Lé Kpẹ̀a E Máàk Beè Emí

12 A beè gbóó dààmà togó gè tú nu dòòle ló loomá bel nè va kọọ̀: “À íe ene kà gbálà ea beè kìl ól vã́ìn. A beè bè gbà beemá tenmá ló vaá ùb bànà e bà é tõó m zàg míí sẹlẹ́ boo, vaá tìb tọ e bà é tõó boo kùdẽe ló ólá sẹlẹ́ boo. Tṍóá, à gbóó tú ólá nè gbò e bà é ẹb nú ea kil ló vaá àà sí kpã́á deè kyẽè. 2 Tṍó e nú e ba beè fò ni léèvè, à gbóó lẹ̀ẹ̀là ene kà a gyóòlo siimá ló gbò e bà géè ẹ̀b nú ea kil ló ólá kọ bà á neèe dõò ńlẹ. 3 Sõò ba beè siíe, bòmie, vaá kyã̀àmàe kóló bá ààmà. 4 A beè kpáá lẹ̀ẹ̀là dõona kà a gyóòlo siimá vá ló, sõò ba beè tú nu baaẹ́ togó, vaá nvèèmàe lẹ́. 5 À lẹ̀ẹ̀là dõona kà a gyóòlo siimá vá ló, bà fẹ́ẹ. À gbóó kpáá lẹ̀ẹ̀là gã́bug dõona gbò siimá vá ló, bà bòm sìgà ọ̀và, vaá fẹ́ sìgà ọ̀và. 6 Áá neń ea beè sigá beè dú a nvín págbálà ea palàge vùlè. Dee deè nvée, à gbóó lẹ̀ẹ̀là nàe gé siimá vá ló, vaá kọọ̀: ‘Bà é fã dẽè ńdáà nvín.’ 7 Sõò gbò e bà géè ẹ̀b nú ea kil ló ólá à gbóó kọ́ nè ene kọọ̀: ‘Neenii neń ea é dé a gyọ́í. Dui mè èé fẹ́ẹ, vaá è tú a gyọ́í naamá ńbeéle.’ 8 Bà gbóó siíe fẹ̀ vaá tobvíe lọl mm̀ ólá. 9 Éé ní e tẹ̀ íè ólá é náa ẽ́? À é dú gé fẹ́ gbò e bà géè ẹ̀b nú ea kil ló ólá vaá tú ólá nè dõona gbò. 10 Ò gáà beè bugii dọ̀ Kpá Káí ea kọ́ọ̀: ‘Kpò dem e gbò tìb tọ beè gbẹmà nvéeá ní e bà oòa kẽ nòòmà gából deè tọ ẹ́. 11 Nakà kpò demí aa bá Jìhóvà,* vaá à palàge dú lé’?”

12 Bà gbóó gbĩ́ gè siíe tṍó e bà nyímá kọọ̀ baala ní ea gé ló bel dòòle lóá nyòòmàe. Sõò boo béè kọ pọ̀ beè sií va ló gbò e bà di kĩá, bà gbóó ààẹ́ ló àà.

13 Bà gbóó lẹ̀ẹ̀là sìgà pá Fárìsíì nè sìgà gbò nyooné nvéè Hẹ́rọ̀d siimáé ló kọbé bà tú bel ea é ló siimáe. 14 Tṍó e bà ínaé ló, bà gbóó kọ́ nèe kọọ̀: “Neǹ Dòbá, è nyímà kọ ò ólò ló kà-kà bel, vaá nóo ólò naa nu kọbé gbò nen leelà ni, nóo ólò ẹ̀b sĩ́ nen naamá nu, sõò ò ólò noomà kà-kà bel ea kil ló Bàrì. É kọọ̀ log ténmá kọ é kpẽ́ kpègè gbáá nè Sízà, sẹ̀ náa ténmá ẽ́? 15 É kpẽ̀ sẹ̀ é gá kpẽ̀ ẽ?” Tṍó ea mon dùm bààsĩ́ ea dì vá m, à gbóó kọ́ nè va kọọ̀: “Éé ní ea náa ò ẹbmaḿ mi ẽ́? Domai ene kà dìnárìọ̀s mè m̀ é ẹb.” 16 Bà gbóó tú ene kà dìnárìọ̀s nèe. À gbóó bĩiná va kọọ̀: “Sĩ́ mée nè béè mée ní ea di boo é?” Bà aalá nèe kọọ̀: “Níà níí Sízà.” 17 Jíízọ̀s à gbóó kọ́ nè va kọọ̀: “Kpẽi nú ea kuu Sízà nei Sízà, vaá ò kpẽ́i nú ea kuu Bàrì nei Bàrì.” À gbóó palàge bọọ́ vá ló.

