Tóm Gbò E Jíízọ̀s Beè Lẹ̀ẹ̀là
2 Tṍó e Sẹ̀lẹ̀nù Deè Péntikọ̀sta gé kilsĩ́, dénè ọ̀và beè di tẽ̀ènè ketõ̀ò. 2 Mm̀ bùló, mon ea silà aa káála ea bélí kòvà fọ́ọ́lọ́ beè gbóó m-má zivèkà tọ e ba beè di ĩ́ìtẽ́á. 3 Vaá ba beè gbóó mòn nú ea bélí dém sã́ ea dọ́ boo togó buù ọ̀và. 4 Nyómá káí beè gbóó dọ boo dénè ọ̀và naa ní e bà daamà togó ló kele-kele dém bel, dì belí bé e nyómá káíá náa kọ bà á láá ló naa.
5 Kà lèlà tṍóá, pá Júù e bà ólò fã̀ Bàrì e bà aa kọ̀láá kà dó beè di Jèrúselẹ̀m. 6 Tṍó e moná silà, gã́bug nen beè gbóó bõoná, vaá a beè palàge bọọ́ vá ló, boo béè kọọ̀ buù ọ̀và dã́gági ba dém bel gã́ gbò nyòòne nvéè Kráìst e bà gé ló. 7 Mm̀ kà-kà, a beè palàge bọọ́ vá ló naa ní e bà kọ́ọ̀: “Níì kà nu bọ̀ọ̀ló. É kọọ̀ dénè gbò e bà gé ló belí níì pá Gálilì nì? 8 À náa và buù bẹ̀ì dì e gé dã́ buù kà bẹẹ dém bel e bà gé ló é? 9 Beelé pá Pátìà, pá Mídìà nè pá Ílàm, gbò e bà ólò tõó Mèsòpòtémìà, Jùdíà nè Kàpàdósìà, Póntọ̀s nè bálásĩ́ Ésìà, 10 Fríjìà nè Pàmfílìà, Íjìpt nè gbò e bà aa bálásĩ́ Líbìà ea di kuló Sàìrínì, pá Júù nè gbò e bè níì pá Júù nì e bà aa Róm̀ dù gé zọ̀ pá Júù fã̀ Bàrì, 11 bií ló pá Kríìt nè Àrébìà dã́à mm̀ buù kà bẹẹ dém bel tṍó e bà gé kọ́ nú ea kil ló gbò tóm dũ̀ùnè e Bàrì ni sí.” 12 Mm̀ kà-kà, a beè palàge bọọ́ vá ló vaá degélé va naa ní e bà bĩ́íná ene kọọ̀: “Éé ní e níí tõó dọ̀ ẹ?” 13 Sõò sìgà ọ̀và géè màngã̀ va vaá kọọ̀: “Míí a téni vá dẽe.”
14 Pítà à gbóó zọ̀ Òb Nè Ene Nen E Jíízọ́s Lẹẹlàa elá èla vaá tú agẹ mon kọọmá nè gbòa kọọ̀: “Booló pá Jùdíà nè dénè boólo eo dií Jèrúselẹ̀m, nyimai níí vaá ò palàge pãanei tṍ ló gbò bel em gé lóí. 15 Míí náa téní dẽè gbòí belí bé eo doomàì naaniiá, boo béè kọọ̀ kátogóí di-dí síìna òb tóm boo lọ̀ọ̀le.* 16 Sõò nee nú e neǹ kọ́ọ̀ bùlà Bàrì Jóẹ̀l beè kọ̀í: 17 ‘Bàrì kọ́ọ̀, “Mm̀ gbò dee deè nvéè dee, m̀ é tú ńdáà nyómá tẹlẹ boo kọ̀láá íb nen, vaá bọọ gbò nvín págbálà nè bọọ gbò nvín pábia é kọ́ bùlà Bàrì. Bọọ gbò nvín ãa gbálà é moà nuù dẽe vaá bọọ gbò kànen é moà gyáálá. 18 Mm̀ gbò deeá, m̀ é tú ńdáà nyómá tẹlẹ boo pá ńdáà gbò gyóòlo págbálà nè pábia vaá bà é kọ́ bùlà Bàrì. 19 Vaá nda é náa kọọ̀ nu dũ̀ùnè á sila sĩ́ káála vaá nu bọ̀ọ̀ló á naaá boo kunukẽ̀í—mii, sã́, nè kpoò kéi é di. 20 Nàànì é kuu gín vaá ẽ́ kúm mii besĩ́ gbele dũ̀ùnè deè Jìhóvàa* kálá dù. 21 Vaá kọ̀láá nen ea kólí béè Jìhóvà,* é duuà.”’
22 “Booló pá Ízrẹẹ̀l, dãi gbò bel em gé lóí: Jíízọ̀s ea dú Názarẹ̀t dú nen e Bàrì beè túe tẹlẹ bàlà kẽ nèi tení dú ló gã́bug tóm dũ̀ùnè nè nu bọ̀ọ̀ló ea beè túe siimá tṍó ea beè dìí zẹ̀ẹ̀ dì belí bé e boolo nyímàì naanii. 23 Ba beè tú gbálàí nvee bá boolo, boo béè nú ea dú bùlà Bàrì nè boo béè nú ea beè tú tṍó gbẹẹ́ deèsĩ́ nyimá. O beè fẹíe tení dú ló gè tuíe nei gbò e bà náa gban tṍ ló log kọ bà á túe ká kú té. 24 Sõò Bàrì beè kẽée lọl kemà ú vaá naa kọ á di pọ́ì aa bá nyaa ló ú, boo béè kọ náa válí kọọ̀ ú á láá bọbvíe. 25 Níà nú ea náa Dévìd beè kọ́ kìlmàé ló kọọ̀: ‘Nda túù Jìhóvà* sẹ̀ẹ̀a sĩ́ lee. Boo béè kọọ̀ a dìḿ boo bá lè, tọ́ọ̀ nu náa é láá kpõ̀ònàm. 26 Vó à naa, nyíém ẹ́ẹ vaá bel em lóò zógè kọọ̀ nyíém palàge ẹẹ, vaá m̀ íe ból dẽesĩ́, 27 boo béè kọ nóo é aàḿ ló gbẹẹ́ mm̀ Bànà Ú, àbèè ge sọ̀bá íí o gyóòlo ea bọ́ló dẹ̀lẹ̀ nyíé boo kọ á bèm. 28 O náa kọ ḿ nyimá ló èèlè ea é ném dùm. Ò é náa kọ ḿ ṍ kààgà gbẹá ní kèsĩ́.’
