Tóm Gbò E Jíízọ̀s Beè Lẹ̀ẹ̀là

26 Àgrípà à gbóó kọ́ nè Pọ́ọ̀l kọọ̀: “Ò é láá ló bel boo o bá.” Tṍóá, Pọ́ọ̀l à gbóó nììnà bá vaá dààmà togó gè ló bel mm̀ ge kpènà a bá kọọ̀:

2 “Nyíém ẹ́ẹ kọọ̀ kèsĩ́ oló Méné Àgrípà ní em gé tõo ló bel mm̀ ge kpènà nà bá nieí kilma ló dénè bel e pá Júù beè lóm ló é, 3 èlmà tõ̀ò boo béè kọọ̀ ò palàge nyimá dénè nàànù kunukẽ̀ nè dùlà bel ea di zẹ̀ẹ̀ pá Júù. Vó à naa, m̀ banì kọ ó ĩ̀ìmà pãaném tṍ ló.

4 “Mm̀ kà-kà, dénè pá Júù e ba beè nyimám ló lọl tṍó em beè di mm̀ nà deè ãa, nyímá bé em beè tõó dùm naa gbẹá zẹ̀ẹ̀ pá beélè dó nè gbẹá Jèrúselẹ̀m. 5 Be bà gbĩ́ gè ló kà-kà bel, bà é nyímá kọọ̀ m̀ ólò tõó dùm dì belí neǹ Fárìsíì, vaá pá Fárìsíì ólò tõó boo log èlmà dénè nakà pá Júùa. 6 Sõò kátogóí, bà gé béélám bel ló boo béè kọọ̀ m̀ íè ból dẽesĩ́ mm̀ nú e Bàrì beè zìgà nè bẹẹ gbò nómá tẹ̀a. 7 Zìgànùí ní e 12 tẽ́gã e íè gé ẹbmà dẽe gè mòn tṍó ea é nááá ẽ́, ea náa kọ bà á tú agẹ bá siimá tóm nè Bàrì bílá dee nè ẹ́ẹ́ èlà ẹ. Nakà ból dẽesĩ́í ní e pá Júù élá boo gbàm bel, e Méné ẽ́.

8 “Éé ní ea náa à tàvàlàí ló gè zìgà kọọ̀ Bàrì ólò kẽee nen ea beè ù lọl kemà ú é? 9 À íè tṍó e nda beè àgala boo kọ à bọ́ló kọ ḿ naa uú boo béè Jíízọ̀s ea dú Názarẹ̀t. 10 Níì kà lèlà nú em beè naa gbẹá Jèrúselẹ̀m ẽ. M beè tú gã́bug gbò e bà di káí nvee tọọ̀ kpọ́gọ́lọ́, boo béè kọ m beè ié kpóó ea aa bá gbò togó vààla gyọ́ọ, vaá m̀ ólò nvèè sãa kúm tṍó e bà é gé fẹ́ va. 11 M beè pììga boo gè tú bá kpóó siimá va kọ bà á àmà sàn ba zìgà tení dú ló gè nèva kpọ̀té gã́bug tṍó gbẹá mm̀ dénè tọ bõ̀ònaló fã̀ pá Júù, vaá boo béè kọ m beè palàge bã̀ súng nyòòmà va, m beè biigè va ló iná nágé dõona kà gbò bon.

12 “Tṍó em gé náa gbò nuí, gbò togó vààla gyọ́ọ beè gbóó nèm kpóó vaá lẹ̀ẹ̀làm siimá Dàmáskọ̀s. 13 Tṍó ea ni dú fèèbe em di èèlè em gé aà, ẹ́ẹ́ dee ea mo èl nàànì beè gbóó mò aa káála beeá tením ló bií ló gbò e ba beè dìḿ ló, e Méné. 14 Tṍó e dénè bẹ̀ì ni dọ́ kunukẽ̀, m̀ gbóó dã́ moń ea kọ́ nèm mm̀ dém bel Híbrù kọọ̀: ‘Sọ́ọ̀l, Sọ́ọ̀l, éé ní ea náa ò gé bíìgèm ló é? Ò gé nveà kom ló o bá belí ból ea olòó kòn byṍ dọọ̀ a tẹ̀ íe.’ 15 Sõò nda beè gbóó kọọ̀: ‘Oloò mée e Nen Ea Íém ẽ́?’ Nen Ea Íém à kọọ̀: ‘Ndaà Jíízọ̀s, eo gé bíìgè lóá. 16 Aa boo elá èla. Nú ea náa m̀ sìlà ní ló dú boo béè ge sà ni naamá ńdáà gyóòlo nè ge naa kọ ó sí neǹ ditõ̀ò kilma ló gbò nú eo beè mòn nè gbò nú em é náa kọ ó mòn ea kilím ló. 17 Vaá nda é duulà ni lọl bá gbòí nè gbò dó em é lẹẹlà ni siimá 18 kọ ó mùùnà va dẽe vaá tú va lọl mm̀ kùkùù gín nvee mm̀ ẹ́ẹ́ dee, nè ge tú va lọl kèbá kpóó lẹ̀ẹ̀là bel Sétàn nvee bá Bàrì, kọbé Bàrì láá ia ló ba pọ́lọ́ nèva, nè kọbé bà láá ié nú e Bàrì beè zìgà nè gbò ea beè naa kọ bà á di káí tení dú ló zìgà e bà íe mm̀ nda.’

