Lé Kpẹ̀a E Máàk Beè Emí

14 A beè sigè bàà dee à dú deè Nàànù Ténì Zelí nè deè Sẹ̀lẹ̀nù Ge Dé Fétúlú E Nú Ea Ólò Gbuuve Nu Á Gé Gbàà, vaá gbò togó vààla gyọ́ọ nè gbò émì kpá géè gbĩ́ bé e bà é náa láá tú kyèèlè siimá Jíízọ̀s vaá fẹ́ẹ. 2 Bà géè kọọ̀: “Née é sííe gbẹá kè sẹ̀lẹ̀nùí boo béè kọọ̀ gbò nen é láá nvèè tã̀àgã̀.”

3 Tṍó ea beè di Bẹ́tanì ea géè dé gyã́á gbẹá tọọ̀ Sáímòn e kom̀ kulè beè olòó di lóá, ene kà ńnváá beè gbóó faalá ló-ló e kpée-kpéè nù ló nóo di m domá. Aẹ̀ bèè kà lé náàd ea palàge sí kpègè. A beè gbóó kùùlà kpà lọl nu vaá tṍé togó. 4 Tṍóá, sìgà nen beè gbóó nvèè súng vaá kọ́ nè ene kọọ̀: “Éé ní ea náa à dõogẽ tṍ nóoí pee é?” 5 Bà gáẹ̀ láá oo nóoí ló nu ea é sígá ló 300 dìnárìọ̀s vaá tú kpègèá nè gbò tãa. Nyíé va beè gbóó palàge bììlà ló ńnvááá. 6 Sõò Jíízọ̀s beè kọọ̀: “Aalííé ló. Éé ní ea náa vaá ò gbĩi gè tãagẽi ńnvááí ẽ́? À náa kà lé nu nèm. 7 Gbò tãa ólò dìí ló lee, vaá ò é láá naaníí va lé kọ̀láá tṍó ea léémái, sõò nda ním é díí ló lee. 8 À náa nú ea kpóó sim tùlà. À tú kpée-kpéè nù ló nóo tóm ló naamá gè kpoogèm dee ló sẹ̀ẹ̀ deé e bà é lím. 9 M̀ lóò kà-kà bel nèi kọọ̀, kọ̀láá kĩée e bà kọ́ lé kpẹ̀aí inmá ea di bàlà booí, bà é kọ́ nágé nu e ńnvááí náaí mm̀ ge kẽ̀èàé boo.”

10 Tṍóá, Júdàs Ìskáriọ̀t ea dṹùnà Òb Nè Bàà Nená beè gbóó àà sí ló gbò togó vààla gyọ́ọ boo béè ge teníé ló nvèè vá bá. 11 Tṍó e bà dã́ naa vó, nyíé va beè palàge ẹẹ naa ní e bà zigà kọ bà é neèe kpègè e bà tú ẹ́ẹ́ kpé naamá. Vó beè naa kọ á gbóó dààmà togó gè gbĩ́ tṍó ea é léé ló gè teníé ló nvèè vá bá.

12 Kà lèlà túá deè Sẹ̀lẹ̀nù E Bà Ólò Dé Fétúlú E Nú Ea Ólò Gbuuve Nu Á Gé Gbààa, ea dú tṍó e bà ólò nè vààla gyọ́ọ̀ Ténì Zelí, pá a gbò nyòòne nvée beè gbóó bĩináe kọọ̀; “Ãàe ní eo gbĩ́ì kọ é kpoogè dee ló nè ni kọbé ò tõo dé gyã́á Nàànù Ténì Zelí é?” 13 A beè gbóó lẹ̀ẹ̀là bàà neń e bà ólò nyoonée nvée, vaá kọ́ nè va kọọ̀: “Aalii bãí Jèrúselẹ̀m mè ò é monii ene kà gbálà ea tóólá féé múú. Biiaíé nvée, 14 vaá kọ̀láá kiée ea bã, kọi nei tẹ̀ íè tọá kọọ̀: ‘Neǹ Dòbá kọ́ é bĩiná ni kọọ̀: “Ãàe ní e nda nè gbò e bà ólò nyooném nvée é tõo dé gyã́á Nàànù Ténì Zelí é?”’ 15 À é gbóó dò bá gbele gbàà mm̀ tọ gbàn deè e ba beè sí tóm ló lọ̀l nèi. Tõoníí kĩá kpoogei dee ló gyã́á Nàànù Ténì Zelí sẹ̀ẹ̀i.” 16 Pá a gbò nyòòne nvée beè gbóó àà bã mm̀ boná vaá mòn gbõ̀ònà bé ea beè kọ́ nè va naaá. Bà gbóó tõó kĩá kpoogá dee ló nyòòmà Nàànù Ténì Zelíá.

