Lé Kpẹ̀a E Máátìù Beè Emí

26 Tṍó e Jíízọ̀s ni ló dénè belí lọ̀l, à gbóó kọ́ nè pá a gbò nyòòne nvée kọọ̀: 2 “Ò nyímàì kọọ̀ bàà dee aa ló kátogóí, Nàànù Ténì Zelí é sẹẹà, vaá bà é tú Sã́áná nená nvee bá gbò e bà é túe ká kú té.”

3 Tṍóá, gbò togó vààla gyọ́ọ nè gbò kàneǹ pá Júù beè bõoná boo beè pọ̀b neǹ vààla gyọ́ọ ea bée kọlà Kéíafàs. 4 Bà géè bilá ló bé e bà é náa tú kyèèlè siimá Jíízọ̀s vaá fẹ́ẹ. 5 Sõò ba beè kọọ̀: “Née é sííe gbẹá kè sẹ̀lẹ̀nùí, kọbé gbò nen náa nveè tã̀àgã̀.”

6 Tṍó e Jíízọ̀s beè di Bẹ́tanì gbẹá tọọ̀ Sáímòn e kom̀ kulè beè olòó di lóá, 7 ene kà ńnváá beè gbóó faalá ló-ló kpée-kpéè nù ló nóo ea sí gbele tõ̀ò kpègè domá, vaá tṍé togó tṍó ea gé dé gyã́á. 8 Tṍó e pá a gbò nyòòne nvée mon naa vó, bà beè gbóó nvèè súng vaá kọọ̀: “Éé ní ea náa à dõogẽ tṍ nóoí pee é? 9 Bà gáẹ̀ beè láá oo nóoí ló gã́bug kpègè, vaá tú kpègèá nè gbò tãa.” 10 Boo béè kọọ̀ Jíízọ̀s nyímá nú e bà gé kọ́, à gbóó kọ́ nè va kọọ̀: “Éé ní ea náa vaá ò gbĩi gè tãagẽi ńnvááí ẽ́? À náa kà lé nu nèm. 11 Gbò tãa ólò dìí ló lee, sõò nda ním é díí ló lee. 12 Tṍó ea tú kpée-kpéè nù ló nóoí tóm ló, à kpóògèm dee ló sẹ̀ẹ̀ deé e bà é lím. 13 M̀ lóò kà-kà bel nèi kọọ̀, kọ̀láá kĩée e bà kọ́ lé kpẹ̀aí inmá ea di bàlà booí, bà é kọ́ nágé nú e ńnvááí náaí mm̀ ge kẽ̀èàé boo.”

14 Tṍóá, Júdàs Ìskáriọ̀t ea dṹùnà Òb Nè Bàà Nená beè gbóó àà sí ló gbò togó vààla gyọ́ọ 15 vaá kọ́ nè va kọọ̀: “Éé ní eo é neḿ mi be m̀ ténié ló nèi ẽ́?” Bà aalá nèe kọọ̀ bà é neèe 30 kà kpègè e bà tú ẹ́ẹ́ kpé naamá. 16 Lọl tṍóá ààmà, a beè gbóó olòó gbĩ́ tṍó ea léé ló gè teníé ló nvèè vá bá.

17 Kà lèlà túá deè Sẹ̀lẹ̀nù E Bà Ólò Dé Fétúlú E Nú Ea Ólò Gbuuve Nu Á Gé Gbààa, gbò nyòòne nvéè Jíízọ̀s beè dù gé bĩináe kọọ̀: “Ãàe ní eo gbĩ́ì kọ é kpoogè dee ló nè ni kọbé ò tõo dé gyã́á Nàànù Ténì Zelí é?” 18 À aalá nè va kọọ̀: “Aalii sií ló ene kà gbálà ea di Jèrúselẹ̀m vaá ò kọ́i neíe kọọ̀, ‘Neǹ Dòbá kọ́ọ̀: “Tṍó em é ú a dũuà iná kuló, vaá m̀ gbĩ́ì ge zọ̀ gbò e bà ólò nyooném nvée sẹlẹ Nàànù Ténì Zelí gbẹá o tọ.”’” 19 Gbò nyòòne nvéè Jíízọ̀s beè gbóó naa gbõ̀ònà nú ea beè kọ́ nè vaá, vaá kpoogè dee ló kọ̀láá kà nu ea dú bíi gè sẹ̀ẹ̀mà Nàànù Ténì Zelí á.

