Kpá E Pọ́ọ̀l Beè Lẹ̀ẹ̀là Má Pá Róm̀

11 M̀ gbóò bĩiná kọọ̀, é kọọ̀ Bàrì beè kìn pá a gbò? Ẽ́èe! Boo béè kọọ̀ nda aà nàgé Ízrẹẹ̀l, m̀ dúù nvín Ébràhám̀, vaá m̀ aà gãà Bénjamìn. 2 Bàrì náa beè kìn pá a gbò e bà dú túá gbò ea beè zẹ́ẹ́ nyimá lóá. É kọ nóo nyímàì nú e Kpá Káí kọ́ kilma ló Èláíjà tṍó ea beè kpẹá pá Ízrẹẹ̀l nè Bàrìa? 3 A beè kọọ̀, “Baa fẹ́ pá o gbò kọ́ọ̀ bùlà Bàrì, e Jìhóvà.* Baa kyọsĩ́ gbò o gbàni vààla gyọ́ọ, vaá áá nda ní em sígà ẹ, vaá kátogóí bà gbĩ́ gè fẹ́m.” 4 Sõò éé ní e Bàrì beè kọ́ nèe ẽ́? A beè kọ́ nèe kọọ̀: “M̀ íè 7,000 gbò gbálà e bà sígá e bà gáà kumí sĩ́ kẽ nè Béèl tọ́ọ̀ dee.” 5 Mm̀ tẽ̀ènè sĩ́deèá, à íe gbò e bà sígá e Bàrì beè tú a sàn nyíe sààmà va e bà dì nàgé mm̀ beélè deeí. 6 Beè Bàrì beè sà va tení dú ló a sàn nyíe, náa dú ná boo béè tóm e ba beè sì; be níì vó nì, sàn nyíeá náa dú ná sàn nyíe.

7 Éé ní eé gbóó kọ̀ ẹ? Ízrẹẹ̀l náa beè ié kà lèlà nú ea géè gbĩ̀, sõò gbò e Bàrì beè sàa beè ié. Nagbò e bà sígáá beè ié agẹ togó, 8 dì belí bé e ba beè emí naaá kọọ̀: “Bàrì a nè va nyómá dáá, dẽe e náa mon nu, nè tṍ e náa dã́ nu tẹlẹ̀ gé nieí.” 9 Dévìd beè kọ nágé kọọ̀: “Ba tébòl á dú gyã̀ì, kpò dem̀ kúm̀ tọ́ ló, nè kpọ̀té nèà va. 10 Naa kọọ̀ dẽé va á kuu gín naa ní e bà náa é láá mòn nu, vaá ò náa kọ bà á kọ̀vàlà lee.”

11 Nda gbóò bĩiná kọọ̀, É kọọ̀ ba beè dọ̀ vaá gbẹá kẽ? Ẽ́èe! Sõò ba gè lọ̀l togó kèbá log beè naa kọọ̀ dùùà á dì nè pá dõona kà dó kọbé bà bẹ́ nyíe. 12 Beè ba gè lọ̀l togó kèbá log beè naa kọọ̀ bàlà boo á bã̀ méné, vaá gè kọọ̀ bà náa égá beè naa kọọ̀ pá dõona kà dó á bã̀ méné, èé kọ́ vàẹ be ba beè egá ẹ́!

13 Kátogóí, nda lóò bel nè boolo eo dúì pá dõona kà dó. Boo béè kọọ̀ m̀ dúù nen e Jíízọ̀s beè lẹ̀ẹ̀là má pá dõona kà dó, m̀ nveè ka ló tóm em gé sí nè Bàrì 14 kọbé be à válí, m̀ láá naa kọọ̀ pá ńdáà gbò á bẹ́ nyíe naa ní e sìgà ọ̀và é duuà àà vá gbàà. 15 Beè ge kọọ̀ Bàrì kpó va lọa ló náa kọọ̀ pá bàlà boo á zọ̀ Bàrì naaá fẹ́ẹ́-fẹẹ̀ ló, èé kọ́ vàẹ be à tú va nvea ló é? À é bélí kọ bà kẽeà aa kemà ú. 16 Beè enè ketõ̀ò ea di ló fàlávà e ba beè feví di káí, zivèkà fàlávà e ba beè fevíá dì nàgé káí. Beè lí té di káí, dénè gbónó ea di ló téá dì nàgé káí.

