Kpá E Pọ́ọ̀l Beè Lẹ̀ẹ̀là Má Pá Róm̀

8 Vó à naa, bel náa bẽ́è gbò e bà gé nyoone nvéè Kráìst Jíízọ̀s. 2 Boo béè kọọ̀ log nyómá káí ea ólò nè dùm gbò e bà gé nyoone nvéè Kráìst Jíízọ̀s a náa kọ ó dií pọ́ì aalíí bá log náàkyọ̀ nè ú. 3 Nú e Logá náa beè láá naa boo béè ọ́ọ́-ọọ e nom̀ kpáló íe, Bàrì a náa tení dú ló gè lẹ̀ẹ̀là a Sã́áná kọ á dú mm̀ bela nen ea é láá ié náàkyọ̀, boo béè ge lọ̀l náàkyọ̀, boo béè kọọ̀ náàkyọ̀ ea di mm̀ nom̀ kpáló gbò nen bẽ́émá ẹlẹ́ Bàrì. 4 Níí beè naaá kọbé beele e náà nú e nyómá káí kọ́, e bè níì nú e nom̀ kpáló kọ́ nì, láá naa lèlà nú e Log bĩ́íná kọ é naa. 5 Boo béè kọọ̀ gbò e bà ólò naa nú e nom̀ kpáló gbĩ́ ólò ká ba bùlà gbẹẹ́ boo nú e nom̀ kpáló gbĩ́, sõò gbò e bà ólò naa nú e nyómá káí gbĩ́ ólò ká ba bùlà gbẹẹ́ boo nú e nyómá káí gbĩ́. 6 Boo béè kọọ̀ ge ká bùlà gbẹẹ́ boo nú ea di mm̀ nom̀ kpáló ólò màn ú, sõò ge ká bùlà gbẹẹ́ boo nú e nyómá káí gbĩ́ ólò màn dùm nè fẹ́ẹ́-fẹẹ̀ ló, 7 boo béè kọọ̀ ge ká bùlà gbẹẹ́ boo nú ea di mm̀ nom̀ kpáló ólò naa kọọ̀ nen á dú neǹ ọ́b Bàrì, boo béè kọọ̀ nom̀ kpáló á gé kèbá log Bàrì, vaá mm̀ kà-kà, náa é láá dì. 8 Vó à naa, gbò e bà gban tṍ ló nú e nom̀ kpáló kọ́ náa é láá naa nú ea léémá Bàrì.

9 Sõò be à dú kà-kà kọọ̀ nyómá káí Bàrì dìí ló, ò é náanii nú e nyómáá kọ́, níì nú e nom̀ kpáló kọ́ nì. Sõò be à íe nen e náa íe nyómá Kráìst, nakà nen náa dṹùnàe. 10 Sõò be ò íè lé gbaa ló kilma ló Kráìst, kọbèè à gá náa o nom̀ kpáló à ù boo béè náàkyọ̀, nyómáá é náa kọ ó ié dùm, boo béè kọ ba beè kọọ̀ ò dúù neǹ lé lab dògò. 11 Beè nyómá Bàrì ea beè kẽee Jíízọ̀s lọl kemà úá dìí m, Bàrì ea beè kẽee Kráìst Jíízọ̀s lọl kemà úá é náa nagé kọọ̀ bọọ nom̀ kpáló á kpáá tõó dùm tení dú ló a nyómá ea dií m-má.

12 Vó à naa e pá vígà, à íe nú eé íè ge gbàntṍ ló, sõò née é gban tṍ ló bẹẹ nom̀ kpáló ea gbĩ́ kọ é naa nú ea léémáe ã́, 13 boo béè kọọ̀ be ò náanii nú ea léémá bọọ nom̀ kpáló, ò é íè ge ui, sõò be ò fẹ́i gbò pọ́lọ́ láb ea di mm̀ bọọ nom̀ kpáló tení dú ló nyómá káí, ò é tõoníí dùm. 14 Boo béè kọọ̀ kọ̀láá gbò e nyómá Bàrì gé túlè dú gbò nvín Bàrì. 15 Boo béè kọọ̀ Bàrì náa beè nèi nyómá ea é túi naamá gyóòlo vaá naa kọ ó kpáá siiai pọ̀. Tãa vó, a beè nèi nyómá ea é náa kọ ó dui pá a nvín, vaá nyómáí ní ea náa kọ é tú agẹ mon kọọmá kọọ̀: “Ábbà, Tẹ̀ ẹ!” 16 Nyómáí sí neǹ ditõ̀ò nè beélè nyómá kọ è dúù gbò nvín Bàrì. 17 Be beele dúù gbò nvín Bàrì, èé íe gyọ́—ea dú gyọ́ ea aa bá Bàrì, vaá à é ne nàigé gyọ́ ea ne Kráìst—boo béè kọọ̀ be è zọ́ẹ mòn tã̀àgã̀, èé zọ́ẹ dõ̀ònà nàgé a ka.

