Tóm Gbò E Jíízọ̀s Beè Lẹ̀ẹ̀là
22 “Pá nà vígà nè pá ndáà tẹ̀, pãanei tṍ, mè m̀ é kọ́ nú ea beè naaá nèi.” 2 Tṍó e bà dã́ ea gé tú dém bel Híbrù loomá bel nèva, bà gbóó kpáá palàge pĩigã́. À gbóó kọọ̀: 3 “Ndaà neǹ Júù vaá m beè mèà gbẹá Tásọ̀s, ea di Sìlísìà, sõò m beè sí tọọ̀ kpá gbẹá boní, vaá Gàmélìẹ̀l ní ea beè noomàm nu ẽ́. A beè palàge noomàm dénè nú ea kil ló Log bẹẹ gbò nómá tẹ̀, vaá m̀ ólò tú gè fã̀ Bàrì kolmá nu dì belí bé e dénè bọ̀ì eo dií kĩí nieí ólò naaá. 4 M beè biigè ló gbò e bà ólò kyãa boo Èèlèí vaá fẹ́ va. M beè olòó sii gbò gbálà nè gbò bia vaá tú va nvee tọọ̀ kpọ́gọ́lọ́. 5 Pọ̀b neǹ vààla gyọ́ọ nè dénè gbò kàneǹ pá Júù é láá sí neǹ ditõ̀ò kilma ló. M beè tú kpá lẹ̀ẹ̀la tóm em é má gbò tùle pá Júù e bà di Dàmáskọ̀s lọ̀l vá bá, vaá m beè di èèlè em géè àà gé sii gbò e ba beè di kĩá kilma Jèrúselẹ̀m kọbé bà né va kpọ̀té.
6 “Sõò gbẹá èèlè em gé aà tṍó ea é láá dú fèèbe, em ni íná kuló Dàmáskọ̀s, mm̀ bùló, ẹ́ẹ́ dee beè gbóó mò aa káála beeá tením ló. 7 M beè gbóó dọ kunukẽ̀ vaá dã́ moń ea kọ́ nèm kọọ̀: ‘Sọ́ọ̀l, Sọ́ọ̀l, éé ní ea náa ò gé bíìgèm ló é?’ 8 Nda à aalá kọọ̀: ‘Oloò mée e Nen Ea Íém ẽ́?’ À kọ́ nèm kọọ̀: ‘Ndaà Jíízọ̀s ea dú Názarẹ̀t eo gé bíìgè ló á.’ 9 Gbò gbálà e ba beè dìḿ lóá beè mòn ẹ́ẹ́ deeá, sõò bà náa beè dã́ moǹ nen ea géè ló bel nèm ã́. 10 Tṍóá, m̀ gbóó bĩiná kọọ̀: ‘Éé ní em é náa e Nen Ea Íém ẽ́?’ Nen Ea Íém à kọ́ nèm kọọ̀: ‘Aa boo kil Dàmáskọ̀s, mè bà é kọ́ kọ̀láá kà nú e ba beè beeláfùl kọ ò é náa nè ni gbẹá kĩá.’ 11 Sõò boo béè kọọ̀ ẹ́ẹ́ deeá beè naa kọ ḿ gá láá mòn nu, gbò e ba beè dìḿ lóá beè siím bá ló kilma Dàmáskọ̀s.
12 “Tṍóá, ene kà gbálà ea kọlà Ànànáíàs ea ólò siiá pọ̀ ló Bàrì vaá naa nú e Log kọ́, vaá dénè pá Júù e bà di kĩá ólò ló lé bel ea kilíé ló 13 beè gbóó dúm ló. A beè elám ku kpàn vaá kọ́ nèm kọọ̀: ‘Ńdáà vígà Sọ́ọ̀l, gbóó mòn nu!’ Tẽ̀ènè tṍóá, m beè gbóó dàlà dẽé boo vaá mònie. 14 À gbóó kọọ̀: ‘Bàrì bẹẹ gbò nómá tẹ̀ a sá ni kọ ó nyimàè a bùlà, vaá naa kọ ó mòn neǹ lé lab dògò, nè ge dã́ bel ea aàẹ́ gã́, 15 boo béè kọọ̀ ò é sí neǹ ditõ̀ò kìlmàé ló vaá kọ́ gbò nú eo beè mòn vaá dã̀ nè kọ̀láá nen. 16 Éé ní eo gé kpáá pee tṍó ló é? Aa boo, dììa múú, vaá ò lógí o náàkyọ̀ lọa ló tení dú ló gè kolí a bée.’
