Tóm Gbò E Jíízọ̀s Beè Lẹ̀ẹ̀là

25 Vó à naa, tṍó e Fẹ́stọ̀s ni íná bálásĩ́ kĩá vaá dààmà togó gè bẹ̀l, a beè gbóó aa Sìzàríà sí Jèrúselẹ̀m tṍó e taà dee ni téní. 2 Gbò togó vààla gyọ́ọ nè gbò gbálà e bà dú Júù e bà íe pọ̀b dọ̀ beè gbóó ló bel ea kil ló Pọ́ọ̀l nèe. Vó beè naa kọ bà á bàn Fẹ́stọ̀s 3 kọ á nveenìè bá neè va vaá kọ bà á lẹ̀ẹ̀là Pọ́ọ̀l domá Jèrúselẹ̀m. Sõò bà géè noo gè gũá fẹ́ Pọ́ọ̀l gbẹá èèlè. 4 Sõò Fẹ́stọ̀s beè aalá kọọ̀ Pọ́ọ̀l é gbẹá Sìzàríà vaá ẹlẹ é beè gé ooàẹ̀ kẽ kilìè kĩá ńkem̀ deeá àla. 5 À gbóó kọọ̀: “Kọ̀láá nen ea íe pọ̀b dọ̀ ea dìí zẹ̀ẹ̀ á nyooném gé lóe bel ló, be à dú kà-kà kọ à íe pọ́lọ́ e gbálàá beè sì.”

6 Tṍó ea ni tú nú ea é láá dú aatáà dee àbèè òb dee tõ̀òmà vá ló, à gbóó àà kil Sìzàríà, vaá deé ea bẽene, à gbóó ĩìtẽ́ boo a kpòté bèèla bel vaá kọ bà á tú Pọ́ọ̀l domá. 7 Tṍó e Pọ́ọ̀l dú, pá Júù e bà aa Jèrúselẹ̀m beè gbóó kpẽá beeáẹ́ ló vaá gbàẹ gã́bug agẹ bá bel e bà náa beè láá zogè tẹlẹ bàlà kẽ kọ à dú kà-kà.

8 Sõò Pọ́ọ̀l beè gbóó ló bel mm̀ gè kpènà a bá kọọ̀: “M̀ gáà sí tọ́ọ̀ kà pọ́lọ́ uú boo Log pá Júù àbèè tọọ̀ káí àbèè Sízà.” 9 Boo béè kọọ̀ Fẹ́stọ̀s géè gbĩ́ gè naa nú ea é léémá pá Júù, à gbóó kọ́ nè Pọ́ọ̀l kọọ̀: “É kọ à é léémá ni kọ ḿ tú ni kilma Jèrúselẹ̀m gé beelá ni bel ló boo béè gbò bel e bà ló ní lóí?” 10 Sõò Pọ́ọ̀l à kọọ̀: “M̀ di élá kèsĩ́ kpòté meńe bèèla bel Sízà, ea dú kĩée ea bọ́ló kọ bà á beelám bel ló gbẹá. M̀ gáà si tọ́ọ̀ kà pọ́lọ́ pá Júù, dì belí bé e olo palàge nyimá naa. 11 Ním banì kọ bà á gá fẹ́m be à íe pọ́lọ́ em beè sì ea bĩ́íná kọ bà á fẹ́m. Sõò beè gbò bel e bà lóm lóí náa dú kà-kà, tọ́ọ̀ nen náa é láá túm lọa bá nèva, boo béè ge naa nú ea é léémá va. M̀ zálì kpá ló belí má Sízà!” 12 Tṍó e Fẹ́stọ̀s ni zọ gbò e bà ólò nèe dùùlà bá deè tṍ loá bel lọ̀l, à gbóó kọọ̀: “Ò zálì kpá ló o bel má Sízà, vó à naa, èé tú ni má Sízà.”