17 Tṍó ea ni dú ló èlà, a beè gbóó faalá Òb Nè Bàà Nen e bà ólò nyoonée nvéeá kilma kĩá. 18 Tṍó e bà gé dé gyã́áá, Jíízọ̀s à gbóó kọ́ nè va kọọ̀: “M̀ lóò kà-kà bel nèi kọọ̀, enè bọ̀ì eo gé zọḿ mi deí gyã́áí é téniḿ ló nvee bá gbò ọ́b.” 19 Nyíé va à gbóó palàge bììlà naa ní e buù ọ̀và bĩ́ínáe kọọ̀: “É kọọ̀ nda?” 20 À gbóó kọ́ nè va kọọ̀: “Níà enè neń ea di zẹ̀ẹ̀ Òb Nè Bàà Nen e bà ólò nyooném nvée, ea gé zọ́m dé gyã́á mm̀ tẽ̀ènè kà bũ̀í. 21 Sã́áná nená é ú dì belí bé e Kpá Káí beè kọ́ naa, sõò pọ́lọ́ múú kyáá á di ló neń ea ténié ló nvee bá gbò ọ́b! À gáẹ̀ dú lé beè nená náa beè mèà.”

22 Tṍó e bà gé dé nuá, à gbóó tú enè kpò fétúlú vaá tã̀àgã ló Bàrì boo. À gbóó baagi nè va, vaá kọ́ nè va kọọ̀: “Tui vaá ò déi; níí tõó dọ̀ nà nom̀ kpáló.” 23 A beè tu nágé gbàág e míí di m, vaá tṍó ea ni ṍá Bàrì zaá boo lọ̀l, à gbóó tú nè va, vaá dénè ọ̀và à gbóó õ̀. 24 À gbóó kọ́ nè va kọọ̀: “Níí tõó dọ̀ nà ‘mii e Bàrì zílmá zíl,’ ea é eèa boo gbele tõ̀ò nen. 25 M̀ lóò kà-kà bel nèi kọọ̀, ním é óná tọ́ọ̀ kà míí e bà tú vã́ìn naamá dọ̀ọ̀mà tṍó em é ṍ ãa míí gbẹá mm̀ Boǹ Méné Bàrì.” 26 Dee deè nvée, tṍó e ba ni ọ́lí sọ́l lèèmà Bàrì lọ̀l, bà gbóó àà kil boo Gù Ólìv.

27 Jíízọ̀s à gbóó kọ́ nè va kọọ̀: “Dénè bọ̀ì é téelai aalím mí ló boo béè kọ ba beè emí mm̀ Kpá Káí kọ́ọ̀: ‘M̀ é fẹ́ neǹ kùdẽe ló naanà bólá, vaá gbò a naanà ból é téélá zààlà.’ 28 Sõò tṍó em ni kẽeà aa kemà ú, m̀ é aà kil Gálilì gé elá bànài.” 29 Pítà à kọ́ nèe kọọ̀: “Kọbèè dénè nagbòa téélá àà ní ló, nda ním é aà.” 30 Jíízọ̀s à gbóó kọ́ nèe kọọ̀: “M̀ lóò kà-kà bel nè ni kọọ̀, besĩ́ kõ̀ò kálá kù bàà tóm kpã́ bílá deeí, ò é amàm sàn taà tóm.” 31 Sõò a beè kilsĩ́ gè kọọ̀: “Kọbèè à dọ ní em zọọ̀ ni ù, ním é amà ni sàn.” Dénè nagbòa à gbóó zọ̀ẹ kọ nágé vó.

