Lé Kpẹ̀a E Máàk Beè Emí

13 Boo tṍó ea géè aa boo beè tọọ̀ káíá àà, enè neń ea ólò nyoonée nvée beè kọ́ nèe kọọ̀: “Neǹ Dòbá, ẹ̀b bé e gbò kpò demí nè gbò tọí dú lé naaà!” 2 Sõò Jíízọ̀s à gbóó kọ́ nèe kọọ̀: “Ò monì gé gbele-gbele tọí? Tọ́ọ̀ kà kpò dem náa é sígá èla e bà náa é kúmí uú kẽ.”

3 Boo tṍó ea di ĩ́ìtẽ́ boo Gù Ólìv, kĩée ea é láá tõo mòn tọọ̀ káíá, Pítà, Jém̀z, Jṍòn, nè Ándrù beè gbóó síé ló kĩée e áá ẹ̀ẹ̀ dì gé bĩináe kọọ̀: 4 “Kọ́ nèi, mó tṍó ní e gbò nuí é nááá ẽ́, vaá éé ní ea dú kpíi ea é zógè tṍó e kùbmà é bã́ ló dénè gbò nuí ẽ́?” 5 Jíízọ̀s à gbóó dààmà togó gè kọ́ nè va kọọ̀: “Ọẹi dẽe kọbé tọ́ọ̀ nen náa dagẹ̀i. 6 Gã́bug nen é dú boo ńdáà bée vaá kọọ̀, ‘Ndaà é nená ẽ́,’ vaá bà é dagẹ̀ gã́bug nen. 7 Gbáló vó, tṍó eo dã́ì kọ̀và bé gím ea aa kuló nè kpẹ̀a bé gím ea aa kpã́á, pọ̀ á gá siíi boo béè kọọ̀ gbò nuí é íè ge naaá. Sõò à gáà lee tṍó e kùbmà é dú.

8 “Boo béè kọọ̀ dó é bé dó, vaá boǹ méné bé boǹ méné. Zùgà kunukẽ̀ é nááá kele-kele ketõ̀ò vaá kíì gyã́á é di nàgé. Dénè nuí dú dààà togó mòn tã̀àgã̀, di belí tṍó e gbàà nvín zọ pábia.

9 “Sõò boolo iei ọ̀ẹ̀ dẽe. Gbò nen é túi nvee tọ bèèla vaá bòmii gbẹá mm̀ ba gbò tọ bõ̀ònaló fã̀, vaá bà é túi ele kèsĩ́ gbò e bà gé bẹl nè gbò méné boo béè ńdáà bée, vaá níí é náa kọ ó iei nèà deè ge kọi kpẹ̀a neí va. 10 Nagé, bà é zẹ́ẹ́ vee lé kpẹ̀aí inmá kọ̀láá kà dó. 11 Tṍó e bà sííi nvee bá gbò e bà gé bẹl, ó gá iei tã̀àgã̀ bùlà ea kil ló nú eo é kọ́i. Sõò kọi kọ̀láá kà nú e nyómá káí kẽeí nyíe tṍóá, boo béè kọọ̀ níì boolo ní eo gé lói belé nì, sõò nyómá káí ní ea gé ló é. 12 Nagé, vígà é téní ló a vígà nvee bá gbò e bà é fẹ́ẹ, vaá tẹ̀ é náa nagé vó a nvín, vaá nvín é náa uú boo a tẹ̀ nè a kà vaá tení vá ló nvee bá ú. 13 Dénè nen é ọ́bvíi boo béè nda, sõò neń ea ĩimà tẹlẹ ke kùbmà ní ea é duuà ẹ.

14 “Tṍó eo monìì nuù kẹ́ẹ ea ólò kyọ̀sĩ́ nu, ea élá kĩée e náa bọ́ló kọ á elá (neń ea gé bugi á tú tàvẹ̀nù bùgmà). Tṍóá, gbò e bà di Jùdíà á gbóó dààmà togó gè teelá kil deè boo gù. 15 Neń ea di boo a tọ á gá dọ̀ na kẽ àbèè ge bàna mm̀ a tọ kọ à é túè nu, 16 vaá neń ea di boo bàlà ól á gá òòà nà si ná be gé tú a pọ̀b kọ̀là ló. 17 Pọ́lọ́ múú kyáá á di ló gbò e nvín di gbàà nè gbò e bà gé ne má nvín mm̀ gbò tṍóá! 18 Kilíí sĩ́ gè tãagãi ló Bàrì kọ á gá naaá tṍó tọ́ọ, 19 boo béè kọọ̀ tã̀àgã̀ ea é nááá tṍóá gáà naaá lọ̀l gé tṍó e Bàrì beè dààmà togó gè dèm nu dọ̀ọ̀mà tṍóá, vaá náa é kpáá naaá tṍó ea ni nááá lọ̀l. 20 Mm̀ kà-kà, be Jìhóvà* náa beè fùl gã́bug deeá naamá ńkpulu, tọ́ọ̀ nen náa gáẹ̀ beè dùùà. Sõò boo béè gbò ea beè sà, a beè fùl gã́bug deeá naamá ńkpulu.