17 Be ba beè fùl sìgà gbónó ea dú ló óliìv lọl ló, vaá bà tú olo nvee dẽè kĩá náa kal ló béè kọọ̀ ò dúù té óliìv ea dú kọ̀l, vaá ò gbóó dààmà togó gè ié bélè ea dú ló té óliìva, 18 ó gá dàlà kpáló boo ló nagbò gbónóá. Be ò dalà kpáló boo, kẽ̀èa boo kọọ̀ níì olo ní eo síì lí téá bií kẽé nì, sõò líá ní ea síi olo bií kẽ ẽ́. 19 Ò é gbóó kọọ̀: “Ba beè fùl gã́bug gbónó lọl ló kọbé bà láá tú nda so dẽe.” 20 Níà kà-kà! Boo béè kọọ̀ ge kọ bà náa íe zìgà beè naa kọ bà á fùl va lọl ló, sõò zìgà e olo íè náa kọ olo ó dì. Ó gá dàlà kpáló boo, sõò pọ̀ á sií ni. 21 Boo béè kọọ̀ beè Bàrì náa beè aa ló gbò gbónó ea beè di ló téá aa kẽ, náa é aà nàgé ló olo. 22 Vó à naa, bugi togó boo sàn nyíe e Bàrì íe nè a kpọ̀té. À ólò nè kpọ̀té gbò e bà dọ, sõò à é íe sàn nyíe ló olo be ò kilsĩ́ gè naa nú ea é náa kọ á ié ni sàn nyíe ló. Bè níì vó nì, à é ful nagé olo lọ̀l. 23 Vaá beè baala oòa kẽ ié zìgà, bà é tú va so dẽe, boo béè kọọ̀ Bàrì é láá òòmà va so dẽe. 24 Be ba beè fùl olo lọl ló té óliìv ea dú kọ̀l vaá so dẽè té óliìv e ba beè fó be, náa kal ló béè kọ náa ólò naaá naa vó, à é náa và bà náa é láá òòma kẽè gbò gbónó ea beè di ló té óliìva aa kẽ so ló é!

25 Boo béè kọọ̀ m̀ gbĩ́ gè naa kọ ó nyimai nuù ke gũ̀aí, e pá vígà, kọbé nóo ẹbvìì bọọ bá kọ ò nyímàì nu: Sìgà pá Ízrẹẹ̀l beè ié agẹ togó. Níí é nááá dọ̀ọ̀mà tṍó e dénè gbò e bà aa dõona kà dó e Bàrì beè sà é dúé ló, 26 vaá níì sĩ́deè e Bàrì é duumà pá Ízrẹẹ̀l ẹ, dì belí bé e ba beè emí naaá kọọ̀: “Nen ea é duulà va é aa Záíòn, vaá à é nveè bá nè pá nvín Jékọ̀b kọ bà á òòà aa ló gè labví pọ́lọ́ láb. 27 Níì zíl em é zọ́ va bã̀àa m tṍó em é tú ba pọ́lọ́ lọ̀l ẹ.” 28 Mm̀ kà-kà, boo béè kọ ba beè kìn lé kpẹ̀aá, bà dú gbò ọ́b Bàrì kọbé nu léé ló boolo, sõò Bàrì beè sà va kọ bà á duè a kóò boo béè nú ea beè zìgà nè ba gbò nómá tẹ̀. 29 Boo béè kọọ̀ Bàrì náa ólò ọgá ló gbò a dõ̀ònù vaá náa ólò ọgá nágé ló gbò ea beè kolí. 30 Boolo beè lọlii togó kèbá Bàrì, sõò a beè iéi sàn nyíe ló, boo béè kọọ̀ baala beè lọ̀l togó kèbá Bàrì. 31 Vó à naa, dì belí bé ea íe sàn nyíe ló boolo boo béè kọ baala lọl togó kèbá naaá, níà bé ea é láá ié sàn nyíe ló baala naa ẽ́. 32 Bàrì a ẹb dénè ọ̀và belí gbò e bà di kpọ́gọ́lọ́ boo béè ba lọ̀l togó kèbá, kọbé à láá ié sàn nyíe ló dénè ọ̀và.

33 Ẹbvii bé e tã́áná dee bá ea aa bá Bàrì, a nyìmànù, nè gbò nú ea nyímá palàge bọọ naaà! A bèèla bel dú ní e nen náa é láá dã́ tẽ́ ló vaá née nyímà dénè bé ea ólò naa nu naa! 34 “Mée ní ea nyímá nú ea dú bùlà Jìhóvà* ẹ, àbèè kọọ̀ mée ní ea é láá dùùlàẹ bá deè tṍ ẽ́?” 35 Àbèè kọọ̀, “Mée ní ea beè zẹ́ẹ́ tú nu nè Bàrì naa ní ea é oòma kẽ nèe ẽ́?” 36 Boo béè kọọ̀ dénè nu aàẹ́ bá, vaá ẹlẹ ní ea náa kọọ̀ dénè nu á dìe, vaá bà dì nè ẹlẹ. Ka á dìé ló dọ̀ọ̀mà dè-dè. Á dì naa vó.