Lé Kpẹ̀a E Jṍòn Beè Emí

9 Tṍó ea géè tení èèlè, à gbóó mòn ene kà gbálà e dẽée beè gimí aa gbàà kà. 2 Gbò e bà ólò nyoonée nvée à gbóó bĩináe kọọ̀: “Neǹ Dòbá, mée ní ea beè sí pọ́lọ́ naa ní e dẽée gímí aa gbàà kà ẹ? É kọọ̀ ẹlẹ sẹ̀ a tẹ̀ nè a kà ẹ?” 3 Jíízọ̀s à aalá nè va kọọ̀: “Níì pọ́lọ́ e gbálàí àbèè a tẹ̀ nè a kà beè sí ní ea gímèe dẽeé nì. Sõò a beè mèà naa vó kọbé gbò nen mon tóm e Bàrì é láá sí nèe. 4 Èé íè ge sí tóm Nen ea beè lẹ̀ẹ̀làmá tṍó e dee gáà bila, boo béè kọọ̀ bílá dee gé dú e tọ́ọ̀ nen náa é láá sí tóm. 5 Kùbmà tṍó e nda di bàlà booí, nda ní em dúù ẹ́ẹ́ dee nèà bàlà booí é.” 6 Tṍó ea ló gbò belí lọ̀l, à gbóó tumí múú kyáá kunukẽ̀ vaá tú sãa kyọ̀ọ̀mà sĩ̀ìna boo dẽè gbálàa. 7 À gbóó kọ́ nèe kọọ̀: “Àà gé logá sĩ́ ni mm̀ múú Sìlóàm” (ea tõó dò “Bà Lẹẹlà” tṍó e bà tab). À gbóó àà gé logá sĩ́ vaá a beè mòn nu tṍó ea oòa kẽ dù.

8 Tṍóá, pá a kè gyṍó nè gbò e ba beè nyimáe ló kọ à ólò bàn nu beè gbóó dààmà togó gè bĩiná kọọ̀: “É kọọ̀ níì gbálà ea beè olòó ĩìtẽ́ kẽ bàn nuá nì?” 9 Sìgà gbò géè kọọ̀: “Níà ẹ̀ẹ̀.” Sìgà gbò à kọọ̀: “Níì ẹ̀ẹ̀ nì. Níà nen ea bélíe.” Sõò gbálàa beè kilsĩ́ gè kọọ̀: “Níà nda.” 10 Vó à naa, bà gbóó bĩináe kọọ̀: “A beè naa và ò láá mòn nu ẽ́?” 11 À aalá nè va kọọ̀: “Gbálà ea kọlà Jíízọ̀sa beè tumí múú kyáá kunukẽ̀ vaá tú sãa kyọ̀ọ̀mà sĩ̀ìnàḿ boo dẽe. À gbóó kọ́ nèm kọọ̀, ‘Àà sí Sìlóàm gé logá sĩ́ ni.’ M beè gbóó àà gé logá sĩ́ vaá m̀ gbóó mòn nu.” 12 Tṍóá, bà gbóó bĩináe kọọ̀: “Ãàe ní e gbálàá dì e?” À aalá nè va kọọ̀: “Ním nyímà.”

13 Bà gbóó faalà gbálà e dẽée beè zẹ́ẹ́ gimíá siimá ló pá Fárìsíì. 14 A beè ẽenà kọọ̀ deé e Jíízọ̀s beè tumí múú kyáá kunukẽ̀ vaá tú sãa kyọ̀ọ̀mà boomá gbálà e dẽée beè gimíá beè dú Deè Bõ̀séi. 15 Pá Fárìsíì à gbóó bĩiná nágé gbálàá bé ea beè naa mòn nu. À gbóó kọ́ nè va kọọ̀: “A beè tú múú kyáá kyọ̀ọ̀mà sãa sĩ̀ìnàḿ boo dẽe. M̀ gbóó àà gé logá sím, vaá m̀ gbóó mòn nu.” 16 Sìgà pá Fárìsíì à gbóó dààmà togó gè kọọ̀: “Bàrì náa beè lẹ̀ẹ̀là gbálàá boo béè kọọ̀ náa sẹlẹ Deè Bõ̀séi.” Dõona gbò à kọọ̀: “À é náà và neǹ náàkyọ̀ láá sí íb gbò tóm dũ̀ùnèí ẽ́?” Pòòà à gbóó bã̀ vá zẹ̀ẹ̀. 17 Bà gbóó kpáá bĩiná gbálà e dẽée beè gimíá kọọ̀: “Tã́gíní bé e dẽè olo ní ea beè mùùnàa, éé ní eo é láá kọ́ kìlmàé ló é?” Gbálàa à aalá nè va kọọ̀: “Ẹ̀ẹ̀ neǹ kọ́ọ̀ bùlà Bàrì.”