13 Tṍó e sìgà dee ni téní, Méné Àgrípà nè Bèníìs beè gbóó dú Sìzàríà gé kãa Fẹ́stọ̀s. 14 Tã́gíní bé e bà é tú gã́bug dee tõ̀òma kĩáá, Fẹ́stọ̀s beè gbóó nootẽ́ nú ea kil ló Pọ́ọ̀l nè ménéá kọọ̀:

“À íe ene kà gbálà e Fílìx beè sọ̀ẹ bá gbẹẹ́ tọọ̀ kpọ́gọ́lọ́, 15 vaá tṍó em beè di Jèrúselẹ̀m, gbò togó vààla gyọ́ọ nè gbò kàneǹ pá Júù beè kọ́ nú ea kilíé ló nèm, vaá kọ ḿ beelá bel bẽèe. 16 Sõò m beè aalá nèva kọọ̀ log ea gé bẹl Róm̀ náa sọtọ́ deè kọ é dõogẽ beelá bel bẽè nen boo béè ge naa nú ea é léémá gbò nen dọ̀ọ̀mà tṍó e gbò e ba beè lóe bel lóá nè ẹ̀ẹ̀ é monà, vaá à ló bel mm̀ ge kpènà a bá kilma ló bel e bà lóé lóá. 17 Boo béè vó, tṍó e bà íná kĩí, ním beè pee tṍó, tãa vó, deé ea bẽene, m beè ĩìtẽ́ boo kpòté bèèla bel vaá kọ bà á tú gbálàá domá. 18 Gbò e bà géè gbàẹ belá beè elá èla ló bel, sõò bà náa beè kọ́ tọ́ọ̀ kà pọ́lọ́ nú em géè ẹ̀bmà dẽe gè dã́ kìlmàé ló. 19 Tãa vó, áá nú e bà géè dùlà bel boo dú nú ea kil ló bé e baala ólò fã̀ báálà Bàrì naa nè nú ea kil ló ene kà gbálà ea kọlà Jíízọ̀s ea beè ù, sõò Pọ́ọ̀l kilsĩ́ gè kọ à di dùm. 20 Tṍó e ním nyímà bé em gá síi bá ló dùlà belí naa, m beè gbóó bĩináe be à é léémáe kọ ḿ faalá belí kilma Jèrúselẹ̀m gé beelá. 21 Sõò tṍó e Pọ́ọ̀l zálí kpá ló belí kọ bà á tuèe gbẹẹlìè tọọ̀ kpọ́gọ́lọ́ dọ̀ọ̀mà tṍó e Sízà* é ne a béèlàfùl, m beè gbóó kọ bà á túe gbẹẹ dọ̀ọ̀mà tṍó em é lẹẹlàẹ má Sízà.”

22 Tṍóá, Àgrípà à gbóó kọ́ nè Fẹ́stọ̀s kọọ̀: “À é léémá nda gè dã́ bel gã́ gbálàá.” Fẹ́stọ̀s à kọọ̀, “Ò é dã́e bel gã́ sṍóeá boo.” 23 Deé ea bẽene, Àgrípà nè Bèníìs beè gbóó ẽegã́ bã kĩée e bà ólò tõo beelá belá. Ba beè faalá gbò pọ̀b neǹ bé nè gbò e bà íe pọ̀b dọ̀ e bà di boná bììa ló. Tṍó e Fẹ́stọ̀s kọ́ bà á gé tú Pọ́ọ̀l domá, bà gbóó túe domá. 24 Fẹ́stọ̀s à gbóó kọọ̀: “Méné Àgrípà nè dénè boólo eo dií kĩí, neenii gbálà e dénè pá Júù beè lóe bel ló nèm gbẹá Jèrúselẹ̀m nè gbẹá kĩí, vaá vulí kpã́ kọọ̀ náa bọ́ló gè tõoná dùmí. 25 Sõò nda monì kọ à gáà naa tọ́ọ̀ kà nú ea bĩ́íná kọ bà á fẹ́ẹ. Vó à naa, tṍó e gbálàí zálí kpá ló a bel má Sízà,* m beè gbóó beeláfùl ge túe máe. 26 Sõò ním nyímà nú em é émí kìlmàé ló má Nen Ea Íém. Vó à naa, m̀ túùe domá kèsĩ́ dénè bọ̀ì, èlmà tõ̀ò oló Méné Àgrípà, kọbé tṍó eo ni dã́e bel gã́ lọ̀l, m̀ láá ié nú em é émí kìlmàé ló. 27 Boo béè kọ à tõó ló nda belí kọọ̀ náa dú nú e nyìmànù di m ge lẹ̀ẹ̀là nen lọl tọọ̀ kpọ́gọ́lọ́ máe e ním kọọ̀ gbò pọ́lọ́ e bà kọ́ à sí.”