20 Tṍó ea ni dú ló èlà, Jíízọ̀s nè 12 nen e bà ólò nyoonée nvéeá beè gbá ĩìtẽ́ kẽ dé gyã́á. 21 Tṍó e bà gé dé gyã́áá, à gbóó kọ́ nè va kọọ̀: “M̀ lóò kà-kà bel nèi kọọ̀ enè bọ̀ì é téniḿ ló nvee bá gbò ọ́b.” 22 Boo béè kọọ̀ belí beè palàge tãagẽ́ va, buù ọ̀và à gbóó bĩináe kọọ̀: “Neń Ea Íém, é kọọ̀ nda?” 23 Jíízọ̀s à aalá nè va kọọ̀: “Nen ea gé zóm dé gyã́á mm̀ tẽ̀ènè kà bũ̀í ní ea é téniḿ ló nvee bà gbò ọ́bvẹ́. 24 À dú kà-kà kọọ̀ Sã́áná nená é ú dì belí bé e Kpá Káí beè kọ́ naa, sõò pọ́lọ́ múú kyáá á di ló nen ea ténié ló nvee bá gbò ọ́b! À gáẹ̀ beè dú lé beè nená náa beè mèà.” 25 Júdàs ea é beè gé teníé ló nvee bá gbò ọ́bvá, à gbóó bĩináe kọọ̀: “Neǹ Dòbá, é kọọ̀ nda?” Jíízọ̀s à aalá nèe kọọ̀: “Olo ní eo gé kọ́á ẹ́.”

26 Tṍó e bà gé dé nuá, Jíízọ̀s à gbóó tú enè kpò fétúlú, vaá tṍó ea ni tãàgã ló Bàrì boo lọ̀l, à gbóó baagi nè pá a gbò nyòòne nvée, vaá kọ́ nè va kọọ̀: “Tui vaá ò déi. Níí tõó dọ̀ nà nom̀ kpáló.” 27 A beè tu nágé gbàág e míí di m, vaá tṍó ea ni ṍá Bàrì zaá boo lọ̀l, à gbóó tú nè va vaá kọọ̀: “Tui vaá ò ṍi. 28 Níí tõó dọ̀ nà ‘mii e Bàrì zílmá zíl,’ ea é eèa boo gbele tõ̀ò nen boo béè ge ia ló ba pọ́lọ́ nè va. 29 Sõò m̀ kọ́ọ̀ nèi kọọ̀: Ním é óná tọ́ọ̀ kà míí e bà tú vã́ìn naamá dọ̀ọ̀mà tṍó em é zọ́i ṍ ãa míí gbẹá mm̀ Boǹ Méné ńdáà Tẹ̀.” 30 Dee deè nvée, tṍó e ba ní ọ́lí sọ́l lèèmà Bàrì lọ̀l, bà gbóó àà kil boo Gù Ólìv.

31 Jíízọ̀s à gbóó kọ́ nè va kọọ̀: “Dénè bọ̀ì é téelai aalím mí ló boo béè nú ea é nááa ḿ ló bílá deeí, boo béè kọ ba beè emí mm̀ Kpá Káí kọọ̀: ‘M̀ é fẹ́ neǹ kùdẽe ló naanà bólá, vaá gbò a naanà ból é téélá zààlà.’ 32 Sõò tṍó em ni kẽeà aa kemà ú, m̀ é aà kil Gálilì gé elá bànài.” 33 Pítà à kọ́ nèe kọọ̀: “Kọbèè dénè nagbòa téélá àà ní ló boo béè nú ea é nááa ní ló, nda ním é téélá àà ní ló!” 34 Jíízọ̀s à gbóó kọ́ nèe kọọ̀: “M̀ lóò kà-kà bel nè ni kọọ̀, besĩ́ kõ̀ò kálá kù kpã́ bílá deeí, ò é amàm sàn taà tóm.” 35 Pítà à kọ́ nèe kọọ̀: “Kọbèè à dọ ní em zọọ̀ ni ù, ním é amà ni sàn.” Dénè nagbò e bà ólò nyoonée nvéeá beè kọ nágé vó.

36 Tṍóá, Jíízọ̀s à gbóó faalá gbò e bà ólò nyoonée nvée kilma kĩée ea kọlà Gẹ̀tsẹ́manì, vaá kọ́ nè va kọọ̀: “Ĩinii tẽ́ kĩí, mè nda é aà kil kĩí-ìla gé tã̀àgã ló Bàrì.” 37 Tṍóá, à gbóó faalá Pítà nè pálaa kà nvín Zẹ́bidì bììa ló. A beè bã̀àgã̀ vaá nyíée beè palàge tã̀àgã̀. 38 À gbóó kọ́ nè va kọọ̀: “Nyíém palàge tã̀àgã̀ belí em é ú. Tõoníí kĩí vaá ò zọḿ mi kuai dẽe ló.” 39 À beè gbóó kyã̀à gbálà ńkem kil deèsĩ́ vaá kumí sĩ́ kẽ tã̀àgã ló Bàrì kọọ̀: “Nà Tẹ̀, be à válí, tú gbàágí lọ̀lím sĩ́. Sõò o bùlà á naa ã́, níì ńda nì.”