21 “Tṍóá, beè nen kọ́ nèi kọọ̀, ‘Ẹbvii! Kráìst di kĩí,’ àbèè kọọ̀, ‘Ẹbvii! À di kĩí-ìla,’ ó gá zigai. 22 Boo béè kọọ̀ gbò e bà kpọ́ kyáá kọọ̀ baalaà Kráìst nè gbò e bà kpọ́ kyáá kọọ̀ baalaà gbò kọ́ọ̀ bùlà Bàrì é beè dù, vaá bà é sígági tóm dũ̀ùnè boo béè ge kẹlẹ gbò nen, vaá be à válí bà é kẹlẹ gbò e Bàrì beè sà. 23 Vó à naa, ọẹi dẽe. M̀ túù tṍó gbẹẹ́ sĩ́ kọ́ dénè nuí nèi.

24 “Sõò mm̀ gbò deeá, tṍó e tã̀àgã̀á ni nááá lọ̀l, nàànì é gbóó kuu gín, ẽ́ náa é ne nà a ẹ́ẹ́ dee, 25 gyã́à káála é kalà aa sĩ́dee, vaá gbò nú ea di sĩ́ káála é zugà. 26 Tṍóá, bà é gbóó mòn Sã́áná nená ea di boo bù dee ea gé dú, vaá à é fáálá kpóó nè ka domá. 27 Tṍóá, à é lẹẹlà gbò nyómá tóm vaá bà é bṍònè ló gbò ea beè sà lọl ténì gá ea di ló bàlà booí, lọl dààmà togò bàlà booí tẹlẹ kĩée e káála íná elá.

28 “Noi nu lọlíí ló té fíìg. Kọ̀láá tṍó eo monìì kọ a gbónó a tẹg vaá kpáá sí pà sãa, ò ólò gbóó nyimai kọọ̀ tṍó e nu ólò dùm a íná kuló. 29 Mm̀ tẽ̀ènè sĩ́deèá, tṍó eo monìì kọọ̀ gbò nuí dì ea gé nááá, gbóó nyimai kọọ̀ Sã́áná nená a íná kuló. 30 Nda lóò kà-kà bel nèi kọọ̀, nakà kúúlíí náa é téní tà tṍó e dénè nuí é nááá. 31 Káála nè kunukẽ̀ é téní tà, sõò gbò bel e nda lóò é di dọ̀ọ̀mà dè-dè.

32 “Kilma ló deeá àbèè tṍóá, tọ́ọ̀ nen náa nyímá, bã̀àna gbò nyómá tóm e bà di káála àbèè nda Sã́áná, sõò ńdáà Tẹ̀ ní ea nyímá ẽ́. 33 Kilíí sĩ́ gè kuai dẽe ló vaá ò kilíí sĩ́ gè dií zìle, boo béè kọ nóo nyímàì tṍó e tṍó e Bàrì beè íbá lóá é lée. 34 À bélí ene kà gbálà ea aà sí kpã́á deè kyẽè vaá tú kpóó lẹ̀ẹ̀là bel nè pá a gyóòlo kọ buù ọ̀và á siimá tóm ea kuú va. À gbóó kọ́ nè neǹ kùdẽe ló kọ á kilsĩ́ gè kùdẽe ló. 35 Vó à naa, kilíí sĩ́ gè kuai dẽe ló boo béè kọọ̀ nóo nyímàì tṍó e tẹ̀ íè tọá é dú. Sẹ̀ à é dú ló èlà àbèè taa tóm dáá àbèè tṍó e dee gáà zìlà àbèè kà bòm deeà, nóo nyímàì, 36 kọbé be à búló dù, náa dú tṍó eo dií dáá. 37 Bel em kọ́ọ̀ nèií, m̀ kọ́ nàgé nè dénè nen kọọ̀: Kilíí sĩ́ gè kuai dẽe ló.”