Lé Kpẹ̀a E Máàk Beè Emí
2 Náa kal ló béè vó, tṍó e sìgà dee ni téní, a beè gbóó kpáá òòà sí Kàpánìòm, vaá kpẹ̀a ea kilíé ló beè zààlà iná dénè ketõ̀ò kọ a íná be. 2 Vó beè naa kọọ̀ gbò nen á m-má tọá bã dénè ketõ̀ò, bã̀àna gã́ nùtọ, vaá a beè gbóó dààmà togó gè ló moǹ bel Bàrì nè va. 3 Ténì nen beè dàlà ene kà gbálà e báàsĩ́e ọọ* domáé ló. 4 Sõò bà náa beè láá túe inmá ló Jíízọ̀s boo béè gã́bug nen ea beè di tọá. Vó beè naa kọ bà á sòòlà boo tọá tẹlẹ kà lèlà kĩée e Jíízọ̀s dì, vaá dàlà váì kpàì e gbálàa di booá tenmá kĩá tẹlẹ̀ẹ́ ló. 5 Tṍó e Jíízọ̀s mon bé e bà íe zìgà naa, à gbóó kọ́ nè nen e báàsĩ́e ọọá kọọ̀: “Nà nvín, m ia ló o pọ́lọ́ nè ni.” 6 Tṍóá, sìgà gbò émì kpá e ba beè di ĩ́ìtẽ́ kĩá à gbóó bugi togó kọọ̀: 7 “Éé ní ea náa vaá gbálàí gé ló bel naaí ẽ́? À gé on Bàrì. É kọ à íe neń ea é láá ia ló pọ́lọ́ daalá lọl ló Bàrì?” 8 Sõò Jíízọ̀s beè gbẹá boo nyimá nú e bà gé bugi togó boo. À gbóó kọ́ nè va kọọ̀: “Éé ní ea náa vaá ò gé bugii togó naanii vóí é? 9 Mókà ea di gbàà ní ea válí é? É kọọ̀ ge kọ́ nè neń e báàsĩ́e ọọí kọọ̀, ‘M ia ló o pọ́lọ́ nè ni,’ sẹ̀ ge kọọ̀, ‘Tú o váì kpàì vaá ò aa boo kyã̀à ẽ’? 10 Sõò kọbé ò nyímai kọọ̀ Sã́áná nená íe kpóó gè ia ló pọ́lọ́ nè gbò nen—” à gbóó kọ́ nè neń e báàsĩ́e ọọá kọọ̀: 11 “Aa boo, tú o váì kpàì, vaá ò aà kil be.” 12 Tẽ̀ènè tṍóá, a gbóó aa boo tú a váì kpàì vaá kyã̀à aa kèsĩ́ dénè gbòa. A beè palàge bọọ́ ló dénè gbòa naa ní e bà leelà Bàrì kọọ̀: “Beele gáà mòn íb nu ea náaí tọ́ọ̀ dee.”
13 A beè kpáá àà kil gã́ Pène Gálilì vaá gã́bug nen beè dúé ló. À gbóó dààmà togó gè noomà va nu. 14 Tṍó ea di boo èèlè ea gé kyãà, a beè mòn Lívaì ea dú nvín Àlfíọ̀s ea di ĩ́ìtẽ́ tọ gbò lọ̀l kpègè gbáá. À gbóó kọ́ nèe kọọ̀: “Nyooném nvée.” Tẽ̀ènè tṍóá, à gbóó aa boo nyoonée. 15 Tṍó e tṍó téní e Jíízọ̀s nè pá a gbò nyòòne nvée di tọọ̀ Lívaì e bà gé dé gyã́á, gã́bug gbò lọ̀l kpègè gbáá nè gbò náàkyọ̀ beè gbóó dù gé zọ̀ va de nágé, boo béè kọọ̀ gã́bug ọ̀và géè bììàẹ́ nvée. 16 Sõò tṍó e gbò émì kpá pá Fárìsíì mon kọ à gé zọ gbò náàkyọ̀ nè gbò lọ̀l kpègè gbáá deá gyã́á, bà gbóó bĩiná pá a gbò nyòòne nvée kọọ̀: “Éé ní ea náa vaá à zọ̀ gbò lọ̀l kpègè gbáá nè gbò náàkyọ̀ deá gyã́á ẽ́?” 17 Tṍó e Jíízọ̀s dã́ naa vó, à gbóó kọ́ nè va kọọ̀: “Gbò válá ló náa íe bíi ló neǹ dóm biè, sõò gbò e lóó va zọ ní e bà íée bíi ló é. M beè dú ló gè kolí gbò náàkyọ̀, níì gbò lé lab dògò nì.”
