Lé Kpẹ̀a E Lúùk Beè Emí

7 Tṍó ea ni ló dénè bel ea géè gbĩ́ gè ló nè va lọ̀l, à gbóó àà kil Kàpánìòm. 2 À íe neǹ togó gbò bé ea beè ié gyóòlo ea palàge vùlè, e kpálóe géè zọ̀ belí ea é ú. 3 Tṍó ea dã́ nú ea kil ló Jíízọ̀s, à gbóó lẹ̀ẹ̀là sìgà gbò kàneǹ pá Júù kọ bà á síé ló gé bànie kọ á dù gé boè a gyóòlo. 4 Bà gbóó iná ló Jíízọ̀s vaá palàge bànie kọọ̀: “À bọ́ló kọ ó nvèè bá nè gbálàí, 5 boo béè kọọ̀ à vulè beele pá Júù, vaá ẹlẹ ní ea beè tìb bẹẹ tọ bõ̀ònaló fã̀e.” 6 Jíízọ̀s à gbóó nyooné va àà. Tṍó ea ni íná kuló tọá, neǹ togó gbò béá à gbóó lẹ̀ẹ̀là pá a kóò kọ bà á gé kọ́ nèe kọọ̀: “Tẹ́ẹ̀, ó gá tã̀àgã̀ boo béè kọ ním bọ́ọ̀ló gè kọ ó dú nà to. 7 Níà nú ea náa vaá m beè ẹ̀b kọ ním bọ́ọ̀ló gè dú ní ló é. Sõò gbẹá kĩá ló bel, mè ńdáà gyóòlo é bóá. 8 Boo béè kọọ̀ nda dì nàgé kè kẽè kpóó lẹ̀ẹ̀là bel, vaá m̀ íè gbò bé em gé lẹẹlà bel ló. M̀ ólò kọ́ nè na není kọọ̀, ‘Àà!’ vaá à aà. M̀ kọ́ nè na nená kọọ̀, ‘Dù!’ vaá à dú, vaá m̀ kọ́ nè nà gyóòlo kọọ̀, ‘Naa nuí!’ vaá à náa.” 9 Tṍó e Jíízọ̀s dã́ naa vó, à gbóó palàge bọọẹ́ ló, naa ní ea kiìa kẽ ẹ̀b gã́bug gbò e ba beè dìé nvéeá vaá kọ́ nè va kọọ̀: “M̀ kọ́ọ̀ nèi kọọ̀ m̀ gáà mòn tọ́ọ̀ neǹ Ízrẹẹ̀l ea íe agẹ zìgà naaí.” 10 Tṍó e gbò ea beè lẹ̀ẹ̀làa ooà iná tọ, bà gbóó mòn kọọ̀ kpáló gyóòloá a válí.

11 Tṍó e ńkem̀ tṍó téní, à gbóó àà sí boń ea kọlà Néìn, vaá gbò e bà ólò nyoonée nvée nè gã́bug dõona gbò beè dìé ló. 12 Tṍó ea íná kuló gbànsĩ́ ea di ló boná, bà géè dàlà íí ene kà nvín págbálà ea dú áá kà nvín ea beè di bá a kà tenmá. Ńnvááá níà vaà tãa, vaá gã́bug gbò e bà aa boná beè dìé ló. 13 Tṍó e Neń Ea Íéi mon ńnvááá, à gbóó dúe ńsàn nyíe, naa ní ea kọ́ nèe kọọ̀: “Ó gá to ná.” 14 À gbóó kyã̀à gé daa bá ló váì kpàìa, vaá gbò e bà géè dàlà à gbóó elá. À gbóó kọọ̀: “Nvín ãa gbálà, m̀ kọ́ọ̀ nè ni kọọ̀, aa boo!” 15 Nvín ãa gbálà ea beè ùa à gbóó ĩìtẽ́ kẽ vaá dààmà togó gè ló bel. Jíízọ̀s à gbóó túe nè a kà. 16 Pọ̀ à gbóó sii dénè ọ̀và, vaá bà gbóó dààmà togó gè lèèlà Bàrì kọọ̀: “Pọ̀bkà neǹ kọ́ọ̀ bùlà Bàrì a ínaí zẹ̀ẹ̀,” vaá “Bàrì a íe sàn nyíe ló pá a gbò.” 17 Kpẹ̀a ea kilíé ló beè gbóó zààlà iná dénè ketõ̀ò ea di Jùdíà nè gbò dó ea di kuló kĩá.