29 “Pá vígà, m̀ túù táàa ló loomá bel nèi ea kil ló Dévìd, ea dú togó boo tọ, kọọ̀ a beè ù vaá bà lìe, vaá kóló dem e ba beè túe li m dìí zẹ̀ẹ̀ tẹlẹ̀ nieí. 30 Boo béè kọọ̀ ẹ̀ẹ̀ beè neǹ kọ́ọ̀ bùlà Bàrì vaá a beè nyimá kọọ̀ Bàrì beè zilàẹ̀ zíl neèe kọ à é túe ene kà a nvín ĩgẽ̀è boo a kpòté méné. 31 A beè gbẹẹ́ sĩ́ mòn vaá kọ́ nú ea kil ló kẽ̀èà aa kemà ú Kráìst, kọọ̀ Bàrì náa beè sọ̀ẹ bá gbẹẹ́ mm̀ Bànà Ú, àbèè ge sọ̀bá a íí kọ á bèm. 32 Bàrì beè kẽee Jíízọ̀s lọl kemà ú, vaá dénè bẹ̀ì beè mònmà dẽe. 33 Vó à naa, boo béè kọọ̀ Bàrì beè dàlàẹ kpãa ló vaá túe sẹ̀ẹ̀a boo bá lè, vaá a íe nyómá káí ea Tẹ̀ beè zìgà nèeá, à gbóó lẹ̀ẹ̀là nú eo monìì vaá dãiá. 34 Dévìd náa beè kil káála, sõò a beè kọọ̀, ‘Jìhóvà* beè kọ́ nè Nen Ea Íém kọọ̀: “Ĩìm tẽ́ boo bá lè 35 dọ̀ọ̀mà tṍó em é tú pá o gbò ọ́b naamá nú eo é sẹlẹ tọ́ boo.”’ 36 Vó à naa, dénè pá Ízrẹẹ̀l á nyimá kọọ̀ Bàrì a tú Jíízọ̀s eo beè kaí kú téá naamá Nen Ea Íéi nè Kráìst.”
37 Tṍó e bà dã́ naa vó, nyíé va beè gbóó palàge tã̀àgã̀ naa ní e bà bĩ́íná Pítà nè nagbò e Jíízọ̀s lẹẹlàa kọọ̀: “Pá vígà, éé ní eé náa ẽ́?” 38 Pítà à gbóó kọ́ nèva kọọ̀: “Ọgai vaá buù bọ̀ì diiaí múú boo béè Jíízọ̀s Kráìst kọbé Bàrì ia ló bọọ pọ́lọ́ nèi, mè ò é gbóó iei nyómá káí e Bàrì ólò nè pọ́ì. 39 Boo béè kọọ̀ zìgànùí dì nè boolo nè bọọ gbò nvín nè dénè gbò e bà aa kpã́á nè dénè gbò e Jìhóvà* bẹẹ Bàrì é kólí nvea ló.” 40 A beè tú agẹ bá kọọmá kpẹ̀a nèva vaá siè va kpóó ló kọọ̀: “Kpoolai lóó lọlíí ló nakà pọ́lọ́ kúúlíí kọbé nóo íei kyọ̀àsĩ́.” 41 Vó beè naa kọọ̀ gbò e bà tú ẹ́ẹ́-ẹẹ̀ nyíe tuumá a moǹ bel á dììa múú, vaá nú ea é láá dú 3,000 nen beè dọ̀ vá ló deeá. 42 Ba beè kilsĩ́ gè olòó nó nu lọl bá gbò e Jíízọ̀s lẹẹlàa. Ba beè olòó zọ̀ va bõoná, gbá deá nu, vaá olòó tã̀àgã ló Bàrì.
43 Mm̀ kà-kà, pọ̀ beè sii kọ̀láá nen, vaá gbò e Jíízọ̀s lẹẹlàa beè gbóó dààmà togó gè sí gã́bug tóm dũ̀ùnè vaá naagi nu bọ̀ọ̀ló. 44 Dénè gbò e bà íe zìgà mm̀ Jíízọ̀s beè gbá di tẽ̀ènè ketõ̀ò vaá olòó gbá dõ̀ònà nú e bà íe, 45 vaá bà géè oo gbò nú e bà íe vaá dõo kpègè ea dú ló nè kọ̀láá nen dẹ̀ẹ̀a boo bíi ea di ló buù nen. 46 Ba beè olòó gbá bõoná mm̀ tọọ̀ káí kọ̀láá dee vaá olòó dé gyã́á gbẹá tọọ̀ kele-kele nen vaá tú ẹ́ẹ́-ẹẹ̀ nyíe nè õ̀òa bùlà dõ̀òmà gyã́á nè ene. 47 Ba beè olòó lèèlà Bàrì vaá nyíè dénè nen beè ẹẹ́ vá ló. Jìhóvà* beè olòó tú gbò e ẹlẹ ni duulà tẹlẹ̀ vá ló buù dee.