18 Tṍóá, pá Sádùsíì e bà náa ólò zìgà kọọ̀ kẽ̀èà aa kemà ú dìa, beè gbóó dù gé bĩináe kọọ̀: 19 “Neǹ Dòbá, Mózìs beè emí kọọ̀ beè nen ú gbẹẹ a va vaá à gáà ie tọ́ọ̀ kà nvín, a vígà á ilí a vaá, vaá bònee nvín gbàà nèe. 20 À íe àlàbà kà vígà págbálà e bà dúá gbàà. Ńtúá kà beè ú gbẹẹ a va tṍó ea gáà ie tọ́ọ̀ kà nvín. 21 Ní ea égè bàà nen beè ilí a vaá, sõò a beè ù tṍó ea gáà ie tọ́ọ̀ kà nvín. Tẽ̀ènè kà nuí beè naaá ló ní ea égè taà nen. 22 Vaá àlàbà ọ̀vàa beè ù tṍó e bà gáà ie tọ́ọ̀ kà nvín. Dee deè nvée, pábiaá beè gbóó u nágé. 23 Tṍó e bà é kẽeà aa kemà ú, mée ea di gbàà àlàbà není ní ea é dú a dóm ẽ́? Boo béè kọọ̀ dénè ọ̀và beè ilíe.” 24 Jíízọ̀s à aalá nè va kọọ̀: “Ò lọi, boo béè kọọ̀ nóo nyímàì nú e Kpá Káí nóòmà àbèè kpóó e Bàrì íe.” 25 Boo béè kọọ̀ tṍó e gbò nen é kẽeà aa kemà ú, gbò gbálà náa é ílí ná va, vaá gbò bia náa é íá ná dóm, boo béè kọ bà é di belí gbò nyómá tóm e bà di káála. 26 Sõò kilma ló gbò e bà é kẽeà aa kemà ú, e kọọ̀ ò gáà beè bugii nú e Mózìs beè emí kilma ló sã́ ea beè bẹ́ ló kpò sàgà téá, kọọ̀ Bàrì beè kọ́ nèe kọọ̀: ‘Nda ní em dúù Bàrì Ébràhám̀, Bàrì Áízìk, nè Bàrì Jékọ̀b e’? 27 À dú Bàrì gbò e bà di dùm, níì níí gbò e ba ni ú nì. Ò palàge lọi.”

