Tóm Gbò E Jíízọ̀s Beè Lẹ̀ẹ̀là

24 Tṍó e vòò dee ni téní, pọ̀b neǹ vààla gyọ́ọ ea kọlà Ànànáíàs beè zọ̀ sìgà gbò kàneǹ pá Júù, nè enè neǹ kpóò log ea kọlà Tẹ̀tọ́lọ̀s dù. Bà beè gbóó ló bel ló Pọ́ọ̀l gbẹá kèsĩ́ Fílìx ea géè bẹ̀l Jùdíà. 2 Tṍó e bà kólí Tẹ̀tọ́lọ̀s kọ á ló bel, à gbóó dààmà togó gè ló bel uú boo Pọ́ọ̀l kọọ̀:

“E íe pọ̀b kpoò fẹ́ẹ́-fẹẹ̀ ló ea aà ni bá, vaá nyìmànù eo bẹlmà a náa kọọ̀ gã́bug nyààa á naaá dóí. 3 Nyíè dénè bẹ̀ì e di kọ̀láá ketõ̀ò dì ea gé ẹ́ẹ ló gbò nuí, vaá è palàge õá ni zaa e Fílìx E Ka Di Ló. 4 Sõò kọbé ním peè ni tṍó ló, m̀ banì kọ ó kìlmà bùlà kẽ pãane tṍ ló bel e gbĩ́ gè kọ́ nè nií. 5 Boo béè kọọ̀ e mon kọọ̀ gbálàíì neǹ tã̀àgã̀ ea gé nveè pò-pòòà zẹ̀ẹ̀ dénè pá Júù beeá ló zivèkà boo kunukẽ̀í, vaá ẹlẹ ní ea gé gyaàma sĩ́ gbò e bà ólò nyoone nvéè Jíízọ̀s ea dú boǹ Názarẹ̀t e. 6 A beè gbĩ́ gè kyọ̀ nàgé tọọ̀ káíá. Níà nú ea náa è siíe é. 7* —— 8 Tṍó eo é bĩ́ínáe bel, ò é mon kọọ̀ dénè nú e gé kọ́ kìlmàé lóí dú kà-kà.”

9 Tṍóá, pá Júù beè gbóó nvèè sãa kúm kọọ̀ dénè bel ea géè lòa dú kà-kà. 10 Tṍó e ménéá ne deè Pọ́ọ̀l kọ á ló bel, Pọ́ọ̀l à gbóó kọọ̀:

