Lé Kpẹ̀a E Jṍòn Beè Emí

13 Besĩ́ì Nàànù Ténì Zelíá à kalá dààà togó, Jíízọ̀s beè nyimá kọọ̀ tṍó ea é gé aalìè bàlà booí nyoonèè a Tẹ̀ a lée. A beè vùlè pá a gbò e bà di bàlà booí, vaá a beè vùlè va iná kùbmà. 2 Dénè tṍó e bà gé dé gyã́á èlàa, Pọ́lọ́ Nyómá beè nvee nyíè Júdàs Ìskáriọ̀t ea dú nvín Sáímòn, kọ á teníé ló nvee bá gbò ọ́b. 3 Boo béè kọọ̀ Jíízọ̀s nyímá kọ a Tẹ̀ beè tú dénè nu nveenìèé bá, vaá a beè aalìè ló Bàrì duè, nè ge kọ à é gé aalìè kilìè ló Bàrì, 4 à gbóó aa boo gyã́á èlà e bà géè dèa gé tú a pọ̀b kọ̀là ló lọa ló, vaá tú báà kàn e bà ólò fã̀àmà ló bọá tõ̀ò tẽ́. 5 Tṍó ea ni náa vó lọ̀l, à gbóó tú múú tṍ mm̀ fẹ́ẹ́lẹ́ vaá dààmà togó gè logí kátọọ̀ pá a gbò nyòòne nvée vaá tú báà kàn e bà ólò fã̀àmà ló ea beè bọá tõ̀ò tẽ́á fã̀àmà va kátọ. 6 Tṍó ea íná ló Sáímòn Pítà, Pítà à gbóó bĩináe kọọ̀: “Nen Ea Íém, ò gbĩ́ gè logím kátọ?” 7 Jíízọ̀s à aalá nèe kọọ̀: “Nóo dã́à ból ló nú em gé náaí, sõò tṍó ea é lée, ò é beè dã́ ból ló.” 8 Pítà à kọ́ nèe kọọ̀: “Ním é zigà kọ ó logím kátọ.” Jíízọ̀s à kọ́ nèe kọọ̀: “Be ním lógì ni kátọ, nóo é láá zọ̀m naaá tọ́ọ̀ kà nu.” 9 Sáímòn Pítà à gbóó kọ́ nèe kọọ̀: “Nen Ea Íém, ó gá logím áá kátọ, sõò logím bá nè togó bií ló.” 10 Jíízọ̀s à kọ́ nèe kọọ̀: “Áá kátọ ní nen ea beè bìlà múú íe bíi ló gè logá ẹ́, boo béè kọọ̀ kpálóe di õ̀òa. Vaá boolo dií õ̀òa, sõò níì dénè bọ̀ì nì.” 11 Boo béè kọ a beè nyimá ló nen ea é ténié ló nvee bá gbò ọ́b. Níà nú ea náa à kọọ̀: “Níì dénè bọ̀ì ní eo dií õ̀òaé nì.”

12 Tṍó ea ni lógí va kátọ lọ̀l vaá nvèà a pọ̀b kọ̀là ló, à gbóó òòà gé ĩìtẽ́ ló gyã́á e bà géè dèa vaá bĩiná va kọọ̀: “Ò dã́ì gé ból ló nú em géè naa nèi ã́? 13 Ò ólò kolím mi ‘Neǹ Dòbá’ nè ‘Nen Ea Íéi,’ vaá ò dií lèlà, boo béè kọọ̀ níà nen em dúùe. 14 Vó à naa, beè nda em dúù Nen Ea Íéi nè bọọ Neǹ Dòbá láá logíi kátọ, à dú nágé bíi kọ ó logii kátọọ̀ ene. 15 Nda zógèi nu dòòmà bá kọọ̀ dì belí bé e nda náa nè boolo naaá, boolo naa naigé vó. 16 M̀ lóò kà-kà bel nèi kọọ̀, gyóòlo náa bọọ èl a tẹ̀ tọ, àbèè kọọ̀ nen e ba beè lẹ̀ẹ̀là bọọ èl nen ea beè lẹ̀ẹ̀làẹ. 17 Ẹ́ẹ́-ẹẹ̀ nyíe á dìí ló be ò nyímai gbò nuí vaá ò naanii. 18 Nda ním gé ló belí kilma ló dénè bọ̀ì. Nda nyímà ló gbò em beè sà, sõò níí nááá kọbéè Kpá Káí ḿḿ-má, ea kọ́ọ̀: ‘Nen ea géè zọ̀m dé gyã́á a náa uuḿ boo.’ 19 Kátogóí, m̀ gé ló belí nèi besĩ́ à kálá naaá, kọbé tṍó ea é nááá, ò zigai kọọ̀ nda ní e ba beè kọ à é dúáẹ́. 20 M̀ lóò kà-kà bel nèi kọọ̀, kọ̀láá nen ea tú nen e nda lẹẹlà tú nágé nda, vaá kọ̀láá nen ea tú nda tú nágé nen ea beè lẹ̀ẹ̀làm.”