18 Gbò e bà ólò nyoone nvéè Jṍòn à gbóó kọ́ gbò nú ea náááí nè Jṍòn. 19 Tṍóá, Jṍòn à gbóó lẹ̀ẹ̀là bàà neń e bà ólò nyoonée nvée kọ bà á sí ló Neń Ea Íéi gé bĩináe kọọ̀: “É kọọ̀ Olo Ní E Ba Beè Kọ À É Dúá Ẹ́, sẹ̀ é ẹ̀bmà dẽè dõona nèn ẽ?” 20 Tṍó e bà íná ló Jíízọ̀s, bà gbóó kọ́ nèe kọọ̀: “Jṍòn Neǹ Dììlè Nen Múú beè lẹ̀ẹ̀lài kọ é gé bĩiná ní kọọ̀, ‘É kọọ̀ Olo Ní E Ba Beè Kọ À É Dúá Ẹ́, sẹ̀ é ẹ̀bmà dẽè dõona nèn ẽ?’” 21 Tṍóá, a beè bó zọ̀ló lọl ló gã́bug nen, bogági agẹ bá kom, kpó zọ lọl mm̀ gbò nen, vaá naa kọọ̀ gbò gímá dẽe á mòn nu. 22 À aalà nè va kọọ̀: “Aalii gé kọi nei Jṍòn nú eo monìì vaá dãi: Gbò gímá dẽe a mon nu, vaá gbò kọ̀và a kyãa, gbò e kom̀ kulè beè di ló a bóá, vaá gbò káá tṍ a dã́ nu, gbò e ba beè ù a kẽeà aa kemà ú, vaá baa kọ́ lé kpẹ̀a nè gbò tãa. 23 Ẹ́ẹ́-ẹẹ̀ nyíe á di ló neń e náa dọ boo béè nda.”

24 Tṍó e gbò e Jṍòn beè lẹ̀ẹ̀làa ni aà, Jíízọ̀s à gbóó dààmà togó gè kọ́ nú ea kil ló Jṍòn nè gbele gã́bug nená kọọ̀: “Éé ní eo beè sií boo bàlà ól gé ẹbvii é? É kọọ̀ víl e fọ́ọ́lọ́ gé lẹ́ẹ̀lẹ̀? 25 Éé ní eo beè sii gé ẹbvii é? É kọọ̀ neń ea nveà lé kọ̀là ló? Beè vó, gbò e bà nveà lé kọ̀là ló vaá ié lé-lé nu ea bií va ólò di tọọ̀ méné. 26 Kà éé ní eo kọ́ì kọọ̀ o beè sii gé ẹbvii é? É kọ ò géè gbĩi gè monii neǹ kọ́ọ̀ bùlà Bàrì? Ẽei, níà neǹ kọ́ọ̀ bùlà Bàrì, sõò à bọọ èl pọ́ì neǹ kọ́ọ̀ bùlà Bàrì. 27 Níà neń e ba beè emí nú ea kil lóá kọọ̀: ‘Ẹ̀b! M̀ é lẹẹlà nà neǹ lẹ̀ẹ̀la tóm ea é gyá ní sĩ́, vaá à é kpóògè dee ló èèlè sẹ̀ẹ̀ ni.’ 28 M̀ kọ́ọ̀ nèi kọọ̀ tọ́ọ̀ nen e pábia beè màn náa bọọ tõ̀ò Jṍòn, sõò neń ea kil kẽ ea di zẹ̀ẹ̀ gbò e bà é bã mm̀ Boǹ Méné Bàrì bọọ èlie.” 29 (Tṍó e dénè gbòa nè gbò lọ̀l kpègè gbáá dã́ naa vó, bà gbóó kọọ̀ Bàrì dú neǹ lé lab dògò boo béè kọọ̀ Jṍòn beè tú va diilé múú. 30 Sõò boo béè kọọ̀ pá Fárìsíì nè gbò e bà palàge nyimá log náa beè tú dùùlà bá deè tṍ ea aa bá Bàrì, bà náa beè zìgà kọọ̀ Jṍòn á tuè va diilèè múú.)

31 “Vó à naa, bà mée ní em é tú gbò e bà di nakà kúúlíí doolé ló é? Bà bélí éé? 32 Bà bélí gbò pá nvín e bà di ĩ́ìtẽ́ kèki e bà gé kọ́ nè ene kọọ̀: ‘È uulì vìli nèi, sõò nóo zobvìì. È tóò, sõò nóo bãagã̀ì.’ 33 Mm̀ tẽ̀ènè sĩ́deèá, tṍó e Jṍòn Neǹ Dììlè Nen Múú beè dù, náa beè dé gyã́á àbèè ge ṍ míí, ò kọi kọọ̀: ‘Zọ dìé m.’ 34 Tṍó e Sã́áná nená dú vaá dé gyã́á, ṍ míí, o kọ́i kọọ̀: ‘Ẹ̀ẹ̀ neǹ gọ̀l òò nè neǹ õ̀ò míí, ẹ̀ẹ̀ kóò gbò lọ̀l kpègè gbáá nè gbò náàkyọ̀!’ 35 Kọ̀láá bé ea dì naa, nyìmànù ólò dọ bàlà kẽ tení dú ló láb e nen lábví.”

