Lé Kpẹ̀a E Máátìù Beè Emí

18 Tṍóá, gbò nyòòne nvéè Jíízọ̀s beè gbóó dúé ló gé bĩináe kọọ̀: “Mée ní ea bọọ lọ̀l vaá à lee mm̀ Boǹ Méné Bàrì e?” 2 À gbóó kolí ene kà ńkem̀ nvín elè vá zẹ̀ẹ̀, 3 vaá kọọ̀: “M̀ lóò kà-kà bel nèi kọọ̀, be nóo nyááàì, vaá labvii láb belii gbò pá nvín, nóo é bãí mm̀ Boǹ Méné Bàrì. 4 Vó à naa, kọ̀láá nen ea kilmà kpáló kẽ belí ńkem̀ nvíní, ní ea bọọ lọ̀l vaá à lee mm̀ Boǹ Méné Bàrì e; 5 vaá kọ̀láá neń ea tú ene kà ńkem̀ nvíní boo béè ńdáà bée tú nágé nda. 6 Tãa vó e nen sívè enè neń ea di zẹ̀ẹ̀ gbò e bà kil kẽ e bà íém zìgà m-mí, à gáẹ̀ beè dú lé be ba beè tú kpò dem e nom̀ tóòmà tò ólò gbẽ̀èmà nu kẹlẹ́ẹ́ òò, vaá tãáe bá tẹlẹ pène.

7 “Pọ́lọ́ múú kyáá á di ló bàlà booí boo béè kọ bà náa kọọ̀ gbò nen á dọ̀ ààḿ nvée! Mm̀ kà-kà, nú ea é náa kọọ̀ nen á dọ̀ ààḿ nvée é íè ge dì, sõò pọ́lọ́ múú kyáá á di ló neń ea náa nú ea náa kọọ̀ nen á dọ̀ ààḿ nvée! 8 Vó à naa, beè o bá àbèè o kpóó tọ ní ea é náa kọ ó dọ̀ ẹ, fùl lọa ló vaá ò tóbví gbẹẹ. À é dú lé be ò íe ene kà bá àbèè ene kà kpóó tọ vaá ié dùm, èlmà ge ié bàà kà bá àbèè bàà kà kpóó tọ, vaá à dú gè tú ni tẹlẹ dáà sã́ ea é di dọ̀ọ̀mà dè-dè. 9 Nagé, beè dẽé ni ní ea é náa kọ ó dọ̀ ẹ, tiilá lọa ból vaá ò tóbví gbẹẹ. À é dú lé be ò íe enè ból dẽe vaá ò íe dùm, èlmà ge ié bàà ból dẽe vaá à dú gè tóbví ni tẹlẹ Gẹ̀hénà e sã́ gé bẹ́ m. 10 Ó gá ẹbvii tọ́ọ̀ neń ea di zẹ̀ẹ̀ gbò e bà kil kẽí tẹlẹí kẽ, boo béè kọ nda kọ́ọ̀ nèi kọọ̀, ba gbò nyómá tóm ea di káála ólò di kèsĩ́ ńdáà Tẹ̀ ea di káála lee. 11* ——

12 “Bọọ bùlà kọ́ và ẹ? Be à íe neǹ kùdẽe ló naanà ból ea íe 100 naanà ból vaá ene kà à dagí, é kọ náa é sọbá 99 kà ní ea sígáá gbẹẹ́ boo gù, vaá àà gé gbĩ́ ní ea dágí á? 13 M̀ lóò kà-kà bel nèi kọọ̀ be à mon, nyíée é palàge ẹẹ ló níá èlmà 99 kà e náa beè dagí á. 14 Mm̀ tẽ̀ènè sĩ́deèá, náa tan ńdáà* Tẹ̀ ea di káála kọọ̀ bã̀àna enè nen ea di zẹ̀ẹ̀ gbò e bà kil kẽí á pè.

15 “Beè o vígà sí ni pọ́lọ́, àà síé ló gé naa kọ á nyimá. Be à gbań ni tṍ ló, nyimá kọ ò nveè bá nè o vígà kọ á naa nú ea lelà. 16 Sõò be náa gbań ni tṍ ló, faalá enè nen àbèè bàà nen siimáé ló, naa ní e bel ea aa gã́ bàà nen àbèè taà nen é láá sí neǹ ditõ̀ò ló dénè bé e nu beè naaá naa. 17 Be náa gbań va tṍ ló, kọ́ nè bõ̀ònatõ̀ò. Be náa gban nagé tṍ ló bõ̀ònatõ̀ò, ò gbóó sẹlẹ́ẹ belí nen e náa nyímá ló Bàrì nè neǹ lọ̀l kpègè gbáá.

