Kpá E Pọ́ọ̀l Beè Lẹ̀ẹ̀là Má Pá Róm̀
16 M̀ gbĩ́ì kọ ó nyimai ló bẹẹ vígà pábia ea kọlà Fíbì, ea gé nveè bá nè gbò e bà di bõ̀ònatõ̀ò ea di Sínkrìà, 2 kọbé ò láá tui lé bá tuumaíe dì belí bé ea bọ́ló gè tú gbò e bà di káí naa, boo béè kọ ò gé gbá nyoonei nvéè Nen Ea Íéi. Neíe kọ̀láá kà nú ea dúe bíi ló, boo béè kọọ̀ ẹlẹ ólò nvèè nàgé bá nè gã́bug nen, bií ló nda.
3 Kanai moǹ Prískà nè Ákuilà, e nda nè ọ̀và gé gbá sí tóm nè Kráìst Jíízọ̀s, 4 e ba beè tú ba dùm nvee kèbá gẹẹ-gẹẹ ló boo béè nda, vaá níì áá nda ní em ṍà va zaaẹ́ nì, sõò dénè bõ̀ònatõ̀ò e bà di gbò dó àla ṍá va zaa nagé. 5 Kana naigé moǹ gbò e bà ólò bõoná ba tọ fã̀ Bàrì. Kanai moǹ Ẹ̀pínitọ̀s em palàge vùlè, ea dṹùnà túá gbò e ba beè aa Ésìà dù gé nyoone nvéè Kráìst. 6 Kanai moǹ Mérì ea gé tú agẹ bá siimá tóm nèiá. 7 Kanai moǹ Àdrónikọ̀s nè Júnìàs, e bà dú pá ńdáà dúà ló e beè gbá di tọọ̀ kpọ́gọ́lọ́á, e bà dú gbò e gbò e Jíízọ̀s lẹẹlà palàge nyimá ló, e ba beè gyààsĩ́ kẽè nda nyoone nvéè Kráìsta.
8 Kanai moǹ Ámplìétọ̀s em palàge vùlè, ea ólò nyoone nagé nvéè Nen Ea Íéi. 9 Kanai moǹ Ọ̀bénòs e ólò gbá sí tóm nè Kráìst, nè Stékìs em palàge vùlè. 10 Kanai moǹ Àpẹ́lìs e Kráìst ténmàa. Kanai moǹ pá tọọ̀ Àrìstábulọ̀s. 11 Kanai moǹ Hẹ̀ródìòn ea dṹùnàm. Kanai moǹ pá tọọ̀ Nàsísọ̀s, e bà gé nyoone nvéè Nen Ea Íéi. 12 Kanai moǹ Tràìfínà nè Tràìfósà, e bà dú gbò bia e bà gé tú agẹ bá siimá tóm nè Nen Ea Íéi. Kanai moǹ Pẹ́sìs, ea dú bẹẹ vígà pábia e vulè, boo béè kọọ̀ a tú agẹ bá siimá tóm nè Nen Ea Íéi. 13 Kanai moǹ Rúfọ̀s e Nen Ea Íéi beè sàa, vaá ò kana naigé moǹ a kà ea dú ńdáà kàa. 14 Kanai moǹ Àsínkritọ̀s, Flígòn, Hẹ́mìs, Pátrobàs, Hẹ́màs, nè pá vígà e bà dì vá ló. 15 Kanai moǹ Fìlólọgọ̀s nè Júlià, Nírìọ̀s nè a vígà pábia, nè Òlímpàs, nè dénè gbò e bà di káí e bà dì vá ló. 16 Kanai moǹ ene vaá ò pyobvii bẹ́ẹ́ ene. Dénè bõ̀ònatõ̀ò e bà gé nyoone nvéè Kráìst kanai mon.
17 M̀ gé ãanéi e pá vígà kọ ó ọẹi dẽe ló gbò e bà ólò nvèè pò-pòòà vaá dú nuù kúm̀ tọ́ ló bií ló gbò e bà gé náa nú ea téní kele aa ló gbò nú eo beè noi ã́, vaá ó gá zọí va naaai nu. 18 Boo béè kọọ̀ gbò e bà dì naa vó dú gyóòlo nè pọ́lọ́ tàn ea dì vá m, níì Nen Ea Íéi, ea dú Kráìst nì, vaá bà ólò tú kpée-kpéè moǹ bel kẹ̀ẹ̀mà gbò e bà náa nyímá nu. 19 Kọ̀láá nen a nyímá kọ ò íei dùm gbàntṍ ló, vaá nyíém palàge ẹẹí ló. Sõò m̀ gbĩ́ì kọ ó nyimai nu kọbé ò láá naanii nú ea dú lé vaá kpoolai lóó lọlíí ló pọ́lọ́ nu. 20 Pọ́ì ńkem̀ tṍó àla, Bàrì ea ólò naa kọ é ié fẹ́ẹ́-fẹẹ̀ ló é tú Sétàn nvèèí kè kátọ vaá kyọ̀ẹ sĩ́. M̀ gé ban kọọ̀ Nen Ea Íéi, ea dú Jíízọ̀s á iéi sàn nyíe ló.
21 Tímotì, e gé gbá siá tóm kanài mon, vaá Lúsìọ̀s, Jésìn, nè Sòsípetà, e bà dṹùnàm kanà nàigé mon.
22 Nda Tẹ́tìọ̀s, em beè emí kpá lẹ̀ẹ̀la tómí kanài mon dì belí nen e gé gbá nyoone nvéè Nen Ea Íéi.
23 Géíọ̀s, e nda ólò tõó a tọ vaá dénè pá vígà ólò bõoná a tọ fã̀ Bàrì kanài mon. Èrástọ̀s, ea ólò faalá kpègè bon, bii ló Kóatọ̀s ea dú a vígà págbálà kanà nàigé mon. 24* ——
25 Bàrì é láá naa kọọ̀ lóói á àgà tení dú ló lé kpẹ̀a em gé kọ́ nè kpẹ̀a ea kil ló Jíízọ̀s Kráìst. Lé kpẹ̀aí gbááá ló nuù ke gũ̀a ea di káí, ea beè di ke gũ̀a mm̀ begè dẽè tṍó vaá Bàrì a kuulà tẹlẹ bàlà kẽ. 26 Sõò kátogóí, Bàrì a náa kọ á dọ bàlà kẽ vaá naa kọọ̀ dénè dó á nyimá tení dú ló gbò moǹ bel kọ́ọ̀ bùlà Bàrì ea di mm̀ Kpá Káí, ea gbááá ló nú e Bàrì ea dì dọ̀ dè-dè beè kọ̀, kọbé ò láá iei dùm gbàntṍ ló tení dú ló zìgà eo íèì. 27 Tení dú ló Jíízọ̀s Kráìst, lèèlà ea dì dọ̀ dè-dè á dì nè Bàrì e áá ẹlẹ ní ea nyímá nu ẽ́. Á dì naa vó.