36 À íe enè neǹ Fárìsíì ea beè kolí Jíízọ̀s kọ á dù gé zọẹ̀ẹ deè gyã́á. Jíízọ̀s à gbóó bã tọọ̀ neǹ Fárìsíìa vaá ĩìtẽ́ kẽ dé gyã́á. 37 Tṍó e ene kà ńnváá e pá boná nyímáe ló naamá neǹ náàkyọ̀ dã́ kọọ̀ à di tọọ̀ neǹ Fárìsíìa ea gé dé gyã́á, à gbóó faalá ló-ló kpée-kpéè nù ló nóo domá. 38 À gbóó kumí dúnú kẽ ló kpóó tọọ̀ Jíízọ̀s vaá tò, tú gĩ́i kàlẹ̀ẹ́ boo kátọ. Tṍó ea ni tú gyáa ea dìé ból fã̀àmà lọ̀l, à gbóó pyobvíe boo kátọ vaá tú kpée-kpéè nù ló nóoá lẹ-lẹ boo. 39 Tṍó e neǹ Fárìsíì ea beè kolíe ló gyã́áá mon naa vó, à gbóó kọ́ nèà a bá kọọ̀: “Beè gbálàí beè dú kàà neǹ kọ́ọ̀ bùlà Bàrì, à gáẹ̀ nyimá ló íb neń e ńnváá ea gé daáẹ bá lóí dú, boo béè kọọ̀ ńnvááí dú neǹ náàkyọ̀.” 40 Jíízọ̀s à gbóó kọ́ nèe kọọ̀: “Sáímòn,* à íe nú em gbĩ́ gè kọ́ nè ni.” À kọ́ nèe kọọ̀: “Neǹ Dòbá, kọ̀!”

41 “À íe bàà nen e ba beè sii kom bá neń ea ólò nè bọ́ọ̀lẹ̀ kpègè. Enè nen beè sii kom̀ 500 dìnárìọ̀s, na nená à sii kom̀ 50 dìnárìọ̀s.* 42 À gbóó ia ló nè pálaa ọ̀và tṍó e bà náa láà kpẽ́ nèe. Vó à naa, mée ea dì vá gbàà ní ea é palàge vùlèe é?” 43 Sáímòn à aalá kọọ̀: “M̀ bulà kọọ̀ níà neń e bà aa ló gã́bug kpègè nèeá.” À gbóó kọ́ nèe kọọ̀: “Ò láà aalá.” 44 À gbóó kììa kẽ ẹ̀b ńnvááá vaá kọ́ nè Sáímòn kọọ̀: “Ò monì gé ńnvááí? M beè bã o tọ, vaá nóo neèm tọ́ọ̀ kà múú kọ ḿ logmá kpóó tọ. Sõò ńnvááí tú a gĩ́i logmám kpóó tọ, vaá tú a gyáa fã̀àmà. 45 Nóo beè pyovím bẹ́ẹ́, sõò lọ̀l gé tṍó em beè bã tọí, ńnvááí gáà aa ló gè pyovím kátọ. 46 Nóo beè tóm nóo togó, sõò ńnvááí tú kpée-kpéè nù ló nóo tóm boo kátọ. 47 Boo béè vó, m̀ kọ́ọ̀ nè ni kọọ̀, náa kal ló béè kọọ̀ a pọ́lọ́ bọọ́ tõ̀ò, m̀ ià ló nèe boo béè kọọ̀ à palàge vùlèm. Sõò neń ea sí ńkem̀ pọ́lọ́ vaá bà ia ló nèe náa ólò bọ̀ọ̀gẹ̀ ié vulè.” 48 Tṍóá, à gbóó kọ́ nè ńnvááá kọọ̀: “M ia ló o pọ́lọ́ nè ni.” 49 Gbò e bà géè zọ̀ẹ dé gyã́áá à gbóó bĩiná ene kọọ̀: “Níì mókà gbálà ea ia na ló pọ́lọ́í é?” 50 À gbóó kọ́ nè ńnvááá kọọ̀: “O zìgà a duulà ni. Aa mm̀ fẹ́ẹ́-fẹẹ̀ ló.”