17 “Sõò tṍó em ooà iná Jèrúselẹ̀m em gé tãàgã ló Bàrì gbẹá tọọ̀ káí, m beè gbóó mòà nuù dẽe 18 vaá mònie ea gé kọ́ nèm kọọ̀: ‘Vàlẹ̀ bá aa boo vaá ò aa Jèrúselẹ̀m, boo béè kọ bà náa é zigà nú eo gé kọ́ kìlmàḿ ló.’ 19 Vaá nda beè kọọ̀: ‘Nen Ea Íém, baala palàge nyimá kọọ̀ m̀ ólò bòm vaá sii gbò e bà zigà ni ló nvee tọọ̀ kpọ́gọ́lọ́ aa mm̀ ene kà tọ bõ̀ònaló fã̀ pá Júù dọ mm̀ ńdõona kà, 20 vaá tṍó e bà géè fẹ́ Stívìn, ea ólò sí neǹ ditõ̀ò kìlmà ní lóá, m beè di élá kĩá. M beè tenmá kọ bà á fẹ́ẹ vaá kùdẽe ló kọ̀là ló gbò e bà géè fẹ́ẹá.’ 21 Sõò a beè kọ́ nèm kọọ̀: ‘Àà, boo béè kọọ̀ nda é lẹẹlà ni kilma gbò dó ea di kpã́á deè.’”
22 Ba beè pãanée tṍ ló dọ̀ọ̀mà tṍó ea ló nakà belí. Tṍóá, bà gbóó vulí kpã́ kọọ̀: “Tui íb nakà gbálàí lọlíí boo kunukẽ̀í, boo béè kọ náa bọ́ló kọ á tõó dùm!” 23 Boo béè kọ bà géè vulí kpã́, tobvígi ba kọ̀là ló, vaá tobví sãa kilma gbàn deè, 24 pọ̀b neǹ béá à gbóó kọ bà á tú Pọ́ọ̀l domá mm̀ kĩée e gbò bé ólò tõoá vaá kọ bà á bòmie tṍó e bà gé bĩ́ínáe bel, kọbé à nyímàè kà lèlà nú ea náa vaá bà géè vulíe kpã́ ló naaá. 25 Sõò tṍó e ba ni bọ́bví Pọ́ọ̀l kọbé bà bomíe, à gbóó bĩiná neǹ togó gbò bé ea beè di élá kĩá kọọ̀: “É kọọ̀ log ténmá kọ ó bòm nvín sãà Róm̀ e bà gáà beeláẹ bel ló?” 26 Tṍó e neǹ togó gbò béá dã́ naa vó, à gbóó àà gé bĩiná pọ̀b neǹ béá kọọ̀: “Éé ní eo gbĩ́ gè naa ẽ́? Gbálàíì nvín sãà Róm̀.” 27 Vó à naa, pọ̀b neǹ béá à gbóó síé ló gé bĩináe kọọ̀: “Kọ́ nèm, é kọ oloò nvín sãà Róm̀?” À aalá naa “Ẽei.” 28 Pọ̀b neǹ béá à kọọ̀: “Nda beè kpẽ́ gã́bug kpègè kọbé m̀ kalá dú nvín sãa.” Pọ́ọ̀l à kọ́ nèe kọọ̀: “Sõò nda beè mèà dú nvín sãa.”
29 Tẽ̀ènè tṍóá, gbò e bà gáẹ̀ gé bòmie tṍó e bà gé bĩináe belá à gbóó kpõ̀òà ààẹ́ ló kil nvée. Pọ̀ à gbóó sii pọ̀b neǹ béá tṍó ea nyímá kọọ̀ ẹ̀ẹ̀ nvín sãà Róm̀, vaá a beè tuè gẹ́l kpọ́gọ́lọ́ bọbmàèe.
30 Boo béè kọ à géè gbĩ́ gè nyimá pọ́lọ́ e pá Júù kọọ̀ Pọ́ọ̀l sí, deé ea bẽene, à gbóó sọ̀ẹ bá vaá kolí gbò togó vààla gyọ́ọ nè dénè gbò e bà ólò beelá bel gbẹá Pọ̀b Tọ Bèèlaà Pá Júù bõonè. À gbóó kolí Pọ́ọ̀l domá gé elè vá zẹ̀ẹ̀.