Lé Kpẹ̀a E Jṍòn Beè Emí
10 “M̀ lóò kà-kà bel nèi kọọ̀, nen e bè náa téní nùtọ bã̀àma ló gbò naanà ból, vaá à dẽe tení dõona ketõ̀ò, níà neǹ zib nè nen ea ólò tú bá kpóó tuumá nu lọl bá nen. 2 Sõò nen ea téní nùtọ bã̀àmà, ní ea dú neǹ kùdẽe ló naanà bólá ẹ́. 3 Nen ea ólò kùdẽe ló nùtọá ólò kùùlà nèe, vaá gbò naanà bólá ólò pãane tṍ ló a mon. À ólò tú béè pá a naanà ból kolmá va vaá faalá va dọ̀ọ̀ma kèdẹi. 4 Tṍó ea ni tú va tẹlẹ kèdẹi, à ólò gbóó kyã̀à gyà vá sĩ́, vaá gbò naanà bólá gbóó nyoonée, boo béè kọọ̀ bà nyímá ló a mon. 5 Bà náa é nyoone neǹ kyáà, tãa vó, bà é téélá ààẹ́ ló, boo béè kọọ̀ bà náa nyímá ló moǹ gbò kyáà.” 6 Jíízọ̀s beè ló bel dòòle lóí nè va, sõò bà náa beè dã́ ból ló nú ea géè kọ́ nè va.
7 Vó à naa, Jíízọ̀s à gbóó kpáá kọ́ nè va kọọ̀: “M̀ lóò kà-kà bel nèi kọọ̀, nda ní em dúù nùtọ e gbò naanà ból é téní bã tọ ẹ́. 8 Kọ̀láá gbò e ba beè dù kọọ̀ baala ní e bà dúè kà-kà gbò kùdẽe ló naanà ból é, níà gbò zib nè gbò e bà ólò tú bá kpóó tuumá nu lọl bá nen. Gbò naanà bólá náa beè gbàn va tṍ ló. 9 Nda ní em dúù nùtọ ẹ́. Kọ̀láá nen ea téniḿ ló bã tọ é duuà. À é bã́ tọ vaá dọ kèdẹi vaá mòn nu gè dè. 10 Neǹ zib náa ólò dõogẽ dù e bè náa é zib nu, fẹ́ nen, vaá kyọ̀sĩ́ nu. M beè dù kọbé bà íe dùm vaá kilsĩ́ gè tõó dùm. 11 Nda ní em dúù lé neǹ kùdẽe ló naanà ból é. Lé neǹ kùdẽe ló naanà ból ólò tú a dùm ne boo gbò a naanà ból. 12 Nen e ba beè tú ló tóm e níì neǹ kùdẽe ló naanà ból nì vaá níì tẹ̀ íe gbò naanà bólá nì ólò mòn kpọ́í ea gé dú vaá gbóó sọ̀bá gbò naanà bólá teelá. Kpọ́íá ólò sii sìgà ọ̀và, vaá gbò nì ea sígá ólò gbóó teelá zààlà— 13 boo béè kọọ̀ níà nen e ba beè túe ló tóm vaá náa bulà nú ea kil ló gbò naanà bólá. 14 Nda ní em dúù lé neǹ kùdẽe ló naanà ból é. Nda nyímà ló gbò ńdáà naanà ból vaá gbò ńdáà naanà ból à nyimá ló nda, 15 dì belí bé e ńdáà Tẹ̀ nyímá ló nda vaá nda à nyimá ló ńdáà Tẹ̀ naaá. Nda túù ńdáà dùm ne boo gbò naanà bólá.
16 “M̀ íè dõona kà gùlù naanà ból e náa dṹùnà níí. M̀ é tú va domá vaá bà é gban tṍ ló nà mon. Bà é gbóó dú tẽ̀ènè gùlù naanà ból vaá ié tẽ̀ènè neǹ kùdẽe ló. 17 Níà nú ea náa ńdáà Tẹ̀ à vùlèm ẽ́, boo béè kọọ̀ m̀ neè nà dùm kọbé m̀ kpáá ié. 18 Tọ́ọ̀ nen náa beè tú nà dùm lọ̀lím bá, sõò m beè nè lọa bùlà. M̀ íè kpóó gè nè vaá m̀ íè kpóó gè kpáá ié. Ńdáà Tẹ̀ ní ea beè nèm nakà kpóóí é.”
19 Pá Júù beè gbóó kpáá pòòà boo béè gbò belí. 20 Gã́bug ọ̀và géè kọọ̀: “Zọ dìé m vaá à bọ dáa. Éé kọ́ ó pãanéíe tṍ ló é?” 21 Dõona gbò à kọọ̀: “Nen e zọ̀ di m náa ólò ló bel naaá. É kọọ̀ zọ é láá mùùnà dẽè nen e dẽée beè gimí?”
