Lé Kpẹ̀a E Jṍòn Beè Emí

18 Tṍó e Jíízọ̀s ló gbò belí lọ̀l, a beè gbóó nyoone pá a gbò nyòòne nvée fùl kolo-kolo kẽè Kídròn kil kĩée e ene kà gbabe dì, vaá ẹlẹ nè pá a gbò nyòòne nvée beè gbóó bã mm̀ gbabe á. 2 Júdàs, ea é ténié ló nvee bá gbò ọ́bvá beè nyimá nágé kĩá, boo béè kọọ̀ Jíízọ̀s nè pá a gbò nyòòne nvée beè olòó bõoná kĩá gã́bug tṍó. 3 Vó à naa, Júdàs beè gbóó faalá sìgà gbò bé nè gbò kùdẽe ló e gbò togó vààla gyọ́ọ nè pá Fárìsíì beè lẹ̀ẹ̀là domá. Ba beè faalági té sã́, dũù sã́, nè nuù bé. 4 Boo béè kọọ̀ Jíízọ̀s nyímá nú ea é gé naaàèé ló, à gbóó kyã̀à nyooné va vaá bĩiná va kọọ̀: “Mée ní eo gé gbĩ́i ẽ́?” 5 Bà aalá nèe kọọ̀: “Jíízọ̀s, ea dú Názarẹ̀t.” Jíízọ̀s à kọ́ nè va kọọ̀: “Ndaà ẹ̀ẹ̀ẹ.” Tṍóá, Júdàs ea é ténié ló nvee bá gbò ọ́bvá beè di éla vá ló.

6 Sõò tṍó e Jíízọ̀s kọ́ nè va kọọ̀, “Ndaà ẹ̀ẹ̀ẹ,” bà gbóó kpõ̀tẽ́ kil nvée vaá tooá dọ kunukẽ̀. 7 À gbóó kpáá bĩiná va kọọ̀: “Mée ní eo gé gbĩ́i ẽ́?” Bà aalá nèe kọọ̀: “Jíízọ̀s ea dú Názarẹ̀t.” 8 Jíízọ̀s à kọ́ nè va kọọ̀: “M̀ kọ́ọ̀ nèi kọọ̀ ndaà ẹ̀ẹ̀ẹ. Be ò gé gbĩ́i nda, aalíí ló na gbòí bà á àà.” 9 Níí ḿm̀-mè bel e a beè lòa kọọ̀: “M̀ gáà pee tọ́ọ̀ nen eo beè nvèèḿ báá.”

10 Tṍóá, Sáímòn Pítà à gbóó mììnà gẹ̀ bé ea beè dìé bá, vaá fùlmà tṍ bá lè lọl ló gyóòloò pọ̀b neǹ vààla gyọ́ọ. Béè gyóòloá beè kọ̀là Málkọ̀s. 11 Sõò Jíízọ̀s à gbóó kọ́ nè Pítà kọọ̀: “Òòmà gẹ̀ béá nvee mm̀ a bọ́ọ̀. É kọ náa bọ́ló kọ ḿ ṍ nú ea di mm̀ gbàág e nà Tẹ̀ beè nèm ã́?”

12 Tṍóá, gbò béá nè gbò e bà di togó gbò bé, nè gbò kùdẽe ló e pá Júù beè lẹ̀ẹ̀là à gbóó sii Jíízọ̀s vaá bọbvíe bá. 13 Bà gbóó zẹ́ẹ́ túe siimá ló Ánàs, boo béè kọọ̀ ẹlẹ ní ea beè dú tẹ̀ vaà Kéíàfàs, ea beè dú pọ̀b neǹ vààla gyọ́ọ kà lèlà gbááá ẹ́. 14 Kàsĩ́, Kéíàfàs ní ea beè kọ́ nè pá Júù kọọ̀, à é dú lé kọọ̀ enè nen á ú boo gã́bug nen ẽ́.