32 Bà gbóó kil kĩée ea kọlà Gẹ̀tsẹ́manì. À gbóó kọ́ nè gbò e bà ólò nyoonée nvée kọọ̀: “Ĩinii tẽ́ kĩí mè nda é aà gé tã̀àgã ló Bàrì.” 33 À gbóó faalá Pítà, Jém̀z, nè Jṍòn ààmà, vaá nyíée à gbóó palàge tã̀àgã̀. 34 À gbóó kọ́ nè va kọọ̀: “Nyíém palàge tã̀àgã̀ belí em é ú. Tõoníí kĩí vaá ò kilíí sĩ́ gè kuai dẽe ló.” 35 A beè gbóó kyã̀à gbálà ńkem kil deèsĩ́ vaá kumí sĩ́ kẽ tã̀àgã ló Bàrì kọ be à válí, tṍó tã̀àgã̀í á tení aalìèé sĩ́. 36 À gbóó kọọ̀: “Abba,* Tẹ̀, dénè nu válí ló olo. Tú gbàágí lọ̀lím sĩ́, sõò naa o bùlà, níì ńda nì.” 37 A beè gbóó òòa kẽ iná vá ló vaá mòn kọ bà di dáá. À gbóó kọ́ nè Pítà kọọ̀: “Sáímòn, ò di dáá? Naa kọ nóo íè kói eo é láá kùà dẽe ló mm̀ ene kà ávà? 38 Kilíí sĩ́ gè kuai dẽe ló vaá ò tãagãi ló Bàrì lee, kọbé nóo dọì bá ẹ̀bmà. À dìí bùlà ge naa vó, sõò bọọ nom̀ kpáló ọọ.” 39 A beè gbóó kpáá àà gé tã̀àgã ló Bàrì vaá lo nágé tẽ̀ènè kà belá. 40 A beè kpáá òòà dù vaá mòn kọ bà di dáá, boo béè kọọ̀ dáá beè palàge dì vá dẽe. Vó à naa, bà náa beè nyimá tọ́ọ̀ kà nú e bà gá kọ́ nèe. 41 A beè kpáá òòà iná vá ló ní ea égè taà tóm vaá kọ́ nè va kọọ̀: “Íb tṍó ea meà naaí ní e boolo di-díí dáá eo gé bṍi séi é! Ó gá daa nai! Ẹbvii! A lée tṍó e bà é gé tení ló Sã́áná nená nvee bá gbò náàkyọ̀. 42 Aalíí boo mè èé aà. Ẹbvii! Mè neń ea é téniḿ ló nvee bá gbò ọ́b a íná kuló.”

43 Boo tṍó ea gé ló belá, Júdàs ea dṹùnà Òb Nè Bàà Nená beè gbóó faalá gã́bug nen e bà fáálá gẹ̀ bé nè túm domá. Gbò togó vààla gyọ́ọ, gbò émì kpá, nè gbò kàneǹ pá Júù ní e ba beè lẹ̀ẹ̀là va ẹ́. 44 Neń ea é ténié ló nvee bá ọ́bvá beè kọ́ nè va kọọ̀: “Kọ̀láá neń em pyóbvìe bẹ́ẹ́ ní eo é síilii é. Tuíe aamai vaá ó gá zigai kọ á kìl.” 45 A beè gbóó kyã̀à síé ló vaá kọọ̀, “Neǹ Dòbá!” à gbóó pyobvíe bẹ́ẹ́. 46 Bà gbóó siíe. 47 Sõò enè neń ea beè di élá kĩá beè gbóó mììnà a gẹ̀ bé vaá fùlmà tṍ lọl ló gyóòloò pọ̀b neǹ vààla gyọ́ọ. 48 Jíízọ̀s à gbóó kọ́ nè va kọọ̀: “Ò fáàlàì gẹ̀ bé nè túm domai gé siimaḿ mi belí neǹ zib? 49 M̀ ólò di tọọ̀ káí kọ̀láá dee em gé nóòmà nu, sõò nóo beè siilím mi. Náa kal ló béè vó, dénè nuí gé nááá kọbé à ḿm̀-mè nú ea di mm̀ Kpá Káí.”

50 Dénè gbò e bà ólò nyoonée nvée beè gbóó teelá zààlà táẹ́ ló. 51 Sõò ene kà nvín ãa gbálà ea beè nvèà kọ̀là ló e bà tú lé báà kàn* naamá beè gbóó bììà vá nvée. Ba beè gbĩ́ gè siíe, 52 sõò a beè sọ̀bá kọ̀là lóá gbẹẹ́ vá bá, vaá tú kóló kpáló* teemá ààmà.

53 Bà gbóó faalá Jíízọ̀s siimá ló pọ̀b neǹ vààla gyọ́ọ, vaá dénè gbò togó vààla gyọ́ọ nè gbò kàneǹ pà Júù nè gbò émì kpá à gbóó bõoná. 54 Sõò Pítà beè kyã̀à ńkem-kem dúé nvée dọ̀ọ̀mà tṍó e bà ínà beè pọ̀b neǹ vààla gyọ́ọá. À gbóó ĩìtẽ́ ló gbò e bà ólò sí tóm beá vaá zìvà sã́. 55 Gbò togó vààla gyọ́ọ nè dénè gbò e bà ólò sí tóm Pọ̀b Tọ Bèèlaà Pá Júù géè gbĩ́ kyáá bel e bà é kpọ́ ló Jíízọ̀s kọbé bà fẹ́ẹ̀ẹ, sõò bà náa beè mòn tọ́ọ̀ kà. 56 Gã́bug nen beè kpọ́ẹ kyáá bel ló, sõò bel e bà ló náa beè dú tẽ̀ènè kà. 57 À íe nagé gbò e ba beè elá èla vaá síe kyáá neǹ ditõ̀ò ló kọọ̀: 58 “E beè dã́ tṍó ea kọ́ọ̀, ‘Nda é kṹúná tọọ̀ káí e ba beè tú bá tìbmàí uú kẽ, vaá m̀ é tú taà dee tìbmà ńdõona kà e bà náa é tú bá tìbmà.’” 59 Sõò bã̀àna bel e bà lóé lóí náa beè gbaaá ló ene.

