Lé Kpẹ̀a E Máàk Beè Emí

9 A beè kilsĩ́ gè kọ́ nè va kọọ̀: “M̀ lóò kà-kà bel nèi kọọ̀ sìgà gbò e bà di kĩí náa é ú dọ̀ọ̀mà tṍó e bà é mon Boǹ Méné Bàrì ea gé bẹl.” 2 Tṍó e ọ̀ọ̀lẹ̀ dee ni téní, Jíízọ̀s beè faalá Pítà, Jém̀z, nè Jṍòn kilma boo gù ea palàge bọọ́ gãboo. Vaá à gbóó nyaaá gbẹá vá kèsĩ́; 3 a pọ̀b kọ̀là ló beè gbóó dààmà togó gè mò vaá ẹẹ iná kĩée e tọ́ọ̀ nen ea di boo kunukẽ̀í náa é láá ẹẹlẹ̀ vaá à ẹ́ẹ naa vó. 4 Nagé, Èláíjà nè Mózìs beè sìlà vá ló, vaá bà géè zọ̀ Jíízọ̀s loá bel. 5 Tṍóá, Pítà à gbóó kọ́ nè Jíízọ̀s kọọ̀: “Neǹ Dòbá, à dú lé kọ è di kĩí. Sọ̀i tọ́ deè kọ é tìb taà kà pẹ́ẹ̀ kĩí, ene kà á dú ńlo, ene kà dú níí Mózìs, vaá ene kà dú níí Èláíjà.” 6 Mm̀ kà-kà, Pítà náa beè nyimá nú ea gá kpáá kọ̀, boo béè kọọ̀ pọ̀ beè palàge sií va. 7 Bù dee beè gbóó kọ̀l va, vaá mon à gbóó sìlà aa gbàà bù deeá kọọ̀: “Níì nà Sã́áná em vulè. Gbanííe tṍ ló.” 8 Tẽ̀ènè tṍóá, ba beè gbóó tẽeá dẽe ló, sõò bà náa beè mòn nà tọ́ọ̀ nen daalá lọl ló Jíízọ̀s.

9 Tṍó e bà gé aa boo gùa kil kunukẽ̀, a beè gbóó palàge ãané va kọ bà á gá kọ́ nú e bà moná nè tọ́ọ̀ nen dọ̀ọ̀mà tṍó e Sã́áná nená é kẽeà aa kemà ú. 10 Ba beè tú belá nvea nyíe,* sõò áá baala beè loá sọ́l boo nú e kẽ̀èà aa kemà úá tõó dọ̀. 11 Bà gbóó dààmà togó gè bĩináe kọọ̀: “Éé ní ea náa gbò émì kpá à kọọ̀ Èláíjà ní ea é íè ge zẹ́ẹ́ dù e?” 12 À aalá nè va kọọ̀: “À dú kà-kà kọọ̀ Èláíjà é zẹ́ẹ́ dù vaá à é oomà dénè nu sẹlẹ́ a dọ̀. Sõò éé ní ea náa vaá ba beè emí kilma ló Sã́áná nená kọọ̀ à é mon gã́bug tã̀àgã̀ vaá gbò nen é tú pọ́lọ́ bá sẹ̀ẹ̀màe ẽ́? 13 M̀ lóò kà-kà bel nèi kọọ̀ Èláíjà beè dù vaá bà tú kọ̀láá kà nú ea léémá va naamáe dì belí bé e ba beè emí kìlmàé ló naaá.”