22 Tṍóá, bà géè sẹlẹ Sẹ̀lẹ̀nù Ge Tú Tọọ̀ Káí Nvee Bá Bàrì gbẹá Jèrúselẹ̀m. Aẹ̀ beè tṍó tọ́ọ, 23 vaá Jíízọ̀s géè kyã̀à tení ke kọ̀ọ̀lọ̀ Sólomòn ea di ló tọọ̀ káíá. 24 Tṍóá, pá Júù à gbóó bõonáé ló vaá dààmà togó gè kọ́ nèe kọọ̀: “Begè dẽè tṍó ea tõò vàẹ ní eé élá besĩ́ ò kálá lọ̀à bel gã́ ẽ́? Be olo ní eo dúù Kráìst e, naa gàb kọ́ nèi.” 25 Jíízọ̀s à kọ̀ nè va kọọ̀: “M beè kọ́ nèi, sõò nóo zigàì. Gbò tóm e nda gé tú béè ńdáà Tẹ̀ siimá sí neǹ ditõ̀ò kìlmàḿ ló. 26 Sõò nóo zigài, boo béè kọọ̀ nóo dúì pá ńdáà gbò naanà ból. 27 Gbò ńdáà naanà ból ólò pãane tṍ ló nà mon. Nda nyímà va ló vaá bà ólò nyooném. 28 Nda é né va dùm e bè náa tá. Bà náa é íé kyọ̀àsĩ́, vaá tọ́ọ̀ nen náa é láá tĩ̀gã̀ va lọ̀lím bá. 29 Gbò e ńdáà Tẹ̀ beè nvèèḿ bá bọọ èl kọ̀láá kà dõona kà nu, vaá tọ́ọ̀ nen náa é láá tĩ̀gã̀ va lọl bá ńdáà Tẹ̀. 30 Nda nè ńdáà Tẹ̀ dúù tẽ̀ènè nen.”*
31 Pá Júù à gbóó kpáá labvígi kpò dem kọbé bà tóbmáe. 32 Jíízọ̀s à bĩiná va kọọ̀: “M beè sí gã́bug tóm dũ̀ùnè ea aa bá ńdáà Tẹ̀, vaá ò monmai dẽe. Mókà ea di gbàà ní eo gbĩ́ì ge elaí boo tobmaḿ mi dem ẽ́?” 33 Pá Júù à aalá nèe kọọ̀: “Née gbĩ́ gè tobmà ni dem boo béè lé tóm eo síì, sõò è gbĩ́ gè tobmà ni dem boo béè kọọ̀ ò oǹ Bàrì; boo béè kọọ̀, náa kal ló béè kọọ̀ ọ̀ọ̀ nen, ò túù o lóó naamá bàrì.” 34 Jíízọ̀s à gbóó bĩiná va kọọ̀: “É kọọ̀ Bàrì náa beè emí mm̀ bọọ Log kọọ̀, “Ò dúì bàrì”? 35 Be a beè kolí gbò e moǹ bel Bàrì zógè kọọ̀ bà íé bẽgẽ bel kolí va ‘bàrì’—vaá bà náa é láá nyaaná nú ea di mm̀ Kpá Káí— 36 éé ní ea náa ò kọi nei nda, e Tẹ̀a beè sẹlẹ́ káí vaá lẹ̀ẹ̀là domá bàlà booí kọọ̀, ‘Ò oǹ Bàrì,’ boo béè kọọ̀ ḿ kọ́ọ̀, ‘Ndaà Sã́áná Bàrì e’? 37 Be ním gé sí gbò tóm e ńdáà Tẹ̀ beè lẹ̀ẹ̀làm, ó gá zigam mí ló. 38 Sõò be m̀ gé sí, kọbèè nóo zigàm mí ló, zigai ló gbò tómí, kọbé ò nyímai vaá kilíí sĩ́ gè nyimai kọọ̀ Tẹ̀a íe kà lé gbaaló kilma ló nda, vaá nda à ié kà lé gbaaló kilma ló Tẹ̀a.” 39 Ba beè gbóó kpáá gbĩ́ gè siíe, sõò a beè kìl àà vá bá, naa ní e bà náa beè láá siíe.
40 A beè gbóó kpáá fùl Pène Jọ́dàn kil na sábáá, ea dú túá kĩée e Jṍòn beè tú gbò nen diilé múú gbẹáá. À gbóó tõó kĩá. 41 Gã́bug nen à gbóó dúé ló gé kọọ̀: “Jṍòn náa beè sí bã̀àna ene kà tóm dũ̀ùnè, sõò kọ̀láá kà nú e Jṍòn beè kọ́ kilma ló gbálàí dú kà-kà.” 42 Gã́bug nen beè gbóó iée zìgà m gbẹá kĩá.