40 A beè òòa kẽ iná ló taà neń e bà ólò nyoonée nvéeá, vaá mòn kọọ̀ bà di dáá. À gbóó kọ́ nè Pítà kọọ̀: “Naa kọọ̀ nóo é láá zọḿ mi kuai dẽe ló mm̀ ene kà ávà? 41 Kilíí sĩ́ gè kuai dẽe ló vaá ò tãagãi ló Bàrì lee, kọbé nóo dọì bá ẹ̀bmà. À dìí bùlà ge naa vó, sõò bọọ nom̀ kpáló ọọ.” 42 A beè kpáá àà gé tã̀àgã ló Bàrì ní ea égè bàà tóm kọọ̀: “Nà Tẹ̀, be náa é válí kọọ̀ gbàágí á ààḿ sĩ́ e bè ním ṍò, o bùlà á naaá.” 43 A beè kpáá òòà dù vaá mòn kọ bà di dáá, boo béè kọọ̀ dáá beè palàge dì vá dẽe. 44 À gbóó kpáá àà vá ló àà gé tã̀àgã ló Bàrì ní ea égè taà tóm, vaá lo nágé tẽ̀ènè kà belá. 45 A beè gbóó òòa kẽ iná ló taà neń e bà ólò nyoonée nvéeá, vaá kọ́ nè va kọọ̀: “Íb tṍó ea meà naaí, ní e boolo di-díí dáá eo gé bṍi séi é! Ẹbvii! A lée tṍó e bà é gé tení ló Sã́áná nená nvee bá gbò náàkyọ̀. 46 Aalíí boo mè èé aà. Ẹbvii! Mè neń ea é téniḿ ló nvee bá gbò ọ́b a íná kuló.” 47 Boo tṍó ea gé ló belá, Júdàs ea dṹùnà Òb Nè Bàà Nená beè gbóó faalá gã́bug nen e bà fáálá gẹ̀ bé nè túm domá. Gbò togó vààla gyọ́ọ nè gbò kàneǹ pá Júù ní e ba beè lẹ̀ẹ̀là va ẹ́.

48 Neń ea é ténié ló nvee bá ọ́bvá beè kọ́ nè va kọọ̀: “Kọ̀láá nen em pyóvìe bẹ́ẹ́ ní eo é síilii é.” 49 A beè gbóó kyã̀à sí ló Jíízọ̀s, vaá kọọ̀: “Kànà mòn kól e Neǹ Dòbá!” À gbóó pyovíe bẹ́ẹ́. 50 Sõò Jíízọ̀s à gbóó kọ́ nèe kọọ̀: “Gbálàí, éé ní eo dúù ló é?” Tṍóá, gbòa beè gbóó kyã̀à nyoone Jíízọ̀s vaá siíe. 51 Sõò enè nen ea di ló Jíízọ̀s beè gbóó mììnà a gẹ̀ bé vaá fùlmà tṍ lọl ló gyóòloò pọ̀b neǹ vààla gyọ́ọ. 52 Tṍóá, Jíízọ̀s à gbóó kọ́ nèe kọọ̀: “Òòmà o gẹ̀ bé sẹlẹ́ kĩée ea ólò dì, boo béè kọọ̀ kọ̀láá gbò e bà dalà gẹ̀ bé é pé dáà gẹ̀ bé. 53 Sẹ̀ nóo bulà kọọ̀ m̀ gáẹ̀ láá bàn nà Tẹ̀, vaá à lẹẹlà nú ea é sígá ló 12 gùlù* gbò nyómá tóm mám? 54 Sõò be m̀ náa vó, à é náa và vaá nu e Kpá Káí beè kọ̀ ḿḿ-má ẽ́?” 55 Tṍóá, Jíízọ̀s à gbóó kọ́ nè gbòa kọọ̀: “Ò fáàlàì gẹ̀ bé nè túm domai gé siimaḿ mi belí neǹ zib? M̀ ólò di ĩ́ìtẽ́ tọọ̀ káí kọ̀láá dee em gé nóòmà nu, sõò nóo beè siilím mi. 56 Dénè gbò nuí gé nááá kọbé à ḿm̀-mè nú e gbò kọ́ọ̀ bùlà Bàrì beè kọ̀.” Tṍóá, dénè gbò e bà ólò nyoonée nvée beè gbóó teelá zààlà táẹ́ ló.

57 Gbò e ba beè sii Jíízọ̀sa beè gbóó faaláẹ kilma beè Kéíafàs, ea dú pọ̀b neǹ vààla gyọ́ọ, vaá gbò émì kpá nè gbò kàneǹ pà Júù beè di bṍóná kĩá. 58 Sõò Pítà beè kyã̀à ńkem-kem dúé nvée dọ̀ọ̀mà tṍó e bà íná beè pọ̀b neǹ vààla gyọ́ọá, vaá tṍó ea bã́ mm̀ beá, a gbóó ĩìtẽ́ ló gbò e bà ólò sí tóm beá kọbé à mon nú ea é nááá.

