Kpá E Pọ́ọ̀l Beè Lẹ̀ẹ̀là Má Pá Róm̀

10 Pá vígà, lé bùlà em íè kìlmà vá ló nè nú em gé ban bá Bàrì dú kọ bà á dùùà. 2 Boo béè kọọ̀ nda síì neǹ ditõ̀ò kìlmà vá ló kọ bà íe bẹ̀à sã́ bùlà nyòòmà ge fã̀ Bàrì, sõò náa dẹẹ̀a boo kà-kà nyìmànù. 3 Boo béè kọọ̀ bà náa nyímá ló nòòkúù Bàrì vaá bà gbĩ́ gè nvèè baálà nòòkúu kẽ, bà náa gbóó tõó boo nòòkúù Bàrì. 4 Kráìst ní ea dú kùbmà Logá ẹ́, kọbé kọ̀láá nen ea íe zìgà láá dú neǹ lé lab dògò.

5 Mózìs beè emí kọọ̀ ge sẹlẹ Log é láá naa kọọ̀ nen á dú neǹ lé lab dògò, tṍó ea kọ́ọ̀: “Kọ̀láá nen ea náa gbò nú e Log kọ́í é dí dùm.” 6 Sõò moǹ bel Bàrì kọ́ nágé kọọ̀ zìgà e nen íe é láá naa kọọ̀ nen á dú neǹ lé lab dògò tṍó ea kọ́ọ̀: “Ó gá kọ́ mm̀ o nyíe kọọ̀, ‘Mée ní ea é sí káála ẹ́?’ níà ge tú Kráìst lọl káála domá, 7 àbèè ge kọọ̀, ‘Mée ní ea é sí mm̀ bànà Ábìs e?’ níà ge kẽee Kráìst lọl kemà ú.” 8 Kpá Káí kọ́ nágé kọọ̀: “Moǹ belá dì ní kuló, à dì ní gã́, vaá à dì ní nyíe”; níà ge kọọ̀, “moǹ bel” ea é náa kọ ó ié zìgà ní e gé veeá. 9 Boo béè kọọ̀ be ò tú o gã́ kọọmá tẹlẹ bàlà kẽ nè gbò nen kọọ̀ Jíízọ̀s dú Nen Ea Íéi, vaá ié zìgà mm̀ o nyíe kọọ̀ Bàrì beè kẽée lọl kemà ú, ò é duuà. 10 Boo béè kọọ̀ zìgà e nen íé mm̀ a nyíe ní ea tú nen naamá neǹ lé lab dògò e, sõò gã́ ní ea é kọ́ọ́má tẹlẹ bàlà kẽ nè gbò nen kọbé à íe dùùà ẹ.

11 Boo béè kọọ̀ Kpá Káí kọ́ọ̀: “Náa é kẹlẹ tọ́ọ̀ nen ea íée zìgà m.” 12 Boo béè kọọ̀ tọ́ọ̀ kà kele á gé zẹ̀ẹ̀ pá Júù nè gbò e bè níì pá Júù nì. Áá tẽ̀ènè kà Nen Ea Íéi ní e dénè bẹ̀ì íèe, vaá à ólò dõo nu taalẹ bá nè kọ̀láá gbò e bà kólíe. 13 Boo béè kọọ̀ “kọ̀láá nen ea kólí béè Jìhóvà* é duuà.” 14 Sõò bà é náa và láá kolíe e bà gáà iée zìgà m ẽ́? Vaá bà é náa và láá iée zìgà m e bà gáà dã́ nú ea kilíé ló é? Vaá bà é náa và láá dã́ nú ea kilíé ló beè tọ́ọ̀ nen náa kọ́ kpẹ̀a nè va ẹ́? 15 Vaá bà é náa và láá vee kpẹ̀aá be bà náa lẹẹlà va ẹ́? Boo béè kọọ̀ Kpá Káí beè kọọ̀: “Ẹ̀b bé e kpóó tọọ̀ gbò e bà gé vee lé kpẹ̀a ea kil ló lé nuá dú lé naa ã̀!”

16 Náa kal ló béè vó, dénè ọ̀và náa beè gbàntṍ ló lé kpẹ̀aá. Boo béè kọọ̀ Àìzáíà beè kọọ̀: “Jìhóvà,* mée ní ea ni íe zìgà mm̀ nú ea dã́ lọl gã́ beele é?” 17 Vó à naa, nen ólò ié zìgà tení dú ló nú ea dã́. Vaá nen ólò dã́ nú ea kil ló Kráìst tṍó e bà kọ́ nèe. 18 Soò nda bĩ́ìnà kọọ̀, É kọ à é dú kọọ̀ bà náa beè dã́ kpẹ̀a á? Níì vó nì, “gbò e bà géè vee kpẹ̀aá beè vee imá dénè ketṍò ea di boo kunukẽ̀í, naa ní e kọbèè gbò e bà di kpã́á beè dã nágé.” 19 Sõò nda kpáà bĩiná kọọ̀, É kọọ̀ pá Ízrẹẹ̀l náa beè dã̀? Mózìs beè zẹ́ẹ́ kọọ̀: “Nda é náa kọ ó iei bẹẹ nyíe tení dú ló gbò e bà gáà du ene kà dó. Nda é náa kọ pá dõona kà dó e bà náa nyímá nu á naa nú ea é náa kọ ó nveenii bá kpóó súng.” 20 Sõò Àìzáíà beè tú agẹ ló kọọmá kọọ̀: “Gbò e bà moním níì gbò e bà géè gbím nì. Gbò e bà nyímám ló níì gbò e bà géè bĩinám nì.” 21 Sõò a beè kọ́ kilma ló pá Ízrẹẹ̀l kọọ̀: “Kọ̀láá dee, nda ólò taalẹ ńdáà bá boo béè gbò lọ̀l togó kèbá nè gbò agẹ togó.”