18 Nda monì kọọ̀ gbò tã̀àgã̀ e gé mon kátogóí náa dú tọ́ọ̀ nu tṍó e doolè ló ka ea é tẹ́lẹ bàlà kẽ tení dúí ló. 19 Boo béè kọọ̀ gbò nú e Bàrì beè dèm dì e bà gé palàge elá bànà tṍó ea é tú pá a nvín tẹlẹ bàlà kẽ. 20 Gbò nú e Bàrì beè dèm beè di kèbá dìtõ̀ò ea náa kọ bà á dú zọ̀là pọ́ì. Náa beè naaá naa vó boo béè kọ à dú ba bùlà, sõò Bàrì ní ea beè naa kọ á dì naa vó é, kọbé bà íe ból dẽesĩ́, 21 kọbé gbò nú e Bàrì beè dèm* láá dì nàgé pọ́ì aa bá gè dú gyóòlo nè nú ea é kyọà vaá ié dì pọ́ì ea dú dũ̀ùnè ea dì nè gbò nvín Bàrì. 22 Boo béè kọọ̀ è nyímà kọọ̀ dénè dèmnù dì e bà gé bãagã̀ vaá di kèbá nyaa ló dọ̀ọ̀mà kátogóí. 23 Nagé, beele e íè túá ból súú ea dú nyómá káíá dì e gé bãagã̀ nàgé, boo tṍó e dì e gé palàge elá bànà tṍó e Bàrì é túi naamá pá a nvín. Tṍóá, bẹẹ nom̀ kpáló é gbóó di pọ́ì tení dú ló nu ààaá. 24 Boo béè kọọ̀ Bàrì beè dùùlài tení dú ló nakà ból dẽesĩ́í. Sõò ge bol dẽesĩ́ nú e nen monmà dẽe níì ból dẽesĩ́ nì. Boo béè kọọ̀ tṍó e nen monmà dẽè nu, é kọ à ólò kpáá bol dẽesĩ́? 25 Sõò be è ból dẽesĩ́ nú e née monmà dẽe, è ólò palàge ĩ̀ìmà vaá elá bànà.

26 Mm̀ tẽ̀ènè sĩ́deèá, nyómá káí ólò nvèè nàgé bá nèi boo béè kọ è dúù gbò ọ́ọ́-ọọ, boo béè kọọ̀ tã̀àgã̀ e íè dú gè kọ née nyímà ló nú ea dú bíi ge tã̀àgã ló Bàrì kilma ló, sõò nyómá káí ólò bàn Bàrì tenmáí boo tṍó e née láà kọ́ nú ea gé tãagéi tẹlẹ bàlà kẽ. 27 Sõò nen ea ólò nyimá nu ea di nyíè nen nyímá nú e nyómá káíá gé kọ, boo béè kọọ̀ nú ea gé bań boo gbò e bà di káíá gbááá ló nú ea dú bùlà Bàrì.

28 È nyímà kọọ̀ Bàrì beè dèm dénè nu kọ bà á gbá siá tóm kọbé à dọ bélè nè gbò e bà vulè Bàrì, ea dú gbò ea beè kolí dì belí bé ea beè dú a bùlà naa. 29 Boo béè kọọ̀ a beè tú tṍó gbẹẹ́ sĩ́ íbá ló túá gbò ea beè zẹ́ẹ́ nyimá ló kọ bà á dì belìè a nvín, kọbé a nvíní láá dú túá kà nvín zẹ̀ẹ̀ gã́bug pá vígà. 30 Nagé, gbò ea beè tú tṍó gbẹẹ́ sĩ́ íbá ló ní e bà dú gbò ea beè kolí nágé é, vaá gbò ea beè kolí ní e bà dú gbò ea ténmá naamá gbò lé lab dògò e. Dee deè nvée, gbò ea ténmá naamá gbò lé lab dògò ní e bà dú gbò ea nveè ka ló é.

31 Beè vó, éé ní eé gbóó kọ́ kilma ló gbò nuí ẽ́? Beè Bàrì di ló beele, mée ní ea é láá naa uuí boo é? 32 Be Bàrì beè láá tú a Sã́áná nè kọ á ú boo dénè bẹ̀ì, é kọ náa é ne nàigé dénè nagbò nuá? 33 Mée ní ea é láá ló bel ló gbò e Bàrì beè sà ẹ? Bàrì ní ea beè tenmà va kọ bà dú gbò lé lab dògò e. 34 Mée ní ea é láá beelá bel bẽè va ẹ́? Kráìst Jíízọ̀s ní ea dú nen ea beè ù, vaá Bàrì à kẽée lọl kemà ú é, vaá ẹlẹ ní ea dú nen ea di boo bá lè Bàrì ea ólò bàn nàigé Bàrì boo é.

35 Éé ní ea é láá naa kọọ̀ Kráìst á gá vùlè nài ẽ́? É kọọ̀ tã̀àgã̀, sẹ̀ tã̀àgã̀ bùlà, sẹ̀ bíígá ló, sẹ̀ tákói, sẹ̀ ge kọọ̀ née íè nu gè nvèà, sẹ̀ gẹẹ-gẹẹ ló dìtõ̀ò, sẹ̀ gẹ̀ bé é? 36 Dì belí bé e ba beè emí naa: “È ólò kpee sĩ́ ló ú kọ̀láá deeí boo béè olo. Bà sẹlẹ́i belí naanà ból e bà é gé kèl.” 37 Kèbá dénè dìtõ̀òí, è béè èlbá tení dú ló nen ea vulèiá. 38 Boo béè kọọ̀ nda palàge àgala boo kọọ̀ kọbèè ú àbèè dùm àbèè gbò nyómá tóm àbèè kpóó ea gé bẹl àbèè gbò nú ea di kátogóí àbèè gbò nú ea é dú sĩ́ àbèè kpóó 39 àbèè nú ea bọọ́ gãboo àbèè nú ea bọọ́ kètẽ́ àbèè dõona kà dèmnù náa é láá kpòòlà beele lọl ló vulè e Bàrì íeí ló tení dú ló Kráìst Jíízọ̀s, ea dú Nen Ea Íéi.