Lé Kpẹ̀a E Máátìù Beè Emí

11 Tṍó e Jíízọ̀s ni kọ́ nú e 12 neń e bà ólò nyoonée nvéeá é náa lọ̀l, à gbóó aa kĩá àà gé noomà nu vaá kọ́ kpẹ̀a mm̀ ba gbò pọ̀b bon.

2 Sõò tṍó e Jṍòn tõó tọọ̀ kpọ́gọ́lọ́ dã́ nú ea kil ló tóm e Kráìst gé sí, à gbóó lẹ̀ẹ̀là gbò e bà ólò nyoonée nvée 3 kọ bà á bĩináe kọọ̀: “É kọ Olo Ní E Ba Beè Kọ À É Dúá ẹ́, sẹ̀ é ẹ̀bmà dẽè dõona nèn ẽ?” 4 Jíízọ̀s à aalá nè va kọọ̀: “Aalii gé kọi nei Jṍòn nú eo dã́ì vaá monii: 5 Gbò gímá dẽe a mon nu vaá gbò kọ̀và a kyãà, gbò e kom̀ kulè di ló a bóá vaá gbò káá tṍ a dã́ nu, gbò e ba beè ù a kẽeà aa kemà ú vaá gbò tãa a dã́ lé kpẹ̀a. 6 Ẹ́ẹ́-ẹẹ̀ nyíe á di ló neń e nda ním dúù nuù kúm̀ tọ́ lọ́ nèàe.”

7 Tṍó e gbò nyòòne nvéè Jṍòn di èèlè e bà gé aà, Jíízọ̀s à gbóó dààmà togó gè kọ́ nú ea kil ló Jṍòn nè gbele gã́bug nená kọọ̀: “Éé ní eo beè sií boo bàlà ól gé ẹbvii é? É kọọ̀ víl e fọ́ọ́lọ́ gé lẹ́ẹ̀lẹ̀? 8 Éé ní eo beè sii gé ẹbvii é? É kọọ̀ nen ea nveà lé kọ̀là ló? Beè vó, gbò e bà nveà lé kọ̀là ló ólò di tọọ̀ méné. 9 Kà éé ní eo kọ́ì kọọ̀ o beè sii gé ẹbvii é? É kọ ò géè gbĩi gè monii neǹ kọ́ọ̀ bùlà Bàrì? Ẽei, níà neǹ kọ́ọ̀ bùlà Bàrì, sõò à bọọ èl pọ́ì neǹ kọ́ọ̀ bùlà Bàrì. 10 Níà nen e ba beè emí nú ea kil lóá kọọ̀: ‘Ẹ̀b! M̀ é lẹẹlà nà neǹ lẹ̀ẹ̀la tóm ea é gyá ní sĩ́, vaá à é kpóògè dee ló èèlè sẹ̀ẹ̀ ni!’ 11 M̀ lóò kà-kà bel nèi kọọ̀, tọ́ọ̀ neń e pábia beè màn náa bọọ tõ̀ò Jṍòn Neǹ Dììlè Nen Múú, sõò nen ea kil kẽ ea di zẹ̀ẹ̀ gbò e bà é bã́ mm̀ Boǹ Méné gbàn deè káála bọọ èlie. 12 Lọl tṍó e Jṍòn beè dààmà togó gè kọ́ kpẹ̀a tẹlẹ̀ kátogói, gbò nen dì e bà gé piiga boo gè bã mm̀ Boǹ Méné Bàrì, vaá gbò e bà kilsĩ́ gè siá kpóó ló dì e bà gé bã́ m. 13 Boo béè kọ Gbò Kọ́ọ̀ Bùlà Bàrì nè Logá beè kọ́ nú ea é nááá dọ̀ọ̀mà tṍó e Jṍòn dú; 14 kọbèè ò zigai àbèè nóo zigài, ẹlẹ ní ea dú ‘Èláíjà e gbò kọ́ọ̀ bùlà Bàrì beè kọ à é dúá ẹ́.’ 15 Neń ea íe tṍ á dã̀.

