Lé Kpẹ̀a E Máàk Beè Emí
8 Mm̀ gbò tṍóá, à íe gã́bug gbò e ba beè dìé ló, vaá bà náa beè ié tọ́ọ̀ kà nu gè dè. À gbóó kolí pá a gbò nyòòne nvée vaá kọ́ nè va kọọ̀: 2 “Gbòí dúm ńsàn nyíe, boo béè kọ baa tú taà dee tõ̀òmàḿ ló vaá bà gáà de tọ́ọ̀ nu. 3 Be m̀ kọ́ bà á àà e bà gáà de tọ́ọ̀ nu, bà é láá gbààà gbẹá èèlè, boo béè kọọ̀ kĩée e sìgà ọ̀và aà dú kpã́á.” 4 Pá a gbò nyòòne nvée à gbóó bĩináe kọọ̀: “Ãàe ní eé láá ié gã́bug gyã́á ea é gbõomá ló gbòí lọ̀l e kĩí di kpã́á aa ló bon ẽ́?” 5 À gbóó bĩiná va kọọ̀: “Kuù kpò fétúlú ní ea dìí bá ẹ́?” Bà aalá nèe kọọ̀: “Àlàbà kpò.” 6 À gbóó kọ́ nè gbòa kọ bà á ĩìtẽ́ kẽ. À gbóó tú àlàbà kpò fétúlúá, õá Bàrì zaá boo, vaá baagi nè gbò e bà ólò nyoonée nvée kọ bà á nè va. Bà gbóó nè va. 7 Ba beè ié nágé sìgà gyã́à, vaá tṍó ea ni tãàgã ló Bàrì boo lọ̀l, à gbóó kọ bà á tu nágé nè va. 8 Ba beè dè vaá à m-má va. Bà beè bõonè ló ní ea sígá ló vaá à m-má mm̀ àlàbà kà pọ̀bkà kùn. 9 Nú ea é dú 4,000 gbò gbálà beè di kĩá. À gbóó lẹ̀ẹ̀là va ààmà.
10 Tẽ̀ènè tṍóá, pá a gbò nyòòne nvée nè ẹ̀ẹ̀ beè gbóó bã mm̀ faà sĩ́ múú kil bálásĩ́ Dàlmànútà. 11 Pá Fárìsíì beè gbóó dààmà togó gè zọ̀ẹ dùlà bel, vaá kọ á sí ene kà tóm dũ̀ùnè ea zógè kọọ̀ Bàrì ní ea beè lẹ̀ẹ̀làẹ ẹ́, naamá gè ẹ̀bmàe. 12 Belá à gbóó kyẽ́e naa ní ea kọọ̀: “Éé ní ea náa gbò e bà di nakà kúúlíí à gbĩ́ gè mònmà dẽè tóm dũ̀ùnè ẽ? M̀ lóò kà-kà bel nèi kọọ̀, nóo é monii tọ́ọ̀ kà tóm dũ̀ùnè.” 13 À gbóó àà vá ló vaá kpáá bã mm̀ faà sĩ́ múúá kil na sábá pèneá.
14 Sõò a beè tává nyíe gè faalá fétúlú, vaá tọ́ọ̀ nu náa beè dì vá bá, daalá lọl ló áá enè kpò fétúlú. 15 A beè palàge ãané va kọọ̀: “Palàge dìí zìle vaá ò íei ọ̀ẹ̀ dẽe ló nú ea ólò gbuuve fétúlú pá Fárìsíì nè nú ea ólò gbuuve fétúlú Hẹ́rọ̀d.” 16 Bà gbóó dààmà togó gè tàlà boo béè kọọ̀ gyã́á á gé vá bá. 17 Tṍó ea nyímá naa vó, à gbóó kọ́ nè va kọọ̀: “Éé ní ea náa ò talai boo béè kọọ̀ gyã́á á géí bá ẹ́? Ò gáà dãi gé ból ló? Éé ní ea náa vaá à tàvàlàí ló gè dã́ ból ló nu ẽ́? 18 ‘Dẽe dìí ból, éé kọ́ ó gá monmai nu ẽ́? Ò íèì tṍ, éé kọ́ ó gá dãamai nu ẽ́?’ Nóo kẽeàì boo 19 tṍó em beè tú vòò kpò fétúlú nèèmà gyã́á 5,000 nen ã́? Kuù kà kùn ní ea beè sigá ló é?” Bà aalá nèe kọọ̀: “Òb nè bàà kà.” 20 “Tṍó em beè tú àlàbà kpò fétúlú nèèmà gyã́á 4,000 nená, kuù kà pọ̀bkà kùn ní ea beè sigá ló é?” Bà aalá nèe kọọ̀: “Àlàbà kà.” 21 À gbóó bĩiná va kọọ̀: “Ò gáà dãi gé ból ló?”
