Lé Kpẹ̀a E Máátìù Beè Emí

6 “Ọẹi dẽe kọbé nóo náànìì lé nu gbẹaí áá kĩée e gbò nen é mon; be níì vó nì, nóo é íei tọ́ọ̀ kà kpẽ́ lọlíí bá bọọ Tẹ̀ ea di káála. 2 Vó à naa, tṍó eo gé dõo nu nè neń e bíi di ló,* ó gá vee belí bé e gbò bààsĩ́ ólò naa gbẹá mm̀ ba gbò tọ bõ̀ònaló fã̀ nè boo èèlè kọbé gbò nen leelà va naaá. Nda lóò kà-kà bel nèi kọọ̀ gbò nen é leelà va, sõò bà náa é íe kpẽ́ ea aa bá Bàrì. 3 Sõò tṍó eo gé dõo nu nè nen e bíi di ló, ó gá zìgà kọọ̀ o bá kie á nyimá nú eo bá lè gé náa, 4 kọbé nú eo dõò nè nen e bíi di ló gbẹ́á ke gũ̀a. Tṍóá, o Tẹ̀ ea ólò mòn nú ea di ke gũ̀a é gbóó nè ni kpẽ́.

5 “Nagé, tṍó eo gé tãagãi ló Bàrì, ó gá belii gbò bààsĩ́, boo béè kọ à ólò leemá va gè elá mm̀ tọ bõ̀ònaló fã̀ nè boo pọ̀b èèlè kĩée e gbò nen é moń va tã̀àgã ló Bàrì. Nda lóò kà-kà bel nèi kọọ̀, Bàrì náa é né va tọ́ọ̀ kà kpẽ́. 6 Sõò tṍó eo gé tãàgã ló Bàrì, bã mm̀ o àn vaá tṍó eo ni kuà nùtọ ló, ò gbóó tãagã ló o Tẹ̀ ea di ke gũ̀a. Tṍóá, o Tẹ̀ ea ólò mòn nú ea di ke gũ̀a é gbóó nè ni kpẽ́. 7 Tṍó eo gé tãagã ló Bàrì, ó gá òòa boo tẽ̀ènè kà moǹ bel gã́bug tóm, belí bé e gbò e bà náa nyímá ló Bàrì ólò naaá, boo béè kọ bà doomà kọọ̀ Bàrì é dã́è ba tã̀àgã̀ ló tṍó e bà lóè gã́bug bel. 8 Vó à naa, ó gá belíí va, boo béè kọọ̀ bọọ Tẹ̀ nyímá nú ea dúi bíi ló besĩ́ ò kalá bĩinaí ẽ.

9 “Neenii bé eo é tãagãi ló Bàrì naaniií:

“‘Bẹẹ Tẹ̀ eo di káála, o bée á di káí. 10 Naa kọ o Boǹ Méné á dú. O bùlà á naaá boo kunukẽ̀í belí bé ea di káála naaá. 11 Nèi gyã́á eé dé nieí; 12 vaá ò ia ló bẹẹ pọ́lọ́ nèi, belí bé e beele ià ló nè gbò e ba beè sí pọ́lọ́ beele naaá. 13 Ó gá zìgà kọ é dọ bá ẹ̀bmà, sõò dùùlài lọl bá pọ́lọ́ nená.’

14 “Be ò iai ló pọ́lọ́ e gbò nen síi, bọọ Tẹ̀ ea di káála é ià nàgé ló nè boolo; 15 sõò be nóo iàì ló pọ́lọ́ e gbò nen síi, bọọ Tẹ̀ náa é ià nàgé ló nè boolo.

16 “Tṍó eo gé kái gã́, ó gá bigelei sĩ́ belii gbò bààsĩ́, boo béè kọ bà ólò bigèlè sĩ́ kọbé gbò nen nyímá kọ bà gé káẹ̀ gã́. M̀ lóò kà-kà bel nèi kọọ̀, bà náa é íe tọ́ọ̀ kà kpẽ́ lọl bá Bàrì. 17 Sõò tṍó eo gé ká gã́, lẹlá nóo togó vaá ò lógá sĩ́, 18 kọbé gbò nen náa nyímá kọ ò gé ká gã́. Áá o Tẹ̀ ea di ke gũ̀a ní ea é nyímáé, tṍóá o Tẹ̀ ea ólò mòn nú ea di ke gũ̀a é gbóó nè ni kpẽ́.