18 Gbò e bà ólò nyoone nvéè Jṍòn nè pá Fárìsíì ólò ká gã́. Vó à naa, bà gbóó dù gé bĩináe kọọ̀: “Éé ní ea náa vaá beele nè gbò e bà ólò nyoone nvéè pá Fárìsíì ólò ká gã́, sõò pá ńlóò gbò nyòòne nvée náa ólò ká gã́ ẽ́?” 19 Jíízọ̀s à aalá nè va kọọ̀: “É kọọ̀ pá kóò nen ea gé ílí va íe bíi ló gè ká gã́ tṍó e nen ea gé ilí vaá dì vá ló? Náa bọ́ló kọ bà á ká gã́ tṍó e nen ea gé ílí vaá di-dí vá ló. 20 Sõò tṍó gé dú e bà é tú neń ea gé ílí vaá lọ̀l vá ló ààmà. Tṍóá, bà é gbóó ká gã́. 21 Tọ́ọ̀ nen náa ólò tú ãa báà nu gbá dẽè nómá pọ̀b kọ̀là ló, boo béè kọọ̀ be à náa vó, nómá báà nuá é zọọà aa dẽè ãa báà nuá, vaá à gbóó kpáá bààlà èl bé ea beè dì naa. 22 Nagé, tọ́ọ̀ nen náa ólò tú ãa míí tṍ mm̀ nómá bẹ̀lẹ̀ míí e bà tú kpá nom naamá. Beè nen náa vó, mííá é pómè bẹ̀lẹ̀a vaá mííá nè bẹ̀lẹ̀a gbá pè. Sõò bà ólò tú ãa míí tṍ mm̀ ãa bẹ̀lẹ̀ e bà tú kpá nom naamá.”
23 Enè Deè Bõ̀séi, Jíízọ̀s géè kyã̀à tení boo bàlà ól e ba beè fó nu. Pá a gbò nyòòne nvée à gbóó dààmà togó gè kã̀ànà nu taa. 24 Vó à naa, pá Fárìsíì à gbóó bĩináe kọọ̀: “Éé ní ea náa pá o gbò nyòòne nvée gé náa nú e log náa ténmá kọ bà á naá Deè Bõ̀séi é?” 25 À aalá nè va kọọ̀: “É kọọ̀ ò gáà beè bugii nú e Dévìd beè naa tṍó e bíi beè dìé ló, nè tṍó e tákói beè tá ló gbò e ba beè dìé lóá nè ẹ̀ẹ̀? 26 É kọ ò gáà beè bugii nòòtẽ́ ea kil ló Àbáíetà ea dú togó gbò vààla gyọ́ọ kọọ̀, Dévìd beè bã tọọ̀ Bàrì dé fétúlú e ba beè nè Bàrì, vaá tú sìgà nè gbò e ba beè dìé ló, ea dú nú e log beè tenmá kọọ̀ áá gbò vààla gyọ́ọ ní e bà á dèe?” 27 À gbóó kpáá kọ́ nè va kọọ̀: “Bàrì beè naa Deè Bõ̀séi boo béè gbò nen. Náa beè dèm gbò nen boo béè ge sẹlẹ Deè Bõ̀séi. 28 Vó à naa, Sã́áná nená ní ea gé lẹẹlà nàgé bel ló Deè Bõ̀séi é.”