Lé Kpẹ̀a E Jṍòn Beè Emí

21 Tṍó e níí nááá lọ̀l, Jíízọ̀s beè kpáá sila ló pá a gbò nyòòne nvée gbẹá ló Pène Tàìbérìàs. Nee bé ea beè sìlà vá ló naaí. 2 Sáímòn Pítà, Tómòs (e bà ólò kolíe Bàà Nvín Kà), Nàtániẹ̀l ea dú Kénà ea di Gálilì, pá nvín Zẹ́bidì, nè bàà kà dõona nèn e bà ólò nyoonée nvée beè di tẽ̀ènè ketõ̀ò. 3 Sáímòn Pítà à gbóó kọ́ nè va kọọ̀: “Nda é aà sí dọọ̀.” Bà gbóó kọ́ nèe kọọ̀: “Beele é nyooné ni.” Bà gbóó gbá bã faà sĩ́ múú àà, sõò kà lèlà bílá deè deeá, bà náa beè sii tọ́ọ̀ nu.

4 Tṍó e dee daamà togó gè ẹẹ, Jíízọ̀s beè gbóó elá gã́ múúá, sõò pá a gbò nyòòne nvée náa beè nyimá kọọ̀ níà Jíízọ̀s. 5 Jíízọ̀s à gbóó bĩiná va kọọ̀: “Gbò pá nvín, é kọ ò íèì nu gè dè?”* Bà aalá nèe kọọ̀: “Ẽ́èe!” 6 À gbóó kọ́ nè va kọọ̀: “Tobvii gbṍòá boo bá lè ló faà sĩ́ múúá, mè ò é síilii sìgà gyã́à.” Bà gbóó tobví, sõò bà náa beè láá dùùlà gbṍòa boo béè kọọ̀ gyã́à beè m-má dẽe. 7 Tṍóá, neǹ nyòòne nvée e Jíízọ̀s ólò palàge vùlèa à gbóó kọ́ nè Pítà kọọ̀: “Níà Nen Ea Íéi!” Tṍó e Sáímòn Pítà dã́ kọọ̀ níà Nen Ea Íéi, à gbóó nvèà a kọ̀là ló vaá pẹẹ dọ múú, boo béè kọ a beè kyã̀àmà kóló kpáló. 8 Sõò nagbò nyòòne nvée e ba beè gbẹá mm̀ faà sĩ́ múúá beè dùùlà gbṍò e gyã́à di ḿ-má dẽeá kilma boo kpò, boo béè kọ bà náa beè di kpã́á aa ló boo kpò. Kĩée e ba beè dì aa ló boo kpò é láá toolá 300 fíìt.

9 Tṍó e bà íná boo kpò, bà gbóó mòn fétúlú nè gẹ̀lẹ̀-gẹ̀lẹ̀ sã́ e gyã́à di dáa. 10 Jíízọ̀s à gbóó kọ́ nè va kọọ̀: “Tui sìgà gyã́à eo síìlììá domai.” 11 Sáímòn Pítà à gbóó bã mm̀ faàa vaá dùùlà gbṍò e gã́bug pọ̀b-pọ̀b paà gyã́à di dẽeá tẹlẹ boo kpò. A beè toolá 153 pa. Gbṍòa náa beè bààlà, náa kal ló béè kọọ̀ gyã́àa beè bọọ́ tõ̀ò. 12 Jíízọ̀s à gbóó kọ́ nè va kọọ̀: “Dui gé dei gyã́á.”* Tọ́ọ̀ nen ea ólò nyoonée nvée náa beè láá bĩináe kọọ̀: “Oloò mée ẽ́?” boo béè kọ ba beè nyimá kọọ̀ níà Nen Ea Íéi. 13 Jíízọ̀s à gbóó tú fétúlú nè gyã́àa nè va. 14 Níí ní ea égè taà tóm e Jíízọ̀s beè sila ló pá a gbò nyòòne nvée tṍó e Bàrì kẽée lọl kemà ú lọ̀l ẹ.