15 Tṍóá, Sáímòn Pítà nè dõona nèn e bà ólò nyoone nvéè Jíízọ̀s géè bììa nvéè Jíízọ̀s. Pọ̀b neǹ vààla gyọ́ọá beè nyimá ló nen ea ólò nyoone nvéè Jíízọ̀sa, vaá nen ea ólò nyoone nvéè Jíízọ̀sa beè gbóó zọ̀ Jíízọ̀s bã boo beè pọ̀b neǹ vààla gyọ́ọá, 16 sõò Pítà beè elá kèdẹi ló nùtọ.* Vó à naa, nakà neǹ nyòòne nvée e pọ̀b neǹ vààla gyọ́ọ nyímáe lóá à gbóó àà gé ló bel nè nen ea ólò kùdẽe ló nùtọá, vaá tú Pítà nvee mm̀ beá. 17 Nvín pábia ea géè kùdẽe ló nùtọá à gbóó bĩiná Pítà kọọ̀: “É kọọ̀ olo níì enè nen ea ólò nyoone nvéè gbálàí nì?” Pítà à aalá kọọ̀: “Nda níì ẹ̀ẹ̀ nì.” 18 Tṍóá, gbò gyóòlo nè gbò kùdẽe ló beè di élá ló sã́ e ba beè nvee lú. Bà géè zùgà boo béè kọọ̀ tọ́ọ beè dì. Pítà beè di éla vá ló ea géè zùgà nàgé.

19 Tṍóá, neǹ togó vààla gyọ́ọá à gbóó bĩiná Jíízọ̀s nú ea kil ló pá a gbò nyòòne nvée nè nú ea gé nóòmà. 20 Jíízọ̀s à aalá nèe kọọ̀: “M beè dọ bàlà kẽ ló bel nè zivèkà bàlà boo. M̀ ólò noomà nu lee gbẹá mm̀ tọ bõ̀ònaló fã̀ pá Júù nè mm̀ tọọ̀ káí e pá Júù ólò bõoná, vaá ním beè ló tọ́ọ̀ kà bel gbẹá ke gũ̀a. 21 Ò bĩ́ìnàm bíb ló éé? Bĩiná gbò e ba beè dã́ nú em beè kọ́ nè va. Bà nyímá nú em beè kọ̀.” 22 Tṍó ea ló gbò belí lọ̀l, enè neǹ kùdẽe ló ea beè di élá kĩá à gbóó sábá sĩ́ Jíízọ̀s, vaá kọọ̀: “Níà bé e olo ólò aalá bel nè neǹ togó vààla gyọ́ọ naa ẽ́?” 23 Jíízọ̀s à aalá nèe kọọ̀: “Be m̀ lóò pọ́lọ́ bel, kọ́ pọ́lọ́ bel em lóò nèm, sõò beè bel em lóò di lèlà, éé ní ea náa ò sám bá ẹ́?” 24 Tṍóá, Ánàs à gbóó bọbvíe bá vaá lẹ̀ẹ̀làẹ má Kéíàfàs, ea dú pọ̀b neǹ vààla gyọ́ọ.

25 Tṍóá, Sáímòn Pítà beè di élá kĩá ea gé zùgà sã́. Bà gbóó kọ́ nèe kọọ̀: “Olo dṹùnà nàgé gbò e bà ólò nyoonée nvée, sẹ̀ níì vó nì?” À àmà sàn vaá kọọ̀: “Nda ním dṹùnà va.” 26 Ene kà gyóòloò pọ̀b neǹ vààla gyọ́ọ, ea dṹùnà gbálà e Pítà beè fùl tṍ lọl lóá à gbóó kọọ̀: “É kọọ̀ nda ním beè mòn olo gbẹá mm̀ gbabe á?” 27 Sõò Pítà beè kpáá àmà sàn. Tẽ̀ènè tṍóá, kõ̀ò à gbóó kù kpã́.