18 “M̀ lóò kà-kà bel nèi kọọ̀ kọ̀láá kà nu eo bọ́bvìì gbẹáí boo kunukẽ̀í é dú nu e ba beè bọbví gbẹá káála, vaá kọ̀láá kà nu eo táàlàì gbẹáí boo kunukẽ̀í é dú nu e ba beè taalá gbẹá káála. 19 M̀ ló nàgé kà-kà bel nèi kọọ̀, be bàà bọ̀ì eo dií boo kunukẽ̀í túì kũ̀ùnà mòn banmai nú eo monìì kọ à dú bíi, ńdáà Tẹ̀ ea di káála é náa nèi. 20 Boo béè kọọ̀, kọ̀láá kĩée e bàà àbèè taà nen bṍóná boo ńdáà bée, nda é dí vá zẹ̀ẹ̀.”

21 Tṍóá, Pítà à gbóó dù gé bĩináe kọọ̀: “Neń Ea Íém, kuù tóm ní em é ia ló nè nà vígà be à sím pọ́lọ́ ẹ́? É kọọ̀ àlàbà tóm?” 22 Jíízọ̀s à aalá nèe kọọ̀: “Nda kọ́ọ̀ nè ni kọọ̀, níì àlàbà tóm nì, sõò 77 tóm.

23 “Níà nú ea náa vaá bà é láá tú Boǹ Méné Bàrì doolé ló méné ea gbĩ́ kọọ̀ pá a gyóòlo á kpẽ́ kom e ba beè siié bá neèe ẽ́. 24 À gé daamà gé togó gè tú va kpègè bá, bà gbóó faalá ene kà gbálà ea sííe kom̀ 10,000 tálẹǹt* bá domá. 25 Sõò boo béè kọ náa beè ié nú ea é kpẽ́émá, a tẹ̀ tọ beè gbóó kọ bà á oóe bií ló a va nè pá a nvín, nè dénè nu ea íe, vaá kpẽemá kom ea síiá. 26 Gyóòloá beè gbóó dọ̀ẹ́ ke gbàà vaá kumí dúnú kẽ bànie kọọ̀: ‘Sóo-sóo, nèm tṍó, mè m̀ é kpẽ́ dénè kom em síì ní bá nè ni.’ 27 A beè dú ńsàn nyíè tẹ̀ tọá naa ní ea sọ́ẹ bá kọ́ á àà, vaá a beè kuu nú boo kom ea beè siiá. 28 Gyóòloá beè gbóó àà vaá zọ̀ dõona kà gyóòlo e bà ólò gbá sí tóm nè ménéá nyòònà. Gyóòloí beè siíe kom̀ 100 dìnárìọ̀s* bá. A beè gbóó siíe vaá biíe bá òò kọọ̀, ‘Kpẽ́ kọ̀láá kà kom eo síìḿ bá nèm.’ 29 Gyóòlo e bà ólò gbá sí tóm nè ménéá beè gbóó dọ̀ kumíe dúnú ke gbàà, vaá bànie kọọ̀, ‘Sóo-sóo, nèm tṍó, mè m̀ é kpẽ́ kom em síì ní bá nè ni.’ 30 Sõò náa beè zìgà, tãa vó, a beè kọ bà á siíe nvee tọọ̀ kpọ́gọ́lọ́ dọ̀ọ̀mà tṍó ea é kpẽ́ kom ea beè siié báá. 31 Tṍó e dõona kà gbó gyóòlo e bà ólò gbá siá tóm mon naa vó, a beè palàge biilé va nyíe, naa ní e bà aà gé kọ́ dénè nú ea náááí nè ba tẹ̀ tọ. 32 A tẹ̀ tọ à gbóó lẹ̀ẹ̀là tóm kolmáe vaá kọ́ nèe kọọ̀: ‘Ọ̀ọ̀ kà neǹ bàg. Nda beè kuu nú boo dénè kom eo beè siiḿ bá tṍó eo banìm. 33 É kọ náa bọ́ló kọ ò gáẹ̀ ié sàn nyíe ló nen eo gé gbái siai tóm, belí bé e nda beè ié sàn nyíe ló olo naaá?’ 34 Tṍóá, a tẹ̀ tọ à gbóó bã̀ súng nyòòmàe, vaá kọ́ nè gbò e bà ólò kùdẽe ló tọọ̀ kpọ́gọ́lọ́ kọ bà á túe nvee tọọ̀ kpọ́gọ́lọ́ dọ̀ọ̀mà tṍó ea é kpẽ́ dénè kom ea síiá. 35 Be buù bọ̀ì nóo iàì ló nei bọọ vígà lọaí mm̀ bọọ nyíe, ńdáà Tẹ̀ ea di káála é tú tẽ̀ènè kà báá sẹ̀ẹ̀mài nagé.”