60 Tṍóá, pọ̀b neǹ vààla gyọ́ọá à gbóó elá èla gbẹá gbàà gbòa vaá bĩiná Jíízọ̀s kọọ̀: “Nóo lóò tọ́ọ̀ kà bel tẹlẹ dẽe? Nóo dã́à gbò bel e bà gé ló ní lói?” 61 Sõò a beè dã́ pĩi vaá náa beè aalá tọ́ọ̀ kà bel tẹlẹ dẽe. Pọ̀b neǹ vààla gyọ́ọá beè gbóó kpáá bĩináe kọọ̀: “É kọọ̀ olo ní eo dúù Kráìst, ea dú Sã́áná Neń Ea Bọọ Lọ̀l Vaá À Lee é?” 62 Tṍóá, Jíízọ̀s à gbóó aalá nèe kọọ̀: “Níà nda, vaá ò é mon nda Sã́áná nen em di ĩ́ìtẽ́ boo bá lè Bàrì ea palàge ié kpóó, em di boo bù dee em gé aa káála dù.” 63 Tṍóá, pọ̀b neǹ vààla gyọ́ọá à gbóó baa a kọ̀là ló vaá kọọ̀: “Mókà neǹ ditõ̀ò ní e kpáà ié bíi ló é?” 64 O dã́amai tṍ bé ea on Bàrì naa. Bọọ bùlà kọ́ và ẹ? Dénè ọ̀và à kọ à bọ́ló gè fẹ́ẹ. 65 Sìgà ọ̀và beè gbóó tumíe múú kyáá ló, tú kàn kọ̀lmàe sĩ́, vaá tú kpọ̀g dìbmàgĩ̀e kọọ̀: “Dòbá neń ea dib ni nèi kọbé à zógè kọ ọ̀ọ̀ neǹ kọ́ọ̀ bùlà Bàrì!” Tṍó e ba ni sáẹ bá sĩ́, gbò e bà ólò sí tóm tọ bèèlaá à gbóó faaláẹ ààmà.

66 Tṍó e Pítà di ĩ́ìtẽ́ boo beá, ene kà nvín pábia ea ólò sí tóm nè pọ̀b nen vààla gyọ́ọá beè gbóó dù. 67 Tṍó ea mon Pítà ea gé zivà sã́, à gbóó ẹ̀bvie vaá kọ́ nèe kọọ̀: “Olo beè dì nàgé ló Jíízọ̀s ea dú Názarẹ̀t.” 68 Sõò a beè àmà sàn vaá kọọ̀: “Ním nyímàe ló. Ním zẹ́ẹ̀ nyimá tọ́ọ̀ kà nú eo gé kọ́á.” À gbóó aa tọá dọ kèdẹi vaá kyã̀à kil deè ló gbànsĩ́. 69 Nvín pábiaá beè mònie gbẹá kĩá vaá kọ nágé nè gbò e ba beè di élá kĩá kọọ̀: “Níì enè ọ̀và.” 70 A beè àmà nàgé sàn vaá pọ́ì ńkem̀ tṍó aa ló tṍóá, gbò e ba beè di élá kĩá beè gbóó kọ nágé nè Pítà kọọ̀: “Mm̀ kà-kà, oloò enè ọ̀và, boo béè kọ ò dúù Gálilì.” 71 Sõò a beè gbóó dààmà togó gè gbó pṍò nèà a bá vaá zilá zíl kọọ̀: “Ním nyímà ló gbálà eo gé kọ́i á!” 72 Tẽ̀ènè tṍóá, kõ̀ò à gbóó kù ní ea égè bàà tóm kpã́. Pítà à gbóó kẽ̀èa boo bel e Jíízọ̀s beè kọ́ nèeá kọọ̀: “Besĩ́ kõ̀ò kálá kù bàà tóm kpã́, ò é amàm sàn taà tóm.” À gbóó àà kil kèdẹi gé palàge tò.