14 Tṍó e bà íná kĩée e nagbò nyòòne nvéeá dì, ba beè mòn gã́bug gbò e bà dì vá ló, vaá gbò émì kpá géè zọ̀ va tàlà. 15 Sõò a beè palàge bọọ́ ló gbòa tṍó e bà moníe, naa ní e bà téélá sì gé kànàe mon. 16 À gbóó bĩiná va kọọ̀: “Éé ní eo gé zọí va talaí boo é?” 17 Enè nen ea di zẹ̀ẹ̀ gbòa à gbóó kọ́ nèe kọọ̀: “Neǹ Dòbá, m̀ fáàlà ńdáà nvín domá ní ló, boo béè kọọ̀ zọ ea dìé m náa kọ á gá ló bel. 18 Kọ̀láá tṍó ea sííe, à ólò tobvíe sá kẽ, vaá à ólò gbọ̀ múú kyáá vaá taa dáa, vaá náa ólò ié ná tọ́ọ̀ kà kóí. M beè kọ́ nè pá o gbò nyòòne nvée kọ bà á kpó zọí lọ̀líé m, sõò bà náa beè láá kpò.” 19 À gbóó kọ́ nè va kọọ̀: “Boólo eo dúì gbò e bè nóo íèì zìgà, begè dẽè tṍó ea tõ̀ò vàẹ ní em é diimàí ló é? Begè dẽè tṍó ea tõ̀ò vàẹ ní em é kilsĩ́ gè ĩ̀ìmà bọọ lábvẹ́? Tuíe domai.” 20 Bà gbóó faalá nvíná máe. Sõò áá bé e zọá gé mon gé Jíízọ̀s, à gbóó naa kọọ̀ gọ́í á sii nvíná vaá tobvíe sá kẽ. Tṍó ea ni tóbvíe sá kẽ, à gbóó kilsĩ́ gè kpọlá kẽ vaá gbọ̀ múú kyáá. 21 Tṍóá, Jíízọ̀s à gbóó bĩiná a tẹ̀ kọọ̀: “Begè dẽè tṍó ea tõ̀ò vàẹ ní e nuí ni nááe ẽ́?” À aalá nèe kọọ̀: “Lọl tã́gíní tṍó ea beè di pá nvín, 22 vaá gã́bug tṍó, à ólò tobvíe tẹlẹ dáà sã́ nè mm̀ múú kọbé à fẹ́ẹ. Sõò be ò é láá bóe, iéi sàn nyíe ló vaá ò nveè bá nèi.” 23 Jíízọ̀s à gbóó kọ́ nèe kọọ̀: “Éé ní ea náa vaá ò kọọ̀, ‘Be ò é láá’ ẹ́? Kọ̀láá kà nu ólò valí ló nen ea íe zìgà.” 24 Tẽ̀ènè tṍóá, tẹ̀ nvíná à gbóó tò vaá kọọ̀: “M̀ íè zìgà! Nvèè bá nèm kọ ḿ kpáá ié zìgà!”

25 Tṍó e Jíízọ̀s mon kọọ̀ gbò nen gé kõoà dù, à gbóó kọ́ bel zọá kọọ̀: “Oló zọ eo bólì gã́ nvíní vaá káẹ tṍ, m̀ kọ́ọ̀ nè ni kọọ̀, tení ààẹ́ m vaá ó gá kpáá bànàé m!” 26 Tṍó e zọá ni náa kọ nvíná á kòòlà kpã́ vaá tú agẹ bá gọ́í siimáe lọ̀l, à gbóó ààẹ́ m. A beè belí kọọ̀ nvíná ú, naa ní e gã́bug nen beè kọọ̀: “A ú!” 27 Sõò Jíízọ̀s beè siíe bá ló bá dàlàẹ lọl boo, vaá à gbóó elá èla. 28 Tṍó ea bã́ ene kà tọ, pá a gbò nyòòne nvée à gbóó bĩináe gbẹá kĩée ea dú áá ẹ̀ẹ̀ kọọ̀: “Éé ní ea náa beele née beè láá kpó zọá lọ̀líé m ẽ́?” 29 À aalá nè va kọọ̀: “Áá tã̀àgã ló Bàrì ní ea é láá kpó íb nakà zọí é.”

30 Ba beè gbóó aa kĩá tení Gálilì àà, sõò náa beè gbĩ́ kọ gbò nen á nyimá kĩée ea diè 31 boo béè kọ à géè noomà pá a gbò nyòòne nvée kọọ̀: “Bà é téní ló Sã́áná nená nvee bá gbò ọ́b vaá bà é fẹ́ẹ, sõò kọbèè bà fẹ́ẹ, à é kẽeà aa kemà ú ní ea égè taà dee.” 32 Náa kal ló béè vó, bà náa beè dã́ ból ló nú ea géè kọ̀, vaá pọ̀ beè sií va gè bĩináe bíb.