21 Tṍó e Jíízọ̀s ló gbò belí lọ̀l, nyíée beè gbóó tã̀àgã̀ naa ní ea kọ́ tẹlẹ bàlà kẽ kọọ̀: “M̀ lóò kà-kà bel nèi kọọ̀, enè nen ea dìí zẹ̀ẹ̀ é téniḿ ló nvee bá gbò ọ́b.” 22 Pá a gbò nyòòne nvée à gbóó ẹ̀là sĩ́ boo béè kọ bà náa nyímá ló nen ea gé kọ́. 23 Enè nen ea ólò nyoonée nvée, ea dú nen e Jíízọ̀s ólò palàge vùlè beè di ĩ́ìtẽ́ kpàn Jíízọ̀s. 24 Vó à naa, Sáímòn Pítà à gbóó kpàlà bá ló nená vaá kọ́ nèe kọọ̀: “Kọ́ nèe kọ á kòl béè nen ea gé kọ́ nèi.” 25 Nen e Jíízọ̀s palàge vùlèa à gbóó dũ̀ùà bã ló Jíízọ̀s vaá bĩináe kọọ̀: “Níà mée, e Nen Ea Íém ẽ́?” 26 Jíízọ̀s à aalá nèe kọọ̀: “Níà kọ̀láá nen em túù fétúlúí diilé mm̀ bũ̀ nè.” Tṍó ea ni tú fétúlúá diilé m lọ̀l, à gbóó nè Júdàs, ea dú nvín Sáímòn Ìskáriọ̀t. 27 Tṍó e Júdàs ni tú fétúlúá lọ̀l, Sétàn à gbóó bã̀é m. Jíízọ̀s à gbóó kọ́ nèe kọọ̀: “Be à íe nú eo gé náa, ò vàlẹ̀ bá naa.” 28 Sõò tọ́ọ̀ gbò e bà géè gbá dé gyã́áá náa beè nyimá nú ea náa à kọ́ vó nèe. 29 Kàsĩ́, sìgà gbò géè dòòmà kọọ̀ tã́gíní bé e Júdàs ní ea ólò faalá kpó kpègèa, Jíízọ̀s géè kọ́ nèe kọ á zalí gbò nú e bà íe bíi ló nyòòmà sẹ̀lẹ̀nùa, àbèè kọ á tú sìgà kpègè nè gbò tãa. 30 Júdàs gé tú gé fétúlúá, à gboó gbẹá boo dọ kèdẹi. Tṍóá, dee a bílá.

31 Vó à naa, tṍó ea ni dọ́ kèdẹi, Jíízọ̀s à gbóó kọọ̀: “Kátogóí, baa nveè ka ló Sã́áná nená, vaá baa nveè ka ló Bàrì tení dú ló Sã́áná nená. 32 Bàrì é nveèe ka ló, vaá ẹlẹ é gbẹ́á boo nvèè ka ló Bàrì. 33 Gbò pá nvín, pọ́ì ńkem̀ tṍó ní em é di-díí ló é. Ò é gbím mi, vaá dì belí bé em beè kọ́ nè pá Júù naaá, ‘Kĩée e nda gé aà kìl, boolo nóo é láá dui,’ kátogóí, m kọ́ nágé nè boolo. 34 M̀ gé néi ãa log kọ ó vulei ene dì belí bé e nda vulè boolo naaá. Boolo vule naigé ene. 35 Dénè nen é nyímá kọ ò gé nyoonei nvéè nda—be ò vulei ene.”

36 Sáímòn Pítà à gbóó bĩináe kọọ̀: “Nen Ea Íém, ãàe ní eo gé kil é?” Jíízọ̀s à aalá nèe kọọ̀: “Kĩée e nda gé kil, nóo é láá nyooném kátogóí, sõò ò é beè dù.” 37 Pítà à bĩináe kọọ̀: “Nen Ea Íém, éé ní ea náa ním é láá nyooné ni kátogóí é? Nda di kpènà ló gè ú ní boo.” 38 Jíízọ̀s à bĩináe kọọ̀: “Ò di kpènà ló gè ú ḿ boo? M̀ lóò kà-kà bel nè ni kọọ̀, besĩ́ kõ̀ò kálá kù kpã́, ò é amàm sàn taà tóm.”