí gé ló bel kilma ló é? É kọ à gé ló bel kilma ló a bá sẹ̀ dõona nèn ẽ?” 35 Fílìp à gbóó kọ́ lé kpẹ̀a ea kil ló Jíízọ̀s nèe. A beè dààmà togó tení dú ló gè baatẽ́ dọ̀ Kpá Káí ea géè bugiá. 36 Tṍó e ba di boo èèlè e bà gé aàa, bà gbóó iná kĩée e múú dì. Gbálàa à gbóó kọọ̀: “Nee múúí! Éé ní ea kpegím lọl ló gè dììa múú ẽ́?” 37* —— 38 À gbóó kọ bà á elè faà e nom gé kpọlẹ̀a. Fílìp nè ẹ̀ẹ̀ à gbóó bã mm̀ múúá, vaá Fílìp à gbóó túe diilé múú. 39 Tṍó e bà aa mm̀ múúá, nyómá Jìhóvà* à gbóó gbẹá boo faalá Fílìp ààmà, vaá gbálàa náa beè mòn nàe. Sõò a beè àà vaá kilsĩ́ gè ṍ kààgà. 40 Fílìp beè gbóó mòà a lóó kọ à diè Áshdọ̀d, vaá a beè vee lé kpẹ̀aá kọ̀láá kà boń ea di kĩá dọ̀ọ̀mà tṍó ea íná Sìzàríà.