Lé Kpẹ̀a E Lúùk Beè Emí

10 Tṍó e gbò nuí nááá lọ̀l, Neń Ea Íéi beè gbóó íbá ló dõona kà 70 nen lọl gbàà gbò e bà ólò nyoonée nvée vaá lẹ̀ẹ̀là bàà-bàà ọ̀và kọ bà á gyaẹ̀ẹ́ sĩ́ gé bã kọ̀láá kà bon nè kọ̀láá ketõ̀ò ea beè kọ à é síè. 2 Tṍóá, Jíízọ̀s à gbóó kọ́ nè va kọọ̀: “Gã́bug nu a léèvè, sõò gbò tóm ea di gbàà dú ńkem. Vó à naa, banii Tẹ̀ Íè nú ea ni léèvèí kọ á kpáá lẹ̀ẹ̀là gbò tóm tẹlẹ mm̀ a ól. 3 Gbóó aalii! Sõò ọẹi dẽe! boo béè kọọ̀ m̀ gé lẹẹlài belí gbò naanà ból e bà lẹẹlà tẹlẹ zẹ̀ẹ̀ gbò kpọ́í. 4 Ó gá faalai bẹ̀lẹ̀ ge nvèè kpègè m àbèè nu gè nvèè gyã́á m, àbèè kpá kátọ, vaá ó gá peelii tṍó boo béè ge kanai moǹ nen gbẹáí èèlè. 5 Kọ̀láá kà tọ eo bãì, zẹ́ẹ́ kanaí va mon kọọ̀: ‘Fẹ́ẹ́-fẹẹ̀ ló á di ló gbò e bà di tọí.’ 6 Vaá beè neń ea di tọá dú neǹ fẹ́ẹ́-fẹẹ̀ ló, fẹ́ẹ́-fẹẹ̀ ló eo beè domai á dìé ló. Sõò be náa dú neǹ fẹ́ẹ́-fẹẹ̀ ló, bọọ fẹ́ẹ́-fẹẹ̀ ló é zọ́i òòà. 7 Tõoníí tọá dei vaá ò ṍi gbò nú e bà néi, boo béè kọọ̀ à bọ́ló gè kpẽ́ nu nè neń ea gé sí tóm. Ó gá aalíí tọ e bà néi gé tõoníí dõona ketõ̀ò.

8 “Nagé, kọ̀láá kà boń eo bãì vaá bà túi, dei kọ̀láá kà nú e bà néi 9 vaá ò bói gbò zọ̀ kpáló e bà di boná, vaá ò kọ́i neí va kọọ̀: ‘Boǹ Méné Bàrì a ínaí kuló.’ 10 Sõò kọ̀láá kà boń eo bãì vaá bà náa túi, aalii kilíí boo ba pọ̀b èèlè vaá ò kọ́i kọọ̀: 11 ‘È kpalà sãa ea dú bọọ boní lọa kè kátọ kọbé à síi neǹ ditõ̀ò ló. Sõò nyimai kọọ̀ Boǹ Méné Bàrì a íná kuló.’ 12 M̀ kọ́ọ̀ nèi kọọ̀ nú ea é nááá ló boná deeá é aga bá èl nú ea é nááá ló Sọ́dòm.

13 “Pọ́lọ́ múú kyáá á di ló booló pá Kọ̀rézìn! Pọ́lọ́ múú kyáá á di ló booló pá Bẹ̀tsáídà! boo béè kọọ̀ beè gbò tóm dũ̀ùnè em beè sí nèi ní em beè sí nè pá Táíà nè Sáídòn ẽ, bà gáẹ̀ beè ọgá kpã́á dee, nvèà kọ̀là ló nyèm, vaá ĩìtẽ́ gbàà bùùlù. 14 M̀ kọ́ọ̀ nèi kọọ̀ nú ea é nááaí ló deè bèèla bel é aga bá èl nú ea é nááá ló Táíà nè Sáídòn. 15 Vaá booló pá Kàpánìòm, é kọọ̀ bà é dalài kpãa ló inmá sĩ́ káála? Mm̀ Bànà Ú* ní e bà é tã́ái bá tẹlẹ̀ẹ!