18 Sõò pá Júù náa beè zìgà kọọ̀ dẽée beè gimí vaá a mon nu, dọ̀ọ̀mà tṍó e bà kólí tẹ̀ nè kà gbálà ea ni láá mòn nuá. 19 Bà gbóó bĩiná va kọọ̀: “É kọ níì bọọ nvín eo kọ́ì kọọ̀ dẽée beè gimí aa gbàà kà a? À náà và à gbóó láá mòn nu kátogóí é?” 20 A tẹ̀ nè a kà à aalá kọọ̀: “È nyímà kọọ̀ níì bẹẹ nvín vaá dẽée beè gimí aa gbàà kà. 21 Sõò née nyímà bé ea náa à láá mòn nu kátogóí àbèè nen ea beè mùùnàe dẽe. Bĩinaíe, mè a tulà togó nen. Á ló bel boo a bá.” 22 A tẹ̀ nè a kà beè ló belí boo béè kọ pọ̀ beè sií va ló pá Júù, boo béè kọọ̀ pá Júù beè bilá ló kọọ̀, kọ̀láá nen ea zigà kọọ̀ Jíízọ̀s níà Kráìst, bà é kpóe lọl mm̀ ba bõ̀ònaló fã̀. 23 Níà nú ea náa a tẹ̀ nè a kà à kọọ̀: “Bĩinaíe, mè a tulà togó nen ẽ́.”

24 Bà gbóó kolí gbálà e dẽée beè gimíá ní ea égè bàà tóm vaá kọ́ nèe kọọ̀: “Nvèè ka ló Bàrì vaá ò ló kà-kà bel nèi. Beele nyímà kọọ̀ gbálàí níà neǹ náàkyọ̀.” 25 À aalá nè va kọọ̀: “Nda ním nyímà be ẹ̀ẹ̀ neǹ náàkyọ̀. Sõò, nú em nyímà dú gè kọọ̀ dẽém beè gimí vaá m láá mòn nu kátogóá.” 26 Tṍóá, bà gbóó bĩináe kọọ̀: “Éé ní ea beè naa ẽ́? A beè mùùnà ni dẽe naa và ẹ?” 27 À aalá nè va kọọ̀: “M beè kọ́ nèí dõona tóm, sõò nóo beè pãanei tṍ ló. Éé ní ea náa ò gbĩ́ gè kpáá dãi ẽ́? É kọọ̀ boolo gbĩ́ gè du naigé pá a gbò nyòòne nvée?” 28 Tṍóá, bà gbóó nvèèmàe lẹ́ vaá kọ́ nèe kọọ̀: “Ò ólò nyoone nvéè gbálàá, sõò beele ólò nyoone nvéè Mózìs. 29 È nyímà kọọ̀ Bàrì beè ló bel nè Mózìs, sõò née nyímà kĩée e nakà gbálàí aà dù.” 30 Gbálàa à aalá nè va kọọ̀: “À dú kà nu bọ̀ọ̀ló kọọ̀ nóo nyímàìe kĩée e gbálàá aà dù, sõò a muunà dẽè nda. 31 È nyímà kọọ̀ Bàrì náa ólò pãane tṍ ló gbò náàkyọ̀, sõò à ólò pãanée tṍ ló kọ̀láá nen ea sííáẹ pọ̀ ló vaá naa a bùlà. 32 Lọ̀l gé deè kéléá, è gáà dã kọọ̀ à íe nen ea ni láá mùùnà dẽè nen e dẽée beè gimí aa gbàà kà. 33 Be níì Bàrì ní ea beè lẹ̀ẹ̀là gbálàíé nì, náa gáẹ̀ beè láá naa tọ́ọ̀ kà nu.” 34 Bà gbóó kọ́ nèe kọọ̀: “O beè mea mm̀ náàkyọ̀, vaá kátogóá, ò gé nóòmà nuù beele?” Bà gbóó tobvíe tẹlẹ kèdẹi!

35 Jíízọ̀s à gbóó dã́ kọ bà tóbvíe tẹlẹ kèdẹi. Tṍó ea moníe, à gbóó bĩináe kọọ̀: “É kọọ̀ ò íè zìgà mm̀ Sã́áná nená?” 36 Gbálàa à aalá kọọ̀: “Tẹ́ẹ̀, ẹlẹẹ̀ mée ẽ́? Kọ́ nèm kọbé m̀ íée zìgà m.” 37 Jíízọ̀s à kọ́ nèe kọọ̀: “O moníe. Kàsĩ́, ẹlẹ ní ea gé zọ́ ni loá belí é.” 38 Gbálàa à gbóó kọọ̀: “M̀ íèe zìgà m, e Nen Ea Íém.” À gbóó kumí sĩ́ kẽ nèe. 39 Tṍóá, Jíízọ̀s à gbóó kọọ̀: “M beè dú bàlà booí ló gè beelá kọọ̀, gbò e bà náa mon nu á mòn nu nè ge kọọ̀ dẽè gbò e bà gé mon nu á gimí.” 40 Tṍó e pá Fárìsíì e ba beè dìé ló dã́ gbò belí, bà gbóó bĩináe kọọ̀: “Naa kọọ̀ ò gé kọ́ọ̀ beeleè gbò gímà dẽe?” 41 Jíízọ̀s à aalá nè va kọọ̀: “Be o beè dui gbò gímá dẽe, nóo gáẹ̀ dui gbò náàkyọ̀. Sõò kátogóí, ò kọ́ì kọọ̀, ‘Beele moǹ nu.’ Ò é gbẹ́aí mm̀ bọọ náàkyọ̀ lee.”