“Nyíém ẹ́ẹ gè ló bel mm̀ ge kpènà nà bá gbẹá ní kèsĩ́, boo béè kọ m̀ nyímà kọọ̀ o tú gã́bug gbáá beemá bel gbẹá dóí. 11 Dì belí bé eo é láá gbĩ́tẽ́ ló vaá nyimá naa, à gáà siga ló 12 dee em beè sí Jèrúselẹ̀m gé fã̀ Bàrì, 12 vaá bà náa beè mònim em gé zọ nen tàlà bel gbẹá mm̀ tọọ̀ káíá àbèè ge tú gbò nen nvèèmà tã̀àgã̀ gbẹá mm̀ tọ bõ̀ònaló fã̀ pá Júù àbèè gbẹá enè ketõ̀ò ea di boná. 13 Vaá bà náa é láá zogè tẹlẹ bàlà kẽ kọọ̀ gbò bel e bà gé lóm lóí dú kà-kà. 14 Sõò kilma ló gè kọ m̀ gbáàà ló ãa bõ̀ònaló, m̀ zigà, vaá mm̀ sĩ́deè e baala kọ́ náa lelàa ní e nda ólò fã̀ Bàrì pá ńdáà gbò nómá tẹ̀ vaá ziga ló dénè nú e Log kọ́ nè nú e ba beè emí mm̀ kpá Gbò Kọ́ọ̀ Bùlà Bàrì e. 15 Nda íè ból dẽesĩ́ mm̀ Bàrì, ea dú ból dẽesĩ́ e nagbòí íe nagé á, kọọ̀ gbò lé lab dògò nè gbò pọ́lọ́ lab dògò é kẽeà aa kemà ú. 16 Boo béè vó, kọ̀láá tṍó, m̀ ólò pììga boo gè ié õ̀òa bug kèsĩ́ Bàrì nè gbò nen. 17 Tṍó e gã́bug gbáá ni téní, m beè gbóó òòa kẽ dù boo béè ge dõo nu nè gbò tãa e bà di beélè dó nè ge nè vààla gyọ́ọ. 18 Tṍó em gé náa gbò nuíá, ba beè gbóó mòním mm̀ tọọ̀ káíá tṍó em ni náa nàànù ge di õ̀òa lọ̀l, sõò gbò nen náa beè di ḿ-maḿ ló àbèè kọ m̀ géè nvèè tã̀àgã̀. Sõò à íe sìgà pá Júù e bà aa bálásĩ́ Ésìà e ba beè di kĩá 19 e bà gáẹ̀ beè dú ní kèsĩ́ gé lóm bel ló be bà beè ié bel e bà é lóm ló. 20 Be níì vó nì, gbòí á kọ̀, be à íe pọ́lọ́ e ba beè mòn kọ m̀ síì tṍó em beè elá kèsĩ́ gbò e ba beè di mm̀ Pọ̀b Tọ Bèèlaà Pá Júùa, 21 daalá lọl ló gè kọọ̀ m beè kọ́ tṍó em beè dì éla vá zẹ̀ẹ̀a kọọ̀: ‘Bà béélám bel ló gbẹá ní kèsĩ́ nieí, boo béè kọ m̀ zigà kọọ̀ gbò e ba beè ù é kẽeà aa kemà ú!’”

22 Sõò, boo béè kọọ̀ Fílìx palàge nyimá kà-kà bel ea kil ló Èèlèí, a beè gbóó lẹ̀ẹ̀là va ààmà vaá kọọ̀: “Tṍó e Lísìàs, ea dú pọ̀b neǹ bé é dú ní em é béélá belí é.” 23 À gbóó kọ́ nè neǹ togó gbò bé kọ á gá sọ̀ẹ bá, sõò á naa kọ á láá ié sìgà dì pọ́ì, vaá á sọ̀tọ́ deè kọọ̀ pá a nen á láá naa gbò nú ea dúe bíi ló.

24 Tṍó e sìgà dee ni téní, Fílìx nè a vaà Drùsílà ea dú Júù beè gbóó dù. Gbálàí beè lẹ̀ẹ̀là tóm kolmá Pọ́ọ̀l vaá a beè pãanée tṍ ló tṍó ea gé kọ́ nú ea ziga ló ea kil ló Kráìst Jíízọ̀s. 25 Sõò tṍó e Pọ́ọ̀l gé ló bel ea kil ló lé lab dògò nè ge lẹ̀ẹ̀là bel ló lóó nè bèèla bel ea é dú, pọ̀ beè gbóó sii Fílìx naa ní ea kọ́ọ̀: “Zẹ́ẹ́ àà. Tṍó em íè tṍó, m̀ é beè kpáá kolí ni.” 26 Sõò dénè tṍóá, a beè dòòmà kọọ̀ Pọ́ọ̀l é neèe kpègè. Vó beè naa kọ á lẹ̀ẹ̀là tóm kolmá Pọ́ọ̀l gã́bug tṍó vaá olòó zọ̀ẹ loá bel. 27 Sõò tṍó e bàà gbáá ni téní, Pọ́shìọ̀s Fẹ́stọ̀s beè gbóó nyaaá ló Fílìx vaá dú nen ea gé bel. Vaá boo béè kọọ̀ Fílìx géè gbĩ́ gè naa nú ea é ẹ́ẹ̀lẹ̀ nyíè pá Júù, a beè sọ̀bá Pọ́ọ̀l gbẹẹ́ tọọ̀ kpọ́gọ́lọ́.