15 Tṍó e ba ni dé gyã́áá lọ̀l, Jíízọ̀s à gbóó bĩiná Sáímòn Pítà kọọ̀: “Sáímòn nvín Jṍòn, ò vulèm gé èlmà gbò nuí?” À aalá nèe kọọ̀: “Ẽei, Nen Ea Íém, ò nyímà kọọ̀ m̀ vulè ni.” Jíízọ̀s à kọ́ nèe kọọ̀: “Nè gyã́á gbò ńdáà naanà ból.” 16 À gbóó kpáá bĩináe ní ea égè bàà tóm kọọ̀: “Sáímòn nvín Jṍòn, ò vulèm gé?” À aalá naa: “Ẽei, e Nen Ea Íém, ò nyímà kọ m̀ vulè ni.” Jíízọ̀s à kọ̀ nèe kọọ̀: “Kùdẽe ló nà ńkem̀ gùlù naanà ból.” 17 À gbóó bĩináe ní ea égè taà tóm kọọ̀: “Sáímòn nvín Jṍòn, ò vulèm gé?” Nyíè Pítà à gbóó bììlà kọ à bĩ́ìnàèe ní ea égè taà tóm kọọ̀: “Ò vulèm gé?” Vó à naa, Pítà à gbóó kọ́ nèe kọọ̀: “Nen Ea Íém, olo nyímà dénè nu. Olo nyímà kọọ̀ nda vulè ni.” Jíízọ̀s à kọ́ nèe kọọ̀: “Nè gyã́á nà ńkem̀ gùlù naanà ból. 18 M̀ lóò kà-kà bel nè ni kọọ̀, tṍó eo beè di mm̀ o deè ãa, ò ólò nvèà kọ̀là ló vaá kyã̀à kil kọ̀láá kĩée ea tań ni. Sõò tṍó eo ni ána, ò é niinà bá vaá dõona nèn nveè ni kọ̀là ló vaá faalá ni kilma kĩée e náa dú o bùlà.” 19 A beè ló belí gè kọ́ íb ú e beè Pítà ú, à é nveè ka ló Bàrì. Tṍó ea ló belí lọ̀l, à gbóó kọ́ nèe kọọ̀: “Kilsĩ́ gè nyooném nvée.”

20 Pítà à gbóó ẹ̀à nvée, vaá mòn neǹ nyòòne nvée e Jíízọ̀s ólò palàge vùlèa ea gé biià vá nvée, ea dú nen e tṍó e bà géè dé gyã́á ló m̀m̀-neá, a beè dũ̀ùà bã ló Jíízọ̀s vaá bĩináe kọọ̀: “Nen Ea Íéi, mée ní ea é téni ní ló nvee bá gbò ọ́bvẹ́?” 21 Tṍó e Pítà moníe, à gbóó bĩiná Jíízọ̀s kọọ̀: “Nen Ea Íém, vaá ẹlẹí à?” 22 Jíízọ̀s à kọ́ nèe kọọ̀: “Éé ní ea kuú ni ea di ló, be à dú nà bùlà kọ á dì dọ̀ọ̀mà tṍó em é dú é? Olo kilsĩ́ gè nyooném nvée.” 23 Vó à naa, belí beè gbóó zààla gbàà dénè pá vígà kọọ̀ nakà neǹ nyòòne nvéeí náa é ú. Sõò Jíízọ̀s náa beè kọ́ nèe kọ náa é ú, sõò a beè kọọ̀: “Éé ní ea kuú ni ea di ló, be à dú nà bùlà kọ á dì dọ̀ọ̀mà tṍó em é dú é?”

24 Ẹlẹ ní ea dú neǹ nyòòne nvée ea beè sí neǹ ditõ̀ò kilma ló gbò nuí vaá emí gbò nuí ẽ́, vaá è nyímà kọọ̀ bel ea ló dú kà-kà.

25 Mm̀ kà-kà, à íe gã́bug dõona kà gbò nú e Jíízọ̀s beè naa, e be ba beè emí dénè nú ea kil ló, m̀ bulà kọọ̀ zivèkà bàlà booí náa gáẹ̀ tá gbò úl kpáá.