Tóm Gbò E Jíízọ̀s Beè Lẹ̀ẹ̀là

3 Enè dee, Pítà nè Jṍòn géè sí boo beè tọọ̀ káí tṍó e bà ólò tã̀àgã ló Bàrì. Tṍóá é láá dú taà tóm boo fèèbe.* 2 À íe ene kà gbálà ea beè dú kọ̀và aa gbàà kà e bà ólò dàlàẹ sẹlẹ́ ló gbànsĩ́ ea kọlà Kà Lé Gbànsĩ́ ea di ló tọọ̀ káíá kọ̀láá dee, kọbé à láá bàn nu bá gbò e bà é bã́ boo beè tọọ̀ káíá. 3 Tṍó ea mon Pítà nè Jṍòn e bà é gé bã boo beè tọọ̀ káíá, à gbóó dààmà togó gè bàn va nu bá. 4 Pítà nè Jṍòn à gbóó ẹ̀bvie vaá kọ́ nèe kọọ̀: “Ẹ̀bvii.” 5 À gbóó ẹ̀b va dòòmà kọ bà é dõonèè nu neèe. 6 Sõò Pítà à gbóó kọ́ nèe kọọ̀: “Ním íè ẹ́ẹ́ kpé nè nóò kpé, sõò nú em íe ní em é né ni ẽ́. Boo béè Jíízọ̀s Kráìst ea dú Názarẹ̀t, aa boo kyã̀à!” 7 À gbóó siíe bá ló bá lè vaá dàlàẹ lọl boo. Tẽ̀ènè tṍóá, kà à gbóó bã̀é mm̀ kpóó tọ vaá kákáí kẽ́e à gbóó aga ló. 8 À gbóó pẹẹ elá èla vaá zọ̀ va kyã̀à bã boo beè tọọ̀ káíá. A beè kyã̀à pẹẹgi vaá olòó lèèlà Bàrì. 9 Dénè nen beè mònie tṍó ea gé kyãà vaá lèèlà Bàrì. 10 Ba beè gbóó nyimá kọọ̀ níà gbálà ea beè olòó ĩìtẽ́ ló Kà Lé Gbànsĩ́ ea di ló tọọ̀ káí bàn nuá. Nú ea nááá ló gbálàí beè palàge bọọ́ vá ló vaá ẹẹlẹ̀ va nyíe.

11 Boo tṍó e bá gbálàá di-dí ló Pítà nè Jṍòn gbẹá kĩée e bà ólò kolíe Ke Kọ̀ọ̀lọ̀ Sólomòna, dénè gbòa à gbóó teelá nyooné va kĩá vaá a beè palàge bọọ́ vá ló. 12 Tṍó e Pítà mon naa vó, à gbóó kọ́ nè gbòa kọọ̀: “Booló pá Ízrẹẹ̀l, éé ní ea náa kọ níí á palàge bọọí ló é, vaá éé ní ea náa kọọ̀ dénè bọ̀ì ó gọlíí ló beele ẹ̀b belí kọọ̀ beélè kpóó àbèè beélè lé lab dògò ní ea náa kọọ̀ gbálàí á láá aa boo kyã̀à ẽ? 13 Bàrì Ébràhám̀, Áízìk, nè Jékọ̀b, ea dú Bàrì beélè gbò nómá tẹ̀, a nveè ka ló a Gyóòlo, ea dú Jíízọ̀s, eo beè tuíe lọaí bá vaá amaíe sàn gbẹá kèsĩ́ Páílèt, náa kal ló béè kọọ̀ a beè gbĩ́ gè sọ̀ẹ bá á. 14 Mm̀ kà-kà, o beè amai sàn nen ea di káí vaá dú neǹ lé lab dògòí, vaá kọi kọ bà á sọ̀bá neǹ fẹ̀ nèna nèi, 15 vaá fẹi Pọ̀b Neǹ Tùle ea é ne dùm gbò nen, sõò Bàrì beè kẽée lọl kemà ú vaá beele beè mònmà dẽe. 16 Vaá tení dú ló a bée nè zìgà e beele íè mm̀ a bée ní ea náa kọọ̀ gbálà eo monìì vaá nyimaíe lóí á láá ié agẹ ló é. Zìgà e beele íèé m ní ea náa kọọ̀ gbálàí á láá boá gbẹá kèsĩ́ dénè bọ̀ì e. 17 M̀ nyímà kọ ò náànìì nuí boo béè kọ nóo beè nyimai, dì belí bé e gbò e bà gé bẹlíi beè naa nagé naaá. 18 Sõò Bàrì sọtọ́ deè kọọ̀ níí á naaá kọbé à ḿm̀-mè nú ea beè kọ́ tenmá gã́ dénè gbò kọ́ọ̀ bùlà Bàrì kọọ̀, Kráìst é mon tã̀àgã̀.

19 “Vó à naa, ọgai, vaá ò kiiaí kẽ, kọbé Bàrì ia ló bọọ pọ́lọ́ nèi, kọbé ò íei dĩ̀ìnè ló ea aa bá Jìhóvà,* 20 kọbé à lẹẹlà Jíízọ̀s, ea dú Kráìst, ea beè sàa mái. 21 Jíízọ̀s é élá káála dọ̀ọ̀mà tṍó e Bàrì é oomà dénè nu sẹlẹ́ a dọ̀, dì belí bé ea beè kọ́ tenmá gã́ gbò kọ́ọ̀ bùlà Bàrì e bà di káí e ba beè di deè kéléá naaá. 22 Kàsĩ́, Mózìs beè kọọ̀: ‘Jìhóvà* ea dú bọọ Bàrì é tú enè neǹ kọ́ọ̀ bùlà Bàrì ea bélí nda lọl zẹ̀ẹ̀ pá bọọ vígà mái, vaá ò é ié ge pãanei tṍ ló kọ̀láá kà nú ea kọ́ nèi. 23 Mm̀ kà-kà, bà é kyọsĩ́ kọ̀láá nen e bè náa pãane tṍ ló Neǹ Kọ́ọ̀ Bùlà Bàrìí lọl zẹ̀ẹ̀ gbò nen.’ 24 Vaá kọ̀láá kà gbò kọ́ọ̀ bùlà Bàrì e ba beè dì lọl ló Sámuẹ̀l ààmà beè palàge kọ́ nú ea kil ló tṍóí. 25 Boolo ní eo dúì nvín gbò kọ́ọ̀ bùlà Bàrì nè gbò nvín e bà meà aa mm̀ zíl e Bàrì beè zọ̀ bọọ gbò nómá tẹ̀ zilá tṍó ea kọ́ nè Ébràhám̀ kọọ̀: ‘Tení dú ló gbò nvín ea aà ní m, ní e dénè pá tọ ea di boo kunukẽ̀í é íe tã́áná dee bá ẹ́.’ 26 Tṍó e Bàrì íbá ló a Gyóòlo lọ̀l, a beè zẹ́ẹ́ lẹ̀ẹ̀làẹ má túá boolo kọ á tãanèi dee bá tení dú ló gè òòmà buù bọ̀ì lọl ló bọọ pọ́lọ́ lab dògò.”