28 Tṍó ea ni dú bòm dee, bà gbóó faalá Jíízọ̀s lọl ló Kéíàfàs kilma beè nen ea gé bẹl. Sõò baala náa beè bã beè nen ea gé bẹl á, kọbé bà náa kyọẹ̀ ba lóó, kọbé bà láá deè gyã́á Nàànù Ténì Zelí. 29 Vó à naa, Páílèt beè gbóó sí vá ló kèdẹi gé bĩiná va kọọ̀: “Mókà pọ́lọ́ ní eo kọ́ì kọọ̀ gbálàí sí é?” 30 Bà aalá nèe kọọ̀: “Beè gbálàí náa beè dú neǹ pọ́lọ́, née gáẹ̀ beè faaláẹ má ni.” 31 Páílèt à kọ́ nè va kọọ̀: “Tuíe aamai vaá ò túi bọọ log beemaíe bel ló.” Pá Júù à aalá nèe kọọ̀: “Log náa sọtọ́ deè kọ beele é fẹ́ nen.” 32 Níí beè naaá boo béè ge mm-mè bel e Jíízọ̀s beè ló kilma ló íb ú ea é gé uè.

33 Vó à naa, Páílèt à gbóó kpáá bã mm̀ a be, vaá kolí Jíízọ̀s bĩináe kọọ̀: “É kọọ̀ olo ní eo dúù Méné pá Júù e?” 34 Jíízọ̀s à aalá nèe kọọ̀: “É kọ ò bĩ́ìnà belí dẹ̀ẹ̀a boo bé eo bugì togó naa, sẹ̀ dõona gbò beè kọ́ nú ea kilím ló nè ni ẽ́?” 35 Páílèt à kọ́ nèe kọọ̀: “É kọọ̀ nda dúù Júù? Pá bọọ dó nè gbò togó vààla gyọ́ọ ní e ba beè tú ni lọa bá nèm ẽ́. Éé ní eo beè naa ẽ́?” 36 Jíízọ̀s à kọ́ nèe kọọ̀: “Ńdáà Boǹ Méné náa dṹùnà bàlà booí. Be ńdáà Boǹ Méné beè dũunà bàlà booí, pá ńdáà gbò gáẹ̀ beè bé-bé kọbé bà náa túm lọa bá nè pá Júù. Sõò dì belí bé em kọ́ọ̀ naaá, ńdáà Boǹ Méné náa dṹùnà bàlà booí.” 37 Vó à naa, Páílèt à gbóó bĩináe kọọ̀: “Beè vó, é kọọ̀ ọ̀ọ̀ méné?” Jíízọ̀s à aalá kọọ̀: “Olo ní eo gé tú o gã́ kọọmá kọọ̀ ndaà ménéá ẽ́. Ge sí neǹ ditõ̀ò nè kà-kà bel ní ea beè naa vaá m̀ mèàe, vaá níà nú ea beè naa nagé kọ ḿ dú bàlà booí é. Kọ̀láá nen ea zọ kà-kà bel dù ólò pãane tṍ ló nà mon.” 38 Páílèt à gbóó bĩináe kọọ̀: “Éé ní ea dú kà-kà bel é?”

Tṍó ea ló belí lọ̀l, à gbóó kpáá òòà sí ló pá Júù gé kọ́ nè va kọọ̀: “Ním gbĩ́ì tọ́ọ̀ kà pọ́lọ́ mòníé bá. 39 Gbáló vó, à dú bọọ nàànù kunukẽ̀ kọ ḿ sọ̀bá enè nen nèi deè Nàànù Ténì Zelí. É kọ ò gbĩ́ì kọ ḿ sọ̀bá Méné pá Júù nèi?” 40 Bà gbóó kpáá vulí kpã́ kọọ̀: “Sọ̀bá Bàrábàs, níì gbálàí nì!” Bàrábàs beè kà agẹ bá neǹ zib.