33 Ba beè gbóó iná Kàpánìòm. Tṍó e bà bã́ tọ, à gbóó bĩiná va kọọ̀: “Éé ní eo géè talaí boo gbẹaí boo èèlèa ẹ?” 34 Bà náa beè ló tọ́ọ̀ bel, boo béè kọọ̀ bà géè tala boo nen ea bọọ ea dì vá zẹ̀ẹ̀ gbẹá boo èèlèa. 35 Tṍó ea ĩ́ìtẽ́ kẽ, à gbóó kolí òb nè bàà nená vaá kọ́ nè va kọọ̀: “Be à íe neń ea gbĩ́ gè tú túá dọ̀, à é íè ge tú a lóó kilma kẽ vaá sí tóm nè dénè nen.” 36 Tṍóá, à gbóó tú ene kà ńkem̀ nvín elè vá zẹ̀ẹ̀. À gbóó tú bá tenmáé ló vaá kọ́ nè va kọọ̀: 37 “Kọ̀láá neń ea tú íb gbò nvíní boo béè ńdáà bée tú nágé nda, vaá kọ̀láá neń ea tú nda, tú nágé neń ea beè lẹ̀ẹ̀làm.”

38 Jṍòn à gbóó kọ́ nèe kọọ̀: “Neǹ Dòbá, e beè mòn neń ea gé tú o bée kpoomá zọ lọl mm̀ gbò nen, vaá e beè gbĩ́ gè kpègie boo béè kọ náa ólò dìí ló.” 39 Sõò Jíízọ̀s à aalá nèe kọọ̀: “Ó gá kpegííe, boo béè kọ náa íe neń ea é tú ńdáà bée siimá tóm dũ̀ùnè ea é válié ló gè vàlẹ̀ bá ló pọ́lọ́ bel ea kilím ló. 40 Boo béè kọọ̀ kọ̀láá neń e náa béi dìí ló. 41 Vaá m̀ lóò kà-kà bel nèi kọọ̀, kọ̀láá neń ea dõo enè tóm gbàág múú gè õ̀ nèi boo béè kọ ò gé nyoonei nvéè Kráìst é íè ge ié a kpẽ́. 42 Tãa vó e nen sívè enè neń ea di zẹ̀ẹ̀ gbò e bà íe zìgàí, à gáẹ̀ beè dú lé be ba beè tú kpò dem e nom̀ tóòmà tò ólò gbẽ̀èmà nu kẹlẹ́ẹ́ òò vaá tãáe bá tẹlẹ pène.

43 “Beè o bá é náa kọ ó dọ̀, fùl lọa ló. À é dú lé be ò íe ene kà bá vaá ié dùm èlmà ge ié bàà kà bá vaá à dú gè tú ni tẹlẹ Gẹ̀hénà* e bà náa é láá gimè sã́ ea di m. 44* —— 45 Vaá beè o kpóó tọ é náa kọ ó dọ̀, fùl lọa ló. À é dú lé be ò íe ene kà kpóó tọ vaá ié dùm èlmà ge ié bàà kà kpóó tọ vaá à dú gè tú ni tẹlẹ Gẹ̀hénà.* 46* —— 47 Vaá beè dẽé ni ní ea é náa kọ ó dọ̀ ẹ, tiilá lọa ból. À é dú lé be ò tú enè ból dẽe bãama mm̀ Boǹ Méné Bàrì èlmà ge ié bàà ból dẽe vaá à dú gè tú ni tẹlẹ Gẹ̀hénà. 48 Gbò lúé ea di kĩá náa ólò ù vaá sã́ ea gé bẹ́ kĩá náa ólò gimí.

49 “Bà é tú sã́ eela boo kọ̀láá nen belí ló e bà zágẹ ló nu. 50 Ló dú lé, sõò be náa kpṍ ná ló nu, éé ní eo é láá naanii vaá à kpáá kpṍ ló nu ẽ́? Iei ló m-míi vaá ò zọi dõona gbò tõoaí mm̀ fẹ́ẹ́-fẹẹ̀ ló.”