16 “Kọ̀láá neń ea gbaníi tṍ ló gban tṍ ló nda. Vaá kọ̀láá neń ea kiníi kin nagé nda. Vaá kọ̀láá neń ea kin nda kin nagé neń ea beè lẹ̀ẹ̀làm.”

17 70 nená à gbóó òòa kẽ dú mm̀ ẹ́ẹ́-ẹẹ̀ nyíe vaá kọọ̀: “Neń Ea Íéi, bã̀àna gbò zọ gbaníi tṍ ló tṍó e túù o bée lẹ̀ẹ̀mà va bel ló.” 18 À gbóó kọ́ nè va kọọ̀: “M̀ monì Sétàn ea dọ aa káálá belí éném dee. 19 Ẹbvii! M beè nèi kpóó kọ ó zagai tọ́ boo naanà nè pèèle, vaá ò elii bá kpóó pọ́lọ́ nená, vaá tọ́ọ̀ nu náa é nveèi kom ló. 20 Náa kal ló béè vó, nyíéi á gá ẹẹ boo béè kọọ̀ gbò pọ́lọ́ nyómá gbaníi tṍ ló, sõò nyíéi á ẹẹ boo béè kọ Bàrì a émí bọọ bée mm̀ káála.” 21 Kà lèlà tṍóá, nyómá káí à gbóó naa kọọ̀ nyíè Jíízọ̀s á palàge ẹẹ naa ní ea kọ́ọ̀: “M̀ leelà ni gbẹá kèsĩ́ dénè nen, e Tẹ̀, eo dúù Neń Ea Íe káála nè kunukẽ̀, boo béè kọọ̀ ò gṍò gbò nuí ló gbò e bà nyímá nu vaá ié tàvẹ̀nù, vaá tẹlẹ bàlà kẽ nè gbò pá nvín. Mm̀ kà-kà, nà Tẹ̀, níì nú eo ténmàe. 22 Ńdáà Tẹ̀ a ném kọ̀láá kà nu. Tọ́ọ̀ nen náa nyímá ló nda Sã́áná nená daalá lọl ló ńdáà Tẹ̀, vaá tọ́ọ̀ nen náa nyímá ló ńdáà Tẹ̀ daalá lọl ló nda Sã́áná nená nè kọ̀láá neń ea tan nda gè naa kọ á nyimáe ló.”

23 À gbóó kììlà sĩ́ kpee pá a gbò nyòòne nvée vaá kọ́ nè áá baala kọọ̀: “Éẹ́-ẹẹ̀ nyíe á di ló gbò e bà mon gbò nú e boolo gé moniií. 24 M̀ kọ́ọ̀ nèi kọọ̀, a beè tàn gã́bug gbò kọ́ọ̀ bùlà Bàrì nè gbò méné gè mòn gbò nú e boolo gé moniií, sõò bà náa beè mòn, nè ge dã́ gbò nú e boolo gé dã́ií, sõò bà náa beè dã̀.”

25 Ene kà gbálà ea palàge nyimá Log beè gbóó elá èla kọbé à ẹbmàè Jíízọ̀s. À gbóó kọọ̀: “Neǹ Dòbá, éé ní ea dú bíi kọ ḿ naa kọbé m̀ íe dùm e bè náa tá ẹ́?” 26 Jíízọ̀s à bĩináe kọọ̀: “Éé ní e ba beè emí mm̀ Logá ẹ́? Éé ní eo dã́à lọl m ẽ́?” 27 À aalá kọọ̀: “‘Ò é íè ge vùlè Jìhóvà* ea dú o Bàrì lọa mm̀ dénè o nyíe nè dénè o dùm* nè dénè o kói nè dénè o bùlà,’ vaá ‘ò vulè o nen dì belí bé eo vulè o bá naa.’” 28 Jíízọ̀s à kọ́ nèe kọọ̀: “Ò láà aalá. Kilsĩ́ gè naa gbò nuí mè ò é íe dùm.”

