Lé Kpẹ̀a E Máátìù Beè Emí

10 Jíízọ̀s beè gbóó kolí 12 neń e bà ólò nyoonée nvée, vaá nè va kpóó gè lẹ̀ẹ̀mà bel ló zọ kọbé bà láá kpó zọ lọl mm̀ nen vaá bó kọ̀láá íb zọ̀ló nè bo.

2 Béè 12 kà gbò tómá kọlà: Sáímòn e bà ólò kolí náe gé Pítà nè a vígà Ándrù, Jém̀z nvín Zẹ́bidì nè a vígà Jṍòn, 3 Fílìp nè Bàtòlómìù, Tómòs nè Máátìù neǹ lọ̀l kpègè gbáá, Jém̀z nvín Àlfíọ̀s, nè Tádìọ̀s, 4 Sáímòn ea íe bẹ̀à sã́ bùlà* nè Júdàs Ìskáriọ̀t ea beè oo Jíízọ̀s tṍó e tṍó téníá.

5 A beè lẹ̀ẹ̀là 12 nená vaá ãané va kọọ̀: “Ó gá kọi kpẹ̀a nei gbò e bè níì pá Júù nì, vaá ó gá bãí tọ́ọ̀ kà boń ea di Sàmérìà, 6 tãa vó, ò síi ló pá Ízrẹẹ̀l e bà bélí naanà ból ea beè kyã̀à pèa. 7 Tṍó eo gé aalii, veelii kọọ̀: ‘Boǹ Méné Bàrì a íná kuló.’ 8 Boi gbò e kpáló va zọ, kẽeei gbò e ba beè ù, boi gbò e kom̀ kulè di ló, vaá ò kpói zọ lọlíí mm̀ nen. O beè iei pọ́ì, nei pọ́ì. 9 Ó gá tui nóò kpé àbèè ẹ́ẹ́ kpé àbèè gbébílí nveeníí mm̀ bọọ bẹ̀lẹ̀ kpègè, 10 àbèè gyã́á eo é déi gbẹáí èèlè, àbèè kọ̀là ló gè nyaamá nu, àbèè kpá kátọ, àbèè gbṍí. Boo béè kọ à bọ́ló gè nè gyã́á neń ea gé sí tóm.

11 “Kọ̀làà kà pọ̀b bon àbèè ńkem̀ bon eo bãì, gbĩi neń ea é tú bàà bá tuumái vaá ò tõoníí kĩá dọ̀ọ̀mà tṍó eo é aalii. 12 Tṍó eo é bãí tọá, kanai moǹ gbò e bà di tọá. 13 Beè gbò e bà di tọá tú lé bá tuumái, fẹ́ẹ́-fẹẹ̀ ló ea dú ló bọọ kànà mòn kól á dì vá ló, sõò be bà náa tú lé bá tuumái, bọọ fẹ́ẹ́-fẹẹ̀ ló á zọ̀i àà. 14 Kọ̀láá kĩée eo ínàì váá bà náa túi àbèè ge pãane tṍ ló moǹ bel eo fáàlàì domai, tṍó eo é aalíí tọá àbèè boná, kpalai sãa lọaí kè kátọ. 15 M̀ lóò kà-kà bel nèi kọọ̀, nú ea é nááá ló boná Deè Bèèla Bel é aga bá èl nú ea é nááá ló Sọ́dòm nè Gòmórà.

16 “Nda lẹẹlài belí gbò naanà ból e bà lẹẹlà tẹlẹ zẹ̀ẹ̀ gbò kpọ́í. Vó à naa, iei ọ̀ẹ̀ dẽe belii naanà vaá ò dúi gbọ́ọ́-gbọọ̀ ló belii kú-kuú kẽ. 17 Iei ọ̀ẹ̀ dẽe ló gbò nen boo béè kọọ̀ bà é túi nvee tọ bèèla vaá bòmii gbẹá mm̀ ba gbò tọ bõ̀ònaló fã̀. 18 Bà é fáálái siimá kèsĩ́ gbò e bà gé bẹl nè ba gbò méné boo béè nda, vaá níí é náa kọ ó iei nèà deè ge kọi kpẹ̀a neí va, bií ló gbò dó àla. 19 Sõò tṍó e bà sííi, ó gá iei tã̀àgã̀ bùlà ea kil ló bá eo é lóomai bel àbèè bel eo é lói, boo béè kọọ̀ ò é nyímai nu gè kọ́ kà lèlà tṍóá; 20 boo béè kọọ̀ níì boolo ní eo gé lói belé nì, sõò nyómá bọọ Tẹ̀ ní ea gé ló bel tenmáí gã́é. 21 Nagé, vígà é téní ló a vígà nvee bá gbò e bà é fẹ́ẹ, vaá tẹ̀ é náa nagé vó a nvín, vaá gbò pá nvín é lọl togó kèbá ba tẹ̀ nè ba kà vaá tení vá ló nvee bá gbò e bà é fẹ́ va. 22 Dénè nen é ọ́bvíi boo béè ńdáà bée, sõò neń ea ĩimà tẹlẹ ke kùbmà ní ea é duuà ẹ. 23 Tṍó e bà bíìgèi ló gbẹá ene kà bon, teelai kilíí ńdõona kà; boo béè kọ m̀ lóò kà-kà bel nèi kọọ̀, nóo é láá kọi kpẹ̀a inmaí dénè bon ea di Ízrẹẹ̀l besĩ́ Sã́áná nená kálá dù.

