Kpá E Pọ́ọ̀l Beè Lẹ̀ẹ̀là Má Pá Róm̀
5 Vó à naa, kátogóí e Bàrì ni ẹbvíi naamá gbò lé lab dògò tení dú ló zìgà e íèí, naanii èé dé kpéè ló fẹ́ẹ́-fẹẹ̀ ló* e íè kilma kĩée e Bàrì dì tení dú ló Neń Ea Íéi, ea dú Jíízọ̀s Kráìst. 2 Zìgà e íèé m a náa kọ Bàrì á iéi sàn nyíe ló, vaá sàn nyíeí ní e gé dé kpéè ló kátogóí é. Vó à naa, naanii èé ṍ kààgà* boo béè kọ è íè ból dẽesĩ́ gè ié ka ea aa bá Bàrì. 3 Níì áá vó nì, naanii èé ṍ kààgà* tṍó e di kèbá tã̀àgã̀, tã́gíní bé e nyímà kọọ̀ tã̀àgã̀ ólò naa kọọ̀ nen á ié ĩ̀ìmà ã. 4 Ĩ̀ìmà ólò naa kọ Bàrì á tenmà nen, vaá tṍó e Bàrì ni ténmàe, à ólò gbóó ié ból dẽesĩ́, 5 vaá ból dẽesĩ́á náa ólò kẹlẹ nen, boo béè kọọ̀ Bàrì beè tú vulè ea íeí ló nvèèí nyíe tení dú ló nyómá káí ea beè nèiá.
6 Mm̀ kà-kà, tṍó e née beè ié tọ́ọ̀ kà kpóó ní e Kráìst beè ú boo gbò náàkyọ̀ kà lèlà tṍó ea bọ́ló é. 7 À é tavàlà kọọ̀ nen á ú boo neǹ lé lab dògò, sõò nen é láá di kpènà ló gè ú boo lé nen. 8 Bàrì beè zogè kọ à vulèèi, boo béè kọọ̀ tṍó e beè di-dí gbò náàkyọ̀ ní e Kráìst beè úí boo é. 9 Ní ea bọọ èl vó, tã́gíní bé e Bàrì beè tenmài kọ è dúù gbò lé lab dògò tení dú ló mii Jíízọ̀sa, èé duuà aa bá súng Bàrì tení dúé ló. 10 Be e beè láá zọ̀ Bàrì naaá fẹ́ẹ́-fẹẹ̀ ló tení dú ló ú a Sã́áná tṍó e beè dú gbò ọ́b, éé ní ea é náa kọ é gá ié dùùà tení dú ló a dùm kátogóí e ni zọ́ẹ naaá fẹ́ẹ́-fẹẹ̀ lóí é? 11 Níí áá vó nì, sõò è ṍ nàgé kààgà mm̀ Bàrì tení dú ló Neń Ea Íéi ea dú Jíízọ̀s Kráìst, ea dú nen ea náa kọ é láá zọ̀ Bàrì naaá fẹ́ẹ́-fẹẹ̀ ló.
12 Boo béè kọọ̀ náàkyọ̀ beè bã bàlà boo tení dú ló enè nen vaá náàkyọ̀ à gbóó màn ú, vaá ú à gbóó zààlà iná ló dénè nen, boo béè kọọ̀ dénè nen dú gbò náàkyọ̀—. 13 Náàkyọ̀ beè bã bàlà booí besĩ́ Log a kalá dì, sõò bà náa é láá kọọ̀ nen sí pọ́lọ́ tṍó e log á gé. 14 Ú beè bẹ̀l lọl boo kpóó tọọ̀ Ádàm tẹlẹ boo kpóó tọọ̀ Mózìs, vaá bẹ̀l nàgé boo bã̀àna gbò e bà gáà si íb pọ́lọ́ e Ádàm beè sìa. Ádàm dì belí nen e ba beè kọ à é dúá.
15 Sõò dõ̀ònùí náa belí náàkyọ̀, boo béè kọọ̀ beè pọ́lọ́ e enè nen beè sì náa kọọ̀ gã́bug nen á ù, à é náa vàẹ vaá sàn nyíè Bàrì nè a dõ̀ònù ea ne tení dú ló sàn nyíè enè nen, ea dú Jíízọ̀s Kráìst náa é tulà gã́bug nen ẽ́! 16 Nagé, nú ea silà aa mm̀ dõ̀ònùí dú kele ló nú ea silà aa mm̀ pọ́lọ́ e enè nen beè sìa, boo béè kọọ̀ Bàrì beè beelá bel bẽè gbò nen boo béè pọ́lọ́ e enè nen beè sì, sõò dõ̀ònù e Bàrì ne tṍó e gã́bug nen ni sí pọ́lọ́ náa kọ á ẹ̀b gbò nen naamá gbò lé lab dògò. 17 Beè náàkyọ̀ enè nen beè naa kọọ̀ ú á bẹ̀l dì belí méné, à é náa và vaá gbò e Bàrì ni íe sàn nyíe ló vaá tenmà va naamá gbò lé lab dògò ea dú dõ̀ònù e Bàrì neá, náa é bẹl tení dú ló enè nen, ea dú Jíízọ̀s Kráìst e!
18 Vó à naa, dì belí bé e ene kà pọ́lọ́ e nen beè sì beè naa kọọ̀ bel á bẽè kọ̀láá nen naaá, níà bé e ene kà lé nu e nen náa beè naa kọọ̀ bel á leè kọ̀láá íb nen vaá Bàrì à tenmà va kọ bà dú gbò lé lab dògò e bà é íe dùm naa ẽ́. 19 Boo béè kọọ̀ dì belí bé e lọ̀l togó kèbá enè nen beè naa kọọ̀ gã́bug nen á dú gbò náàkyọ̀ naaá, níà bé e dùm gbàntṍ ló e enè nen íe é náa kọọ̀ gã́bug nen á dú gbò lé lab dògò naa ẽ́. 20 Ba beè gbóó nvèè Logá kẽ kọbé pọ́lọ́ bọọ́ tõ̀ò. Sõò kĩée e pọ́lọ́ bọọ́ tõ̀ò, sàn nyíè Bàrì palàge bọọ èl. 21 Ló éé? Kọbé dì belí bé e náàkyọ̀ nè ú beè gbá bẹ̀l dú méné naaá, níà bé e sàn nyíe é láá bẹ̀l dú méné tení dú ló lé lab dògò ea é náa kọ nen á ié dùm e bè náa tá tení dú ló Jíízọ̀s Kráìst, ea dú Neń Ea Íéi naa ẽ́.