29 Sõò boo béè kọọ̀ gbálàa géè gbĩ́ gè leevè bel a bá, à gbóó bĩiná Jíízọ̀s kọọ̀: “Mée ní ea dú nà nen ẽ́?” 30 Jíízọ̀s à aalá kọọ̀: “Ene kà gbálà géè aa Jèrúselẹ̀m kil Jérikò. À gbóó dọ gbàà gbò zib naa ní e bà tú dénè nu lọ̀líé bá, bòmie, vaá gbóó tú kpàà-kpàà séi gbẹẹẹ́ gbàà àà. 31 À beè ẽenà kọọ̀ enè neǹ vààla gyọ́ọ géè tení èèlèa. Tṍó ea moníe, à gbóó tení na sábá èèlèa àà. 32 Tṍó e enè neǹ Lívaì íná kĩá vaá mòn nàe gé, à tení na sábáá àà. 33 Sõò tṍó e enè neǹ Sàmérìà ea géè tení èèlèa íná kĩá vaá mònie, à gbóó dúe ńsàn nyíe. 34 À gbóó bã̀é ló vaá tú nu bọbví dẽè a kom. À gbóó tú nóo nè míí tṍ dẽe. Tṍóá, à gbóó túe nvee boo a nom vaá faaláẹ ààmà kilma tọọ̀ fáàlà kyáà gé ẹ̀b nú ea kilíé ló. 35 Deé ea bēene, à gbóó kpẽ́ bàà kà dìnárìọ̀s* nè tẹ̀ íè tọọ̀ fáàlà kyáàa, vaá kọ́ nèe kọọ̀: ‘Ẹ̀b nú ea kil ló gbálàí, vaá beè kpègè eo ẹbmà nú ea kilíé ló bọọ èl níí, m̀ é oòma kẽ nè ni tṍó em é oòa kẽ dù.’ 36 Mée ea di gbàà táaa není ní ea zógè kọ à dúè neǹ gbálà ea beè dọ gbàà gbò zibvá ẹ́?” 37 À aalá kọọ̀: “Níà neń ea beè iée sàn nyíe lóá.” Jíízọ̀s à gbóó kọ́ nèe kọọ̀: “Àà gé naa nagé vó.”

38 Boo tṍó e bà di èèlè e bà gé aà, bà gbóó bã ene kà bon. Ene kà ńnváá ea kọlà Mátà à gbóó tú va nvee a tọ vaá kolí va kyáà. 39 A beè ié ene kà vígà pábia ea kọlà Mérì, ea beè ĩìtẽ́ ló kpóó tọọ̀ Neń Ea Íéi vaá kilsĩ́ gè pãane tṍ ló bel ea géè lò. 40 Sõò Mátà náa beè láá pãanée tṍ ló boo béè kọọ̀ à géè naa gã́bug nu. À gbóó dúé ló gé bĩináe kọọ̀: “Neń Ea Íém, é kọ ò dã́à pĩi kọọ̀ ńdáà vígà pábia á sọ̀bá dénè tóm gbẹẹḿ bá kọọ̀ áá m̀m̀ ḿ sì? Kọ́ nèe kọ á dù gé nvèè bá nèm.” 41 Neń Ea Íéi à gbóó aalá nèe kọọ̀: “Mátà, Mátà, ò bọọgẹ̀ tãagẽ o bá vaá di mm̀ kíìli-kíìli kilma ló gã́bug nu. 42 Pọ́ì ńkem̀ nu àbèè áá ene kà nu ní ea dú bíi é. Mérì sa kà lé nu vaá bà náa é lọlíé bá.”