28 Tṍó e enè neǹ émì kpá ea géè pãané va tṍ ló tṍó e bà géè tàlàa nyímá kọ à palàge aalá belá nè va. À gbóó bĩináe kọọ̀: “Mókà log ní ea palàge bọọ ẹ́?” 29 Jíízọ̀s à aalá nèe kọọ̀: “Ní ea palàge bọọ dú kọọ̀, ‘Dãi, e booló pá Ízrẹẹ̀l, Jìhóvà* ea dú bẹẹ Bàrì, dú ene kà Jìhóvà,* 30 vaá ò é íè ge vùlè Jìhóvà* ea dú o Bàrì lọa mm̀ dénè o nyíe nè dénè o dùm nè dénè o bùlà nè dénè o kói.’ 31 Ní ea égè bàà kà dú kọọ̀, ‘Ò é íè ge vùlè o nen dì belí bé eo vulè o bá naa.’ Tọ́ọ̀ kà log ea kpáá bọọ èl gbò níí á gé.” 32 Neǹ émì kpáá à kọ́ nèe kọọ̀: “Ò láà aalá e Neǹ Dòbá, ò lóò kà-kà bel, ‘Áá ene kà Bàrì ní ea dìe vaá ńdõona kà á gé ná,’ 33 vaá gè vùlèe lọa mm̀ dénè o nyíe nè dénè o dã̀ból ló nu nè dénè o kói nè ge vùlè nen dì belí bé eo vulè o bá naa palàge bọọ èl ge tú nom nè dõona kà gbò nu vaamá gyọ́ọ nè Bàrì.” 34 Tṍó e Jíízọ̀s mon kọ à tú nyìmànù aamá belá, à gbóó kọ́ nèe kọọ̀: “Nóo íè nà bíi ló gbele tõ̀ò nu kọbé ò kálá bã mm̀ Boǹ Méné Bàrì.” Vaá tọ́ọ̀ nen náa beè kpáá ié ná táàa ló gè bĩináe bel.

35 Tṍó e Jíízọ̀s géè noomà nú mm̀ tọọ̀ káíá, a beè bĩiná kọọ̀: “Éé ní ea náa gbò émì kpá à kọọ̀ Kráìst níà nvín Dévìd e? 36 Dévìd beè kọ́ gbẹá kèbá tùle nyómá káí kọọ̀, ‘Jìhóvà* beè kọ́ nè Neń Ea Íém kọọ̀: “Ĩìm tẽ́ boo bá lè dọ̀ọ̀mà tṍó em é tú pá o gbò ọ́b nvèè ní kè kátọ.”’ 37 Beè Dévìd beè kolíe Neń Ea Íém, à náà và vaá Kráìst à dú à nvín ẽ́?”

A bel beè kpe tṍ dénè gbò e bà géè pãanée tṍ lóá. 38 A beè kilsĩ́ gè noomà va nu kọọ̀: “Iei ọ̀ẹ̀ dẽe ló gbò émì kpá e bà ólò nvèà vọ̀b kọ̀lá ló kyã̀à vaá gbĩ́ kọọ̀ gbò nen á kanàè va mon gbẹá kèki, 39 nè gè ĩìtẽ́ deèsĩ́ té gbẹá ba gbò tọ bõ̀ònaló fã̀ nè ge ĩìtẽ́ kĩée e ka di ló lọ̀l vaá à lee tṍó e bà gé dé gyã́á ló èlà. 40 Bà ólò kpalí bá gbò vaà tãa, vaá tã̀àgã̀ begè dẽè tã̀àgã ló Bàrì kọbé gbò nen leelàẹ̀ va. Bà é íe kà agẹ bá kpọ̀té.”

41 À gbóó àà gé ĩìtẽ́ ló kpó e bà ólò tẹlẹ̀ kpègè m, vaá ẹ̀b bé e gbò nen gé tẹlẹ̀ kpègè mm̀ kpóá naa. Gbele tõ̀ò gbò méné géè tẹlẹ̀ gã́bug kpègè m. 42 Ene kà vaà tãa beè gbóó dù gé tẹlẹ̀ bàà kà sọ́gọ́ kpègè m. 43 À gbóó kolí pá a gbò nyòòne nvée, vaá kọ́ nè va kọọ̀: “M̀ lóò kà-kà bel nèi kọọ̀, kpègè e vaà tãaí tẹ́lẹ̀ bọọ èl ní e dénè nagbòa beè tẹlẹ̀. 44 Boo béè kọọ̀ dénè nagbòa tẹ́lẹ̀ lọl dẽè gã́bug e bà íe, sõò náa kal ló béè kọọ̀ ńnvááí dú kà neǹ tãa, à tẹ́lẹ̀ dénè nú ea íe ea gáẹ̀ láá tõ̀òma dùm.”