24 “Neń ea gé nó nu náa bọọ èl a neǹ dòbá, àbèè kọọ̀ gyóòlo bọọ èl a tẹ̀ tọ. 25 Neń ea gé nó nu é láá belí a neǹ dòbá, vaá gyóòlo é láá belí a tẹ̀ tọ. Be ba beè kolí tẹ̀ tọá kolíe Bìẹ́lzẹbọ̀b, à é náa và bà náa é kólí nágé pá tọá kolíe vó é? 26 Pọ̀ á gá siíi lóó va, boo béè kọọ̀ kọ̀láá kà nú e bà kọl, bà é beè kọ̀ọ̀là, vaá kọ̀láá kà nú ea di ke gũ̀a, é beè dọ bàlà kẽ. 27 Nú em kọ́ọ̀ nè áá booloí, kọi nei dénè nen, vaá ò élaí boo tọ veelii bel em sáàgà nèií. 28 Ó gá siiai pọ̀ ló gbò e bà é láá fẹ́ bọọ nom̀ kpáló, sõò bà náa é láá kyọ̀sĩ́ bọọ dùm;* tãa vó, siiai pọ̀ ló neń ea é láá kyọ̀sĩ́ bọọ nom̀ kpáló nè bọọ dùm gbẹá mm̀ Gẹ̀hénà.* 29 Ò é láá oo bàà kà ńgá kṍò ló ene kà kpọ́gọ́lọ́ kpègè e bè á gé ló tọ́ọ̀ nu, sẹ̀ níì vó nì ẽ? Sõò enè ọ̀và náa é dọ́ kẽ e bọọ Tẹ̀ náa é nyímá. 30 Sõò Bàrì nyímá bã̀àna gã́bug paà gyáa ea dìí togó. 31 Vó à naa, pọ̀ á gá siíi boo béè kọọ̀ ka di ló boolo èl gã́bug ńgá kṍò.

32 “Kọ̀láá neń ea náa kọọ̀ gbò nen á nyimá kọ à gé nyoonèè nvéè nda, nda é náa nagé kọọ̀ ńdáà Tẹ̀ ea di káála á nyimá kọ à gé nyooném nvée. 33 Sõò kọ̀láá neń ea amàm sàn gbẹá kèsĩ́ gbò nen, nda é amà nàe gé sàn gbẹá kèsĩ́ ńdáà Tẹ̀ ea di káála. 34 Ó gá iei bùlà kọọ̀ m beè dú ló gè domà fẹ́ẹ́-fẹẹ̀ ló boo kunukẽ̀í. Ním beè dú ló gè nvèè fẹ́ẹ́-fẹẹ̀ ló, sõò m beè dú ló gè nvèè pò-pòòà.* 35 Boo béè kọ m beè dú ló gè tú pò-pòòà tẹlẹ zẹ̀ẹ̀ nvín págbálà nè a tẹ̀, nè zẹ̀ẹ̀ nvín pábia nè a kà, nè zẹ̀ẹ̀ va nè a kà dóm. 36 Mm̀ kà-kà, neǹ ọ́b nen é dú neń e bà dú tẽ̀ènè kà tọ. 37 Kọ̀láá neń ea vulè a tẹ̀ àbèè a kà èlmà nda náa bọ́ló gè nyooném nvée. Vaá kọ̀láá neń ea vulè a nvín págbálà àbèè a nvín pábia èlmà nda náa bọ́ló gè nyooném nvée. 38 Kọ̀láá neń e bè á gé kpènà ló gè dàlà a té tã̀àgã̀* vaá nyooném nvée náa bọ́ló gè nyooném nvée. 39 Kọ̀láá neń ea gbĩ́ gè kpènà a dùm é pee, sõò kọ̀láá neń ea pee a dùm boo béè ndà, é íe dùm.

40 “Kọ̀láá neń ea túi tú nágé nda, vaá kọ̀láá neń ea tú nda tú nágé neń ea beè lẹ̀ẹ̀làm. 41 Kọ̀láá neń ea tú neǹ kọ́ọ̀ bùlà Bàrì boo béè kọọ̀ ẹ̀ẹ̀ neǹ kọ́ọ̀ bùlà Bàrì é íe kpẽ́ e neǹ kọ́ọ̀ bùlà Bàrì ólò ié, vaá kọ̀láá neń ea tú neǹ lé lab dògò boo béè kọọ̀ ẹ̀ẹ̀ neǹ lé lab dògò é íe kpẽ́ e neǹ lé lab dògò ólò ié. 42 Nda lóò kà-kà bel nèi kọọ̀, kọ̀láá neń ea dõo kọbèè enè tóm gbàág tọ́ọ̀ múú nè enè neń ea di zẹ̀ẹ̀ gbò e bà kil kẽí kọ á õ̀ boo béè kọọ̀ à ólò nyooném nvée, é íe a kpẽ́.”