59 Gbò togó vààla gyọ́ọ nè dénè gbò e bà ólò sí tóm Pọ̀b Tọ Bèèlaà Pá Júù géè gbĩ́ kyáá bel e bà é kpọ́ ló Jíízọ̀s kọbé bà fẹ́ẹ̀ẹ. 60 Sõò bà náa beè mòn tọ́ọ̀ kà, náa kal ló béè kọọ̀ gã́bug nen beè dù gé kpọ́ẹ kyáá bel ló. Tṍó e tṍó téní, bàà nen beè gbóó kpáá dù 61 vaá kọọ̀: “Gbálàí beè kọọ̀, ‘M̀ é láá kũuná tọọ̀ káí Bàrì tẹlẹ kẽ, vaá m̀ tib lọ̀l mm̀ taà dee.’” 62 Boo béè vó, pọ̀b neǹ vààla gyọ́ọá à gbóó elá-èla vaá kọ́ nèe kọọ̀: “Nóo lóò tọ́ọ̀ kà bel tẹlẹ dẽe? Nóo dã́à gbò bel e bà gé ló ní lóí?” 63 Sõò Jíízọ̀s beè dã́ pĩi. Vó à naa, pọ̀b neǹ vààla gyọ́ọá beè gbóó kọ́ nèe kọọ̀: “Ló kà-kà bel nè Bàrì ea di dùm, é kọọ̀ olo ní eo dúù Kráìst, ea dú Sã́áná Bàrì e?” 64 Jíízọ̀s à aalá nèe kọọ̀: “Olo ní eo gé kọ́á. Sõò m̀ kọ́ọ̀ nè ni kọọ̀: Lọl kátogóí ààmà, ò é mon nda Sã́áná nen em di ĩ́ìtẽ́ boo bá lè Bàrì ea palàge ié kpóó, em di boo bù dee em gé aa káála dù.” 65 Tṍóá, pọ̀b neǹ vààla gyọ́ọá à gbóó baa a pọ̀b kọ̀là ló vaá kọọ̀: “À on Bàrì! Mókà neǹ ditõ̀ò ní e kpáà ié bíi ló é? Katogóí, o dã́amai tṍ bé ea on Bàrì naa. 66 Bọọ bùlà kọ́ và ẹ?” Bà aalá nèe kọọ̀: “À bọ́ló kọ á ù.” 67 Tṍóá, bà gbóó tumíe múú kyáá sĩ́, vaá tú kpọ̀g dìbmàgìe. Dõona gbò á sáẹ bá sĩ́, 68 vaá kọọ̀: “Kráìst, be ọ̀ọ̀ neǹ kọ́ọ̀ bùlà Bàrì, kòl béè neń ea dib ni nèi.”

69 Tṍóá, Pítà beè di ĩ́ìtẽ́ boo beá, vaá ene kà nvín pábia ea ólò sí tóm boo beá beè gbóó dúé ló vaá kọ́ nèe kọọ̀: “Olo beè dì nàgé ló Jíízọ̀s ea dú Gálilì!” 70 Sõò a beè àmà sàn gbẹá kèsĩ́ dénè ọ̀và, vaá kọọ̀: “Ním nyímà tọ́ọ̀ kà nú eo gé kọ́á.” 71 Tṍó ea aa kĩá iná ló tọ ea di ló gbànsĩ́ ea di beá, dõona kà nvín pábia beè mònie vaá kọ́ nè gbò e bà di kĩá kọọ̀: “Gbálàí beè di ló Jíízọ̀s neǹ Názarẹ̀t.” 72 A beè kpáá àmà sàn vaá zilá zíl kọọ̀: “Ním nyímà ló gbálàá!” 73 Pọ́ì ńkem̀ tṍó aa ló tṍóá, gbò e ba beè di élá kĩá beè gbóó kyã̀à bã ló Pítà, vaá kọ́ nèe kọọ̀: “Mm̀ kà-kà, oloò enè ọ̀và, boo béè kọ ò lóò bel belí pá Gálilì.” 74 Tṍóá, à gbóó dààmà togó gè gbó pṍò nèà a bá vaá zilá zíl kọọ̀: “M̀ kọ́ọ̀ ním nyímà ló gbálàá!” Tẽ̀ènè tṍóá, kõ̀ò à gbóó kù kpã́. 75 Pítà à gbóó kẽ̀èa boo bel e Jíízọ̀s beè kọ́ nèeá, kọọ̀: “Besĩ́ kõ̀ò kálá kù kpã́, ò é amàm sàn taà tóm.” À gbóó àà kil kèdẹi gé palàge tò.