22 Tṍóá, ba beè gbóó kil Bẹ̀tsáídà vaá gbò nen beè dàlà ene kà gbálà e dẽée gímí domáé ló, vaá bànie kọ á daáẹ bá ló. 23 À gbóó sii bá ló bá gbálà e dẽée gímíá vaá faaláẹ kilma nvéè bon. Vaá tṍó ea ni túmíe múú kyáá boo dẽe lọ̀l, à gbóó dẹlẹ́ẹ bá ból vaá bĩináe kọọ̀: “É kọ à íe nú eo monì?” 24 Gbálàa à gbóó ẹ̀b gbàn deè vaá kọọ̀: “M̀ monì gbò nen, sõò bà bélígi té ea gé kyãà tení ló kẽ.” 25 Jíízọ̀s beè gbóó kpáá daa bá boo dẽè gbálàa, vaá dẽée beè gbóó boá naa ní ea mon nu leevè. 26 À beè lẹ̀ẹ̀làẹ kilma be vaá kọ́ nèe kọọ̀, “Ó gá bã mm̀ boní.”
27 Jíízọ̀s nè gbò e bà ólò nyoonée nvée à gbóó àà kil gbò boń ea di Sìzàríà Fílipaì. Tṍó e bà di èèlè e bà gé aà, à gbóó bĩiná pá a gbò nyòòne nvée kọọ̀: “Mée ní e gbò nen kọ́ nda dúù e?” 28 Bà aalá nèe kọọ̀: “Sìgà gbò kọ́ọ̀ ọ̀ọ̀ Jṍòn Neǹ Dììlè Nen Múú, sìgà gbò à kọọ̀ ọ̀ọ̀ Èláíjà, vaá sìgà gbò à kọọ̀ ọ̀ọ̀ enè neń eo dṹùnà gbò kọ́ọ̀ bùlà Bàrì.” 29 À gbóó òòmà bíbvá bĩiná va kọọ̀: “Vaá mée ní e boolo bulài kọọ̀ nda dúù e?” Pítà à aalá nèe kọọ̀: “Oloò Kráìst.” 30 À gbóó ãané va kọ bà á gá kọ́ nu ea kilìèé ló nè tọ́ọ̀ nen. 31 À gbóó dààmà togó gè noomà va kọọ̀ Sã́áná nená é mon gã́bug tã̀àgã̀ vaá gbò kàneǹ pá Júù nè gbò togó vààla gyọ́ọ nè gbò émì kpá é kiníe vaá fẹ́ẹ, sõò à é kẽeà ní ea égè taà dee. 32 A beè tõó gbàà dénè nen ló belí, sõò Pítà à gbóó faaláẹ kilma kpògà kẽ gé kọ́ẹ bel. 33 À gbóó kììa ló kẽ ẹ̀b pá a gbò nyòòne nvée, vaá kọ́ bel Pítà kọọ̀: “Tení ààḿ sĩ́, e Sétàn! boo béè kọọ̀ nóo bugì togó belí Bàrì, sõò ò bugì togó belí nen.”
34 À gbóó kolí gbòa bií ló pá a gbò nyòòne nvée vaá kọ́ nè va kọọ̀: “Be à íe neń ea gbĩ́ gè nyooném nvée, á kìn a lóó vaá dàlà a té tã̀àgã̀, vaá gbóó kilsĩ́ gè nyooném nvée. 35 Boo béè kọọ̀ kọ̀láá neń ea gbĩ́ gè kpènà a dùm é pee, sõò kọ̀láá neń ea pee a dùm boo béè nda nè boo béè lé kpẹ̀aí, é kpenà a dùm. 36 Mm̀ kà-kà, mókà bélè ní e nen é íe be à ié dénè nu ea di bàlà booí vaá à pee a dùm ẽ? 37 Kà lèlà éé ní e nen é láá nè kọbé à kpáá ié dùm ẽ? 38 Boo béè kọọ̀ kọ̀láá neń ea sííá kẹ́ẹ ló nda nè nà moǹ bel mm̀ nakà bàlà boò náàkyọ̀ e bà náa bọ́ló dẹ̀lẹ̀ nyíé booí, Sã́áná nená é sííá náe gé kẹ́ẹ ló tṍó ea é fáálá ka e a Tẹ̀ beè nèe bií ló gbò nyómá tóm e bà di káí domá.”