16 “Bà mée ní em é láá tú nakà kúúlíí doolé ló é? Bà bélí gbò pá nvín e bà di ĩ́ìtẽ́ kèki, e bà gé kọ́ nè ba kóò 17 kọọ̀: ‘È uulì vìli nèi, sõò nóo zobvìì; è tò, sõò nóo bãagã̀ì.’ 18 Mm̀ tẽ̀ènè sĩ́deèá, tṍó e Jṍòn beè dù, náa beè dé nu àbèè ge ṍ nu, gbò nen à kọọ̀: ‘Zọ dìé m.’ 19 Tṍó e Sã́áná nen dú vaá dé gyã́á, ṍ míí, gbò nen a kọ́ọ̀: ‘Ẹ̀ẹ̀ neǹ gọ̀l òò nè neǹ õ̀ míí, ẹ̀ẹ̀ kóò gbò lọ̀l kpègè gbáá nè gbò náàkyọ̀.’ Kọ̀láá bé ea dì naa, nyìmànù ólò dọ bàlà kẽ tení dú ló láb e nen lábví.”

20 À gbóó dààmà togó gè kọ́ bel gbò e bà di gbò boń ea beè sí gã́bug tóm dũ̀ùnè gbẹáá, boo béè kọọ̀ bà náa ọ́gá. A beè kọọ̀: 21 “Pọ́lọ́ múú kyáá á di ló booló pá Kọ̀rézìn! Pọ́lọ́ múú kyáá á di ló booló pá Bẹ̀tsáídà! boo béè kọọ̀ beè gbò tóm dũ̀ùnè em beè sí nèi ní em beè sí nè pá Táíà nè Sáídòn ẽ, bà gáẹ̀ beè ọgá kpã́á dee, nvèà kọ̀là ló nyèm, vaá ĩìtẽ́ gbàà bùùlù. 22 Sõò m̀ kọ́ọ̀ nèi kọọ̀ nú ea é nááaí ló Deè Bèèla Bel é aga bá èl nú ea é nááá ló Táíà nè Sáídòn. 23 Vaá booló pá Kàpánìòm, é kọọ̀ bà é dalài kpãa ló inmá sĩ́ káála? Mm̀ Bànà Ú ní e bà é tã́ái bá tẹlẹ̀ẹ, boo béè kọọ̀ beè íb tóm dũ̀ùnè em beè sí nèi ní em beè sí gbẹá Sọ́dòm ẽ, à gáẹ̀ beè di-di tẹlẹ̀ nieí. 24 Sõò, m̀ kọ́ọ̀ nèi kọọ̀ nú ea é nááaí ló Deè Bèèla Bel é aga bá èl nú ea é nááá ló Sọ́dòm.”

25 Kà lèlà tṍóá, Jíízọ̀s à gbóó kọọ̀: “M̀ leelà ni gbẹá kèsĩ́ dénè nen, e Tẹ̀, eo dúù Neń Ea Íe káála nè kunukẽ̀, boo béè kọọ̀ ò gṍò gbò nuí ló gbò e bà nyímá nu vaá ié tàvẹ̀nù, vaá tẹlẹ bàlà kẽ nè gbò pá nvín. 26 Mm̀ kà-kà, Tẹ̀, níì nú eo ténmàe. 27 Ńdáà Tẹ̀ a ném kọ̀láá kà nu. Tọ́ọ̀ nen náa palàge nyimá ló nda èlmà ńdáà Tẹ̀, vaá tọ́ọ̀ nen náa palàge nyimá ló ńdáà Tẹ̀ èlmà nda, nè kọ̀láá nen ea tan nda gè naa kọ á nyimáe ló. 28 Dénè boolo e tóm ni ḿ-mái vaá tò a bã́í men, dui, mè nda é náa kọ ó iei bõ̀séi. 29 Dui gé zọḿ mi siai tóm vaá ò nói nu lọlím mí ló, boo béè kọọ̀ m̀ dúù nen gbọ́ọ́-gbọọ̀ ló nè neǹ kìlmà kpáló kẽ. Tṍóá, ò é gbóó iei bõ̀séi. 30 Boo béè kọọ̀ nà tóm náa tavàlà, vaá nà tò à valí.”