19 “Kubvii gè gboi gyọ́ sẹlẹ́í boo kunukẽ̀í, kĩée e kàkám* nè kálòga é láá tagi kyọ̀ vaá gbò zib baa bã ló vaá zìb. 20 Tãa vó, gboi gyọ́ sẹlẹí káála kĩée e kàkám* àbèè kálòga náa é láá tagi kyọ̀, vaá gbò zib náa é láá baa bã ló vaá zìb. 21 Boo béè kọọ̀ kĩée eo gyọ́ dì ní eo nyíe é di nàgé é.

22 “Súú dẽe ní ea dú té sã́ ea di ló nen ẽ́. Beè súú dẽé ni nyágĩ́,* dénè kẽ é ẹ́ẹ ní ló. 23 Sõò beè súú dẽé ni kọọgà,* dénè kẽ é kuú ni gín ló. Beè ẹ́ẹ́ dee ea dì ní m kuu gín, ẹ̀b bé ea é palàge kuu gín naaà!

24 “Tọ́ọ̀ nen náa é láá dú gyóòlo bàà kà tẹ̀ tọ; boo béè kọọ̀ à é vulè enè ọ̀và vaá à ọ́bví na nená, àbèè kọọ̀ à é dává gbẹá ló enè ọ̀và vaá à ẹb na nená tẹlẹ kẽ. Nóo é láá dui gyóòlo Bàrì nè Gyọ́ tẽ̀ènè tṍó.

25 “Boo béè vó, nda kọ́ọ̀ nèi kọọ̀: Kubvii gè iei tã̀àgã̀ bùlà kilmaí ló nú eo é déi nè nú eo é ṍi, àbèè kọ̀là ló eo é nveai. É kọọ̀ dùm náa bọọ èl gyã́á vaá bọọ kpáló à bọọ èl kọ̀là ló gè nvèà? 26 Palàge ẹbvii gbò ńnóm e bà gé pẹ́ẹ́ sĩ́dee; bà náa ólò fó nu àbèè ge bùùlà nu àbèè ge kọlí nu sẹlẹ́ dá, sõò bọọ Tẹ̀ ea di káála ólò nè va gyã́á. É kọọ̀ boolo nóo bọọlìì elíí va? 27 Mée ea dìí zẹ̀ẹ̀ ní ea é láá tú enè dee* tẹlẹ boo a dùm tení dú ló gè ié tã̀àgã̀ bùlà ẹ? 28 Nagé, éé ní ea náa ò iei tã̀àgã̀ bùlà ea kil ló nu gè nvèà ẽ? Noi nu lọlíí ló bé e gbò víl ea di boo bàlà ól gé bọọ naa. Bà náa ólò sí tọ́ọ̀ kà tóm àbèè ge lò kàn simá; 29 Sõò m̀ kọ́ọ̀ nèi kọọ̀, bã̀àna Sólomòn ea beè palàge ié gyọ́ náa beè láá nvèà nú ea kpé dẽe belí gbò vílí. 30 Beè Bàrì láá nvèè kọ̀là ló gbò víl ea di boo bàlà ól ea é láá dum nieí vaá bà kpá sã́ ló lọ̀ọ̀leá boo, é kọ náa é nveè kọ̀là ló boolo èlmà vó, e boólo eo íèì ńkem̀ zìgà? 31 Vó à naa, ó gá iei tã̀àgã̀ bùlà vaá ò kọ́i kọọ̀, ‘Éé ní eé dé é?’ àbèè, ‘Éé ní eé ṍ ẽ́?’ àbèè, ‘Éé ní eé nveà ẽ?’ 32 Boo béè kọọ̀ dénè gbò nuí ní e gbò e bà náa nyímá ló Bàrì gé ká nyíe gbẹẹ́ boo gè ié é. Bọọ Tẹ̀ ea di káála nyímá kọọ̀ ò íèì bíi ló dénè gbò nuí.

33 “Vó à naa, kilíí sĩ́ gè gbĩi Boǹ Méné Bàrì nè ge naa nú ea lelà kèsĩ́ Bàrì naamá túá kà nu, mè Bàrì é néi dénè gbò nuí. 34 Boo béè vó, ó gá iei tã̀àgã̀ bùlà ea kil ló sṍóe, boo béè kọọ̀ sṍóe íe ńlẹ́ẹ̀ tã̀àgã̀. Buù dee íe tã̀àgã̀ ea gbõonàe ló.