19 “Vó à naa, e Méné Àgrípà, ním beè lọ̀l togó kèbá nú e Bàrì beè kùùlà nèm ã́, 20 sõò m beè zẹ́ẹ́ kọ́ nè gbò e bà di Dàmáskọ̀s besĩ́ m̀ kalá kọ́ nè gbò e bà di Jèrúselẹ̀m nè gbò e bà di dénè bálásĩ́ Jùdíà, bií ló pá dõona kà dó, kọ bà á ọgá vaá kììa kẽ nyoone Bàrì tení dú ló gè sí tóm ea zógè kọ bà ọ́gá. 21 Níà nú ea náa pá Júù à siím gbẹá mm̀ tọọ̀ káíá vaá gbĩ́ gè fẹ́m ẽ́. 22 Sõò, boo béè kọ m mon nvèè bá ea aa bá Bàrì, m̀ dì em gé kilsĩ́ gè kọ́ kpẹ̀a nè gbò ńkem nè ńpọ̀b, vaá áá nú em géè kọ̀ dú nú e Gbò Kọ́ọ̀ Bùlà Bàrì nè Mózìs beè kọ à é nááá— 23 kọọ̀ Kráìst é mon tã̀àgã̀, vaá boo béè kọọ̀ ẹlẹ ní ea dú túá nen e Bàrì é kẽee lọl kemà úé, à é kọ́ kpẹ̀a vaá naa kọọ̀ gbòí nè pá dõona kà dó á ié ẹ́ẹ́ dee.”

24 Boo tṍó e Pọ́ọ̀l dì ea gé ló gbò belí mm̀ ge kpènà a bá, Fẹ́stọ̀s à gbóó tú agẹ mon kọọmá kọọ̀: “Dáa dì ní dẽe, e Pọ́ọ̀l! Bá kpóó nò kpá a bọẹ́ ni dáa!” 25 Sõò Pọ́ọ̀l beè kọ́ nèe kọọ̀: “Dáa á gém dẽe, e Fẹ́stọ̀s Eo Dúù Méné E Ka Di Ló. M̀ gé ló kà-kà bel e nyìmànù di m. 26 Mm̀ kà-kà, méné em gé tááá ló ló bel nèí palàge nyimá gbò nuí. M̀ palàge àgala boo kọọ̀ tọ́ọ̀ kà náa táẹ́ nyíe, boo béè kọọ̀ tọ́ọ̀ kà nuí náa beè naaá gbẹá ke gũ̀a. 27 É kọọ̀ oló Méné Àgrípà zigà ló nú e Gbò Kọ́ọ̀ Bùlà Bàrì beè kọ́? M̀ nyímà kọ ò zigà.” 28 Sõò Àgrípà beè kọ́ nè Pọ́ọ̀l kọọ̀: “Pọ́ì ńkem̀ tṍó, ò é náa kọ ḿ nyoone nvéè Kráìst.” 29 Pọ́ọ̀l à gbóó aalá nèe kọọ̀: “Kọbèè tẽ̀ènè kátogóí àbèè tṍó téní ló, m̀ banì Bàrì kọọ̀ olo nè dénè gbò e bà gé pãaném tṍ ló nieí á dì belí bé e nda dì naaí, sõò bà á gá túi nvee kpọ́gọ́lọ́ belí bé e nda dì naaí.”

30 Tṍóá, Méné Àgrípà nè Fẹ́stọ̀s nè Bèníìs, bií ló dénè gbò e ba beè di ĩ́ìva tẽ́ lóá beè gbóó elá èla. 31 Sõò tṍó e bà gé aà, bà gbóó kọ́ nè ene kọọ̀: “Gbálàí gáà si tọ́ọ̀ kà pọ́lọ́ ea bĩ́íná gè fẹ́ẹ àbèè ge túe nvee tọọ̀ kpọ́gọ́lọ́.” 32 Àgrípà à gbóó kọ́ nè Fẹ́stọ̀s kọọ̀: “Be níì kọọ̀ gbálàí beè zalí kpá ló a bel má Sízà nì, è gáẹ̀ beè sọ̀ẹ bá.”